1, 2. Koleā leia e tonu ke tou fai ke tou nonofo ai i le alofa o le Atua?

 E TOU fia makeke fuli ti mo saosaoa mei faʼasiga masaki. Ko ia e tou faiga ke tou kai a ni neʼa kai mālilie, mo fakatautaugaʼoi a le tino, ti mo tokaga fakamālielie kia tātou totonu. Ti e maʼua ke tou faiga ki ai. Kae o tupu e tou iloa e toe fua mālie faʼi kiate kita, e leʼaise tou ʼaga loa o tiʼaki. Kae e iai mo le tasi ake anoʼaga e tonu ai ke tou faiga ke tou saosaoa ti mo maʼua le makeke.

² E mālie kua tou iloa a Seova, talie na tou ako lana Folafola. Kae i le temi nei, e tonu ke soko atu latātou fakamakekeʼi o latātou fakakauneʼa mo ia. Na fakalotomakekeʼi e Suta a le kau Kilisiteano ke lātou “nofo mau i le alofa o le Atua” ti na toe fakasā e ia kia lātou le neʼa leia e tonu ke lotou fai. Na pati a ia kia lātou: “Kotou faufau koutou totonu i lakoutou tui maokioki.” (Suta 20, 21) Ko ia, e mafai fefeʼaki ke tou fakatuputupu latātou tui ke makeke?

3-5. (1) Koleā le manatu e loto e Satana ke ke maʼua o uiga mo fakatotonu alā a Seova? (2) Ti koleā lau manatu o uiga mo lao ti mo pelesepeto a Seova?

³ E maʼuiga ake a lau taupau le manatu leia, e leʼaise tasi ake a neʼa e toe mālie ake i lau fakalogo leia kia Seova. E loto a Satana ke ke manatu, e faigataʼa ʼai le fakalogo ki  fakatotonu alā a le Atua, ti e ke maʼuli fiafia ake loa mo kāpau e ke fakalogo faʼi ki lou loto, o ke filifili le neʼa leia e mālie mo leia e veli. Ti ko manatu anā na faiga a ia ke tui e le kakai talu mei le ōloto o Eteni. (Senesi 3:1-6) I le temi nei, e toe soko faʼi lana fai le neʼa lenā.

⁴ E tonu ko ia a Satana? E faigataʼa ko ia a fakatotonu alā a Seova? Leʼai. Fakakaukauʼi ake muʼa sakinake la, e ke ʼevaʼeva i se malaʼe fulumalie e saʼele ai a fenua. Ti e ke tio ki se ā tauʼaluga leia e tapono ai le ano ki leia ake fētuʼu o le gāneʼa lenā e ke saʼele ai. E lagi ke pati feneʼeki loa: “Koleā ko ia e leʼaise mafai ke kau fakalaka ki leia ake fētuʼu?” Kae i le temi lenā, e ke logo ai ki le gugulu o se laione i leia ake fētuʼu o le ā. E koi ke ʼaga faʼi ko ia o taupau lau manatu, i lau pati leia pe koleā e leʼaise mafai ke ke ano ki leia ake fētuʼu o le ā? E ke fiafia loa talie e puipui a koe e le ā lenā, ti e leʼaise mafai ke kai a koe e le laione. Ko ia e fakatātā a pelesepeto a Seova pe le ā lenā, ti ko le Tiapolo ki le laione. E fakatokaga mai a le Folafola a le Atua: “Kotou fakapotopoto, mo alaala talie ko lokoutou fili, le Tiapolo, e taka ofaipe se laione gugulu, o afa pe ko ai leia e kai loa e ia.”—1 Petelo 5:8.

⁵ E loto Seova ke tou maʼuli fiafia. E se loto a ia ke fakasalaʼi tātou e Satana. Ko ia na soli mai e Seova a lao mo pelesepeto ke puipui ai tatou ti ke tou toe maʼua ai mo le maʼuli fiafia. (Efeso 6:11) Na tosi e Sakopo: “Ko leia e tio loloto ki le lao saosaoa, lao o le lauatea, ti e kataki fualoa . . . e manuia loa i lana gaoi.”—Sakopo 1:25.

6. Koleā e mafai ke tou tui papau ai ko tokoi alā e tuku mai e Seova e fua manuʼia loa ki lotātou maʼuli?

⁶ Mokā tou fai le neʼa leia e kole mai ki ai a Seova, ti e toe fīmālie ake lotātou maʼuli ti e toe makeke ake mo latātou fakakauneʼa mo ia. Sakinake la, mokā tou faikole sosoko kiate ia, ti e fua manuʼia ai kia tātou. (Mateo 6:5-8;  1 Tesalonika 5:17) Mokā tou fakalogo kiate ia o tou maʼopoʼopo o atolasio kiate ia mo tou fefakalotomakekeʼaki, ti e tou fiafia ʼai. Ti ka tou kau makeke ki le gaʼoi faifakamafola ti mo le fai ako, ti e tou toe fiafia ai. (Mateo 28:19, 20; Kalate 6:2; Epeleo 10:24, 25) Ka tou fakakaukau ki tapuakina alā e tou maʼua mei le fai o neʼa anā, ti e tokoi mai ke tou fakamāʼoki ai, ko tokoi alā e tuku mai e Seova e fua manuʼia loa ki lotātou maʼuli.

7, 8. Koleā loa ka tokoi mai ke leʼaise tou ʼī ki faigataʼaʼia alā e mafai ke tau kia tātou?

⁷ E mafai ke tou ʼī na tou felāvei mo ni faigataʼaʼia kae asiasiʼi ai latātou tui ti e mafai ai ke faigataʼa latātou ʼaga o tauʼi. Kāpau e ke logoʼi le neʼa lenā, ti e tonu ke ke manatuʼi le pati leinei a Seova: “Ko au, [“Seova,” MN] lou Atua, e kau ako a koe ke ke manuia, e kau taki a koe i le ala leia e  tonu ke ke mulimuli ai. Oi, amusia ake ke ke tokaga ki aku folafola! E ifo loa kiate koe ni tapuakina ofaipe se vaitafe, ti e au loa kiate koe le manuia ofaipe ni galu o le tai!”—Esaia 48:17, 18.

⁸ Kāpau e tou fakalogo kia Seova, ti e tou maʼua loa le tokamālie o fai pe se vaitafe leia e leʼaise toe malō ti ko latātou faitotonu leia e fakatātā ki atātou aga mālilie, e fai loa pe galu alā o le tai e pale o tau ki le ʼone ti e toe ifo ki tai. Ko ia, logo ai pe koā a faigataʼaʼia e mafai ke tau mo tātou, kae e tonu ke tou nofo agatonu kia Seova. E fakapapau mai i le Tosi-Tapu: “Ke ke toe tuku lou mauli [“Seova,” MN] ti e poupou loa e ia a koe, e leaise tuku loa e ia ke siga le tagata agatonu i se aso.”—Pesalemo 55:23.

9, 10. Koleā le fakaʼuiga o le ʼatuʼatu?

⁹ Kāpau e ke fakamakekeʼi lau fakakauneʼa mo Seova, “e ke tuputupu loa o ke liliu ko se tasi kua ʼatuʼatu i le potu fakalaumālie”. (Epeleo 6:1, MN) Kae koleā le fakaʼuiga o le ʼatuʼatu?

¹⁰ E leʼaise tou liliu fua ko ni Kilisiteano kua ʼatuʼatu i le temi leia e tou mātutuʼa ai. Ke tou liliu ko se tasi kua ʼatuʼatu, e tonu ke tou tuku a Seova ke liliu ko lotātou kaukauneʼa mālie ti ke tou tio ki neʼa fuli o fai pe le tio a Seova. (Soane 4:23) Na tosi e Paulo: “Ko latou ala e mauli o mulimuli ki le kanofi e tokaga ki nea o le kanofi, kae ko latou ala e mauli o mulimuli ki le Laumalie e tokaga ki nea o le Laumalie.” (Loma 8:5) Ko se tasi leia e ʼatuʼatu, e leʼaise fakamuʼamuʼa e ia a fakafiafia ti mo koloa kesekese fuli. Ko le neʼa leia e takimuʼa kiate ia i lona maʼuli, ko lana tausi kia Seova ti e toʼo e ia ni tonu fakapotopoto. (Taagapati 27:11; lau Sakopo 1:2, 3.) E leʼaise tuku e ia a se tasi ke ekenaki a ia ki le faʼī mo se neʼa e veli. Ko se tasi leia kua ʼatuʼatu, e iloa  e ia le neʼa leia e mālie ti e fakatotonu ke fai e ia le neʼa lenā.

11, 12. (1) Koleā na pati ki ai a Paulo o uiga mo se Kilisiteano leia “kua poto mālie”? (2) Fakamatala pe koleā leia ko le liliu ko se Kilisiteano kua ʼatuʼatu e fai pe se tagata fai manogi?

¹¹ E maʼua ke faiga fakamālotoloto ke mafai ai le liliu ko se tasi kua ʼatuʼatu. Na tosi e Paulo: “Kae ko le magiti makeke e tuku ki tagata ku ʼatuʼatu, kia lātou alā kua poto mālie i le fakakesekeseʼi o le mālie ti mo le veli.” (Epeleo 5:14, MN) Ko le kupu “poto mālie” e fai pe le akoako o se tasi ki le fai manogi.

¹² Mokā tou tio ki neʼa alā e mafai ke fai e se tasi leia e fai manogi, ti e tou iloa ai na maʼua kiate ia se temi fualoa ke akoako ai ke poto mālie i le fai manogi. Na se tupu ake a ia ko se tasi e fai manogi. Mokā tupu ake se gā toe, e leʼaise poto a ia i le fakaʼaogaʼi o ona vaʼe ti mo ona lima. Kae i le ano o le temi, e akoako a ia ke poto i le toʼo o ni neʼa ti mo le saʼele. Kāpau e akoako fakamālielie a ia, ti e mafai ke liliu o poto i le fakaʼaogaʼi o koga fuli alā o lona tino. O toe felaʼaki mokā tonu ke tou liliu ko se tasi e ʼatuʼatu, e maʼua ki ai ni temi ke tou akoako ai.

13. Koleā loa ka tokoi mai ke tou popoto i le manatu pe Seova?

¹³ I le tosi leinei, na tou tioʼi pe fefeʼaki latātou manatu ti mo tio o fai pe Seova. Na tou toe matala ai ki le maʼuiga leia o fakatotonu a Seova ti na tou ako ke tou fia fai ki ai. Mokā tou toʼo ni tonu, ti e tou fakakaukau feneʼeki: ‘Koā loa a lao pe ko pelesepeto o le Tosi-Tapu e tonu ke kau fakaʼaogaʼi i le anoʼaga leinei? E fefeʼaki laku ʼaga o maʼuliʼi? Koleā loa e loto e Seova ke kau fai?ʼ—Lau Taagapati 3:5, 6; Sakopo 1:5.

14. Koleā leia e tonu ke tou fai ke tou fakamakekeʼi ai latātou a tui?

¹⁴ E leʼaise tonu ke tou fakagato le fakalotomakekeʼi o latātou tui kia Seova. Ko le kai o se neʼa kai leia e mālie, e mafai  ke tou makeke ai. O toe felaʼaki mo latātou tui, e tonu ke tou ako a neʼa alā o uiga mo Seova ke fakamakekeʼi ai latātou tui. I latātou kamata ako le Tosi-Tapu, na tou ako ai ni māʼoki tāfito o uiga mo Seova ti mo neʼa alā e fai e ia. Kae i le ano o le temi, e tonu ke tou toe fakaloloto a latātou fia matala o uiga mo neʼa alā e tou ako i le Folafola a Seova. Ti ko le neʼa lenā na fia fakasā e Paulo i lana tosi: “E tuku le magiti makeke ki tagata kua katoa.” I le maʼuliʼi o neʼa alā e tou ako, e tou toe fakalasi ai lotātou a poto. E pati i le Tosi-Tapu: ‘E maʼuiga lasi ake le poto.ʼ—Taagapati 4:5-7; 1 Petelo 2:2.

15. Koleā leia e maʼuiga ake ke tou alofa māʼoki kia Seova ti mo otātou fetaina mo tuagaʼane?

¹⁵ E mafai ke saosaoa a se tasi mei faʼasiga masaki kesekese ti ke toe maʼua e ia le makeke. Ti ke saosaoa a ia mei potu anā, e tonu ke tokaga tuʼumaʼu a ia kiate ia. E toe felaʼaki ki se tasi leia kua ʼatuʼatu, e tonu ke faiga fakamālotoloto a ia ke mafai ai lana taupau le makeke o lana fakakauneʼa mo Seova. E fakamanatu mai e Paulo: “Ke kotou fakatiotio kia koutou totonu, ke iloa pe kotou nonofo i le tui; kotou asiasii koutou totonu.” (2 Kolinito 13:5) Kae leʼaise feʼauga fua ke makeke le tui. Kae e tonu foki ke soko atu le tuputupu o lotātou alofa kia Seova mo otātou fetaina mo tuagaʼane. Na pati a Paulo: “Kapau e kau maua . . . le iloa . . . ti kapau e kau maua loa le tui katoa o kaku ki le siki o mauga, kae e leaise kau maua le alofa, ko le nea noa au.”—1 Kolinito 13:1-3.

16. Koleā e loto Satana ke tou manatu ki ai?

¹⁶ E loto Satana ke tou manatu, e leʼaise mafai ke mālieʼia tātou e Seova. E loto a ia ke tou lotogaʼegaʼe ti ke tou manatu e leʼaise maʼua ni puleʼaki ki otātou faigataʼaʼia. E se loto a ia ke tou fānaki ki otātou fetaina mo tuagaʼane. Ti e se loto a ia ke tou fiafia. (Efeso 2:2) E iloa Satana e mafai ki atātou  manatu alā e se mālie ke fakatupu mamae kia tātou ti e toe mafai ke fakalotogaʼegaʼeʼi ai latātou fakakauneʼa mo le Atua. Kae na soli mai e Seova se amanaki ke tokoi mai ke tou tauʼi ai a manatu veveli anā.

17. Koleā e maʼuiga ai latātou amanaki?

¹⁷ E fakatatau i le Tosi-Tapu i 1 Tesalonika 5:8, a lotātou amanaki ki se puloga leia e puipui ai le ulu o se tagata solia lolotoga o se tau. E fakaʼigoaʼi e ia le puloga lenā ko le “puloga tau o le fakamauli.” Ko le amanaki ki fakapapau alā a Seova e puipui ai loa lotātou atamai ti e tokoi mai loa ke tou tauʼi a manatu veveli.

18, 19. Na fakalotomakekeʼi fefeʼaki e le amanaki a Sesu?

¹⁸ Na maʼua e Sesu le makeke mei lana amanaki ki fakapapau alā a Seova. I le pō fakaʼoki a Sesu i le kele, na maʼua ke tauʼi e ia ni faigataʼaʼia. Na kākāʼi e ia e lona kaukauneʼa. Ko le tasi na pati e leʼaise e iloa e ia a ia. Ko ʼiki na lotou tītuʼa kiate mo sola. Ko kakai o lona fenua na lotou fakafesagai  kiate ia ti na lotou loto ke mateʼi a ia i se pou fakamamae. Koleā leia na tokoi kiate ia ke mafai ai lana katakiʼi a faigataʼaʼia fuli anā? “Na tali ia a mamae o le [“pou,” MN] ti na fakanoai ia le luma o le mate lena, talie na tio a ia ki le fiafia leia na tuu i ona mua, ti kua nofo i le lima atamai o le agaiaga o le Atua.”—Epeleo 12:2.

¹⁹ Na iloa e Sesu, kāpau e nofo agatonu a ia, ti e fakakololiaʼi loa e ia a lona Tamana ti mo fakamāʼoki ai ki le gutu loiloi a Satana. Na maʼua e ia se fiafia lasi mei lana amanaki ki fakapapau anā. Na toe iloa e ia ku vave faʼi lana toe liliu ki lona Tamana i selo. Na tokoi le amanaki lenā kiate ia ke mafai ai lana katakiʼi a anoʼaga fuli. Ko ia, o fai pe Sesu, e tonu ke tou fakamuʼamuʼa i atātou manatu a latātou amanaki. E tokoi mai loa ke tou kataki logo ai pe koleā leia e mafai ke soko.

20. Koleā loa ka tokoi atu ke ke taupau se manatu mālie?

²⁰ E tio Seova ki lau tui ti mo lau kataki. (Esaia 30:18;  lau Malakia 3:10.) E fakapapau e ia “e soli atu loa e ia kiate koe le nea leia e oli ki ai lou loto.” (Pesalemo 37:4) Ko ia ke ke fakamuʼamuʼa i au manatu a lau amanaki. E loto Satana ke tou lotogaʼegaʼe ti ke tou manatu e leʼaise fakasoko loa e Seova ana fakapapau. Kae e tonu ke tou tauʼi a manatu veveli anā. Kāpau e ke logoʼi kua ke kamata lotolotolua o uiga mo lau amanaki, kole kia Seova ke tokoi atu. Ke ke manatuʼi pe koleā e pati i Filipe 4:6, 7: “Aua na kotou tokaga mamae ki se nea e tasi, kae kotou fakasa ki le Atua a nea ala e aoga kia koutou i ni kole, mo ni kolekole, ti mo ni fakafetai, ti ko le tokamalie o le Atua, leia e fakalaka ake i atamai fuli, e taupau ia loa okoutou loto mo akoutou manatu ia Sesu-Kilisito.”

21, 22. (1) Koleā le fakatuʼutuʼu a Seova ki le kele? (2) Koleā loa e ke fakatotonu ke ke fai?

²¹ E tonu ke ke toʼo tuʼumaʼu se temi feʼauga ke ke fakakaukau ai ki neʼa fulumalie alā ka tou maʼua loa i le temi kāʼau. Ku vave le atolasio o fenua fuli kia Seova. (Apokalipisi 7:9, 14) Fakakaukauʼi ake le maʼuli i le mālama foʼou, e toe mālie ake loa i neʼa fuli alā e leʼaise tou amanaki ki ai. E puliʼi loa a Satana mo ana kau temonio ti mo agaveveli fuli. E leʼaise toe masaki ti mo leʼaise ke toe mate loa. E ke ala ake loa i usu fuli e leʼaise ke toe gaʼegaʼe loa ti mo fiafia e ke maʼuli. E gaʼoi fakatasi fuli loa a fenua ke fakaliliu ai le kele ko se palatiso. E kakai fuli loa a fenua ki neʼa kai mālilie ti e lātou maʼua loa se nofoʼaga e tokamālie. E leʼaise toe agaveveli loa a fenua mo agamakeke. E lātou feʼagamālieʼaki loa. Ko ia, ko kakai fuli i le kele e lātou maʼua loa “le lauatea o fanau a le Atua i le kololia.”—Loma 8:21.

²² E loto Seova ke koulua liliu o kaukauneʼa mālie tukupau. Ko ia, fai a neʼa fuli e ke mafai ke ke fakalogo ai kiate ia ti ke ke fakafeofi ai kiate ia i aso fuli. Eio, ke tou nonofo maʼu ai i le alofa o le Atua o leʼegato.—Suta 21.