1. Nɛ̌ nǔ ka nɔ cí nú Jehovah, hwenu e ɖokpo ɖò lɛngbɔ̌ tɔn e jɛ zɔ n’i lɛ é mɛ é lɛkɔ wá é?

LEE mǐ ɖɔ gbɔn ɖò xóta e wá yì é mɛ é ɔ, Jehovah jlɛ́ éɖée dó lɛngbɔ̌nyitɔ́ ɖagbe e nɔ kpé nukún dó lɛngbɔ̌ tɔn lɛ ɖokpo ɖokpo wu kpo wanyiyi kpo é ɖé wu. É nɔ ba mɛ ɖebǔ e jɛ zɔ n’i é. Jehovah ɖɔ nú Izlayɛli-ví e jó è dó lɛ é ɖɔ: ‘Mi lɛkɔ wá gɔ̌n ce, enɛ ɔ, un na lɛkɔ wá mi gɔ́n.’ Mǐ tuùn ɖɔ mɔ̌ wɛ nǔ nɔ lɛ́ cí n’i égbé, ɖó é ɖɔ: “Un nɔ huzu ǎ.” (Mal. 3:6, 7) Jezu ɖɔ ɖɔ enyi mɛsɛntɔ́ Jehovah tɔn e ko jɛ zɔ n’i é ɖokpo vɔ́vɔ́ lɛkɔ wá ɔ, é nɔ víví nú Jehovah kpo wɛnsagun lɛ kpo tawun.—Luk. 15:10, 32.

2. Etɛ lɛ jí mǐ ka na ɖɔ xó dó ɖò xóta elɔ mɛ?

² Mǐ ni ɖɔ xó dó lǒ Jezu tɔn e kúnkplá alɔdidó mɛ ɖěɖee jɛ zɔ nú Jehovah lɛ é atɔn jí. Mǐ na ɖɔ xó dó jijɔ tawun tawun e sín hudo mǐ ɖó bo na dó d’alɔ lɛngbɔ̌ ɖěɖee bú lɛ é bonu ye na lɛkɔ wá gɔ̌n tɔn é ɖé lɛ jí. Mǐ na lɛ́ mɔ nǔ e wu é jɛxa ɖɔ è ni dó gǎn bo nɔ gudo nú mɛ ɖěɖee ma ɖó gǎn ǎ lɛ é.

3-4. Etɛwu nawe e xó è ɖɔ ɖò Luki 15:8-10 mɛ é ka xwè sɔ bo ba gankwɛ tɔn e bú é sɔmɔ̌?

³ Mǐ ɖó na dó gǎn tawun bo ba mɛ e jló na lɛkɔ wá Jehovah gɔ́n lɛ é. Ðò lǒ e ɖò Wɛnɖagbe-Wema Luki tɔn mɛ é ɖé mɛ ɔ, Jezu tinmɛ lee nawe ɖé ba gankwɛ xɔ akwɛ e bú n’i é gbɔn é. Lǒ enɛ dɔn ayi mǐtɔn wá lě dò é ba gankwɛ ɔ sɔ é jí.—Xà Luki 15:8-10.

⁴ Jezu tinmɛ lee nǔ cí nú nawe ɔ hwenu e é mɔ gankwɛ xɔ akwɛ e é hɛn bú é é. Ðò Jezu hwenu ɔ, é cí ɖɔ vǐnɔ Jwifu ɖé lɛ nɔ na gankwɛ wǒ vǐ nyɔnu yetɔn ɖò alɔwliwlizán vǐ ɔ tɔn gbè ɖɔhun. Vlafo, ɖokpo ɖò gankwɛ mɔhun mɛ ba wɛ nawe ɔ ɖè. Nawe ɔ mɔ ɖɔ kɔ́mɛ wɛ akwɛ ɔ jɛ. Enɛ wu ɔ, é tá zogbɛ́n bo ba gbɔn fí bǐ, amɔ̌ é ka mɔ ǎ. Vlafo, zogbɛ́n ɔ ɖiɖɛ̌ sɔmɔ̌  bonu é na mɔ akwɛ kpɛví enɛ ǎ. Gudo mɛ ɔ, é xwè sɔ bo za xwé ɔ gbè bǐ. Ðò zunkɔ́ e é kplé é mɛ ɔ, é wá mɔ gankwɛ tɔn ɖ’emɛ, b’ɛ ɖò kínkɔ́n wɛ ɖò weziza zogbɛ́n ɔ tɔn nu. Agbɔ̌n tɔn jɛ dò tawun! É ylɔ́ xɔ́ntɔn tɔn lɛ kpo nɔzo tɔn lɛ kpo bo dó wɛnɖagbe ɔ ye.

5. Etɛwu é ka sixu vɛwǔ ɖɔ è ni tuùn fí e mɛ e jó agun ɔ dó lɛ é ɖè é?

⁵ Lee mǐ mɔ gbɔn ɖò lǒ Jezu tɔn mɛ é ɔ, é nɔ byɔ gǎndidó cobɔ è na mɔ nǔ e è hɛn bú é. Mɔ̌ ɖokpo ɔ, é sixu byɔ ɖɔ mǐ ni dó gǎn tawun cobo mɔ fí e mɛ e jó agun ɔ dó lɛ é ɖè é. Bɔya ye ɖó gbɛ̌didó xá mǐ te dìn é ɔ, xwè ko jɛ. Ye tlɛ sixu ko sɛ̀ tɛn yì fí ɖé bɔ nɔví e ɖò xá enɛ mɛ lɛ é tuùn ye ǎ. Amɔ̌, ɖò alɔnu dìn ɔ, é ɖò wɛn ɖɔ mɛ e awakanmɛ gbɔjɔ na lɛ é ɖé lɛ jló tawun na lɛkɔ wá Jehovah gɔ́n. Ye jló na sɛn Jehovah ɖó kpɔ́ xá nɔví sunnu kpo nɔví nyɔnu lɛ kpo, amɔ̌, ye ɖó hudo alɔdó mǐtɔn tɔn.

6. Nɛ̌ mɛ e ɖò agun ɔ mɛ lɛ é bǐ ka sixu ɖ’alɔ ɖò mɛ e awakanmɛ gbɔjɔ na lɛ é biba mɛ gbɔn?

⁶ Mɛ̌ mɛ̌ e ka sixu ɖ’alɔ ɖò mɛ e awakanmɛ gbɔjɔ na lɛ é biba mɛ? Mǐ mɛ bǐ wɛ; mɛxo agun tɔn lɛ, gbexosin-alijitɔ́ lɛ, mɛ e ɖò xwédo yetɔn mɛ lɛ é, kpo wɛnjlatɔ́ lɛ kpo sixu d’alɔ bɔ è tuùn fí e ye ɖè é. Xɔ́ntɔn towe ɖé alǒ hɛ̌nnumɔ towe ɖé sín awakanmɛ gbɔjɔ vlafo wɛ à? A xò gò mɛ e awakanmɛ gbɔjɔ na é ɖé ɖò sinsɛnzɔ́ xwé ɖé gbè jɛ xwé ɖé gbè tɔn hwenu alǒ hwenu e a ɖò alɔ ɖó ɖò kúnnuɖiɖe agbawungba tɔn mɛ é wɛ à? Tinmɛ nú mɛ ɔ ɖɔ enyi é jló ɖɔ mɛxo agun tɔn lɛ ni wá ba ɛ kpɔ́n ɔ, kpodo awǎjijɛ kpo wɛ emi na yí adlɛsi tɔn bo zé jó nú ye.

7. Etɛ nǔ e mɛxo agun tɔn e nɔ nyí Thomas é ɖɔ é ka sixu kplɔ́n we?

⁷ Mɛxo agun tɔn lɛ wɛ ɖó azɔ̌ taji ɔ bo na ba mɛ e ba na lɛkɔ wá Jehovah gɔ́n lɛ é. Nɛ̌ ye ka sixu wà mɔ̌ gbɔn? Ðǒ ayi nǔ e mɛxo agun tɔn e nɔ nyí Thomas *, bo nɔ nɔ Espagne é ɖɔ é wu. É ko d’alɔ Kúnnuɖetɔ́ 40 jɛji bɔ ye lɛkɔ wá agun ɔ mɛ. É ɖɔ: “Jɛ nukɔn hwɛ̌ ɔ, un nɔ kanbyɔ nɔví vovo ɖɔ mɛɖé ka tuùn fí e mɛ enɛ lɛ nɔ nɔ dìn é à jí. Alǒ, un nɔ kanbyɔ wɛnjlatɔ́ lɛ ɖɔ ye ka ɖ’ayi mɛ e gɔn kplé b’ɛ ko lín é ɖě wu à jí. Akpakpa nɔ sɔ́ mɛ gegě ɖò agun ɔ mɛ bɔ ye nɔ d’alɔ, ɖó ye nɔ mɔ ɖɔ mɛ biba xó ɔ kan emi lɔ. Enɛ gudo ɔ, nú un yì ba nɔví e awakanmɛ gbɔjɔ na é ɖé kpɔ́n ɔ, un nɔ kan vǐ yetɔn lɛ kpo hɛ̌nnumɔ yetɔn ɖevo lɛ kpo byɔ ye. Mɛ e awakanmɛ gbɔjɔ dìn lɛ é ɖé lɛ nɔ kplá vǐ yetɔn lɛ wá kplé ɖ’ayǐ, bɔ vǐ enɛ lɛ sixu ko nyí wɛnjlatɔ́ hwenɛnu. È sixu d’alɔ ye lɔmɔ̌ bɔ ye na lɛkɔ wá Jehovah gɔ́n.”

8. Ðò lǒ e kúnkplá vǐ ɖuvanɔ ɔ bo ɖò Luki 15:17-24 mɛ é mɛ ɔ, nɛ̌ tɔ́ ɔ ka wà nǔ xá vǐ tɔn e lɛkɔ sín hwɛ tɔn lɛ gudo é gbɔn?

⁸ Enyi mǐ na d’alɔ mɛ e jló na lɛkɔ wá Jehovah gɔ́n lɛ é ɔ, jijɔ tɛ lɛ mǐ ka ɖó na ɖó? Ðǒ ayi nǔ e lǒ e Jezu dó dó vǐ ɖuvanɔ ɔ wu é sixu kplɔ́n mǐ é ɖé lɛ wu. (Xà Luki 15:17-24.) Jezu tinmɛ ɖɔ vǐ ɔ wá mɔ ɖò gudo mɛ ɖɔ emi wà xlonɔnú bo wá gbeta ɔ kɔn bo lɛkɔ wá xwé. Tɔ́ ɔ kánwezun bo yì kpé vǐ tɔn bo zunfan ɛ dó na ɛ jiɖe ɖɔ emi yí wǎn n’i. Vǐ ɔ sín ayixa ɖò hun xò xá ɛ wɛ, b’ɛ mɔ ɖɔ emi kún sɔ́ jɛxa bonu è na ylɔ́ emi ɖɔ vǐ ó. Hwenu e vǐ ɔ ɖɔ lee nǔ cí n’i é nú tɔ́ tɔn é ɔ, é sè wuvɛ̌ xá ɛ. Enɛ gudo ɔ, tɔ́ ɔ ɖè afɔ tawun tawun ɖé lɛ dó na jiɖe vǐ ɔ ɖɔ é víví nú emi ɖɔ é lɛkɔ wá xwé, bɔ emi na wà nǔ xá ɛ vǐ e emi yí wǎn na é ɖɔhun, é na nyí mɛsɛntɔ́ ɖé ɖɔhun ǎ. Bo na dó ɖè enɛ xlɛ́ ɔ, tɔ́ ɔ ɖu agɔ̌ ɖé dó vǐ tɔn e lɛkɔ sín hwɛ tɔn lɛ gudo é takúnmɛ bo lɛ́ na ɛ awu ɖagbeɖagbe lɛ.

9. Jijɔ tɛ lɛ mǐ ka ɖó na ɖó bá dó d’alɔ mɛ e awakanmɛ gbɔjɔ lɛ é bɔ ye na lɛkɔ wá Jehovah gɔ́n? (Kpɔ́n gbǎví “ Lee È Sixu D’alɔ Mɛ E Ba Na Lɛkɔ Wá Jehovah Gɔ́n lɛ É Gbɔn É.”)

 ⁹ Jehovah cí tɔ́ e xó è ɖɔ ɖò lǒ enɛ mɛ é ɖɔhun. É yí wǎn nú nɔví mǐtɔn e awakanmɛ gbɔjɔ na lɛ é bo ba ɖɔ ye ni lɛkɔ wá emi gɔ́n. Nú mǐ nɔ wà nǔ Jehovah ɖɔhun ɔ, mǐ sixu d’alɔ ye bɔ ye na lɛkɔ wá. Enɛ na byɔ suúlu, wuvɛ̌sexámɛ, kpo wanyiyi kpo ɖò mǐ sí. Etɛwu mǐ ka ɖó na nɔ ɖè jijɔ taji enɛ lɛ xlɛ́? Nɛ̌ mǐ ka sixu nɔ wà mɔ̌ gbɔn?

10. Etɛwu é ka nɔ byɔ suúlu cobɔ è na d’alɔ mɛɖé bɔ é na jɛ ganji ɖò gbigbɔ lixo?

¹⁰ Mǐ ɖó na nɔ ɖó suúlu ɖó é nɔ byɔ hwenu cobɔ mɛɖé na jɛ ganji ɖò gbigbɔ lixo. Mɛ e awakanmɛ gbɔjɔ na ɖ’ayǐ lɛ é gegě ɖɔ ɖɔ mɛxo lɛ kpo mɛ ɖevo e ɖò agun ɔ mɛ lɛ é kpo ba emi kpɔ́n azɔn mɔkpan cobɔ emi wá lɛkɔ. Nɔví nyɔnu e nɔ nyí Nancy bo nɔ nɔ Tofɔligbé-Zǎnzǎnhweji Asie tɔn é wlan ɖɔ: “Un ɖó xɔ́ntɔn alɔmayimɛ ɖé ɖò agun ɔ mɛ b’ɛ d’alɔ mì tawun. É yí wǎn nú mì dada ce wɛ é nyí ɖɔhun. É flín mì hwenu ɖagbe e mǐ zán ɖó kpɔ́ ɖ’ayǐ lɛ é. É nɔ ɖótó mì kpo suúlu kpo hwenu e un nɔ ɖò lee nǔ cí nú mì é ɖɔ n’i wɛ é; é ka nɔ xò nǔ kpɔ́n cobo nɔ ɖè wě xá mì ǎ. É xlɛ́ ɖɔ emi nyí xɔ́ntɔn jɔ xɔ́ntɔn bo ɖò gbesisɔmɛ bá d’alɔ mì hweɖebǔnu.”

11. Etɛwu mǐ ka ɖó hudo wuvɛ̌sexámɛ tɔn cobo na xò hwihwɛ́ mɛ e è d’akpɔ na é?

¹¹ Wuvɛ̌sexámɛ cí atínkɛ́n agbɔ̌nnɔ ɖé ɖɔhun bo sixu ɖè wuvɛ̌ e mɔ wɛ è ɖè é kpò. Mɛ e awakanmɛ gbɔjɔ na é ɖé lɛ ɖò xwi ɖí xá nǔ e mɛ e ɖò agun ɔ mɛ é ɖé wà nú ye b’ɛ d’akpɔ nú ye lɛ é wɛ sín xwè mɔkpan ɖíe. Enɛ wu ɔ, ye jló na lɛkɔ wá Jehovah gɔ́n ǎ. Ye mɛ ɖé lɛ sixu lin ɖɔ è wà nǔ agɔ xá emi.  Ye sixu ɖó hudo mɛ e na ɖótó ye bo na mɔ nǔ jɛ lee nǔ cí nú ye é mɛ é ɖé tɔn. (Ja. 1:19, nwt) María e awakanmɛ gbɔjɔ na wá yì é ɖɔ, “Un ɖó hudo tó e na sè xó ce é, abɔ̌ e ta un na y’avǐ kɔn nyi é, kpo alɔ e na xlɛ́ ali mì é kpo tɔn.”

12. Nɛ̌ wanyiyi Jehovah tɔn ka cí kan ɖé ɖɔhun gbɛn?

¹² Biblu jlɛ́ wǎn e Jehovah yí nú togun tɔn é dó kan ɖé wu. Ali tɛ nu wanyiyi Mawu tɔn ka cí kan ɖé ɖɔhun ɖè? Ðǒ ayi nǔjlɛdonǔwu elɔ wu: Mǐ ni ɖɔ ɖɔ a ɖò tɔ̀ kú wɛ ɖò xù e ɖò adǎn jí é ɖé mɛ, bɔ mɛɖé nyi awu e nɔ hwlɛn gbɛ̀ gán é ɖé dó we. É na víví nú we tawun, ɖó é na d’alɔ we bɔ gǎn e dó wɛ a ɖè bo na nɔ tɔ̀ ɔ nukúnmɛ é na bɔwǔ nú we. Amɔ̌, awu enɛ kɛɖɛ ko kpé bonu a na gán ǎ. Sin ɔ fá, hǔn tɔjihun e sixu hwlɛn we gán é ɖé mɛ jɛn a na byɔ cobo gán. A ɖó hudo mɛ e na nyi kan ɖé sɛ́dó we bo na dɔn we byɔ tɔjihun mɔhun mɛ é tɔn. Jehovah ɖɔ dó Izlayɛli-ví e jɛ zɔ n’i lɛ é wu ɖɔ: “Wanyiyi dɔn nyɛ kpo ye kpo ɖó kpɔ́ gɛdɛ ɖɔhun.” (Oz. 11:4) Mɔ̌ ɖokpo ɔ wɛ nǔ nɔ cí nú Mawu égbé dó mɛ e ma sɔ́ ɖò sinsɛn ɛ wɛ ǎ, bɔ tagba lɛ kpo linkpɔ́n lɛ kpo ɖí bú lɛ é wu. É ba ɖɔ ye ni tuùn ɖɔ emi yí wǎn nú ye, bo lɛ́ ba na d’alɔ ye bonu ye na lɛkɔ wá emi gɔ́n. Jehovah sixu zán we dó ɖɔ nú ye ɖɔ Emi yí wǎn nú ye.

13. Ðɔ nǔ e jɛ bo xlɛ́ hlɔnhlɔn e wanyiyi nɔví nɔví tɔn nɔ ɖó é ɖé.

¹³ É ɖò taji ɖɔ mǐ ni na jiɖe mɛ e awakanmɛ gbɔjɔ na lɛ é ɖɔ Jehovah yí wǎn nú ye, bɔ mǐ lɔ yí wǎn nú ye. Awakanmɛ gbɔjɔ Pablo e xó mǐ ɖɔ ɖò xóta e wá yì é mɛ é nú xwè 30 jɛji. É ɖɔ: “Un gosin xwégbe zǎnzǎn gbè ɖokpo, bo xò gò nɔví nyɔnu mɛxomɔ  xomɛnyɔtɔ́ ɖé, b’ɛ ɖɔ xó nú mì kpo wanyiyi kpo. Un jɛ avǐ ya jí vǐ kpɛví ɖé ɖɔhun. Un ɖɔ n’i ɖɔ é cí ɖɔ Jehovah wɛ sɛ́ ɛ dó bɔ é wá ɖɔ xó nú mì ɖɔhun. Hwenɛnu wɛ un wá gbeta ɔ kɔn bo na lɛkɔ wá Jehovah gɔ́n.”

14. Sɔgbe xá lǒ e ɖò Luki 15:4, 5 mɛ é ɔ, etɛ lɛngbɔ̌nyitɔ́ ɔ ka wà hwenu e é mɔ lɛngbɔ̌ e bú é é?

¹⁴ É byɔ ɖɔ mǐ ni fɔ́n bo nɔ ɖò gudo nɔ nú mɛ e awakanmɛ gbɔjɔ na lɛ é wɛ. Vǐ ɖuvanɔ e xó Jezu ɖɔ ɖò lǒ tɔn mɛ é ɖɔhun ɔ, akpa ɖaxó ɖé sixu ko jɛ ye wu ɖò lee nǔ nɔ cí nú mɛ é linu. Bɔ nǔ e ye mɔ kpɔ́n ɖò gbɛ̀ Satáan tɔn mɛ é sixu ko zɔ́n bɔ gǎn vɔ ɖò ye wu ɖò gbigbɔ lixo. É byɔ ɖɔ mǐ ni d’alɔ ye bonu ye ni vɔ́ hlɔnhlɔn na nǔɖiɖi e ye ɖó nú Jehovah é. Ðò lǒ e kúnkplá lɛngbɔ̌ e bú é mɛ ɔ, Jezu ɖɔ lee lɛngbɔ̌nyitɔ́ ɔ zé lɛngbɔ̌ ɔ nyi kɔlivla mɛ bo kplá ɛ lɛkɔ wá kpó ɔ mɛ gbɔn é. Lɛngbɔ̌nyitɔ́ ɔ zán hwenu kpo hlɔnhlɔn kpo gegě cobo mɔ lɛngbɔ̌ e bú é. Amɔ̌, é mɔ ɖɔ emi ɖó na zé è kaka wá kpó ɔ mɛ, ɖó hlɔnhlɔn sɔ́ ɖò lɛngbɔ̌ ɔ wu sɔmɔ̌ bonu é na lɛkɔ wá kpó ɔ mɛ éɖóɖó ǎ wu.—Xà Luki 15:4, 5.

15. Nɛ̌ mǐ ka sixu nɔ gudo nú mɛ e ma ɖó gǎn ǎ bo jló na lɛkɔ wá Jehovah gɔ́n lɛ é gbɔn? (Kpɔ́n gbǎví “ Azɔ̌wanú Xɔ Akwɛ Ðé.”)

¹⁵ É sixu byɔ ɖɔ mǐ ni zán hwenu kpo hlɔnhlɔn kpo gegě dó d’alɔ mɛ e awakanmɛ gbɔjɔ na é ɖé lɛ bonu ye na ɖu ɖò gǎnmaɖó yetɔn lɛ jí. Amɔ̌, kpo alɔdó gbigbɔ mímɛ́ Jehovah tɔn, Xó tɔn, gɔ́ nú wema jinjɔn Biblu jí lɛ tɔn kpo ɔ, mǐ sixu d’alɔ ye bɔ ye na lɛ́vɔ syɛn só ɖò gbigbɔ lixo. (Hlɔ. 15:1) Nɛ̌ mǐ ka sixu bló mɔ̌ gbɔn? Mɛxo agun tɔn e ko mɔ nǔ kpɔ́n é ɖé ɖɔ: “Ðò ninɔmɛ gegě mɛ ɔ, nú mɛ e awakanmɛ gbɔjɔ na lɛ é wá  gbeta ɔ kɔn ɖɔ emi jló nǔgbo nǔgbo na lɛkɔ wá Jehovah gɔ́n ɔ, é nɔ byɔ ɖɔ è ni kplɔ́n Biblu xá ye.” * Hǔn, enyi è byɔ we ɖɔ a ni kplɔ́n Biblu xá mɛ e awakanmɛ gbɔjɔ na é ɖé ɔ, etɛwu a ma ka na yí gbè nú wǔjɔmɛ enɛ ǎ? Mɛxo ɔ lɛ́vɔ ɖɔ: “Wɛnjlatɔ́ e na kplɔ́n Biblu xá mɛ e awakanmɛ gbɔjɔ na é ɖó na nyí xɔ́ntɔn ɖagbe ɖé; é na nyí mɛ e é sixu vo bo ɖɔ xomɛ na é.”

16. Nɛ̌ mǐ ka wà gbɔn bo tuùn ɖɔ wɛnsagun lɛ nɔ d’alɔ mǐ?

¹⁶ Nǔ e ko jɛ kpɔ́n lɛ é gegě xlɛ́ ɖɔ wɛnsagun lɛ nɔ ɖò alɔ dó mǐ wɛ bonu mǐ na mɔ mɛ e jló na lɛkɔ wá Jehovah gɔ́n lɛ é. (Nǔɖe. 14:6) Ði kpɔ́ndéwú ɔ, Silvio e nɔ nɔ Équateur é xoɖɛ vívɛ́ sɛ́dó Jehovah ɖɔ é ni d’alɔ emi bonu emi ni lɛkɔ wá agun ɔ mɛ. É kpò ɖò ɖɛ ɔ xò wɛ, bo sè bɔ è xúxú hɔn tɔn. Mɛxo agun tɔn we wɛ. Ðò mɛbakpɔ́n enɛ hwenu ɔ, kpo awǎjijɛ kpo wɛ mɛxo agun tɔn lɛ jɛ alɔdó è jí.

17. Lè tɛ mǐ ka nɔ mɔ ɖò alɔdidó mɛ e ma ɖó gǎn ɖò gbigbɔ lixo ǎ lɛ é mɛ?

¹⁷ Mǐ na mɔ awǎjijɛ gegě ɖò alɔdidó mɛ e ma ɖó gǎn ɖò gbigbɔ lixo ǎ lɛ é bonu ye na lɛkɔ wá Jehovah gɔ́n mɛ. Ðǒ ayi nǔ e Salvador ee nyí gbexosin-alijitɔ́ ɖé bo nɔ dó gǎn tawun dó d’alɔ mɛ e awakanmɛ gbɔjɔ na lɛ é ɖɔ é wu: “Hweɖelɛnu ɔ, é nɔ vɛwǔ tawun nú má glɔ́n ali nú ɖasin awǎjijɛ tɔn bonu é na gɔn kunkun. É nɔ víví nú mì tawun ɖɔ un nɔ wà azɔ̌ xá Jehovah bo na d’alɔ mɛsɛntɔ́ tɔn vívɛ́ lɛ bonu ye na gosin gbɛ̀ Satáan tɔn mɛ bo na lɛkɔ wá gɔ̌n Tɔn.”—Mɛ. 20:35.

18. Enyi awakanmɛ gbɔjɔ we ɔ, etɛ jí a ka sixu kú dó?

¹⁸ Enyi a ko jɛ zɔ nú togun Jehovah tɔn hǔn, kúdeji ɖɔ Jehovah kpò ɖò wǎn yí nú we wɛ. É ba ɖɔ a ni lɛkɔ wá emi gɔ́n. É na byɔ ɖɔ a ni ɖè afɔ ɖé lɛ cobo lɛkɔ wá gɔ̌n tɔn. Vǐtɔ́ e xó Jezu ɖɔ ɖò lǒ tɔn mɛ é ɖɔhun ɔ, Jehovah ɖò nukún ɖó kɔlilɛ towe wɛ, bo na dó kwabɔ nú we kpo xomɛhunhun kpo.