1-2. (a) Nɛ̌ acɛkpikpa ɖé lɛ́ ka fɔ́n gǔ dó togun Mawu tɔn jí gbɔn? Nɛ̌ togun Mawu tɔn ka wa nǔ gbɔn? (b) Ényí è ná bo tlɛ ɖo tagba dó nú mǐ wɛ ɔ, aniwú mǐ ka sixú j’awǎ? (Lɛ̌ ɖɔ xó dó ɖiɖe e ɖo akpa ɔ jí é wú.)

 DIN hwɛ̌ ɔ, è gbɛ́ azɔ̌ mǐtɔn, alǒ ɖó dogbó ná ɖo to 30 jɛjí mɛ gbɔn gbɛ ɔ bǐ mɛ. Ðo to énɛ́ lɛ́ ɖé lɛ́ mɛ ɔ, acɛkpikpa lɛ́ wlí nɔví mǐtɔn lɛ́ sú. Étɛ́ yě ka wa nyi do? Yě wa nǔtí nyi do ɖo Jexóva nukúnmɛ ǎ. Nǔ e yě nɔ wa kpowun é wɛ nyí ɖɔ yě nɔ xa Biblu, bo nɔ lɛ́ kplɔ́n, nɔ ɖɔ Mawuxó, lobo nɔ lɛ́ yi kplé lɛ́. Yě nɔ lɛ́ ɖó wǔ zɔ. Gbeklánxámɛ syɛ́nsyɛ́n lɛ́ ɖo ayǐ có, mɛsɛntɔ́ gbejínɔtɔ́ Mawu tɔn lɛ́ hɛn gbejíninɔ yětɔn wú; ɖo xógbe ɖěvo mɛ ɔ, yě xlɛ́ ɖɔ émí tɛ́dó Jexóva wú gbánwúngbánwún. Bɔ énɛ́ nɔ ná yě awǎjijɛ.

² Vlafo, a nǎ ko mɔ fɔtóo Kúnnuɖetɔ́ Jexóva tɔn akɔ́nkpantɔ́ ɖé lɛ́ tɔn, bo ná ko lɛ́ ɖ’ayi wú ɖɔ yě ɖo nǔ ko wɛ. Yě ɖo awǎjijɛ mɛ ɖó yě tuun ɖɔ gbejí e émí ɖe nú Jexóva é zɔ́n bɔ nǔ émítɔn nyɔ́ nukún tɔn mɛ. (1 Tan 29:17a) Jezu ɖɔ: “Awǎjijɛnɔ wɛ nyí mɛ e è dó ya ná ɖó nǔjlɔ́jlɔ́wiwa wú lɛ́ é . . . Mi j’awǎ bónú awǎjijɛ mitɔn ní túnflá, ɖó ajɔ mitɔn d’agba ɖo jǐxwé.”—Mat. 5:10-12.

3. Lěe Mɛsɛ́dó 4:19, 20 ɖɔ gbɔn é ɔ, nɛ̌ mɛsɛ́dó lɛ́ ka wa nǔ gbɔn hwenu e è dó ya nú yě ɖo xwe kanweko nukɔntɔn ɔ mɛ é? Aniwú yě ka wa nǔ gbɔn mɔ̌?

³ Nǔ e nu mɛsɛ́dó Jezu tɔn lɛ́ dɛ ɖe hwenu e è dó ya nú yě, ɖó yě ɖo wɛn ɖagbe e kúnkplá Jezu é jlá wɛ é wútu é ɖɔhun nu dɛ ɖe wɛ nɔví mǐtɔn lɛ́ lɔ ɖe égbé. Azɔn mɔ̌kpán wɛ hwɛɖɔtɔ́ ɖěɖěe ɖo Hwɛɖɔxɔsá ɖaxó Jwifu lɛ́ tɔn lɛ́ é “dó sɛ́n nú yě syɛ́nsyɛ́n ɖɔ yě ma sɔ́ ɖɔ xó dó Jezu nyíkɔ mɛ ɖě ó.” (Mɛ. 4:18; 5:27, 28, 40) Nɛ̌ mɛsɛ́dó lɛ́ ka wa nǔ gbɔn? (Xa Mɛsɛ́dó 4:19, 20.) Yě tuun ɖɔ mɛ e ɖó acɛ hú  acɛkpatɔ́ énɛ́ lɛ́ é wɛ ‘zɔ́n ɖɔ émí ní jlá togun ɔ bǐ, bo ɖe kúnnu’ bǐ mlɛ́mlɛ́ dó Klísu wú. (Mɛ. 10:42) Énɛ́ wú ɔ, Piyɛ́ɛ kpó Jaan kpó, éé nyí afɔsɔ́ɖótetɔ́ yětɔn lɛ́ é ɖɔ kpó akɔ́nkpinkpan kpó ɖɔ émí ɖó ná se tónú nú Mawu, é nyɔ́ hú émí ní se tónú nú hwɛɖɔtɔ́ énɛ́ lɛ́, bo lɛ́ ɖɔ nyi wɛn ɖɔ, émí kún ná gɔn xó ɖɔ dó Jezu wú gbeɖé ó. É cí ɖɔ yě ɖo kinkanbyɔ́ hwɛɖɔtɔ́ énɛ́ lɛ́ wɛ ɖɔ: ‘Mi ka lin ɖɔ è ná gbɔ tónú se nú Mawu e ɖó acɛ hú mi flaflá tɔn é, bo se tónú nú mi wɛ a?’

4. Étɛ́ Mɛsɛ́dó 5:27-29 ka ɖɔ mɛsɛ́dó lɛ́ wa? Nɛ̌ mǐ ka sixú wa nǔ yě ɖɔhun gbɔn?

⁴ Mɛsɛ́dó lɛ́ sɔ́ kpɔ́ndéwú ɖagbe ɖ’ayǐ, bɔ klisánwun nǔgbó lɛ́ bǐ ɖó ná xwedó, énɛ́ wɛ nyí ɖɔ “è ɖó ná se tónú nú Mawu; é nyɔ́ hú è se tónú nú gbɛtɔ́.” (Xa Mɛsɛ́dó 5:27-29.) Ée è xo mɛsɛ́dó lɛ́ ɖó gbejíninɔ yětɔn wú gúdo é ɔ, yě tɔ́n sín Hwɛɖɔxɔsá ɖaxó Jwifu lɛ́ tɔn, bɔ “xomɛ hun yě tlala, ɖó yě mɔ ɖɔ Mawu mɔ émí dó mɔ mɛ e jɛxá ya ji dó Jezu nyíkɔ mɛ é,” bɔ yě lɛ́ gbɛ kan dó wɛnɖagbejíjlázɔ́ ɔ nu!—Mɛ. 5:40-42.

5. Nǔkanbyɔ́ tɛ́ lɛ́ mǐ ka ná ná xósin ná?

⁵ Kpɔ́ndéwú e mɛsɛ́dó lɛ́ sɔ́ ɖ’ayǐ é fɔ́n nǔkanbyɔ́ ɖé lɛ́ nyi te. Ði kpɔ́ndéwú ɔ, nɛ̌ mɛsɛ́dó lɛ́ ka sixú se tónú nú Mawu hú gbɛtɔ́, bɔ ɖo hwe ɖokpó ɔ nu ɔ, yě ná lɛ́ xwedó gbeɖiɖe Mawuxówéma ɔ tɔn e ɖɔ ɖɔ è ‘ní nɔ hwíhwɛ́ mɛɖée dó acɛkpikpa ɖaxó lɛ́ glɔ́’ é gbɔn? (Hlɔ̌. 13:1, nwt) Égbé ɔ, nɛ̌ mǐ ka sixú “nɔ hwíhwɛ́ [mǐɖée] dó gǎn lɛ́ kpódó acɛkpikpa lɛ́ kpán glɔ́” lěe mɛsɛ́dó Pɔ́lu ɖɔ gbɔn é, bo ka ná lɛ́ kpo ɖo gbejí nɔ nú Mawu éé nyí Acɛkpatɔ́ ɖaxó hú gǎn mǐtɔn é wɛ gbɔn?—Ti. 3:1.

6. (a) Mɛ̌ mɛ̌ e ka nyí “acɛkpikpa ɖaxó lɛ́” e xó Hlɔ̌manu lɛ́ 13:1 ɖɔ é? Étɛ́ é ka ɖo dandan ɖɔ mǐ ní nɔ wa nú yě? (b) Étɛ́ mǐ ka ɖó ná tuun dó acɛ e acɛkpatɔ́ lɛ́ ɖó é wú?

⁶ Xa Hlɔ̌manu lɛ́ 13:1, nwt. Ðo wěmafɔ énɛ́ mɛ ɔ, xógbe “acɛkpikpa ɖaxó lɛ́” ɔ nɔ dó gesí gbɛtɔ́ ɖěɖěe ɖo acɛ kpa wɛ, bo ɖó acɛ dó mɛ ɖěvo lɛ́ jí lɛ́ é. Klisánwun lɛ́ ɖó ná nɔ se tónú nú acɛkpikpa lɛ́. Yě nɔ jɛ hun dó fífá jí ɖo to mɛ, nɔ mɔ nǔ jɛ wú ɖɔ  toví lɛ́ nɔ nyi sɛ́n, bɔ hweɖélɛ́nu ɔ, yě tlɛ nɔ jɛ hun dó togun Jexóva tɔn jí. (Nǔɖe. 12:16) Énɛ́ wú ɔ, mǐ ɖó ná nɔ sú takwɛ́ kpó kuzu kpó yětɔn yě, nɔ ɖó sísí nú yě, lobo nɔ lɛ́ wlí yɛ̌yi e jɛxá é nú yě. (Hlɔ̌. 13:7) Amɔ̌, Jexóva wɛ ná tɛn acɛkpatɔ́ énɛ́ lɛ́ wɛ zɔ́n bɔ yě ɖó acɛ e yě ɖó é. Jezu ɖe nǔgbódodó énɛ́ xlɛ́ nyi wɛn hwenu e tokpɔngán Hlɔ̌ma tɔn Pɔ́nsu Pilátu kan nǔ byɔ́ ɛ é. Hwenu e Pilátu ɖɔ ɖɔ émí hɛn ɔ, émí ná wá gbeta ɔ kɔn ɖɔ è ní hwlɛ́n Jezu, alǒ hu i é ɔ, Jezu ɖɔ n’i ɖɔ: “Ényí Mawu ma ná gbe tɔn we ǎ ɔ, a sixú ɖó acɛ ɖěbǔ ɖo jǐ ce ǎ; énɛ́ ɔ wú wɛ mɛ e jó mì ɔ hu hwɛ hú we.” (Jaan 19:11) Lěe é nyí gbɔn ɖo ninɔmɛ Pilátu tɔn mɛ é ɔ, acɛ e acɛkpatɔ́ lɛ́ kpó toxóɖɔtɔ́ lɛ́ kpó ɖó ɖo égbé é ɖó dogbó.

7. Ninɔmɛ tɛ́ lɛ́ mɛ mǐ ma ka ɖó ná se tónú nú acɛkpatɔ́ lɛ́ ɖe ǎ? Étɛ́ mǐ ka ɖó ná hɛn dó ayi mɛ?

⁷ Klisánwun lɛ́ ɖó ná nɔ se tónú nú sɛ́n e acɛkpatɔ́ lɛ́ dó bɔ yě ma t’afɔ sɛ́n Mawu tɔn lɛ́ jí ǎ lɛ́ é bǐ. Amɔ̌, ényí yě byɔ́ mǐ ɖɔ mǐ ní wa nǔ e Mawu dó sɛ́n tɔn é ɖé, abǐ yě dó sɛ́n nú mǐ ɖɔ mǐ ní ma wa nǔ e Mawu byɔ́ ɖo mǐ sí é ɖé ó ɔ, mǐ sixú se tónú nú yě ǎ. Ði kpɔ́ndéwú ɔ, yě sixú byɔ́ mɛ wínnyáwínnyá lɛ́ ɖɔ yě ní byɔ́ ahwan mɛ bá jɛ hun dó to yětɔn jí. * Alǒ, yě sixú gbɛ́ Biblu kpó wěma mǐtɔn lɛ́ kpó, bo lɛ́ dó sɛ́n ɖɔ mǐ kún ná ɖɔ Mawuxó, alǒ kplé bo sɛn Mawu ó. Ényí acɛkpatɔ́ lɛ́ zán acɛ e yě ɖó é nyi do, bo dó ya nú ahwanvú Klísu tɔn lɛ́ mɔ̌ ɔ, yě ná ɖó gbe tɔn nú Mawu! Jexóva ɖo yě mɔ wɛ.—Nǔt. 5:7.

8. Vogbingbɔn tɛ́ ka ɖo Jexóva kpó “acɛkpikpa ɖaxó lɛ́” kpó tɛ́ntin? Aniwú é ka ɖo tají ɖɔ mǐ ní tuun vogbingbɔn énɛ́?

⁸ Xókwín “ɖaxó” ɔ sín tínmɛ wɛ nyí nǔ e ɖo tɛn ɖaxó mɛ é, é nyí nǔ e ɖo tɛn ɖaxó hú gǎn mɛ é ǎ. Nǔgbó wɛ ɖɔ xógbe “acɛkpikpa ɖaxó lɛ́” nɔ dó gesí acɛkpatɔ́ lɛ́ có, mɛɖé ɖe bo ɖó acɛ bǐ mlɛ́mlɛ́, bɔ é wɛ nyí Nǔbǐwúkpétɔ́ ɔ. Azɔn mɔ̌kpán wɛ Biblu ylɔ́ Jexóva Mawu ɖɔ “Mawu Ajalɔ̌nlɔn.”—Dan. 7:18, 22, 25, 27.

9. Étɛ́ gbeyíɖɔ Daniyɛ́li ka mɔ ɖo nǔmimɔ ɖé mɛ?

⁹ Gbeyíɖɔ Daniyɛ́li mɔ nǔmimɔ ɖé, b’ɛ xlɛ́ nyi wɛn ɖɔ Jexóva ɖó acɛ hú acɛkpatɔ́ lɛ́ bǐ. Gběkanlin ɖaxó ɛnɛ wɛ Daniyɛ́li mɔ jɛ nukɔn, bɔ yě nɔ te nú acɛkpikpa e ɖ’agbɔ̌n hú bǐ ɖo gbɛ ɔ mɛ wá yi lɛ́ é kpó égbé tɔn lɛ́ kpó. Yě wɛ nyí Babilɔ́nu, Mɛdi kpó Pɛ́si kpó, Glɛ̌ki, Hlɔ̌ma kpó acɛkpikpa e ɖó agbɔ̌n hú bǐ ɖo gbɛ ɔ mɛ, bo ɖo acɛ kpa wɛ égbé é kpó, é wɛ nyí Anglo-Amérique. (Dan. 7:1-3, 17) Énɛ́ gúdo ɔ, Daniyɛ́li mɔ Jexóva Mawu b’ɛ ɖo ayǐjínjɔ́n ɖo axɔ́súzinkpo tɔn jí ɖo hwɛɖɔxɔsá ɖo jǐxwé. (Dan. 7:9, 10) Nǔ e gbeyíɖɔ gbejínɔtɔ́ énɛ́ mɔ bɔ d’é wú é nyí akpágbanúmɛ nú acɛkpatɔ́ égbé tɔn lɛ́.

10. Sɔgbe xá Daniyɛ́li 7:13, 14, 27 ɔ, mɛ̌ mɛ̌ e Jexóva ka ná acɛ bɔ yě ná kp’acɛ dó ayǐkúngban ɔ jí? Étɛ́ énɛ́ ka ɖe xlɛ́ dó wǔtu tɔn?

¹⁰ Xa Daniyɛ́li 7:13, 14, 27, nwt. Mawu yí hlɔ̌nhlɔ́n kpó acɛ kpó e acɛkpatɔ́ lɛ́ ɖó lɛ́ é bǐ sín yě sí, bo sɔ́ jó nú mɛ e jɛxá hú gǎn, bo lɛ́ ɖó hlɔ̌nhlɔ́n hú gǎn é. Mɛ̌ é ka sɔ́ ná? Mɛ e “cí gbɛtɔ́ví ɔ ɖɔhun” é; mɛ énɛ́ wɛ nyí Jezu Klísu, gɔ́ nú “togun mímɛ́ Mawu Ajalɔ̌nlɔn ɔ tɔn,” énɛ́ wɛ nyí mɛ 144000 ɖěɖěe ná ɖu axɔ́sú “káká yi mavɔmavɔ” lɛ́ é. (Dan. 7:18) É ɖo wɛn ɖɔ Jexóva wɛ nyí “Mawu Ajalɔ̌nlɔn ɔ,” ɖó éɖokpónɔ géé wɛ ɖó acɛ bo ná wa nǔ mɔ̌hun.

11. Nǔ ɖěvo tɛ́ Daniyɛ́li ka wlán b’ɛ xlɛ́ ɖɔ Jexóva wɛ nyí Ajalɔ̌nlɔn ɖo wɛ̌kɛ́ ɔ bǐ mɛ?

¹¹ Nǔ e Daniyɛ́li mɔ ɖo nǔmimɔ mɛ é dó  zǒgbe nǔ e é ɖɔ jɛ nukɔn é ɖé jí. Daniyɛ́li ɖɔ: “Mawu [jǐxwé] tɔn ɔ” “wɛ nɔ ɖe axɔ́sú sín gǎnzinkpo jí. É wɛ nɔ zé mɛ axɔ́sú.” É ɖɔ gɔ́ ná ɖɔ: “Mawu Ajalɔ̌nlɔn ɔ wɛ ɖó acɛ dó gbɛtɔ́ lɛ́ bǐ jí, . . . é nɔ ná acɛ mɛ e jló è é.” (Dan. 2:19-21; 4:14) Jexóva ka ko yí acɛ sín mɛ sí, alǒ lɛ́ ná acɛ mɛ kpɔ́n a? Ganjí!

12. Nǎ kpɔ́ndéwú lěe Jexóva nɔ ɖe axɔ́sú lɛ́ sín axɔ́súzinkpo yětɔn jí ɖo hwexónu gbɔn é tɔn ɖokpó. (Kpɔ́n ɖiɖe ɔ.)

¹² Jexóva ɖe xlɛ́ nyi wɛn ɖɔ émí wɛ ɖó acɛ ɖaxó hú gǎn dó “acɛkpikpa ɖaxó lɛ́ jí.” Mǐ ní gbéjé kpɔ́ndéwú e xlɛ́ mɔ̌ é atɔn kpɔ́n. Falawɔ́ɔn e nɔ nɔ Ejípu é sɔ́ togun Jexóva tɔn dó ɖó kannumɔ, bo gbɛ́ azɔn mɔ̌kpán ɖɔ émí kún ná jó yě dó nú yě ná yi ó. Amɔ̌, Mawu tún kan yě, bo sú Falawɔ́ɔn kún dó ɖo Xu vɔvɔ ɔ mɛ. (Tín. 14:26-28; Ðɛh. 136:15) Babilɔ́nu xɔ́sú Bɛlucasáa ylɔ́ agɔ̌ ɖokpó, bo “sɔ́ éɖée ɖó Aklúnɔ jǐxwé tɔn ɔ há jí” lobo “kpa susu nú vodún e è zé kpatágan dó bló ná lɛ́, ée è zé siká dó bló ná lɛ́,” bo gɔn susu kpa nú Jexóva. (Dan. 5:22, 23) Amɔ̌, Mawu dó winnyá nya goyítɔ́ énɛ́. “Gbe énɛ́ gbe zǎn mɛ ɔ,” è hu Bɛlucasáa, bɔ axɔ́súɖuto tɔn jɛ Mɛdinu lɛ́ kpó Pɛ́sinu lɛ́ kpó lɔ mɛ. (Dan. 5:28, 30; Dan. 6:1) Elódu Aglipa nukɔntɔn e nyí Palestine xɔ́sú é zɔ́n bɔ è hu mɛsɛ́dó Jaki, bo sú mɛsɛ́dó Piyɛ́ɛ kpó linlin ɔ kpó ɖɔ émí ná hu éɖésú. Amɔ̌, Jexóva lɔn bónú Elódu wa nǔ e wa gbé é ja é ǎ. ‘Wɛnsagun Jexóva tɔn sín alɔ jɛ wǔ tɔn,’ bɔ é kú.—Mɛ. 12:1-5, 21-23.

13. Nǎ kpɔ́ndéwú lěe Jexóva sú kún dó nú kplékplé acɛkpatɔ́ lɛ́ tɔn gbɔn é tɔn ɖokpó.

¹³ Jexóva lɛ́ ɖe xlɛ́ ɖɔ émí wɛ nyí Ajalɔ̌nlɔn nú kplékplé acɛkpatɔ́ lɛ́ tɔn lɛ́ bǐ. É fun ahwan dó Izlayɛ́li ví lɛ́ tamɛ, bo d’alɔ yě bɔ yě sú kún dó nú axɔ́sú Kanáa tɔn 31, bo yí akpáxwé gěgé ɖo Akpádídó yíkúngban ɔ jí. (Joz. 11:4-6, 20; 12:1, 7, 24) Jexóva lɛ́ d’alɔ Izlayɛ́li ví lɛ́, bɔ yě ɖu ɖo axɔ́sú Bɛni-Hadadi kpó Silíi xɔ́sú 32 kpó e tɔ́n ahwan Izlayɛ́li ví lɛ́ é jí.—1 Axɔ́. 20:1, 26-29.

14-15. (a) Étɛ́ axɔ́sú Nabukodonɔzɔ́ɔ kpó Daliwúsi kpó ka ɖɔ dó Nǔbǐwúkpétɔ́ e Jexóva nyí é wú? (b) Étɛ́ Ðɛhanwlántɔ́ ɖokpó ka ɖɔ dó Jexóva kpó togun tɔn kpó wú?

¹⁴ Azɔn mɔ̌kpán wɛ Jexóva xlɛ́ ɖɔ émí nyí Mawu Ajalɔ̌nlɔn! Hwenu e Babilɔ́nu  xɔ́sú Nabukodonɔzɔ́ɔ gó ɖó ‘lěe é syɛ́n sɔ é kpó lěe acɛkpikpa tɔn xɔ susu gbɔn é kpó wú,’ bo ma sɔ́ éɖée hwe bo yí gbe ɖɔ Jexóva wɛ nyí mɛ ɖokpó géé e susu jɛxá é ǎ é ɔ, Mawu sín alɔ jɛ wǔ tɔn, bɔ é hun alɛ. Ée Nabukodonɔzɔ́ɔ sín azɔn gbɔ gúdo é ɔ, é “dó kú nú Mawu Ajalɔ̌nlɔn” ɔ, bo yí gbe ɖɔ “Axɔ́súɖuɖu [Jexóva tɔn] ná nɔ ayǐ káká sɔ́yi.” É ɖɔ gɔ́ ná ɖɔ: “É ja nǔɖé wa gbé ɔ, mɛɖé nɔ sixú gbɛ́ ǎ.” (Dan. 4:27, 30-32) Hwenu e gbejí e Daniyɛ́li ɖe é gbɔn tɛ́nkpɔ́n nu bɔ Jexóva hwlɛ́n ɛ sín kinnikínní lɛ́ nu mɛ gúdo é ɔ, axɔ́sú Daliwúsi ɖe gbeta élɔ́ tɔ́n: “Un ná gbe ɖɔ mɛ e ɖo axɔ́súɖuto ce sín ayǐkúngban jí lɛ́ bǐ ní ɖó sísí nú Mawu Daniyɛ́li tɔn, bo ɖi xɛsi n’i. É wɛ nyí Mawu gbɛɖe ɔ. É wɛ ná nɔ ayǐ tɛgbɛ sɔ́yi. Axɔ́súɖuto tɔn ná vɔ gbeɖé ǎ. Acɛkpikpa tɔn ná nɔ ayǐ káká sɔ́yi.”—Dan. 6:8-11, 20-23, 27, 28.

¹⁵ Ðɛhanwlántɔ́ ɖokpó ɖó ayi nǔ élɔ́ wú: ‘Jexóva nɔ hɛn wě e ɖe wɛ akɔta lɛ́ ɖe ɔ gblé; é nɔ glɔ́n ali nú togun lɛ́ sín tito.’ É ɖɔ gɔ́ ná ɖɔ: ‘Nǔ nyɔ́ nú akɔta e nɔ sɛn Jexóva ɖokpónɔ é; nǔ nyɔ́ nú togun e Jexóva sɔ́ dó ɖó togun tɔn é.’ (Ðɛh. 33:10, 12) Hwɛjijɔ ɖagbe e wú mǐ ɖó ná nɔ gbejí nú Jexóva é ɖokpó nɛ́!

16. Jiɖiɖe tɛ́ mǐ ka sixú ɖó dó hwenu e “wǔvɛ́ ɖaxó” ɔ ná wá é wú? Aniwú? (Kpɔ́n fɔtóo ɔ)

¹⁶ Mǐ ko xa nǔ dó nǔ e Jexóva wa wá yi lɛ́ é wú. Étɛ́ mǐ ka sixú ɖó nukún ɖɔ é ná jɛ ɖo sɔgúdo? Mǐ sixú ɖeji ɖɔ Jexóva ná hwlɛ́n mɛsɛntɔ́ tɔn gbejínɔtɔ́ lɛ́ ɖo “wǔvɛ́ ɖaxó” e ja é hwenu. (Mat. 24:21; Dan. 12:1) É ná wa mɔ̌ hwenu e Kplékplé akɔta lɛ́ tɔn, ée è nɔ ylɔ́ ɖɔ Gɔ̌gu Magɔ́gi tɔn é ná tɔ́n ahwan mɛ ɖěɖěe ɖo gbejí nú Jexóva lɛ́ é, gbɔn gbɛ ɔ bǐ mɛ é. É nyí to 193 ɖěɖěe ɖo Gbɛ̌ kplékplé akɔta lɛ́ tɔn mɛ é bǐ ná bo tlɛ ɖo Kplékplé akɔta lɛ́ tɔn mɛ ɔ, yě ná sixú kpé wú bo fun ahwan xá Mawu Ajalɔ̌nlɔn ɔ kpó ahwankpá tɔn jǐxwé tɔn ɔ kpó ǎ! Jexóva d’akpá ɖɔ: ‘Un ná ɖe xlɛ́ akɔta lɛ́ bǐ ɖɔ nyɛ wɛ nyí Mawu e kló bo nyí Mawu mímɛ́ é, bɔ yě ná tuun ɖɔ nyi  wɛ nyí Jexóva.’—Ezek. 38:14-16, 23; Ðɛh. 46:10.

17. Étɛ́ ka ɖo te kpɔ́n axɔ́sú ayǐkúngban ɔ jí tɔn lɛ́ kpó mɛ ɖěɖěe ɖo gbejí nú Jexóva lɛ́ é kpó bɔ Biblu ɖɔ?

¹⁷ Ahwan e Gɔ̌gu ná tɔ́n togun Jexóva tɔn é ná tɔ́n kɔ dó ahwan Aamagedɔ́ni tɔn mɛ; ahwan énɛ́ hwenu wɛ Jexóva ná sú kún dó nú “axɔ́sú e ɖo ayǐkúngban ɔ bǐ jí lɛ́” é. (Nǔɖe. 16:14, 16; 19:19-21) Amɔ̌, “mɛ e nɔ wa nǔ ɖó sɛ́nxwi jí lɛ́ wɛ ná nɔ to ɔ mɛ, mɛ e ɖo gbejí lɛ́ ná nɔ fínɛ́.”—Nǔx. 2:21.

18. Étɛ́ klisánwun nǔgbó gěgé ka ɖo gbesisɔmɛ bá wa? Aniwú? (Daniyɛ́li 3:28)

¹⁸ Ðo xwe lɛ́ vlamɛ ɔ, klisánwun nǔgbó gěgé sɔ́ mɛɖésúsíninɔ yětɔn kpó gbɛ yětɔn kpó ɖ’axɔ́ nu, ɖó wǎn e yě yí nú Jexóva e nyí Nǔbǐwúkpétɔ́ yětɔn é wú. Klisánwun nǔgbó énɛ́ lɛ́ kán ɖ’é jí bá nɔ gbejí nú Jexóva. Yě cí Eblée atɔn ɖěɖěe nɔ gbejí nú Mawu Ajalɔ̌nlɔn ɔ bɔ é hwlɛ́n yě ɖo myɔkpó e mɛ myɔ ɖo jiji wɛ ɖe hɛhɛ é mɛ é ɖɔhun.—Xa Daniyɛ́li 3:28.

19. Étɛ́ jí Jexóva ka ná zɔn dó dó ɖɔ hwɛ xá togun tɔn? Étɛ́ énɛ́ ka ná byɔ́ ɖo mǐ sí din?

¹⁹ Ðɛhanwlántɔ́ Davídi ɖɔ dó lě do gbejí nɔ nú Mawu ɖo tají sɔ é wú ɖɔ: ‘Jexóva, hwi wɛ nɔ ɖɔ hwɛ xá togun lɛ́, Jexóva, ɖe xlɛ́ ɖɔ hwɛ ce jɔ, ɖó nǔ jlɔ́jlɔ́ wɛ un wa, xomɛvɔ́nɔ wɛ un nyí.” (Ðɛh. 7:9) Davídi lɛ́ ɖɔ gɔ́ ná ɖɔ: “Xomɛvɔ́ e un ɖe ɔ kpó nǔ jlɔ́jlɔ́ e un nɔ wa ɔ kpó ní hɛn mì ɖó te.” (Ðɛh. 25:21) Ali ɖagbe hú gǎn e nu è sixú zán gbɛ mɛtɔn ɖe é wɛ nyí ɖɔ è ní nɔ gbejí nú Jexóva; nǔ ɖěbǔ ná bo tlɛ ɖo mǐ gbo wɛ ɔ, mǐ ɖó ná sa gbejí e mǐ ɖe n’i é gbeɖé ǎ! Mɔ̌ mɛ ɔ, lěe nǔ cí nú Ðɛhanwlántɔ́ e ɖɔ xó élɔ́ é wɛ é ná cí nú mǐ lɔmɔ̌: ‘Nǔ nyɔ́ nú mɛ e nǔɖé ma jɛ do ɖo walɔ yětɔn wú ǎ, alǒ gbejínɔtɔ́ lɛ́, mɛ e nɔ xwedó Jexóva sɛ́n ɔ dó wa nǔ lɛ́ é.’—Ðɛh. 119:1.