1. Nɛ̌ wǔ e Jehovah jɔ mǐ bɔ mǐ ná nɔ xo ɖɛ sɛ́dó è é ka nɔ cí nú mǐ?

 MƐ E bló jǐnukúnsin kpó ayǐkúngban kpó é ná nǔ xɔ akwɛ́ ɖé mǐ; é yí gbe bɔ mǐ nɔ xo ɖɛ sɛ́dó è. Lin tamɛ dó nǔ élɔ́ jí: Mǐ sixú ɖɔ nǔ e ɖo ayi mǐtɔn mɛ lɛ́ é bǐ nú Jehovah hweɖébǔnu, dó gbe ɖěbǔ mɛ; é ka tlɛ byɔ́ ɖɔ mǐ ní ɖɔ n’i jɛ nukɔn lɔ ǎ. Ényí mǐ ná bo tlɛ ɖo azɔnzan jí ɖo dotóoxwé oo, alǒ mǐ ɖo gankpá mɛ oo, mǐ sixú xo ɖɛ sɛ́dó Tɔ́ mǐtɔn wǎnyíyínɔ ɔ, bo ɖeji ɖɔ é ná ɖótó mǐ. Nǔníná énɛ́ su nukún mǐtɔn mɛ tawun.

2. Nɛ̌ axɔ́sú Davídi ka xlɛ́ ɖɔ wǔjɔmɛ e émí ɖó bo ná nɔ xo ɖɛ é su nukún émítɔn mɛ gbɔn?

² Wǔ e è jɔ axɔ́sú Davídi bɔ é ná nɔ xo ɖɛ é su nukún tɔn mɛ tawun. É ji han élɔ́ sɛ́dó Jehovah: “Ðɛ e xo wɛ un ɖe ɔ ní wá gɔ̌n towe zǎlínkpɔ́n sín azɔ ɖɔhun.” (Ðɛh. 141:1, 2) Ðo Davídi sín hwenu ɔ, è nɔ sɔ́ nǔ nú zǎlínkpɔ́n mímɛ́ e vɔ̌sánúxwlémawutɔ́ lɛ́ nɔ zán bo ná dó sɛn Mawu lěe é ba gbɔn é é ganjí. (Tín. 30:34, 35) Davídi nɔ ba ná lin tamɛ ganjí dó nǔ e é ná byɔ́ Jehovah ɖo ɖɛ tɔn mɛ lɛ́ é jí, lěe è nɔ sɔ́ nǔ nú zǎlínkpɔ́n ɔ gbɔn é ɖɔhun. Nǔ e mǐ lɔ nɔ jló tawun bá wa é nɛ́. Mǐ nɔ jló ɖɔ ɖɛ mǐtɔn lɛ́ ní nɔ nyɔ́ Jehovah nukúnmɛ.

3. Ényí mǐ ɖo ɖɛ xo sɛ́dó Jehovah wɛ ɔ, nɛ̌ mǐ ka ɖó ná nɔ wa nǔ gbɔn? Aniwú?

³ Mǐ ɖó ná nɔ xo ɖɛ sɛ́dó Jehovah kpó sísí ɖaxó kpó hwebǐnu. Lin tamɛ dó nǔmimɔ jí wǔ e Ezayíi, Ezekiyɛ́li, Daniyɛ́li kpó Jaan kpó mɔ lɛ́ é jí. Nǔmimɔ énɛ́ lɛ́ gbɔn vo nú yěɖée có, yě ka ɖó nǔɖé ɖo bǔ. Yě mɛ bǐ wɛ ɖɔ ɖɔ Jehovah nyí Axɔ́sú susunɔ ɖé. Ezayíi “mɔ Aklúnɔ ɖo ayǐjínjɔ́n axɔ́súzinkpo tɔn jí; axɔ́súzinkpo ɔ yi jǐ káká.” (Eza. 6:1-3) Ezekiyɛ́li mɔ Jehovah ɖo ayǐjínjɔ́n ɖo ahwankɛkɛ́ tɔn jǐxwé tɔn ɔ jí, bɔ wěziza ɖé lɛ́ lɛ̌ dó è; é “za wě . . . lěe  jǐ nɔ ja bɔ nyǐ nɔ ɖi ɔ ɖɔhun.” (Ezek. 1:26-28) Daniyɛ́li mɔ “degénɔ kpikpoe ɖokpó,” bɔ awu e é dó lɛ́ é wé lawé ɖɔhun, lobɔ axɔ́súzinkpo Tɔn nɔ kán zo. (Dan. 7:9, 10) Gɔ́ ná ɔ, Jaan mɔ Jehovah ɖo ayǐjínjɔ́n ɖo axɔ́súzinkpo e nyǐ ɖi lɛ́ lɛ̌ dó, bɔ é nɔ kɔ́n awǐnnya e è nɔ ylɔ́ ɖɔ emɛlódu é ɖɔhun é jí. (Nǔɖe. 4:2-4) Ée mǐ nɔ ɖo tamɛ lin dó susu Jehovah tɔn e è ma sixú jlɛ́ ǎ é wú wɛ é ɔ, é nɔ flín mǐ ɖɔ ɖɛ e mǐ nɔ xo sɛ́dó Jehovah é ɔ, wǔjɔmɛ ɖaxó ɖé wɛ é nyí, bo nɔ lɛ́ flín mǐ ɖɔ é ɖo tají tawun ɖɔ mǐ ní nɔ wa mɔ̌ kpó sísí kpó. Amɔ̌, nɛ̌ mǐ ka ɖó ná nɔ xo ɖɛ gbɔn?

4. Étɛ́ xógbe nukɔn nukɔntɔn ɖěɖěe Jezu zán ɖo ɖɛ kpɔ́ndéwú tɔn e ɖo Matíe 6:9, 10 mɛ lɛ́ é ka kplɔ́n mǐ?

⁴ Xa Matíe 6:9, 10. Ðo Mawuxóɖiɖɔ só jí tɔn Jezu tɔn hwenu ɔ, é kplɔ́n ahwanvú tɔn lɛ́ lěe yě ná nɔ xo ɖɛ gbɔn bɔ é ná nyɔ́ Mawu nukúnmɛ é. Ée Jezu ɖɔ “lěe mi ɖó ná nɔ xo ɖɛ gbɔn ɔ ɖíe” gúdo é ɔ, nǔ tawun tawun élɔ́ lɛ́ e cá kan xá linlin Jehovah tɔn lɛ́ tlɔlɔ é wɛ é byɔ́ jɛ nukɔn: nyǐkɔ Mawu tɔn ní nyí nǔ mǐmɛ́, Axɔ́súɖuto Mawu tɔn e ná sú kún dó nú mɛ e nɔ klán gbe xá ɛ lɛ́ é bǐ é ní wá kpó nǔ ɖaaɖagbe ɖěɖěe É ɖo linlin wɛ bo ná wa ɖo ayǐkúngban ɔ jí, bo ná lɛ́ wa nú gbɛtɔ́ lɛ́ ɖo sɔgúdo é kpó. Ényí mǐ lɔmɔ̌ nɔ byɔ́ nǔ mɔ̌hun lɛ́ ɖo ɖɛ mǐtɔn lɛ́ mɛ ɔ, mǐ nɔ ɖe xlɛ́ ɖɔ jlǒ Mawu tɔn wɛ ɖo tají nú mǐ.

5. Ényí mǐ xo ɖɛ sɛ́dó Jehovah, bo byɔ́ ɛ nǔ e hudó mǐɖésúnɔ lɛ́ é ɔ, é ka nɔ ɖótó mǐ a?

⁵ Ðo akpáxwé ɖɛ ɔ tɔn e bɔ d’é wú é mɛ ɔ, Jezu xlɛ́ ɖɔ mǐ sixú byɔ́ nǔ e hudó mǐɖésúnɔ lɛ́ é ɖo ɖɛ mǐtɔn lɛ́ mɛ. Mǐ sixú byɔ́ Jehovah ɖɔ é ní ná nǔɖuɖu égbé tɔn mǐ, sɔ́ hwɛ mǐtɔn lɛ́ kɛ mǐ, ní ma lɔn nú mǐ jɛ tɛ́nkpɔ́n mɛ ó, lobo hwlɛ́n mǐ ɖo awǒvi sí. (Mat. 6:11-13) Ényí mǐ nɔ byɔ́ nǔ énɛ́ lɛ́ Jehovah ɖo ɖɛ mǐtɔn lɛ́ mɛ hǔn, xlɛ́xlɛ́ wɛ mǐ ɖe ɖɔ mǐ tuun ɖɔ mǐ ɖó alɔdó Jehovah tɔn sín hudó, bo lɛ́ ba ɖɔ nǔ mǐtɔn ní nyɔ́ nukún tɔn mɛ.

6. Nǔ e ɖo ɖɛ kpɔ́ndéwú tɔn ɔ mɛ lɛ́ é kɛ́ɖɛ́ jɛ́n mǐ ka sixú nɔ byɔ́ ɖo ɖɛ mǐtɔn lɛ́ mɛ a? Tínmɛ.

⁶ Jezu ba ɖɔ ahwanvú émítɔn lɛ́ ní vɔ́ nǔ e ɖo ɖɛ kpɔ́ndéwú tɔn ɔ mɛ lɛ́ é ɖɔ pɛ́pɛ́pɛ́ ǎ. Ðo ɖɛ ɖěvo e Jezu xo lɛ́ é mɛ ɔ,  é byɔ́ nǔ ɖěvo e sín hudó é ɖó ɖo gan énɛ́ mɛ lɛ́ é. (Mat. 26:39, 42; Jaan 17:1-26) Mɔ̌ ɖokpó ɔ, mǐ sixú xo ɖɛ dó nǔ ɖěbǔ e ɖo ado hu nú mǐ wɛ é sín takúnmɛ. Ényí mǐ jló ná wá gbeta ɖé kɔn ɔ, mǐ sixú xo ɖɛ dó byɔ́ nǔnywɛ́ kpó nukúnnúmɔjɛnǔmɛ kpó. (Ðɛh. 119:33, 34) Ényí mǐ jló ná jɛ azɔ̌ syɛ́nsyɛ́n ɖé jí ɔ, mǐ sixú xo ɖɛ dó byɔ́ nukúnnúmɔjɛnǔmɛ kpó nǔtuuntuun kpó. (Nǔx. 2:6) Mɛjitɔ́ lɛ́ sixú xo ɖɛ dó vǐ yětɔn lɛ́ tamɛ, bɔ vǐ lɛ́ sixú xo ɖɛ dó mɛjitɔ́ yětɔn lɛ́ tamɛ, lobɔ mǐ mɛ bǐ sixú nɔ xo ɖɛ dó mɛ ɖěɖěe mǐ nɔ kplɔ́n Biblu xá lɛ́ é kpó mɛ e mǐ nɔ ɖɔ mawuxó ná lɛ́ é kpó sín tamɛ; mɔ̌ wɛ mǐ ka ɖó ná wa lɔ. É ɖo wɛn ɖɔ é kún nyí nǔ kɛ́ɖɛ́ wɛ mǐ ná nɔ byɔ́ ɖo ɖɛ mǐtɔn lɛ́ mɛ ó.

7. Étɛ́wú mǐ ka ɖó ná nɔ kpa susu nú Jehovah ɖo ɖɛ mɛ?

⁷ Mǐ ɖó ná flín bo ná nɔ kpa susu nú Jehovah ɖo ɖɛ mǐtɔn lɛ́ mɛ. Mawu kɛ́ɖɛ́ wɛ é jɛxá ɖɔ è ní nɔ kpa súsú ná hú mɛ ɖěvo ɖěbǔ. É “nyɔ́” bo “ɖo gbesisɔmɛ bo ná sɔ́ hwɛ kɛ mɛ.” É lɛ́ nyí ‘xomɛfátɔ́, nǔbláwǔkúnúmɛtɔ́, nɔ yá wǔ sin xomɛ ǎ, xomɛnyɔ́tɔ́, gbejínɔtɔ́.’ (Ðɛh. 86:5, 15) É ɖo wɛn ɖɔ, mǐ ɖó hwɛjijɔ ɖagbe e wú mǐ ná nɔ kpa susu nú Jehovah ɖó mɛ alɔkpa e é nyí é kpó nǔ e é nɔ wa lɛ́ é kpó wú é.

8. Ðɔ nǔ e takúnmɛ mǐ sixú nɔ dó kú nú Jehovah dó é ɖé lɛ́. (Ðɛhan 104:12-15, 24)

⁸ Gɔ́ nú susu kpikpa nú Jehovah ɔ, mǐ ɖó ná nɔ dó kú n’i ɖó nǔjíwǔ tootóbú e é bló lɛ́ é wú ɖo ɖɛ mǐtɔn lɛ́ mɛ. Ði kpɔ́ndéwú ɔ, mǐ sixú nɔ dó kú n’i ɖó nǔ élɔ́ lɛ́ wú: sinmɛ ɖaaɖagbe e folówa e mǐ nɔ mɔ lɛ́ é ɖó é, nǔɖuɖu víví maxamaxa lɛ́, gɔ́ nú awǎjijɛ e mǐ nɔ mɔ ɖó xɔ́ntɔn vívɛ́ e mǐ zun lɛ́ é wú é. Tɔ́ wǎnyíyínɔ ɔ ná mǐ nǔ énɛ́ lɛ́ kpó gěgé ɖěvo lɛ́ kpó, bónú mǐ ní ɖó awǎjijɛ. (Xa Ðɛhan 104:12-15, 24.) Tají hú bǐ ɔ, mǐ nɔ dó kú nú Jehovah nú nǔɖuɖu gbigbɔ tɔn tootóbú e é nɔ ná mǐ lɛ́ é kpó nukúnɖíɖó jí wǔ sɔgúdo tɔn e mǐ ɖó é kpó.

9. Étɛ́ ka sixú d’alɔ mǐ bɔ mǐ ná nɔ dó kú nú Jehovah? (1 Tɛsaloníkinu lɛ́ 5:17, 18)

⁹ É sixú bɔ wǔ tawun bɔ mǐ ná nɔ wɔn bo gɔn kú dó nú Jehovah ɖó nǔ tootóbú e é nɔ bló nú mǐ lɛ́ é wú. Étɛ́ ka sixú d’alɔ  mǐ bɔ mǐ ná nɔ flín? Mǐ sixú nɔ wlán nǔ tawun tawun e mǐ byɔ́ ɖo ɖɛ mɛ lɛ́ é ɖ’ayǐ, bɔ sín hweɖénu jɛ hweɖénu ɔ, mǐ ná nɔ yi kpɔ́n, bo ná dó tuun lěe Jehovah ná xósin nú yě gbɔn é. Énɛ́ gúdo hǔn, xo ɖɛ bo dó kú nú Jehovah ɖó alɔ e é dó we é wú. (Xa 1 Tɛsaloníkinu lɛ́ 5:17, 18.) Lin tamɛ dó nǔ élɔ́ jí: Ényí mɛ ɖěvo lɛ́ ɖe nǔsumɛnukúnmɛ xlɛ́ mǐ ɔ, é nɔ víví nú mǐ bɔ mǐ nɔ lɛ́ mɔ ɖɔ è yí wǎn nú mǐ. Mɔ̌ ɖokpó ɔ, ényí mǐ nɔ flín bo nɔ dó kú nú Jehovah nú xósin e é nɔ ná nú ɖɛ mǐtɔn lɛ́ é ɔ, é nɔ hun xomɛ n’i tawun. (Koló. 3:15) Amɔ̌, mǐ lɛ́ ɖó hwɛjijɔ tají hú gǎn ɖěvo e wú mǐ ná dó kú nú Mawu é.

10. Sɔgbe xá 1 Piyɛ́ɛ 2:21 ɔ, aniwú mǐ ka ɖó ná nɔ dó kú nú Jehovah ɖó sɛ́ e é sɛ́ Vǐ tɔn dó ayǐkúngban jí é wú?

¹⁰ Xa 1 Piyɛ́ɛ 2:21. Mǐ ɖó ná nɔ dó kú nú Jehovah ɖó Vǐ vívɛ́ná tɔn e é sɛ́ dó bɔ é wá kplɔ́n nǔ mǐ é wú. Nǔ kplɔ́nkplɔ́n dó gbɛzán Jezu tɔn wú nɔ zɔ́n bɔ mǐ nɔ kplɔ́n nǔ gěgé dó Jehovah kpó lěe nǔ mǐtɔn ná nyɔ́ nukún tɔn mɛ gbɔn é kpó wú. Ényí mǐ ɖi nǔ nú vɔ̌sísá Klísu tɔn ɔ, mǐ sixú zun xɔ́ntɔn vívɛ́ xá Jehovah Mawu, lobo lɛ́ nɔ fífá mɛ xá ɛ.—Hlɔ̌. 5:1.

11. Étɛ́wú mǐ ka nɔ xo ɖɛ sɛ́dó Jehovah gbɔn Jezu jí?

¹¹ Mǐ nɔ dó kú nú Jehovah ɖó mǐ sixú xo ɖɛ sɛ́dó è gbɔn Vǐ tɔn jí. Jehovah nɔ gbɔn Jezu jí bo nɔ ná nǔ e mǐ byɔ́ ɛ lɛ́ é mǐ. Jehovah nɔ ɖótó ɖɛ e è xo sɛ́dó è ɖo Jezu nyíkɔ mɛ lɛ́ é, bo nɔ lɛ́ ná sin nú ɖɛ énɛ́ lɛ́. Jezu tínmɛ ɖɔ: “Nǔ e mi ná byɔ́ gbɔn nyǐkɔ ce mɛ ɔ, un ná ná bǐ mi, bónú Tɔ́ ɔ ná sixú xɔ susu gbɔn Vǐ ɔ jí.”—Jaan 14:13, 14.

12. Hwɛjijɔ ɖěvo tɛ́ mǐ ka ɖó bo ná nɔ dó kú nú Jehovah ɖó Vǐ tɔn e é ná mǐ é wú?

¹² Jehovah nɔ sɔ́ hwɛ mǐtɔn lɛ́ kɛ mǐ gbɔn vɔ̌sísá gbɛxɔnúmɛ tɔn Jezu tɔn gblamɛ. Biblu ɖɔ dó Jezu wú ɖɔ é wɛ nyí ‘vɔ̌sánúxwlémawutɔ́ ɖaxó mǐtɔn bo jínjɔ́n ɖisíxwé nú axɔ́súzinkpo Mawu susu bǐ nɔ ɔ tɔn ɖo jǐxwé.’ (Ebl. 8:1) Jezu wɛ nyí “ɖɛ̌mɛnu [mǐtɔn] ɖo Tɔ́ ɔ gɔ́n.” (1 Jaan 2:1) Mǐ nɔ dó kú nú Mawu tawun ɖɔ é ná mǐ vɔ̌sánúxwlémawutɔ́ ɖaxó e nɔ mɔ nǔ jɛ gǎnmaɖó mǐtɔn lɛ́ wú, bo nɔ lɛ́ “sa vo” nú Mawu dó ta mǐtɔn mɛ é. (Hlɔ̌. 8:34; Ebl. 4:15) Ðó mǐ nyí hwɛhutɔ́ wútu ɔ, mǐ sixú kpé wú bo sɛkpɔ́ Jehovah ɖo ɖɛ mɛ vɔ̌sísá Jezu tɔn mɛvo ǎ. É ɖo wɛn ɖɔ mǐ ná yí gbe ɖɔ nǔníná xɔ akwɛ́ e Jehovah ná mǐ é, énɛ́ wɛ nyí Vǐ vívɛ́ná tɔn e é ná mǐ é ɔ, mǐ kún sixú dó kú tɔn n’i vɔ gbeɖé kpɔ́n ó!

13. Ðo zǎn e jɛ nukɔn nú kú Jezu tɔn é mɛ ɔ, nɛ̌ é ka xlɛ́ ɖɔ émí yí wǎn nú ahwanvú émítɔn lɛ́ gbɔn?

¹³ Ðo zǎn e jɛ nukɔn nú kú Jezu tɔn é mɛ ɔ, é xo ɖɛ azɔn mɔ̌kpán dó ahwanvú tɔn lɛ́ tamɛ, bo byɔ́ Tɔ́ tɔn ɖɔ é ní “hwlɛ́n yě ɖo awǒvi sí.” (Jaan 17:15) Énɛ́ ɖe lě do Jezu yí wǎn nú yě sɔ é xlɛ́! É tuun ɖɔ malínmálín mɛ ɔ, émí ná ji ya tawun có, mɛsɛ́dó tɔn lɛ́ sín nǔ ka kpo ɖo ayi mɛ ɖu n’i wɛ.

14. Nɛ̌ mǐ ka sixú nɔ xlɛ́ nɔví mǐtɔn lɛ́ ɖɔ mǐ yí wǎn nú yě gbɔn?

¹⁴ Jezu ɖɔhun ɔ, mǐ ná nɔ sɔ́ ayi mǐtɔn ɖó nǔ e hudó mǐ lɛ́ é kɛ́ɖɛ́ jí ǎ. É nyɔ́ wa ɔ, mǐ ná nɔ xo ɖɛ dó nɔví mǐtɔn lɛ́ takúnmɛ hwɛhwɛ. Ényí mǐ nɔ wa mɔ̌ hǔn, tónú se nú gbeɖiɖe Jezu tɔn e ɖɔ ɖɔ mǐ ní yí wǎn nú mǐɖée é wɛ mǐ ɖe nɛ́; mɔ̌ e mǐ nɔ  wa é nɔ lɛ́ xlɛ́ Jehovah ɖɔ mǐ yí wǎn nú nǔɖitɔ́ hǎtɔ́ mǐtɔn lɛ́ tawun. (Jaan 13:34) Ðɛxixo dó nɔví mǐtɔn lɛ́ takúnmɛ nyí hwenu hinhɛn gú ǎ. Xó Mawu tɔn ɖɔ nú mǐ ɖɔ: “Ðɛ e hwɛjijɔnɔ nɔ xo ɔ nɔ ɖó hlɔ̌nhlɔ́n ɖésú.”—Ja. 5:16.

15. Étɛ́wú nǔɖitɔ́ hǎtɔ́ mǐtɔn lɛ́ ka ɖó hudó ɖɛ mǐtɔn lɛ́ tɔn?

¹⁵ Nǔɖitɔ́ hǎtɔ́ mǐtɔn lɛ́ ɖó ɖɛ mǐtɔn lɛ́ sín hudó, ɖó yě ɖo xwi ɖí xá tagba gěgé wɛ. Mǐ sixú byɔ́ Jehovah ɖɔ é ní d’alɔ yě bónú yě ná dɛ ɖo azɔn, adla j’ayǐ, tohwan, yadónúmɛ alǒ wǔvɛ́ ɖěvo lɛ́ nu. Mǐ sixú lɛ́ xo ɖɛ dó nɔví mǐtɔn e nɔ w’azɔ̌ syɛ́nsyɛ́n bo ná dó hɛn sɔ mɛ e ɖo hudó mɛ lɛ́ é takúnmɛ. Hwiɖésúnɔ sixú tuun mɛ ɖěɖěe ɖo xwi ɖí xá wǔvɛ́ mɔ̌hun wɛ é ɖé lɛ́. Nɔ ylɔ́ nyǐkɔ yětɔn lɛ́ ɖo ɖɛ towe lɛ́ mɛ. Ényí mǐ nɔ byɔ́ Jehovah ɖɔ é ní d’alɔ yě bónú yě ní dɛ hǔn, wǎnyíyí jɔ wǎnyíyí nɔví nɔví tɔn ɔ ɖe xlɛ́ wɛ mǐ ɖe nɛ́.

16. Étɛ́wú mǐ ka ɖó ná nɔ xo ɖɛ dó mɛ ɖěɖěe nɔ nɔ nukɔn nú nǔ lɛ́ ɖo agun ɔ mɛ lɛ́ é takúnmɛ?

¹⁶ Ényí mǐ nɔ xo ɖɛ dó nɔví ɖěɖěe nɔ w’azɔ̌ syɛ́nsyɛ́n ɖo agun ɔ mɛ lɛ́ é takúnmɛ ɔ, é nɔ víví nú yě bɔ yě nɔ lɛ́ ɖu le tɔn. Mɛsɛ́dó Pɔ́lu tuun ɖɔ émí ɖó ɖɛ mɛ ɖěvo lɛ́ tɔn sín hudó. É wlán ɖɔ: “Mi nɔ xo ɖɛ nú nyɛ lɔmɔ̌, bónú un ja xó ɖɔ gbé hǔn, Mawu ní ná mì xó e sɔgbe é, bónú má ɖɔ xó kpódó jiɖiɖe kpó, bó ná dó tín nǔbúdo Wɛn ɖagbe ɔ tɔn mɛ.” (Efɛ́. 6:19) Égbé ɖésú ɔ, mǐ ɖó nɔví súnnu azɔ̌syɛ́nsyɛ́nwatɔ́ e nɔ kpé nukún dó nǔ lɛ́ wú é gěgé. Ényí mǐ nɔ byɔ́ Jehovah ɖɔ é ní kɔn nyɔ̌ná dó azɔ̌ yětɔn lɛ́ jí hǔn, wǎnyíyí ɖe xlɛ́ yě wɛ mǐ ɖe nɛ́.

17-18. Ninɔmɛ tɛ́ lɛ́ mɛ è ka sixú byɔ́ mǐ ɖɔ mǐ ní nɔ nukɔn nú mɛ ɖěvo lɛ́ ɖo ɖɛ mɛ ɖe? Étɛ́ mǐ ka ɖó ná hɛn dó ayi mɛ?

¹⁷ Hweɖélɛ́nu ɔ, è nɔ byɔ́ mǐ ɖɔ mǐ ní nɔ nukɔn nú mɛ ɖěvo lɛ́ ɖo ɖɛ mɛ. Ði kpɔ́ndéwú ɔ, nɔví nyɔ̌nu e nɔ kpé nukún dó Biblu kplɔ́nkplɔ́n ɖé wú é sixú byɔ́ nɔví nyɔ̌nu e kplá ɛ yi Biblu kplɔ́nkplɔ́n ɔ domɛ é ɖɔ é ní xo ɖɛ. Nɔví nyɔ̌nu e kplá mɛ yi Biblu kplɔ́nkplɔ́n ɔ domɛ é sixú gɔn Biblu kplɔ́ntɔ́ ɔ tuun ganjí, énɛ́ wú ɔ, é sixú jló ná xo ɖɛ ɖo vivɔnu nǔkplɔ́nkplɔ́n ɔ tɔn. Mɔ̌ mɛ ɔ, é sixú bɔ  wǔ n’i hú gǎn bɔ é ná tuun nǔ e é ná byɔ́ dó nǔkplɔ́ntɔ́ ɔ takúnmɛ lɛ́ é.

¹⁸ È sixú byɔ́ nɔví súnnu ɖé ɖɔ é ní xo ɖɛ ɖo kplé kúnnuɖegbé tɔn alǒ kplé agun tɔn ɖé hwenu. Nɔví súnnu ɖěɖěe ɖó wǔjɔmɛ énɛ́ lɛ́ é ɖó ná hɛn linlin e wú è ɖo kplé ɔ ná bló wɛ é ayi mɛ. È ɖó ná gbɔn ɖɛ e è nɔ xo lɛ́ é sín yɛkan mɛ dó kplɔ́n nǔ agun ɔ, alǒ xwlé ɖɔnúese lɛ́ mɛ ǎ. Cɛ́jú e è nɔ ná nú han kpó ɖɛ kpó nú ɖibla nyí kplé agun tɔn lɛ́ bǐ é ɔ, atɔ́ɔ́n wɛ; énɛ́ wú ɔ, nɔví súnnu e ɖo ɖɛ xo wɛ é ɖó ná “ɖɔ xó gěgé” ǎ, tají ɔ ɖo ɖɛ bǐbɛ́mɛ tɔn lɛ́ hwenu.—Mat. 6:7.

19. Étɛ́ ka ná d’alɔ mǐ bɔ mǐ ná ɖo gbesisɔmɛ nú azǎn e gbe Jehovah ná ɖɔ hwɛ é?

¹⁹ Ðɛ ɖó ná nyí nǔ tají ɖo gbɛzán mǐtɔn mɛ, ɖó hwɛɖɔzán Jehovah tɔn ko sɛkpɔ́ hú gǎn. Énɛ́ wú wɛ Jezu ɖɔ: “Mi bo nɔ wunzɛn hwebǐnu, bo nɔ ɖo ɖɛ xo wɛ hwebǐnu, bo ná mɔ hlɔ̌nhlɔ́n dó gló nǔ énɛ́ lɛ́ e ná jɛ lɛ́ bǐ, lobo ná sigǎn nɔ te ɖo Gbɛtɔ́ví ɔ nukɔn.” (Luk. 21:36) Ényí mǐ nɔ xo ɖɛ hwɛhwɛ ɔ, nǔɖiɖi mǐtɔn ná lí dǒ bɔ mǐ ná lɛ́ ɖo gbesisɔmɛ nú azǎn e gbe Jehovah ná ɖɔ hwɛ é.

20. Nɛ̌ ɖɛ mǐtɔn lɛ́ ka sixú cí zǎlínkpɔ́n wǎnɖagbenɔ ɖɔhun gbɔn?

²⁰ Étɛ́ lɛ́ jí mǐ ka ɖɔ xó dó? Wǔ e è jɔ mǐ bɔ mǐ nɔ xo ɖɛ é nɔ su nukún mǐtɔn mɛ tawun. Nǔ tají e takúnmɛ mǐ ná nɔ xo ɖɛ dó lɛ́ é wɛ nyí nǔ e kúnkplá linlin Jehovah tɔn tlɔlɔ lɛ́ é. Mǐ nɔ lɛ́ dó kú nú Mawu ɖó Vǐ tɔn kpó Axɔ́súɖuto tɔn e ɖo acɛ kpa wɛ é kpó wú, bɔ mǐ nɔ lɛ́ xo ɖɛ dó nǔɖitɔ́ hǎtɔ́ mǐtɔn lɛ́ tamɛ. Gɔ́ ná ɔ, Jehovah nɔ lɛ́ jló ɖɔ mǐ ní nɔ xo ɖɛ dó nǔ e nɔ hudó mǐ ayǐhɔ́ngbe ayǐhɔ́ngbe lɛ́ é tamɛ, bo nɔ lɛ́ byɔ́ alɔdó bá dó hɛn nǔɖiɖi mǐtɔn lí dǒ. Ényí mǐ nɔ lin tamɛ dó nǔ e mǐ nɔ ɖɔ ɖo ɖɛ mǐtɔn lɛ́ mɛ lɛ́ é jí ganjí ɔ, mǐ nɔ xlɛ́ ɖɔ wǔ e è jɔ mǐ bɔ mǐ nɔ xo ɖɛ é xɔ akwɛ́ nú mǐ. Xógbe mǐtɔn lɛ́ ná cí zǎlínkpɔ́n wǎnɖagbenɔ e è xwlé Jehovah é ɖɔhun; yě “nɔ hɛn xomɛ tɔn hun.”—Nǔx. 15:8.