1-2. Sɔgbe kpo Nǔɖexlɛ́mɛ 15:3 kpo ɔ, nǔ tɛ lɛ Jehovah ka na mǐ? Etɛwu mǐ ka na ɖɔ xó dó ye jí ɖò xóta elɔ mɛ?

JEHOVAH nyí Mawu alɔhundónanǔmɛtɔ́ ɖé. Dǒ nukún nǔ e é na mǐ é ɖé lɛ mɛ kpɔ́n: ayikúngban, xwé ɖɛkpɛɖɛkpɛ mǐtɔn e ma kpé we ǎ é; tamɛfɔn mǐtɔn e é bló ɖò ali jiwǔ ɖé nu é; kpo Xó tɔn Biblu ɔ kpo. Ðó Jehovah na nǔ atɔn enɛ lɛ mǐ wutu ɔ, mǐ ɖó fí e mǐ na nɔ é, mǐ sixu lin tamɛ bo lɛ́ ɖɔ xó ɖó kpɔ́ xá mɛ ɖevo lɛ, bɔ mǐ nɔ lɛ́ mɔ xósin nú nǔ taji e mǐ nɔ kanbyɔ lɛ é.—Xà Nǔɖexlɛ́mɛ 15:3.

² Ðò xóta elɔ mɛ ɔ, mǐ na ɖɔ xó dó nǔnina atɔn enɛ lɛ jí klewun. Lee mǐ lin tamɛ dó ye jí sɔ é ɔ, mɔ̌ wɛ ye na sù nukún mǐtɔn mɛ sɔ, mɔ̌ ɖokpo ɔ wɛ jlǒ e mǐ ɖó bo na hɛn Gbɛɖotɔ́ wanyiyinɔ mǐtɔn Jehovah sín xomɛ hun é na syɛn sɔ. (Nǔɖe. 4:11) Mǐ na lɛ́ ɖò gbesisɔmɛ hugǎn, bo na d’alɔ mɛ ɖěɖee è ko sɔ́ adingban-núkplɔnmɛ nǔ lɛ jɔ nú yeɖée tɔn dó blɛ́ lɛ é.

3. Etɛwu ayikúngban ɔ ka gbɔn vo nú planɛti ɖevo lɛ bǐ?

³ Nǔnywɛ Mawu tɔn jɛ wě vaan ɖò lee é bló ayikúngban e nyí xwé mǐtɔn é gbɔn é mɛ. (Hlɔ. 1:20; Ebl. 3:4) Planɛti ɖevo lɛ ɖè bo nɔ lɛlɛ̌ dó hwesivɔ ɔ, amɔ̌, ayikúngban ɔ kpé we ǎ, ɖó nǔ e na zɔ́n bɔ gbɛtɔ́ na nɔ gbɛ̀ lɛ é bǐ wɛ ɖ’eji.

4. Etɛwu mǐ ka sixu ɖɔ ɖɔ ayikúngban ɔ nyɔ́ hú jɔmɛhun e gbɛtɔ́ bló é ɖebǔ?

⁴ Ðò ali ɖé lɛ nu ɔ, ayikúngban ɔ cí jɔmɛhun e ɖò jɔmɛ é ɖé ɖɔhun. Amɔ̌, vogbingbɔn taji ɖé lɛ ɖò jɔmɛhun e gbɛtɔ́ gɔ́ é ɖé kpo ayikúngban mǐtɔn kpo tɛntin. Ði kpɔ́ndéwú ɔ, enyi mɛ e ɖò jɔmɛhun ɖé mɛ lɛ é ɖesu wɛ na sɔnǔ nú jɔhɔn, nǔɖuɖu, kpo sin kpo e ye na zán lɛ é, bo ma sixu bɛ́ nǔ kwiji lɛ nyi gbě ǎ ɔ, táan nabi ye ka na nɔ gbɛ̀ na? Ye na yawǔ  kú. Amɔ̌, nǔɖogbɛ liva mɔkpan wɛ ɖò ayikúngban ɔ jí. Ayikúngban ɔ ɖesu nɔ sɔnǔ nú jɔhɔn, nǔɖuɖu, kpo sin kpo e sín hudo mǐ ɖó é, bɔ ye ka nɔ hwedó mǐ ǎ. Nǔ kwiji lɛ ɖò ayikúngban ɔ jí có, é kpó ɖò fí ɖɛkpɛɖɛkpɛ e mǐ sixu nɔ é nyí wɛ. Nɛ̌ nǔ ka sixu nyí mɔ̌ gbɔn? Jehovah bló ayikúngban ɔ ɖó alɔkpa ɖé bɔ nǔ e gblé ɖ’eji lɛ é sixu lɛ́ huzu nǔ e nyɔ́ bɔ è na zán lɛ é. Mǐ na ɖɔ xó dó huzuhuzu sín tuto jiwǔ mɔhun we jí, bɔ ye kúnkplá jɔhɔn kpo sin kpo.

5. Huzuhuzu sín tuto tɛ ka kúnkplá jɔhɔn? Nǔgbo tɛ enɛ ka xlɛ́?

⁵ Gbɛtɔ́ kpo kanlin kpo ɖó hudo jɔhɔn tɔn bá nɔ gbɛ̀. È ɖɔ ɖɔ nǔɖogbɛ lɛ nɔ gbɔ́n jɔhɔn tɔ́nu liva kanweko ɖò xwè ɖokpo mɛ. Nǔɖogbɛ enɛ lɛ ɖokpo ɔ nɔ tún jɔhɔn kwijikwiji e nɔ nyí dioxyde de carbone é. Nǔ ɖò mɔ̌ có, nǔɖogbɛ enɛ lɛ nɔ gbɔ́n jɔhɔn xwíxwí ɔ bǐ gbeɖé ǎ, mɔ̌ jɛn jɔhɔn kwijikwiji e ye nɔ tún é ma nɔ wà nǔ dó jɔhɔn xwíxwí ɔ wu ǎ é nɛ. Etɛwu? Ðó Jehovah lɛ́ dá atín kpo gbehan kpo tɛnmɛ tɛnmɛ lɛ, bɔ ye nɔ gbɔ́n jɔhɔn kwijikwiji ɔ bo nɔ tún jɔhɔn ɖagbe ɔ. Ðó huzuhuzu sín tuto enɛ nɔ zɔ́n bɔ mǐ nɔ mɔ jɔhɔn bo nɔ gbɔ́n wutu ɔ, mǐ sixu yí gbè nú xó e ɖò Mɛsɛ́dó 17:24, 25 mɛ é: “Mawu . . . wɛ nɔ na gbɛ̀, bo nɔ na funfún kpodo nǔ bǐ kpo gbɛtɔ́ lɛ.”

6. Huzuhuzu sín tuto tɛ ka kúnkplá sin? Etɛ enɛ ka ɖexlɛ́? (Lɛ̌ kpɔ́n gbǎví “ Huzuhuzu Sín Tuto E Kúnkplá Sin É: Nǔnina Jehovah Tɔn.”)

⁶ Sin ɖò planɛti mǐtɔn e nyí ayikúngban é jí, ɖó ayikúngban ɔ ɖò fí e é na nɔ dó hwesivɔ é pɛ́ɛ wutu. Nú é ko sɛkpɔ́ ɛ kpɛɖé wɛ nyí ɔ, sin e ɖò ayikúngban ɔ jí é bǐ na ko mɛ, bɔ ayikúngban ɔ na ko hunzo kaka bɔ nǔɖogbɛ ɖě na ɖ’eji ǎ. Enyi ayikúngban ɔ ko lín d’è kpɛɖé hú mɔ̌ wɛ ɔ, sin e ɖò ayikúngban ɔ jí é bǐ na ko huzu singǒ, bɔ ayikúngban ɔ bǐ na ko huzu laglasi aditi ɖé. Ðó Jehovah sɔ́ ayikúngban ɔ ɖó tɛn e jɛxa é mɛ wutu ɔ, huzuhuzu sín tuto e kúnkplá sin ɖò ayikúngban ɔ jí é sixu zɔ́n bɔ è nɔ gbɛ̀. Hwesivɔ ɔ nɔ xwí sin e ɖò xù lɛ mɛ é kpo ee ɖò ayikúngban ɔ jí é kpo, b’ɛ nɔ huzu akpɔ́kpɔ́. Ðò xwè ɖokpo ɖokpo mɛ ɔ, sin e hwesivɔ ɔ nɔ xwí é sukpɔ́ hú sin e ko ɖò tɔgwede e gbɔn gbɛ̀ ɔ mɛ lɛ é bǐ mɛ é. Sin enɛ nɔ nɔ jɔhɔn mɛ nú azǎn wǒ mɔ̌, cobo nɔ wá huzu jǐ alǒ laglasi linfín bo nɔ ja. Gudo mɛ ɔ, sin ɔ nɔ lɛkɔ yì xù lɛ mɛ alǒ fí ɖevo e sin nɔ nɔte ɖè lɛ é, bɔ huzuhuzu ɔ nɔ lɛ́ bɛ́. Jehovah sɔnǔ nú huzuhuzu enɛ, bonu sin ni ɖò ayikúngban ɔ jí hwebǐnu. Enɛ xlɛ́ ɖɔ Jehovah nyí nǔnywɛtɔ́ bo lɛ́ ɖó hlɔnhlɔn.—Jɔb. 36:27, 28; Nǔt. 1:7.

7. Ali tɛ lɛ nu mǐ ka sixu ɖexlɛ́ ɖɔ nǔnina e xó Ðɛhan 115:16 ɖɔ é sù nukún mǐtɔn mɛ ɖè?

⁷ Nɛ̌ mǐ ka sixu xlɛ́ ɖɔ planɛti mǐtɔn e è bló ɖò ali jiwǔ ɖé nu é kpo nǔ e ɖ’eji lɛ é kpo sù nukún mǐtɔn mɛ gbɔn? (Xà Ðɛhan 115:16.) Ali e nu mǐ sixu wà mɔ̌ ɖè é ɖokpo wɛ nyí ɖɔ mǐ ni nɔ lin tamɛ dó nǔ e Jehovah bló lɛ é jí. Enɛ na sísɛ́ mǐ bɔ mǐ na nɔ dókú nú Jehovah ɖò azǎn ɖokpo ɖokpo jí, ɖó nǔ ɖagbe e na mǐ wɛ é ɖè lɛ é wu. Mǐ nɔ ɖexlɛ́ ɖɔ ayikúngban e jí mǐ ɖè é sù nukún mǐtɔn mɛ, gbɔn xá e mɛ mǐ ɖè é hinhɛn ɖó mimɛ̌ jí lee mǐ kpéwú gbɔn é gblamɛ.

8. Etɛwu mǐ ka sixu ɖɔ ɖɔ è bló tamɛfɔn mǐtɔn ɖò ali jiwǔ ɖé nu?

⁸ Jehovah bló tamɛfɔn gbɛtɔ́ tɔn ɖò ali jiwǔ ɖé nu. Hwenu e a kpò ɖò nɔ towe sín adɔ mɛ é wɛ tamɛfɔn towe ko ɖò susu wɛ kpo tuto kpo, bɔ ɖò cɛju ɖokpo ɖokpo mɛ ɔ, nǔvikún tamɛfɔn ɔ tɔn yɔyɔ̌ afatɔ́n mɔkpan nɔ jɔ! Dobanúnǔtɔ́ lɛ ɖɔ ɖɔ nǔvikún bǔnɔ ɖěɖee è nɔ ylɔ́ ɖɔ neurone lɛ é  liva 100 mɔ̌ wɛ nɔ nɔ tamɛfɔn mɛ e ko nyí mɛxo é ɖé tɔn mɛ. Nǔvikún enɛ lɛ wɛ kplé bo nyí tamɛfɔn mǐtɔn, bo nɔ da kilóo ɖokpo adaɖé mɔ̌. Mǐ ni ɖɔ xó dó nǔwukpíkpé jiwǔ e tamɛfɔn ɔ ɖó lɛ é klewun ɖé jí.

9. Etɛ ka na we ganjɛwu ɖɔ nǔwukpíkpé e mǐ ɖó bo nɔ ɖɔ xó é nyí nǔɖe bɔ Mawu na mǐ?

⁹ Nǔwukpíkpé e mǐ ɖó bo nɔ ɖɔ xó é ɔ, nǔjiwǔ ɖé wɛ. Dǒ nukún nǔ e nɔ jɛ hwenu e mǐ nɔ ɖò xó ɖɔ wɛ é mɛ kpɔ́n kpɛɖé. Cobonu xókwín ɖokpo na tɔ́n sín nu towe mɛ ɔ, tamɛfɔn towe ɖó na xlɛ́ ali kan 100 mɔ̌ ɖò ɖɛ̌, vɛ̌go, nufló, aglanká, kpo akɔ́nnú towe kpo mɛ. Enyi xó e ɖɔ wɛ mɛɖé ɖè é na zawě ɔ, kan enɛ lɛ bǐ ɖó na sɛ̀ tɛn lyɛ̌ngbelyɛ̌ngbe. Dobanúnǔ e kúnkplá nǔwukpíkpé gbè ɖé didó tɔn é ɖé tɔ́n ɖò 2019 bo xlɛ́ ɖɔ vǐ yɛyɛ̌ lɛ sixu tuùn xókwín ɖě ɖó vo nú ɖě. Enɛ nɔ gudo nú nǔ e dobanúnǔtɔ́ gegě ɖi nǔ na é, é wɛ nyí ɖɔ è jì mǐ bɔ mǐ ɖó nǔwukpíkpé bá tuùn gbè ɖé lobo lɛ́ kplɔ́n gbè enɛ. É ɖò wɛn ɖɔ nǔwukpíkpé e mǐ ɖó bo nɔ ɖɔ xó é ɔ, nǔɖe wɛ bɔ Mawu na mǐ.—Tín. 4:11.

10. Nɛ̌ mǐ ka sixu xlɛ́ ɖɔ nǔwukpíkpé xóɖiɖɔ tɔn e Mawu na mǐ é sù nukún mǐtɔn mɛ gbɔn?

¹⁰ Ali e nu mǐ sixu xlɛ́ ɖɔ nǔwukpíkpé xóɖiɖɔ tɔn e Mawu na mǐ é sù nukún mǐtɔn mɛ ɖè é ɖokpo wɛ nyí ɖɔ mǐ na nɔ tinmɛ nǔ e wu mǐdɛɛ lɛ ɖi nǔ ɖɔ Mawu wɛ dá nǔ lɛ bǐ é nú mɛ ɖěɖee ɖi nǔ ɖɔ nǔ lɛ jɔ nú yeɖée lɛ é. (Ðɛh. 9:2; 1 Pi. 3:15, 16a) Mɛ ɖěɖee nɔ jɛhun dó nǔkplɔnmɛ enɛ jí lɛ é nɔ ɖɔ ɖɔ ayikúngban ɔ kpo nǔ e ɖ’eji lɛ é bǐ kpo wá xwetɔ́n kpowun wɛ. Enyi mǐ zán Biblu kpo nǔ e jí mǐ ɖɔ xó dó ɖò xóta elɔ mɛ lɛ é ɖé lɛ kpo ɔ, mǐ sixu jɛhun dó Tɔ́ mǐtɔn jixwé tɔn ɔ jí, bo tinmɛ nǔ e wu mǐ kúdeji ɖɔ Jehovah wɛ dá jǐ kpo dò kpo é nú mɛ ɖěɖee jló na ɖótó lɛ é.—Ðɛh. 102:26; Eza. 40:25, 26.

11. Ðɔ hwɛjijɔ e wu tamɛfɔn mǐtɔn jiwǔ é ɖokpo.

¹¹ Nǔwukpíkpé e mǐ ɖó bo nɔ flín nǔ é jiwǔ tawun. Ðò hwexónu ɔ, wema-wlantɔ́ ɖé ɖɔ ɖɔ tamɛfɔn gbɛtɔ́ tɔn kpéwú bo na flín nǔ ɖěɖee na gɔ́ wema livi 20 mɔ̌ mɛ lɛ é. Amɔ̌ dìn ɔ, è ɖɔ ɖɔ nǔwukpíkpé e mǐ ɖó bo nɔ flín nǔ é lɛ́ d’agba hú mɔ̌. Nǔwukpíkpé bǔnɔ tɛ gbɛtɔ́ lɛ ka ɖó?

12. Nɛ̌ nǔwukpíkpé e mǐ ɖó bo na kplɔ́n walɔ ɖagbe é ka zɔ́n bɔ mǐ gbɔn vo nú kanlin gbɔn?

¹² Ðò nǔɖiɖó e ɖò ayikúngban jí lɛ é bǐ mɛ ɔ, gbɛtɔ́ lɛ kɛɖɛ wɛ ɖó nǔwukpíkpé ɔ bo na kplɔ́n walɔ ɖagbe gbɔn nǔ e ye wà wá yì lɛ é flínflín kpo tamɛ linlin dó ye jí kpo gblamɛ. Wǎgbɔ tɔn ɔ, mǐ sixu kplɔ́n nǔgbododó walɔ ɖagbe tɔn ɖěɖee nyɔ́ zán lɛ é, bo bló huzuhuzu ɖò lee mǐ nɔ lin tamɛ gbɔn é kpo lee mǐ nɔ zán gbɛ̀ gbɔn é kpo mɛ. (1 Kɔ. 6:9-11; Kolo. 3:9, 10) Nǔgbo ɔ, mǐ sixu kplɔ́n ayixa mǐtɔn bo na tuùn nǔ ɖagbe ɖò nǔ nyanya mɛ. (Ebl. 5:14) Mǐ sixu kplɔ́n bo na nɔ ɖè wanyiyi, wuvɛ̌sexámɛ kpo nǔblawukúnúmɛ kpo xlɛ́. Mǐ sixu kplɔ́n bo na nɔ ɖɔhwɛ jlɔjlɔ Jehovah ɖɔhun.

13. Sɔgbe xá Ðɛhan 77:12, 13 ɔ, nɛ̌ mǐ ka ɖó na zán nǔwukpíkpé e mǐ ɖó bo nɔ flín nǔ bɔ Mawu na mǐ é gbɔn?

 ¹³ Ali e nu mǐ nɔ xlɛ́ ɖɔ nǔwukpíkpé e mǐ ɖó bo nɔ flín nǔ bɔ Mawu na mǐ é sù nukún mǐtɔn mɛ ɖè é ɖokpo wɛ nyí ɖɔ, mǐ nɔ flín hwebǐnu ɖɔ Jehovah ko d’alɔ mǐ, bo lɛ́ dó gbɔ nú mǐ wá yì. Enɛ na gɔ́ sò nú jiɖiɖe mǐtɔn ɖɔ é na lɛ́ d’alɔ mǐ ɖò sɔgudo. (Xà Ðɛhan 77:12, 13; 78:4, 7) Ali ɖevo e nu mǐ nɔ wà mɔ̌ ɖè é wɛ nyí ɖɔ mǐ nɔ flín nǔ ɖagbe e mɛ ɖevo lɛ wà nú mǐ é bɔ é nɔ sù nukún mǐtɔn mɛ. Dobanúnǔtɔ́ lɛ mɔ ɖɔ mɛ ɖěɖee nǔ nɔ sù nukúnmɛ na lɛ é nɔ ɖibla ɖó awǎjijɛ hugǎn. É lɛ́ nyɔ́ ɖɔ mǐ ni nɔ wà nǔ Jehovah ɖɔhun bo nɔ wɔn nǔɖe lɛ. Ði kpɔ́ndéwú ɔ, nǔwukpíkpé e Jehovah ɖó bo nɔ flín nǔ é ɖó blɔ̌ ǎ, amɔ̌, enyi mǐ lɛkɔ sín hwɛ mǐtɔn lɛ gudo ɔ, é nɔ wá gbeta ɔ kɔn bo nɔ sɔ́ hwɛ mǐtɔn lɛ kɛ mǐ, bo nɔ wɔn nǔ e mǐ wà nyi dò lɛ é. (Ðɛh. 25:7; 130:3, 4) É ba ɖɔ mǐ ni wà nǔ ɖokpo ɔ nú mɛ ɖevo lɛ, hwenu e ye wà nǔ nyi dò nú mǐ é.—Mat. 6:14; Luk. 17:3, 4.

14. Nɛ̌ mǐ ka sixu xlɛ́ ɖɔ tamɛfɔn jiwǔ e Mawu na mǐ é sù nukún mǐtɔn mɛ gbɔn?

¹⁴ Enyi mǐ nɔ zán tamɛfɔn e Mawu na mǐ é dó kpa susu n’i ɔ, é na xlɛ́ ɖɔ nǔnina jiwǔ enɛ sù nukún mǐtɔn mɛ. Mɛɖé lɛ nɔ zán tamɛfɔn yetɔn dó wá gbeta nǔ e nyí ɖagbe kpo nyanya kpo lɛ é tɔn kɔn nú yeɖée. Amɔ̌, ɖó Jehovah wɛ dá mǐ wutu ɔ, é nyɔ́ ɖɔ mǐ ni ɖó nukún ɖɔ nǔgbododó tɔn lɛ nyɔ́ hú nǔgbododó ɖebǔ e sín gbeta kɔn mǐ sixu wá é. (Hlɔ. 12:1, 2) Nú mǐ zán gbɛ̀ sɔgbe xá nǔgbododó tɔn lɛ ɔ, mǐ nɔ ɖó fífá ɖò gbɛ̀ mǐtɔn mɛ. (Eza. 48:17, 18) Mǐ nɔ lɛ́ mɔ gbɛ̀ ɔ sín nu, é wɛ nyí ɖɔ mǐ nɔ kpa susu nú Gbɛɖotɔ́ mǐtɔn kpo Tɔ́ mǐtɔn kpo bo nɔ lɛ́ bló b’ɛ nɔ gó dó mǐ wu.—Nǔx. 27:11.

15. Nɛ̌ Biblu e Jehovah na mǐ é ka xlɛ́ ɖɔ é yí wǎn nú mǐ gbɔn?

¹⁵ Biblu nyí nǔ ɖagbe ɖé bɔ Mawu na mǐ. Tɔ́ mǐtɔn jixwé tɔn ɔ sɔ́ Xó tɔn dó ayi mɛ nú gbɛtɔ́ lɛ bɔ ye wlan, ɖó é yí wǎn nú mǐ  tawun. Gbɔn Biblu gblamɛ ɔ, Jehovah nɔ na xósin nú nǔ taji hugǎn ɖěɖee mǐ sixu kanbyɔ lɛ é, ɖi elɔ lɛ: Fitɛ mǐ ka gosin? Etɛwu mǐ ka ɖò gbɛ̀ ɔ mɛ? Etɛ sɔgudo ka hɛn nu? Jehovah ba ɖɔ vǐ emitɔn lɛ ni mɔ xósin nú nǔkanbyɔ enɛ lɛ, enɛ wu ɔ, é d’alɔ gbɛtɔ́ lɛ bɔ ye lilɛ Biblu ɔ dó gbè gegě mɛ. Égbé ɔ, Biblu ɔ blebu, alǒ akpáxwé tɔn lɛ ko tíìn ɖò gbè 3 000 jɛji mɛ. Sín hwexónu ɔ, Biblu wɛ nyí wema e è lilɛ dó gbè ɖevo mɛ bo lɛ́ má hugǎn é. Gbɛtɔ́ lɛ na bo tlɛ ɖò fí ɖebǔ alǒ nɔ dó gbè ɖebǔ ɔ, ali hun nú ye mɛ gegě bɔ ye na kplɔ́n wɛn e ɖò Biblu mɛ é dó anɔ̌nugbe yetɔn mɛ.—Kpɔ́n gbǎví “ Biblu Ðiɖetɔ́n Dó Aflikagbe lɛ Mɛ.”

16. Sɔgbe xá Matie 28:19, 20 ɔ, nɛ̌ mǐ ka sixu ɖexlɛ́ ɖɔ Biblu ɔ sù nukún mǐtɔn mɛ gbɔn?

¹⁶ Enyi mǐ nɔ xà Biblu ɔ gbè bǐ gbè, nɔ lin tamɛ dó nǔ e é nɔ kplɔ́n mǐ lɛ é jí, lobo nɔ tɛ́n kpɔ́n bo nɔ zán nǔ e mǐ kplɔ́n lɛ é ɔ, é na xlɛ́ ɖɔ nǔnina enɛ sù nukún mǐtɔn mɛ. Gɔ́ na ɔ, mǐ nɔ ɖè nǔsumɛnukúnmɛ xlɛ́ Mawu, gbɔn nǔ e wu mǐ kpé lɛ é bǐ wiwa dó má wɛn e ɖò Biblu ɔ mɛ é xá mɛ gegě lee é nyɔ́ bló gbɔn é gblamɛ.—Ðɛh. 1:1-3; Mat. 24:14; xà Matie 28:19, 20.

17. Nǔnina alɔkpa tɛ lɛ xó mǐ ka ɖɔ ɖò xóta elɔ mɛ? Etɛ jí mǐ ka na ɖɔ xó dó ɖò xóta e bɔ d’ewu é mɛ?

¹⁷ Ðò xóta elɔ mɛ ɔ, mǐ ɖɔ xó dó nǔ elɔ lɛ e Mawu na mǐ é wu: ayikúngban e nyí xwé mǐtɔn é; tamɛfɔn mǐtɔn e é bló ɖò ali jiwǔ ɖé nu é, kpo Xó tɔn Biblu ɔ kpo. Amɔ̌, Jehovah lɛ́ na nǔ ɖevo lɛ mǐ bɔ nukún sixu mɔ ǎ. Mǐ na ɖɔ xó dó nǔnina xɔ akwɛ enɛ lɛ e è ma nɔ mɔ ǎ é jí ɖò xóta e bɔ d’ewu é mɛ.