1-2. Étɛ́ ka ná zɔ́n bɔ Mawu ná yí gbe nú sɛn e sɛn ɛ wɛ mǐ ɖe é?

 ÉNYÍ a se xókwín “sɛn” ɔ, étɛ́ ka nɔ wá ayi mɛ nú we? Bóyá, nɔví súnnu e ɖo kpolijijɛ ɖo adɔ̌zan tɔn kpá, bó ɖo nǔ e ɖo ayi tɔn mɛ lɛ́ é ɖɔ nú Jehovah wɛ ɖo ɖɛ vívɛ́ ɖé mɛ é wɛ nɔ wá ayi mɛ nú we. Alǒ, xwédo e ɖo vǐví Biblu kplɔ́nkplɔ́n tɔn ɖu wɛ é ɖé wɛ nɔ wá ayi mɛ nú we vlafo.

² Ðo ninɔmɛ we énɛ́ lɛ́ bǐ mɛ ɔ, Mawu sɛn wɛ mɛ énɛ́ lɛ́ ɖe. Jehovah ka ná yí gbe nú sɛn e sɛn ɛ wɛ yě ɖe é a? Ényí é sɔgbe xá linlin tɔn, bɔ yě lɛ́ wa mɔ̌ kpó wǎnyíyí kpó, bɔ sísí lɛ́ ɖ’é kɔn ɔ, é ná yí gbe ná. Mǐ yí wǎn nú Jehovah tawun. Mǐ tuun ɖɔ é jɛxá ɖɔ è ní sɛn ɛ, bɔ mǐ ba ná sɛn ɛ ɖo ali ɖagbe hú gǎn ɔ nu.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná vɔ́ lěe è sɛn Jehovah gbɔn ɖo hwexónu bɔ é yí gbe ná é gbéjé kpɔ́n, bó ná lɛ́ gbéjé ali e nu mǐ sixú sɛn ɛ ɖe ɖo égbé b’ɛ ná yí gbe ná é tántɔn kpɔ́n. Ée mǐ ná ɖo mɔ̌ wa wɛ é ɔ, mǐ ná lin tamɛ dó lěe mǐɖésúnɔ mɛtún ɔ sixú bló gbɔn, bɔ Mawu sinsɛn mǐtɔn ná lɛ́ kpɔ́n te d’é jí é jí. Mǐ ná lɛ́ mɔ nǔ e wú Mawu sinsɛn ɖo ali e sɔgbe é nu nɔ hɛn awǎjijɛ wá nú mǐ lɛ́ é.

4. Nɛ̌ mɛ e sɛn Jehovah cóbɔ Jezu wá ayǐkúngban jí lɛ́ é ka xlɛ́ ɖɔ émí yí wǎn nú Jehovah, bó lɛ́ ɖó sísí n’i gbɔn?

⁴ Súnnu gbejínɔtɔ́ lɛ́ ɖi Abɛ́li, Nɔwée, Ablaxámu kpó Jɔbu kpó xlɛ́ ɖɔ émí ɖó sísí nú Jehovah, bó lɛ́ yí wǎn n’i.  Gbɔn nɛ̌ é? Tónú e yě se n’i é, nǔɖiɖi e yě ɖó n’i é kpó vɔ̌ vovo e yě sá lɛ́ é kpó wɛ ɖe énɛ́ xlɛ́. Biblu ɖɔ nǔ e yě wa lɛ́ é bǐ nú mǐ ǎ. Amɔ̌, é ɖo wɛn ɖɔ yě wa nǔ e wú yě kpé é bǐ bó kpa susu nú Jehovah, lobɔ é yí gbe nú sɛn e yě sɛn ɛ é. Nukɔnmɛ ɔ, Jehovah wá ná Mɔyízisɛ́n ɔ kúnkan Ablaxámu tɔn lɛ́. Gbetakɛ́n tawun tawun ɖé lɛ́ ɖo sɛ́n énɛ́ lɛ́ mɛ, bó ɖɔ lěe Jehovah ba ɖɔ è ní sɛn émí gbɔn é.

5. Nɛ̌ Jehovah ka ba ɖɔ ahwanvú Jezu tɔn lɛ́ ní sɛn émí gbɔn?

⁵ Ðo kú kpó fínfɔ́n sín kú kpó Jezu tɔn gúdo ɔ, Jehovah sɔ́ nɔ ɖó nukún ɖɔ mǐ ní se tónú nú Mɔyízisɛ́n ɔ ǎ. (Hlɔ̌. 10:4) Sɛ́n yɔ̌yɔ́ ɖěvo wɛ Klisánwun lɛ́ ɖó ná nɔ se tónú ná, énɛ́ wɛ nyí “Klísu sín sɛ́n ɔ.” (Ga. 6:2) Bó ná dó se tónú nú “sɛ́n” énɛ́ ɔ, é byɔ́ ɖɔ yě ní kplɔ́n sɛ́n ɔ dó tamɛ, bó nɔ ɖo sɛ́n nyi wɛ gbɛmɛ ǎ, loɔ, ényí yě nɔ xwedó kpɔ́ndéwú Jezu tɔn, bó nɔ lɛ́ zán gbɛ sɔgbe xá nǔkplɔ́nmɛ tɔn lɛ́ hǔn, sɛ́n énɛ́ ɔ nyi wɛ yě ɖe nɛ́. Égbé ɖésú ɔ, Klisánwun lɛ́ nɔ wa nǔ e wú yě kpé é, bó nɔ xwedó Klísu, bó ná dó nyɔ́ Jehovah nukúnmɛ, lobɔ “lǐndɔ̌n [yětɔn] lɛ́ ná vo.”—Mat. 11:29.

6. Nɛ̌ mǐ ka sixú ɖu xóta élɔ́ sín le gbɔn?

⁶ Ée mǐ ná ɖo akpáxwé Mawu sinsɛn mǐtɔn tɔn lɛ́ ɖokpó ɖokpó gbéjé kpɔ́n wɛ é ɔ, kanbyɔ́ hwiɖée ɖɔ: ‘Gǎn tɛ́ lɛ́ un ka ko dó ɖo ali énɛ́ nu?’ A sixú lɛ́ kanbyɔ́ hwiɖée ɖɔ: ‘Un ka sixú lɛ́ bló bɔ lěe sɛn Mawu gbɔn wɛ un ɖe é ná lɛ́ kpɔ́n te d’é jí a?’ A ɖó ná hun xomɛ dó gǎn e a ko dó wá yi lɛ́ é wú, amɔ̌, a ɖó ná lɛ́ byɔ́ Jehovah ɖɔ é ní d’alɔ we bónú a ná mɔ nǔ jɛ hǔzúhúzú e a sixú bló lɛ́ é wú.

7. Nɛ̌ ɖɛ e mǐ nɔ xo kpó ayi bǐ kpó lɛ́ é ka nɔ cí nú Jehovah?

⁷ Ényí mǐ ɖo ɖɛ xo sɛ́dó Jehovah wɛ hǔn, sinsɛn ɛ mǐ ɖe nɛ́. Mawuxówéma ɔ jlɛ́ ɖɛ e mǐ nɔ xo lɛ́ é dó zǎlínkpɔ́n e è xwe sɔ bó sɔ́ nǔ ná, bɔ è nɔ xwlé Mawu ɖo Goxɔ ɔ mɛ, b’ɛ wá yá é ɔ, è wá xwlé è ɖo tɛ́npli ɔ mɛ é wú. (Ðɛh. 141:2) Zǎlínkpɔ́n énɛ́ nɔ ɖó wǎn e nɔ nyɔ́ se nú Mawu é ɖé. Mɔ̌ ɖokpó ɔ, ényí mǐ ná bó tlɛ nɔ zán xógbe e bɔkun lɛ́ é dó xo ɖɛ sɛ́dó è ɔ, é nɔ se ɖɛ vívɛ́ mǐtɔn. (Nǔx. 15:8; Sɛ́n. 33:10) Mǐ ɖó hwɛjijɔ ɖagbe e wú mǐ ná ɖi ɖɔ ényí mǐ ɖe wǎnyíyí kpó nǔsumɛnukúnmɛ kpó mǐtɔn xlɛ́ Jehovah ɔ, xomɛ nɔ hun i tawun lɛ́ é. É nɔ ba ɖɔ mǐ ní ɖɔ nǔ e ɖo linkpɔ́n ɖó nú mǐ wɛ lɛ́ é, nǔ e ɖó nukún wɛ mǐ ɖe lɛ́ é kpó nǔjlómɛ mǐtɔn lɛ́ kpó nú émí. Cóbónú a ná xo ɖɛ sɛ́dó Jehovah hǔn, xwe sɔ, bó lin tamɛ dó nǔ e ná ɖɔ wɛ a ɖe lɛ́ é jí. Mɔ̌ wiwa ná zɔ́n bɔ a ná xwlé “zǎlínkpɔ́n” wǎnɖagbenɔ hú gǎn ɖé Tɔ́ towe jǐxwé tɔn ɔ.

8. Ali ɖagbe tɛ́ ka hun nú mǐ bɔ mǐ ná kpa susu nú Mawu?

⁸ Ényí mǐ ɖo susu kpa nú Jehovah wɛ hǔn, sinsɛn ɛ wɛ mǐ ɖe nɛ́. (Ðɛh. 34:2) Ényí mǐ nɔ ɖɔ xó nú mɛ ɖěvo lɛ́ dó lěe mǐ yí wǎn nú Jehovah gbɔn é, gɔ́ nú lěe jijɔ tɔn ɖaaɖagbe lɛ́ kpó nǔ e é nɔ wa lɛ́ é kpó nɔ dɔn mǐ gbɔn é wú hǔn, susu kpa n’i wɛ mǐ ɖe nɛ́. Ényí nǔ e é nɔ wa nú mǐ lɛ́ é nɔ su nukún mǐtɔn mɛ ɔ, mǐ ná ɖó hwɛjijɔ ɖagbe e wú mǐ ná ɖɔ xó dó wǔ tɔn é gěgé. Ényí mǐ nɔ lin tamɛ dó nǔ ɖagbe e Jehovah wa nú mǐ lɛ́ é bǐ jí ɔ, mǐ ná ɖó hwɛjijɔ e wú mǐ ná kpa susu n’i é gěgé. Mawuxóɖiɖɔzɔ́ ɔ nɔ hun ali bǔnɔ ɖé nú mǐ bónú “mǐ ná sɔ́ nu mǐtɔn dó kpa susu nú nyǐkɔ [Mawu] tɔn ɖo togun mɛ agbawungba.” (Ebl. 13:15) Lěe é ɖo dandan ɖɔ mǐ ní nɔ xwe sɔ bó nɔ lin tamɛ dó nǔ e ná ɖɔ nú Jehovah wɛ mǐ ɖe ɖo ɖɛ mɛ lɛ́ é jí gbɔn é ɔ, é ná nyɔ́ ɖɔ mǐ ní nɔ lin tamɛ ganjí dó nǔ e ná ɖɔ nú mɛ lɛ́ wɛ mǐ ɖe ɖo sinsɛnzɔ́ ɔ mɛ é jí jɛ nukɔn. Mǐ ba ɖɔ lěe mǐ “nɔ kpa susu nú Mawu dó sá vɔ̌ n’i” gbɔn é ní nyí ɖagbe hú gǎn ɔ. Énɛ́ wú  wɛ mǐ nɔ ɖɔ xó kpó akpakpa sɔ́ mɛ kpó hwenu e mǐ ɖo sinsɛnzɔ́ ɔ mɛ é.

9. Izlayɛ́li ví hwexónu tɔn lɛ́ ɖɔhun ɔ, nɛ̌ mǐ ka nɔ ɖu le kplé e mǐ nɔ kplé ɖó kpɔ́ lɛ́ é tɔn gbɔn? Nǎ kpɔ́ndéwú hwiɖésúnɔ tɔn ɖé.

⁹ Ényí mǐ nɔ yi kplé lɛ́ hǔn, Jehovah sɛn wɛ mǐ ɖe nɛ́. È ɖɔ nú Izlayɛ́li ví hwexónu tɔn lɛ́ ɖɔ: ‘Hǔn xwewú xwewú ɔ, súnnu e ɖo togun mitɔn mɛ lɛ́ bǐ ná nɔ yi Jehovah, Mawu mitɔn nukɔn azɔn atɔn ɖo tɛn e é ná sɔ́ é mɛ.’ (Sɛ́n. 16:16) Yě ɖó ná jó xwé yětɔn kpó gle yětɔn lɛ́ kpó dó, bɔ mɛɖé ná ɖo xɛ nya ɖo yě jí wɛ ǎ. Amɔ̌, Jehovah d’akpá nú yě ɖɔ: “Azɔn atɔn e mi ná wá gɔ̌n ce ɖo xwe ɖokpó mɛ ɔ, mɛ ɖěbǔ ná glá ɖɔ émí ná klá jɛ to mitɔn nu hwe énɛ́ ɔ nu ǎ.” (Tín. 34:24) Ðó Izlayɛ́li ví lɛ́ ɖeji dó Jehovah wú bǐ mlɛ́mlɛ́ wútu ɔ, yě nɔ yi nǔwiwa xwewú xwewú tɔn énɛ́ lɛ́ tɛnmɛ. Bɔ mɔ̌ mɛ ɔ, yě nɔ ɖu le tɔn ɖo ali gěgé nu. Ði kpɔ́ndéwú ɔ, yě nɔ kplɔ́n nǔ gěgé dó Sɛ́n Mawu tɔn wú, yě nɔ lin tamɛ dó nǔ e Jehovah nɔ wa nú yě lɛ́ é jí, bó nɔ lɛ́ ɖu vǐví kpɔ́ e yě nɔ nɔ xá mɛ ɖěvo e yí wǎn nú Jehovah lɛ́ é tɔn. (Sɛ́n. 16:15) Ényí mǐ lɔ nɔ sá vɔ̌ lɛ́, bó nɔ yi kplé Klisánwun tɔn mǐtɔn lɛ́ ɔ, le ɖokpó ɔ lɛ́ wɛ mǐ nɔ ɖu. Gɔ́ ná ɔ, lin tamɛ dó lěe nǔ nɔ cí nú Jehovah, ényí a sɔ nǔ, bó ná xósin kléwún éé xwe ali é ɖé jí.

10. Aniwú hanjiji ka ɖo tají ɖo Mawu sinsɛn mǐtɔn mɛ?

¹⁰ Ényí mǐ ɖo han ji ɖó kpɔ́ xá nɔví súnnu kpó nɔví nyɔ̌nu kpó mǐtɔn lɛ́ wɛ hǔn, Mawu sɛn wɛ mǐ ɖe nɛ́. (Ðɛh. 28:7) Izlayɛ́li ví lɛ́ nɔ mɔ ɖɔ hanjiji ɔ, akpáxwé tají ɖé wɛ é nyí ɖo Mawu sinsɛn émítɔn mɛ. Axɔ́sú Davídi sɔ́ azɔ̌ d’así nú Levíi ví 288 bɔ yě ná nɔ ji han ɖo tɛ́npli mɛ. (1 Tan 25:1, 6-8) Égbé ɔ, mǐ sixú ɖe wǎn e mǐ yí nú Mawu é xlɛ́ hwenu e mǐ ɖo susu kpa n’i dó han mɛ wɛ é. Kɔnugbe alɔkpa e mǐ ɖó é wɛ nyí nǔ tají ɔ ǎ. Ð’ayi nǔjlɛ́dónǔwú élɔ́ wú: Ényí mǐ ɖo xó ɖɔ wɛ ɔ, “mǐ mɛ bǐ wɛ nɔ wa nǔ nyi do gbɔn alɔkpa gěgé mɛ,” amɔ̌, énɛ́ ka nɔ zɔ́n bónú mǐ nɔ gɔn xó ɖɔ ɖo agun kpó sinsɛnzɔ́ ɔ kpó mɛ ǎ. (Ja. 3:2) Mɔ̌ ɖokpó ɔ, mǐ ɖó ná lɔn bónú gbe mǐtɔn e ma nyɔ́ han sɔmɔ̌ ǎ é ná zɔ́n bónú mǐ ná gɔn han ji dó kpa susu nú Jehovah ǎ.

11. Lěe è tínmɛ gbɔn ɖo Ðɛhan 48:14 mɛ é ɔ, étɛ́wú mǐ ka ɖó ná nɔ bló tuto bó ná nɔ kplɔ́n Biblu ɖo xwédo mɛ?

¹¹ Ényí mǐ nɔ kplɔ́n Xó Jehovah tɔn, bó nɔ lɛ́ kplɔ́n nǔ vǐ mǐtɔn lɛ́ dó Jehovah wú hǔn, sinsɛn ɛ wɛ mǐ ɖe nɛ́. Gbɔjɛzán ɔ nɔ hun ali nú Izlayɛ́li ví lɛ́ bɔ yě nɔ jó azɔ̌ e yě nɔ wa gbe bǐ gbe lɛ́ é dó, bó nɔ sɔ́ ayi ɖó kancícá e ɖo yě kpó Jehovah kpó tɛ́ntin é jí. (Tín. 31:16, 17) Gbejínɔtɔ́ e ɖo tɛ́ntin yětɔn lɛ́ é nɔ kplɔ́n nǔ vǐ yětɔn lɛ́ dó Jehovah kpó nǔ ɖagbe e é nɔ wa lɛ́ é kpó wú. Mǐ lɔmɔ̌ ɖó ná bló tuto bó ná nɔ xa Xó Mawu tɔn, lobo lɛ́ kplɔ́n. Akpáxwé Mawusinsɛn mǐtɔn tɔn ɖé wɛ, bó nɔ d’alɔ mǐ bɔ mǐ nɔ sɛkpɔ́ Jehovah d’é jí. (Ðɛh. 73:28) Gɔ́ ná ɔ, ényí mǐ ɖo nǔ kplɔ́n ɖó kpɔ́ wɛ ɖo xwédo mɛ ɔ, mǐ sixú d’alɔ vǐ mǐtɔn lɛ́ bɔ yě ná zun xɔ́ntɔn vívɛ́ xá Tɔ́ mǐtɔn jǐxwé tɔn wǎnyíyínɔ ɔ.—Xa Sɛ́nflínmɛ 6:6, 7.

12. Étɛ́ nǔ e Jehovah lin dó azɔ̌ e mɛ ɖěɖěe bló nǔ e ná nɔ Goxɔ ɔ mɛ lɛ́ é wa é wú é ka kplɔ́n mǐ?

¹² Ényí mǐ nɔ gbá fí e mǐ nɔ sɛn Jehovah ɖe lɛ́ é, bó nɔ lɛ́ hɛn yě dó mǐmɛ́ jí hǔn, Jehovah sɛn wɛ mǐ ɖe nɛ́. Biblu ɖɔ ɖɔ Goxɔ ɔ gbígbá kpó nǔ e kúnkplá ɛ lɛ́ é blóbló kpó nyí “azɔ̌ mímɛ́.” (Tín. 36:1, 4) Égbé ɖésú ɔ, Jehovah nɔ kpɔ́n kpléxɔ Axɔ́súɖuto ɔ tɔn lɛ́ kpó xɔ yɛhwexɔ́súɖuto ɔ tɔn ɖěvo e è nɔ gbá lɛ́ é kpó dó mɔ sinsɛnzɔ́ mímɛ́. Nɔví súnnu kpó nɔví nyɔ̌nu kpó ɖé lɛ́ nɔ zán hwenu gěgé dó azɔ̌ énɛ́ lɛ́ takúnmɛ. Fún e yě nɔ jɔ dó azɔ̌ Axɔ́súɖuto ɔ tɔn sín takúnmɛ é nɔ su nukún mǐtɔn mɛ. Nǔgbó ɔ, yě nɔ lɛ́ ɖ’alɔ ɖo Mawuxóɖiɖɔzɔ́ ɔ mɛ. Yě mɛ ɖé lɛ́ tlɛ sixú ba bó ná nyí gběxosín-alijítɔ́ hwebǐnu tɔn. Ényí nɔví súnnu kpó nɔví nyɔ̌nu kpó azɔ̌syɛ́nsyɛ́nwat ɔ́ énɛ́ lɛ́ jɛxá bó ná nyí gběxosín-alijítɔ́ hwebǐnu tɔn ɔ, mɛxó agun tɔn lɛ́ ná yí gbe ná, bó ná dó xlɛ́ ɖɔ émí ɖo gǔdo nú xɔgbígbázɔ́ e è nɔ wa lɛ́ é. Ényí mǐ tuun azɔ̌ ɖo xɔgbígbá linu kpó mǐ gbɔ kpó ɔ, mǐ mɛ bǐ sixú d’alɔ bɔ xɔ lɛ́ ná nɔ mǐmɛ́ jí, bó lɛ́ nɔ ninɔmɛ ɖagbe mɛ.

13. Linlin tɛ́ mǐ ka ɖó ná nɔ ɖó dó nǔ e mǐ nɔ ná dó nɔ gǔdo nú azɔ̌ Axɔ́súɖuto ɔ tɔn lɛ́ é wú?

¹³ Ényí mǐ nɔ ná nǔ dó nɔ gǔdo nú azɔ̌ Axɔ́súɖuto ɔ tɔn lɛ́ hǔn, Jehovah sɛn wɛ mǐ ɖe nɛ́. Izlayɛ́li ví lɛ́ ɖó ná zɔn asígbá-alɔgbá bó wá Jehovah nukɔn ǎ. (Sɛ́n. 16:16) Yě ɖó ná hɛn nǔ bó wá ná ɛ, lěe ninɔmɛ yětɔn yí gbe ná gbɔn é. Mɔ̌ mɛ ɔ, yě nɔ xlɛ́ ɖɔ tuto vovo e è bló bónú émí ná dó sixú ɖu le tɔn ɖo gbigbɔ lixo é su nukún émítɔn mɛ. Nɛ̌ mǐ ka sixú xlɛ́ Jehovah ɖɔ mǐ yí wǎn n’i, bɔ nǔ e wa nú mǐ wɛ é ɖe lɛ́ é bǐ nɔ su nukún mǐtɔn mɛ gbɔn? Ali e nu mǐ sixú wa mɔ̌ ɖe é ɖokpó wɛ nyí ɖɔ mǐ ní ná akwɛ́ lěe ninɔmɛ mǐtɔn yí gbe ná gbɔn é, dó nɔ gǔdo nú agun e mɛ mǐ ɖe é kpó azɔ̌ e è nɔ wa gbɔn gbɛ ɔ bǐ mɛ é kpó. Mɛsɛ́dó Pɔ́lu ɖɔ xó dó énɛ́ wú gbɔn lě: “Nú è sɔ́ jlǒ ɖagbe dó ná nǔ mɛ ɔ, nǔ e ɖo mɛ sí ɔ wɛ Mawu nɔ kpɔ́n, bó nɔ yí nǔníná énɛ́; ényí nǔ e ma ɖo mɛ sí ǎ ɔ wɛ é nɔ kpɔ́n ǎ.” (2 Kɔ. 8:4, 12) Nǔ ɖěbǔ e mǐ ná kpó ayi bǐ kpó é nɔ su nukún Jehovah tɔn mɛ, nǔ ɔ ná bó tlɛ hwe gbɔn ɖěbǔ ɔ nɛ́.—Mak. 12:42-44; 2 Kɔ. 9:7.

14. Sɔgbe xá Nǔnywɛ́xó 19:17 ɔ, linlin tɛ́ Jehovah ka nɔ ɖó dó alɔ e mǐ nɔ dó nɔví mǐtɔn e ɖo hudó mɛ lɛ́ é wú?

¹⁴ Ényí mǐ nɔ d’alɔ Klisánwun hǎtɔ́ e ɖo hudó mɛ lɛ́ é hǔn, Jehovah sɛn wɛ mǐ ɖe nɛ́. Jehovah dó akpá nú Izlayɛ́li ví lɛ́ ɖɔ émí ná sú xomɛnyínyɔ́nú e yě wa nú wamamɔnɔ lɛ́ é sín axɔ́ yě. (Sɛ́n. 15:7, 10) Nǔgbó ɔ, ényí mǐ d’alɔ nǔɖitɔ́ hǎtɔ́ e ɖo hudó mɛ é ɖé hweɖébǔnu ɔ, Jehovah nɔ mɔ ɖɔ émí wɛ è ná nǔ. (Xa Nǔnywɛ́xó 19:17.) Ði kpɔ́ndéwú ɔ, hwenu e Pɔ́lu ɖo gantɔ́ nyí wɛ é ɔ, Klisánwun e ɖo Filípu lɛ́ é sɛ́ nǔníná d’è, bɔ Pɔ́lu ylɔ́ nǔníná énɛ́ ɖɔ “vɔ̌sísá e nɔ nyɔ́ Mawu nukúnmɛ bɔ é nɔ yí gbe ná é.” (Filí. 4:18) Lin tamɛ dó mɛ ɖěɖěe ɖo agun towe mɛ lɛ́ é jí, bó kanbyɔ́ hwiɖée ɖɔ: ‘Mɛɖé ka ɖe bɔ un sixú d’alɔ a?’ Ényí mǐ nɔ zán hwenu, hlɔ̌nhlɔ́n, nǔwúkpíkpé kpó nǔɖókan kpó mǐtɔn lɛ́ dó d’alɔ mɛ ɖěɖěe ɖo hudó mɛ lɛ́ é ɔ, é nɔ su Jehovah nukúnmɛ tawun, b’ɛ nɔ mɔ dó mɔ akpáxwé Mawusinsɛn mǐtɔn tɔn ɖé.—Ja. 1:27.

15. Jehovah sinsɛn nɔ byɔ́ hwenu kpó gǎndídó kpó, amɔ̌, aniwú é má ka nyí agban bó ɖo kɔ jí nú mǐ ǎ?

¹⁵ Jehovah sinsɛn nɔ byɔ́ hwenu kpó gǎndídó kpó. Amɔ̌, é ka nyí agban bó ɖo kɔ jí nú mǐ ǎ. (1 Jaan 5:3) Aniwú? Ðó wǎn e mǐ yí nú Jehovah é wú wɛ mǐ ɖo sinsɛn ɛ wɛ. Dǒ nukún nǔ élɔ́ mɛ kpɔ́n: vǐ kpɛví ɖé ba ná ná nǔɖé tɔ́ tɔn. É sixú byɔ́ hwenu gěgé ɖo así tɔn cóbɔ é ná ɖe desɛ́ɛn ɖé, bó ná tɔ́ tɔn. Amɔ̌, é ná vɛ́ n’i ɖɔ é zán hwenu énɛ́ dó nǔ ɔ wú ǎ. É yí wǎn nú tɔ́ tɔn, bɔ xomɛ hun i ɖɔ é ná ɛ nǔ énɛ́. Mɔ̌ ɖokpó ɔ, ɖó mǐ yí wǎn nú Jehovah wútu ɔ, mǐ nɔ hun xomɛ dó zán hwenu mǐtɔn kpó hlɔ̌nhlɔ́n mǐtɔn kpó dó sɛn ɛ.

16. Sɔgbe xá Eblée lɛ́ 6:10 ɔ, nɛ̌ gǎn e mǐ mɛ ɖokpó ɖokpó nɔ dó bó ná dó dó xomɛhunhun nú Jehovah é ka nɔ cí n’i?

¹⁶ Mɛjitɔ́ wǎnyíyínɔ lɛ́ nɔ ɖó nukún ɖɔ nǔ ɖokpó ɔ lɛ́ wɛ vǐ émítɔn lɛ́ bǐ ná ná émí ǎ. Yě nɔ tuun ɖɔ vǐ ɖě gbɔn vo nú ɖě, bɔ nǔwúkpíkpé yětɔn lɛ́ kún ka lɛ́ nyí ɖokpó ɔ ó. Mɔ̌ ɖokpó ɔ, Tɔ́ mǐtɔn jǐxwé tɔn ɔ mɔ nǔ jɛ ninɔmɛ mǐ mɛ ɖokpó ɖokpó tɔn wú. Vlafo a sixú kpé wú, bó nɔ wa nǔ hú mɛ e a tuun, bó lɛ́ yí wǎn ná lɛ́ é gěgé. Alǒ, a sixú nɔ ma kpé wú bó nɔ wa nǔ gěgé mɛ ɖěvo lɛ́ ɖɔhun, ɖó  xwe, lanmɛ, alǒ, xwédo sín agban ɖěvo lɛ́ wútu. Ma nú awakanmɛ kú we ó. (Ga. 6:4) Jehovah ná wɔn nǔ e a wa lɛ́ é ǎ. É nyí a nɔ wa nǔ e wú a kpé lɛ́ é bǐ kpó linlin ɖagbe kpó ɔ, é nɔ víví n’i. (Xa Eblée lɛ́ 6:10.) Jehovah tlɛ tuun nǔ e ba ná wa wɛ a ɖe lɛ́ é. É ba ɖɔ a ní ɖ’awǎjijɛ, bónú sɛn e sɛn ɛ wɛ a ɖe é ní lɛ́ jɛmɛ nú we.

17. (a) Ényí a nɔ mɔ ɖɔ akpáxwé Mawusinsɛn mǐtɔn tɔn ɖé lɛ́ nɔ vɛ́ wǔ ɔ, étɛ́ a ka sixú wa? (b) Nɛ̌ akpáxwé Mawusinsɛn mǐtɔn tɔn e xó è ɖɔ ɖo gbǎví “ Blǒ bónú awǎjijɛ towe ní lɛ́ jɛjí” ɔ mɛ é ka ko d’alɔ we gbɔn?

¹⁷ Ényí alɔ ɖíɖó ɖo akpáxwé Mawusinsɛn mǐtɔn tɔn ɖé lɛ́ mɛ, ɖi nǔkplɔ́nkplɔ́n mɛɖésúnɔ tɔn, alǒ Mawuxó ɖiɖɔ ɖo agbawungba nɔ vɛ́ wǔ nú mǐ ɔ ka ló? Mǐ ná ɖibla mɔ ɖɔ lě do mǐ nɔ ɖ’alɔ ɖo azɔ̌ énɛ́ lɛ́ mɛ sɔ é ɔ, mɔ̌ do wɛ mǐ ná ɖu vǐví yětɔn, bɔ yě ná lɛ́ hɛn le wá nú mǐ sɔ. Mǐ sixú sɔ́ Mawusinsɛn mǐtɔn jlɛ́ dó azɔ̌ ɖé lɛ́ wú ɖi lanmɛ biba kpɔ́n, alǒ lěe è ná zán nǔxonú ɖé gbɔn é kplɔ́nkplɔ́n. Ényí ayanuɖé kpowun wɛ mǐ nɔ wá bló nǔ énɛ́ lɛ́ ɔ, yě sixú nɔ ma má mǐ. Amɔ̌, mǐ ní ɖɔ ɖɔ mǐ wá gbeta ɔ kɔn bó ná nɔ wa nǔ énɛ́ lɛ́ gbe bǐ gbe. Ðo bǐbɛ́mɛ ɔ, mǐ sixú nɔ zán cɛ́jú kléwún ɖé gbe bǐ gbe, amɔ̌ nú hwenu ɖo yiyi wɛ ɔ, mǐ sixú jɛ táan gěgé zán d’é jí jí. Ényí mǐ ɖo ɖagbe e gǎndídó mǐtɔn ɖo hinhɛn wá wɛ lɛ́ é mɔ wɛ ɔ, mǐ ná ɖibla nɔ ɖo nukún ɖó táan énɛ́ lɛ́ wɛ, bó ná ɖu vǐví yětɔn nǔgbó nǔgbó. A ka mɔ ali e nu mǐ sixú zán wlɛnwín énɛ́ ɖe ɖo Mawusinsɛn mǐtɔn mɛ é a?

18. Nǔ tají tɛ́ mǐ ka sixú wa? Ényí mǐ wa mɔ̌ ɔ, étɛ́ ka ná jɛ?

¹⁸ Nǔ tají hú gǎn e mǐ sixú wa é wɛ nyí mǐ ní sɛn Jehovah kpó ayi mǐtɔn bǐ kpó. Wǎgbɔ tɔn ɔ, mǐ nɔ ɖu vǐví gbɛzán awǎjijɛnɔ éé lɛ́ ɖó nu é ɖé tɔn, lobo nɔ lɛ́ ɖó nukún bó ná sɛn Jehovah káká sɔ́yi. (Nǔx. 10:22) Din hwɛ̌ ɔ, mǐ ɖó fífá ayi mɛ tɔn, ɖó mǐ tuun ɖɔ Jehovah nɔ d’alɔ mɛsɛntɔ́ tɔn lɛ́ ɖo tagba yětɔn lɛ́ mɛ. (Eza. 41:9, 10) É ɖo wɛn ɖɔ mǐ ɖo hwɛjijɔ ɖagbe gěgé e wú mǐ ná j’awǎ hwenu e mǐ ɖo Tɔ́ wǎnyíyínɔ mǐtɔn e bló nǔ lɛ́ bǐ, bɔ ‘susu kpó yɛ̌yi kpó jɛxá’ é sɛn wɛ é!—Nǔɖe. 4:11.