Ko Yahuwah a humi dewgal aranal ngal. Deftere Allah nden wi’i o tagi debbo arano on « o addani mo Aadama ». Baaba Aadama weltino haa o inni : « E hino non ƴi’e ƴi’e an, e ɓandu ɓandu an » (Fuɗɗoode nden 2:22, 23). Yahuwah no faalaa yo gorko e ɓeyngu mun heɓu weltaare e saa’iiji ɗin fow.

Si on jommbii maa on jommbaama, on sikkay piiji ɗin fow timmi. Kono tigi tigi on, gorko e ɓeyngu mun, yiɗindirɓe heɓay liddondiral (1 Korenti 7:28). E nder ndee deftere, on yi’ay tugaale Deftere Allah nden. Si on huutorii ɗun, on waaway heɓude weltaare ka dewgal mon e ka ɓeynguure mon (Zabuura 19:8-11, TMN).

KO DEFTERE ALLAH NDEN WI’I KON : Ko gorko on woni hoore ɓeynguure nden (Efeesi 5:23).

Si tawii ko on moodibbo, Yahuwah no taɲɲinii ka dankoɗon ɓeyngu mon moƴƴa (1 Petruusu 3:7). O tagiri mo fii wallitagol on. Himo faalaa yo on jogoro mo e hoore teddungal e yiɗon mo (Fuɗɗoode nden 2:18). Hiɗon haani yiɗugol ɓeyngu mon moƴƴa e waɗon ko nafata mo (Efeesi 5:25-29).

Si tawii ko on sonnaajo, Yahuwah no taɲɲinii ka teddinon moodi mon moƴƴa e wallon mo no o hunnira haajuuji makko ɗin (1 Korenti 11:3 ; Efeesi 5:33). Ko yo on wonu ɓaawo makko hara on wullitaaki (Koloosi 3:18). Si on waɗii ɗun, on ɓurtay labeede yeeso moodi mon e yeeso Yahuwah (1 Petruusu 3:1-6).

KO HAANUƊON KON WAƊUDE :

• Lanndee ɓeyngu mon maa moodi mon honno wonirton moodi moƴƴo maa ɓeyngu moƴƴo. Jentee moƴƴa e waɗon ko haani kon fii yo on ɓeydu waɗugol ko moƴƴi

• Muɲɲee. Neeɓay si anndon honno gerdirton fii mo kala e mon no weltinira oya

KO DEFTERE ALLAH NDEN WI’I KON : Hiɗon haani ndaarude ko nafata moodi mon maa ɓeyngu mon (Filipii 2:3, 4). Jogoree moodi mon maa ɓeyngu wa jaaman, annditon Yahuwah no yamiri jiyaaɓe makko ɓen yo wonu newaniiɓe fow (2 Timotee 2:24). « Haalugol hara miijitaaki no wa’i wa tufirgol goɗɗo kaafa, kono ɗenngal mokobaa ko lekki. » Ko ɗun waɗi, suɓee ko haaloton kon (Tindi 12:18, TMN). Ruuhu Yahuwah on wallay on no yewtiron no moƴƴiri e hoore giggol (Galaasi 5:22, 23 ; Koloosi 4:6).

KO HAANUƊON KON WAƊUDE :

• Toree Allah fii no waɗiron doy e no heɓiron ɓernde laaɓunde adaade yo on yewtude fii ko hitti onon e moodi mon maa ɓeyngu mon

• Miijitee moƴƴa ko haaloton kon e no haalirton non

KO DEFTERE ALLAH NDEN WI’I KON : Si on jommbii maa on jommbaama, haray on woni « gooto » onon e ɓeyngu mon maa moodi mon. (Matta 19:5.) Kono ko on yimɓe ɗiɗo, mo kala e needi mun. Ko ɗun waɗi hiɗon haani anndude honno gerdirton fii yo on heɓu miijo wooto e noone goote (Filipii 2:2). Fewjugol e hoore pottal no moƴƴi. Deftere Allah nden wi’i : « E nder diisagol, eɓɓoore gasay » (Tindi 20:18, TMN). Accee tugaale Deftere Allah nden ɗowa on siɗon fewjodude (Tindi 8:32, 33, TMN).

KO HAANUƊON KON WAƊUDE :

• Yewtee ɓeyngu mon maa moodi mon fii ko miijiɗon kon

• Yewtidee ado yo on waɗude ahadi