1. Étɛ́ lɛ́ mǐ ka se ɖo kplé xwewú xwewú tɔn 2023 tɔn domɛ?

 ÐO KPLÉ xwewú xwewú tɔn 2023 tɔn hwenu ɔ, a akpakpa sɔ́ mǐ tawun hwenu e è xwlé nukúnnúmɔjɛnǔmɛ yɔ̌yɔ́ ɖé lɛ́ mǐ dó nǔ e mǐ ɖi nǔ ná é ɖé lɛ́ wú, bo lɛ́ se ɖɔnúese e sɔ́ akpakpa mɛ é ɖé lɛ́ dó sinsɛnzɔ́ mǐtɔn wú é. Ði kpɔ́ndéwú ɔ, mǐ se ɖɔ ali sixú hun nú mɛɖé lɛ́ bɔ yě ná xo kpóɖó nú togun Jexóva tɔn, ényí é ná bo tlɛ nyí ɖo kún súsú dó nú Babilɔ́nu ɖaxó ɔ gúdo ɔ nɛ́. Mǐ lɛ́ se ɖɔ bɛ́sín novembre 2023 ɔ, è kún sɔ́ ná byɔ́ ɖo wɛnjlátɔ́ Axɔ́súɖuto ɔ tɔn lɛ́ sí ɖɔ yě ní ɖó azɔ̌ e yě wa ɖo sinsɛnzɔ́ ɔ mɛ lɛ́ é bǐ sín gbe ó. Xlɛ́xlɛ́ wɛ hǔzúhúzú mɔ̌hun lɛ́ ka ɖe ɖɔ sinsɛnzɔ́ mǐtɔn kún sɔ́ ɖo tají sɔmɔ̌, alǒ kún sɔ́ myá nukún sɔ lěe é ko ɖe ɖ’ayǐ é ó a? Ðěbǔ lɔ ǎ!

2. Ényí ayǐ ɖokpó ɖokpó ɖo hǐnhɔ́n wɛ ɔ, étɛ́wú sinsɛnzɔ́ mǐtɔn ka nɔ lɛ́ myá nukún d’é jí? (Maki 13:10)

² Ayǐ ɖokpó hɔ́n ɔ, sinsɛnzɔ́ mǐtɔn nɔ lɛ́ myá nukún d’é jí. Étɛ́wú? Ðó ganmɛ ɖo yiyi wɛ. Ð’ayi nǔ e Jezu ɖɔ ɖ’ayǐ dó lěe wɛnɖagbejíjlázɔ́ ɔ ná yi gbɔn ɖo azǎn gǔdo gúdo tɔn lɛ́ mɛ é wú. (Xa Maki 13:10.) Ðo tan ɖokpó ɔ e Matíe wlán é mɛ ɔ, Jezu ɖɔ ɖɔ è ná jlá wɛn ɖagbe ɔ gbɔn ayǐkúngban ɔ bǐ jí cóbɔ “vivɔnu ɔ” ná wá. (Mat. 24:14) Gbɛ nyanya Satáan tɔn sín vivɔnu bǐ mlɛ́mlɛ́ wɛ xógbe énɛ́ nɔ dó gesí. Jexóva ko sɔ́ “azǎn ɔ kpó gan ɔ mɛ kpó” ɖó te nú nǔ e ná jɛ zaanɖé din lɛ́ é. (Mat. 24:36; 25:13; Mɛ. 1:7) Ayǐ ɖokpó hɔ́n ɔ, mǐ nɔ sɛkpɔ́ hwe énɛ́  nu d’é jí. (Hlɔ̌. 13:11) Din hwɛ̌ ɔ, mǐ ɖó ná kpo ɖo wɛn ɖagbe ɔ jlá wɛ káká jɛ hwenu e vivɔnu ɔ ná wá é.

3. Étɛ́ ka nɔ sísɛ́ mǐ bɔ mǐ nɔ jlá wɛn ɔ?

³ Nǔkanbyɔ́ tají e mǐ bǐ ba ná lin tamɛ d’é jí é ɖokpó ɖíe: Étɛ́wú mǐ ka nɔ jlá wɛn ɖagbe ɔ? È ná ɖɔ kpowun ɔ, wǎnyíyí wɛ nɔ sísɛ́ mǐ bɔ mǐ nɔ jlá wɛn ɔ. Nǔ e mǐ nɔ wa ɖo sinsɛnzɔ́ ɔ mɛ é nɔ ɖe wǎnyíyí mǐtɔn xlɛ́, énɛ́ wɛ nyí wǎn e mǐ yí nú wɛn ɖagbe ɔ é, wǎn e mǐ yí nú gbɛtɔ́ lɛ́ é, bɔ hú gǎn bǐ ɔ, wǎn e mǐ yí nú Jexóva kpó nyǐkɔ tɔn kpó é. Mǐ ní ɖɔ xó dó nǔ énɛ́ lɛ́ ɖokpó ɖokpó jí.

MǏ NƆ JLÁ WƐN Ɔ ÐÓ MǏ YÍ WǍN NÚ WƐN ÐAGBE Ɔ

4. Ényí mǐ se wɛn ɖagbe ɖé ɔ, nɛ̌ nǔ ka nɔ cí nú mǐ?

⁴ A ka flín lěe nǔ cí nú we hwenu e a se wɛn ɖagbe ɖé é a? Vlafo a se ɖɔ asi towe ji vǐ, alǒ a mɔ azɔ̌ e sín hudó a ɖó tawun é ɖé. É ɖo wɛn ɖɔ, kpó akpakpa sɔ́ mɛ kpó wɛ a jlá wɛn ɖagbe énɛ́ xwédo towe kpó xɔ́ntɔn towe lɛ́ kpó. Nǔ mɔ̌hun ɖé ka jɛ hwenu e a se wɛn ɖagbe hú gǎn bǐ ɔ, énɛ́ wɛ nyí Axɔ́súɖuto Mawu tɔn sín wɛn ɖagbe é a?

5. Azɔn nukɔntɔn e a kplɔ́n nǔgbó e ɖo Xó Mawu tɔn mɛ é ɔ, nɛ̌ nǔ ka cí nú we? (Kpɔ́n fɔtóo lɛ́ lɔmɔ̌.)

⁵ Lin tamɛ dó lěe nǔ cí nú we hwenu e a se nǔgbó e ɖo Xó Mawu tɔn mɛ é azɔn nukɔntɔn é jí. A kplɔ́n nǔ élɔ́ lɛ́: Tɔ́ towe jǐxwé tɔn ɔ yí wǎn nú we, é ba ɖɔ a ní nɔ xwédo émítɔn e mɛ mɛsɛntɔ́ émítɔn lɛ́ ɖe é mɛ, é d’akpá bo ná ɖó nǔ wǔvɛ́ mimɔ kpó yajiji kpó nu, a sixú ɖó nukún bo ná mɔ mɛvívɛ́ towe e ko kú lɛ́ é bɔ yě ná fɔ́n wá gbɛ ɖo gbɛ yɔ̌yɔ́ ɔ mɛ, kpó nǔ gěgé ɖěvo lɛ́ kpó. (Mak. 10:29, 30; Jaan 5:28, 29; Hlɔ̌. 8:38, 39; Nǔɖe. 21:3, 4) Nǔgbó énɛ́ lɛ́ byɔ́ ayi mɛ nú we tawun. (Luk. 24:32) A yí wǎn nú nǔ e kplɔ́n wɛ a ɖe lɛ́ é, bo ba ná jlá mɛ lɛ́ bǐ!—Sɔ́ jlɛ́ dó Jelemíi 20:9 wú.

6. Étɛ́ tan Ernest kpó Rose kpó tɔn ka kplɔ́n we?

⁶ Kpɔ́ndéwú ɖé ɖíe. Nɔví súnnu ɖé nɔ nyí Ernest, b bɔ xwe wǒ mɔ̌ ɖó wɛ é ɖe hwenu e tɔ́  tɔn kú é. Ernest ɖɔ: “Un nɔ kanbyɔ́ nyiɖée ɖɔ: ‘Sɛ́xwé wɛ é ka yi a? Alǒ xó tɔn ɔ, vɔ jɛ́n é ko vɔ nɛ́ a?’ Vǐ ɖěvo e sín tɔ́ kpo ɖo gbɛ lɛ́ é sín gbɛ nɔ jló mì.” Ernest nɔ yi tɛ́kpámɛ hwɛhwɛ bo nɔ jɛ kpo ɖo tɔ́ tɔn sín yɔ ta, lobo nɔ xo ɖɛ ɖɔ: “Kɛnklɛ́n Mawu, un ba ná tuun fí e tɔ́ ce ɖe é.” Ernest sín tɔ́ kú bɔ é ná bló xwe 17 mɔ̌ gúdo é ɔ, è xwlé Biblu kplɔ́nkplɔ́n Ernest, b’ɛ yá wǔ yí gbe. Ée é kplɔ́n ɖɔ mɛ kúkú lɛ́ kún sɔ́ tuun nǔtí ó, bɔ é cí ɖɔ sɛnmlɔ mɛ wɛ yě ɖe ɖɔhun, lobɔ Biblu d’akpá ɖɔ è ná fɔ́n mɛ sín kú ɖo sɔgúdo é ɔ, akpakpa sɔ́ ɛ tawun. (Nǔt. 9:5, 10; Mɛ. 24:15) Wǎgbɔ tɔn ɔ, é wá mɔ xósin nú nǔkanbyɔ́ e ɖo linkpɔ́n ɖó n’i wɛ sín xwe mɔ̌kpán ɖíe lɛ́ é. Nǔgbó Biblu tɔn e kplɔ́n wɛ Ernest ɖe lɛ́ é sɔ́ akpakpa ɛ tawun. Asi tɔn Rose wá xo kpóɖó n’i ɖo nǔkplɔ́nkplɔ́n ɔ kɔn, bo ɖe wǎn e é yí nú wɛn Axɔ́súɖuto ɔ tɔn é xlɛ́. Ðo 1978 ɔ, yě bló batɛ́mu. Kpó xomɛhunhun kpó wɛ yě má nǔ xɔ akwɛ́ e yě ɖi nǔ ná lɛ́ é xá xwédo yětɔn lɛ́, xɔ́ntɔn yětɔn lɛ́ kpó mɛ ɖěvo ɖěbǔ e ba ná ɖótó yě lɛ́ é kpó. Nǔ e mɛ é wá tɔ́n kɔ dó é wɛ nyí ɖɔ Ernest kpó Rose kpó d’alɔ gbɛtɔ́ 70 jɛjí bɔ yě yi nukɔn bo bló batɛ́mu.

7. Ényí wǎn e mǐ yí nú nǔgbó Biblu tɔn é dó ɖɔ do ɖo ayi mǐtɔn mɛ ɔ, étɛ́ ka nɔ jɛ? (Luki 6:45)

⁷ É ɖo wɛn ɖɔ, ényí wǎn e mǐ yí nú nǔgbó Biblu tɔn lɛ́ é dó ɖɔ do ɖo ayi mǐtɔn mɛ ɔ, mǐ kún sixú bɔ nu dó aɖǔ ó. (Xa Luki 6:45.) Lěe nǔ cí nú ahwanvú Jezu tɔn xwe kanweko nukɔntɔn ɔ tɔn lɛ́ é wɛ é nɔ cí nú mǐ lɔ; yě ɖɔ: “Mǐdɛɛ lɛ́ ɔ, mǐ sixú gɔn xó ɖɔ dó nǔ e mǐ mɔ bo se lɛ́ é wú ǎ.” (Mɛ. 4:20) Mǐ yí wǎn nú nǔgbó ɔ sɔmɔ̌ bɔ, mǐ nɔ ba ná má xá mɛ gěgé lěe mǐ kpé wú gbɔn é bǐ.

MǏ NƆ JLÁ WƐN Ɔ ÐÓ MǏ YÍ WǍN NÚ GBƐTƆ́ LƐ́

8. Étɛ́ ka nɔ sísɛ́ mǐ bɔ mǐ nɔ jlá wɛn ɖagbe ɔ mɛ ɖěvo lɛ́? (Kpɔ́n gbǎví “ Yǐ wǎn nú gbɛtɔ́ lɛ́: D’alɔ yě bónú yě ní húzú ahwanvú.”) (Kpɔ́n fɔtóo ɔ lɔmɔ̌.)

⁸ Jexóva kpó Vǐ súnnu tɔn kpó ɖɔhun ɔ, mǐ yí wǎn nú gbɛtɔ́ lɛ́. (Nǔx. 8:31, nwt; Jaan 3:16) Mǐ nɔ se wǔvɛ́ xá mɛ ɖěɖěe ma “tuun Mawu ǎ,” bo ma ka lɛ́ “ɖó nukúnɖíɖó ɖě ǎ” lɛ́ é titewungbe tɔn. (Efɛ́. 2:12) Yě ɖo tagba gěgé ɖí xwi xá wɛ, bɔ mǐdɛɛ lɛ́ ka ɖó nǔ e sín hudó yě ɖó é, énɛ́ wɛ nyí Axɔ́súɖuto Mawu tɔn sín wɛn ɖagbe. Wǎn e mǐ yí nú mɛ mɔ̌hun lɛ́ é kpó wǔvɛ́ e mǐ nɔ se xá yě é kpó nɔ sísɛ́ mǐ bɔ mǐ nɔ dó gǎn e wú mǐ kpé é bǐ bo nɔ jlá wɛn ɖagbe ɔ yě. Wɛn xɔ akwɛ́ énɛ́ sixú ná nukúnɖíɖó yě, d’alɔ yě bɔ yě ná ɖó gbɛ e nyɔ́ hú gǎn bǐ é din, bo lɛ́ hun ali nú yě bɔ yě ná mɔ “gbɛ jɔ gbɛ ɔ,” énɛ́ wɛ nyí gbɛ mavɔmavɔ ɖo gbɛ yɔ̌yɔ́ Mawu tɔn mɛ.—1 Tim. 6:19.

9. Akpá tɛ́ mǐ ka nɔ gba nú mɛ ɖěvo lɛ́ dó sɔgúdo wú? Étɛ́wú? (Ezekiyɛ́li 33:7, 8)

⁹ Wǎn e mǐ yí nú gbɛtɔ́ lɛ́ é nɔ lɛ́ sísɛ́ mǐ bɔ mǐ nɔ gba akpá nú yě dó vivɔnu gbɛ nyanya  élɔ́ tɔn e ɖo sisɛkpɔ́ wɛ é wú. (Xa Ezekiyɛ́li 33:7, 8.) Nɔzo mǐtɔn lɛ́ kpó hɛ̌nnumɔ mǐtɔn nǔmaɖitɔ́ lɛ́ kpó sín nǔ nɔ blá wǔ nú mǐ. Mɛ gěgé nɔ ɖo gbɛ yětɔn zán wɛ kpowun ma tuun nǔ e ɖo nǎ jɛ wɛ é, énɛ́ wɛ nyí ɖɔ “wǔvɛ́ ɖaxó ɖé ná tíin, bɔ mɔ̌hunkɔtɔn ko tíin kpɔ́n sín hwenu e gbɛ ɔ jɔ dó káká jɛ din é ǎ, mɔ̌hunkɔtɔn ɖě ka sɔ́ ná lɛ́ tíin gbeɖé ǎ.” (Mat. 24:21) Mǐ ba ɖɔ yě ní tuun nǔ e ɖo nǎ jɛ wɛ ɖo hwɛɖiɖɔ sín hwenu énɛ́ é. Jɛ nukɔn hwɛ̌ ɔ, è ná sú kún dó nú sinsɛn nǔvú, énɛ́ gúdo ɔ, è ná sú kún dó nú gbɛ nyanya élɔ́ blěbú ɖo Aamagedɔ́ni hwenu. (Nǔɖe. 16:14, 16; 17:16, 17; 19:11, 19, 20) Ðɛ mǐtɔn wɛ nyí ɖɔ mɛ gěgé ní se akpágbanúmɛ ɔ, bo wá gɔ́ nú mǐ ɖo mawusinsɛn mímɛ́ ɔ mɛ din. Amɔ̌, nɛ̌ nǔ ka ná nyí gbɔn nú mɛ ɖěɖěe ma ná ɖótó mǐ ɖo din ǎ lɛ́ é, káká jɛ mɛ e ɖo xwédo mǐtɔn mɛ lɛ́ é jí?

10. Étɛ́wú é ka ɖo tají ɖɔ mǐ ní kpo ɖo akpá gba nú mɛ lɛ́ wɛ?

¹⁰ Lěe è tínmɛ gbɔn ɖo xóta e wá yi é mɛ é ɔ, Jexóva sixú ba ná hwlɛ́n mɛ ɖěɖěe jɛ nǔ ɖi n’i jí hwenu e yě mɔ bɔ è sú kún dó nú Babilɔ́nu ɖaxó ɔ gúdo lɛ́ é. Ényí mɔ̌ hǔn, xó ɖiɖɔ nú yě d’é wú tlɛ lɛ́ ɖo tají tawun din hú ɖ’ayǐ tɔn. Lin tamɛ dó nǔ élɔ́ jí: Nǔ e mǐ nɔ ɖɔ nú yě din é sixú zɔ́n bɔ yě ná ɖó nǔ e yě ná wá flín ɖo hwenɛ́nu é. (Sɔ́ jlɛ́ dó Ezekiyɛ́li 33:33 wú.) Bóyá, yě ná flín akpá e mǐ gba nú yě é, bɔ énɛ́ ná sísɛ́ yě bɔ yě ná xo kpóɖó nú mǐ ɖo mawusinsɛn mímɛ́ ɔ mɛ cóbɔ hwenu ná yi. Lěe gantɔ́cɔ́tɔ́ e ɖo Filípu é sín ayi húzú ɖo “ayǐkúngban dán wǔ syɛ́nsyɛ́n” ɖé kpowun gúdo gbɔn é ɔ, bóyá mɛ e ma nɔ ɖótó mǐ din ǎ é ɖé lɛ́ ná wá húzú linlin hwenu e yě ná mɔ bɔ è ná sú kún dó nú Babilɔ́nu ɖaxó ɔ ɖo ajijimɛ gúdo é.—Mɛ. 16:25-34.

MǏ NƆ JLÁ WƐN Ɔ ÐÓ MǏ YÍ WǍN NÚ JEXÓVA KPÓ NYǏKƆ TƆN KPÓ

11. Nɛ̌ mǐ ka nɔ ɖe xlɛ́ ɖɔ Jexóva wɛ susu, yɛ̌yi kpó hlɔ̌nhlɔ́n kpó jɛxá gbɔn? (Nǔɖexlɛ́mɛ 4:11) (Kpɔ́n fɔtóo lɛ́ lɔmɔ̌.)

¹¹ Hwɛjijɔ tají hú gán e wú mǐ nɔ jlá wɛn ɖagbe ɔ é wɛ nyí ɖɔ mǐ yí wǎn nú Jexóva Mawu kpó nyǐkɔ mímɛ́ tɔn kpó. Mǐ nɔ mɔ ɖɔ sinsɛnzɔ́ mǐtɔn nɔ hun ali nú mǐ, bɔ mǐ nɔ kpa susu nú Mawu e mǐ yí wǎn ná é. (Xa Nǔɖexlɛ́mɛ 4:11.) Mɛsɛntɔ́ gbejínɔtɔ́ Jexóva tɔn lɛ́ bǐ yí xó nú nǔɖíɖó gbigbɔ tɔn jǐxwé tɔn e ɖɔ xó élɔ́ lɛ́ é: Jexóva Mawu mǐtɔn, susu, yɛ̌yi kpó hlɔ̌nhlɔ́n kpó jɛxá we. Mǐ nɔ kpa susu n’i, bo nɔ lɛ́ wlí yɛ̌yi n’i hwenu e mǐ nɔ má kúnnuɖenú ɖejidéwú e xlɛ́ ɖɔ é wɛ “dá nǔ lɛ́ bǐ,” bɔ é wú wɛ mǐ lɛ́ ɖo gbɛ é xá mɛ ɖěvo lɛ́ é. Mǐ nɔ ɖe xlɛ́ ɖɔ é jɛxá hlɔ̌nhlɔ́n mǐtɔn, ényí mǐ nɔ zán hwenu mǐtɔn, gbɛzán mǐtɔn kpó nǔɖókan mǐtɔn lɛ́ kpó dó ɖ’alɔ ɖo sinsɛnzɔ́ ɔ mɛ bǐ mlɛ́mlɛ́ lěe ninɔmɛ mǐtɔn yí gbe ná gbɔn é ɔ  nɛ́. (Mat. 6:33; Luk. 13:24; Koló. 3:23) È ná ɖɔ kpowun ɔ, mǐ yí wǎn nú xó ɖiɖɔ dó Mawu e mǐ yí wǎn ná é wú. Akpakpa nɔ lɛ́ sɔ́ mǐ dó xó ɖiɖɔ nú mɛ ɖěvo lɛ́ dó nyǐkɔ Mawu tɔn kpó Mawu alɔkpa e é nyí é kpó wú. Étɛ́wú?

12. Nɛ̌ mǐ ka nɔ klɔ́ cí sín nyǐkɔ Jexóva tɔn wú ɖo sinsɛnzɔ́ mǐtɔn mɛ gbɔn?

¹² Wǎn e mǐ yí nú Jexóva e nɔ sísɛ́ mǐ bɔ mǐ nɔ klɔ́ cí sín nyǐkɔ tɔn wú. (Mat. 6:9) Tínmɛ énɛ́ tɔn wɛ nyí ɖɔ, mǐ nɔ ba ná ɖɔ nú mɛ ɖěvo lɛ́ ɖɔ xó baɖabaɖa ɖěɖěe Satáan ɖɔ dó Jexóva wú lɛ́ é kún nyí nǔgbó ó. (Bǐb. 3:1-5; Jɔb. 2:4; Jaan 8:44) Nú mǐ ɖo sinsɛnzɔ́ ɔ mɛ ɔ, mǐ nɔ ba tawun bo ná jɛ hun dó Mawu mǐtɔn jí, lobo ɖɔ nǔgbó ɔ dó wǔ tɔn nú mɛ ɖěɖěe ba ná ɖótó mǐ lɛ́ é bǐ. Mǐ nɔ ba ɖɔ mɛ lɛ́ bǐ ní tuun ɖɔ jijɔ tɔn e hú gǎn bǐ é wɛ nyí wǎnyíyí, bɔ lěe é nɔ kpa acɛ gbɔn é sɔgbe bo jlɔ́, bɔ Axɔ́súɖuto tɔn ná ɖó nǔ wǔvɛ́ lɛ́ bǐ nu zaanɖé din, lobo hɛn fífá kpó awǎjijɛ jɔ awǎjijɛ kpó wá nú gbɛtɔ́ lɛ́. (Ðɛh. 37:10, 11, 29; 1 Jaan 4:8) Ényí mǐ jɛ hun dó nyǐkɔ Jexóva tɔn jí ɖo sinsɛnzɔ́ ɔ mɛ ɔ, mǐ nɔ klɔ́ cí sín nyǐkɔ tɔn wú. Mǐ nɔ lɛ́ j’awǎ, ɖó mǐ nɔ zán gbɛ sɔgbe xá nyǐkɔ mǐtɔn. Gbɔn nɛ́ é?

13. Étɛ́wú mǐ ka nɔ gó ɖó Kúnnuɖetɔ́ Jexóva tɔn e mǐ nyí é wú? (Ezayíi 43:10-12)

¹³ Jexóva sɔ́ mǐ bónú mǐ ná nyí “kúnnuɖetɔ́” tɔn lɛ́. (Xa Ezayíi 43:10-12.) Xwe ɖé lɛ́ ɖíe ɔ, wěmasɛ́dómɛ Hǎgbɛ́ alixlɛ́mɛtɔ́ ɔ tɔn ɖé ɖɔ: “Yɛ̌yi wlí nú mɛ sín nǔ ɖaxó hú gǎn e mǐ mɛ ɖokpó ɖokpó sixú ɖu vǐví tɔn é wɛ nyí ɖɔ è ná ylɔ́ mǐ ɖɔ Kúnnuɖetɔ́ Jexóva tɔn.” c Étɛ́wú è ka sixú ɖɔ mɔ̌? Nǔjlɛ́dónǔwú ɖé ɖíe. Ényí é byɔ́ ɖɔ mɛɖé ní ɖe kúnnu nú we ɖo hwɛɖɔxɔsá ɖé ɔ, mɛ e a tuun bo ɖeji dó wǔ tɔn bɔ a lɛ́ tuun ɖɔ é ɖó nyǐkɔ ɖagbe ɖo ta bɔ è ná ɖeji dó kúnnuɖiɖe tɔn wú é ɖé wɛ a ná sɔ́. Sɔ́ e Jexóva sɔ́ mǐ bɔ mǐ nyí Kúnnuɖetɔ́ tɔn lɛ́ é xlɛ́ ɖɔ é  tuun mǐ ganjí, bo lɛ́ ɖeji dó mǐ wú ɖɔ mǐ ná ɖe kúnnu dó émí wú ɖɔ émíɖokpónɔ wɛ nyí Mawu nǔgbó ɔ. Mǐ nɔ mɔ ɖɔ yɛ̌yi wɛ é wlí nú mǐ tawun bo sɔ́ mǐ bɔ mǐ nyí Kúnnuɖetɔ́ tɔn lɛ́, énɛ́ wú ɔ, mǐ nɔ zán ali e hun nú mǐ lɛ́ é bǐ bo nɔ bló bɔ mɛ ɖěvo lɛ́ nɔ tuun nyǐkɔ tɔn, bo nɔ kɔ́n sɛ sín adingban tobutóbú e è ɖó dó kɔ tɔn lɛ́ é jí. Nú mǐ ɖo mɔ̌ wa wɛ ɔ, mǐ nɔ zán gbɛ sɔgbe xá nyǐkɔ Kúnnuɖetɔ́ Jexóva tɔn lɛ́ e ɖo ta nú mǐ bɔ mǐ nɔ gó d’é wú tawun é!—Ðɛh. 83:18, nwt; Hlɔ̌. 10:13-15.

MǏ NÁ KPO ÐO WƐN Ɔ JLÁ WƐ KÁKÁ JƐ VIVƆNU

14. Nǔ ɖaaɖagbe tɛ́ lɛ́ ka ɖo te kpɔ́n mǐ?

¹⁴ Nǔ ɖaaɖagbe tɛ́ lɛ́ ɖíe ɖo te kpɔ́n mǐ è! Kpó nyɔ̌ná Jexóva tɔn kpó ɔ, mǐ ɖo nukún ɖó wɛ ɖɔ mɛ gěgé ɖěvo lɛ́ ná lɛ́ yí wɛn ɔ cóbɔ wǔvɛ́ ɖaxó ɔ ná bɛ́. Gɔ́ ná ɔ, akpakpa ɖo mǐ sɔ́ wɛ ɖɔ ényí é ná bo tlɛ nyí ɖo wǔvɛ́ ɖaxó ɔ, énɛ́ wɛ nyí hwenu e vɛ́ wǔ hú gǎn bɔ è ma ko mɔ kpɔ́n ǎ é hwenu ɔ, mɛ gěgé ɖěvo lɛ́ sixú tɔ́n sín gbɛ Satáan tɔn mɛ bo xo kpóɖó nú mǐ ɖo susu kpikpa nú Jexóva mɛ.—Mɛ. 13:48.

15-16. Étɛ́ mǐ ka ná kpo ɖo wiwa wɛ? Káká jɛ hwetɛ́nu?

¹⁵ Din hwɛ̌ ɔ, mǐ ɖó azɔ̌ bo ná wa. Azɔ̌ ɖé wɛ bɔ mǐ sɔ́ ná wá wa kpɔ́n gbeɖé ǎ; è jɔ wǔ mǐ bɔ mǐ ná jlá Axɔ́súɖuto Mawu tɔn sín wɛn ɖagbe ɔ gbɔn ayǐkúngban ɔ bǐ jí. Ðo hwe ɖokpó ɔ nu ɔ, mǐ ɖó ná kpo ɖo akpá gba nú mɛ lɛ́ wɛ. É byɔ́ ɖɔ mɛ lɛ́ ní tuun ɖɔ gbɛ nyanya élɔ́ sín vivɔnu ɖo sisɛkpɔ́ wɛ wunnáwúnná. Bɔ hwenu e hwɛɖiɖɔ sín hwenu énɛ́ ná wá é ɔ, mɛ lɛ́ ná tuun ɖɔ wɛn e mǐ jlá é ɔ, Jexóva Mawu gɔ́n wɛ é gosín.—Ezek. 38:23.

¹⁶ Étɛ́ jí mǐ ka kú dó din lo bá wa? Wǎnyíyí, énɛ́ wɛ nyí wǎn yí nú wɛn ɖagbe ɔ, wǎn yí nú gbɛtɔ́ lɛ́, bɔ tají hú gǎn ɔ, wǎn yí nú Jexóva Mawu kpó nyǐkɔ tɔn kpó ná sísɛ́ mǐ bɔ mǐ ná kpo ɖo wɛn ɖagbe ɔ jlá wɛ kpó akpakpa sɔ́ mɛ kpó, kpódó kanɖódónǔwú kpán, káká jɛ hwenu e Jexóva ná ɖɔ “é kpé!” dó é.