Yahuwah no yamiri en « yiɗugol sella-findeyaagal ». (Mikaa 6:8, TMN.) Ɗun-le no ɓuri e moƴƴude ka dewgal mon ɓayri ɓaawo sella-findeyaagal, hoolaare alaa. Ko hoolaare yaɲɲata giggol.

Hannde sella-findeyaagal alaa e dewle buy. Fii danndugol dewgal mon ngal, hiɗon haani waɗugol piiji ɗiɗi.

KO DEFTERE ALLAH NDEN WI’I KON : Taskee, anndon « ko ɓuri moƴƴude kon ». (Filipii 1:10.) Dewgal mon ngal ko huunde hittunde e nder ngurndan mon ɗan. Waɗee ngal ko adii kon.

Yahuwah no faalaa yo on wattan yila e ɓeyngu mon maa moodi mon e feƴƴindinon ngurndan mon ɗan (Waajotooɗo on 9:9, TMN). O hollii on ko laaɓi pos, wonaa yo on welsindo e ɓeyngu mon maa moodi mon. Kono, mo kala ko yo waɗu ko weltinta oya (1 Korenti 10:24). Waɗee fii no ɓeyngu mon maa moodi mon anndira himo yiɗaa.

KO HAANUƊON KON WAƊUDE :

• Waɗee fii no wondiron e ɓeyngu mon maa moodi mon saa’i woo saa’i, wattanon yila e makko

• Yo miijo mon ngon wonu « menen » hara wonaa « min »

KO DEFTERE ALLAH NDEN WI’I KON : « Kono min mi wi’ay on, kala ndaaruɗo debbo fii himmangol mo, haray ontigi jeenii mo ka ɓernde mun » (Matta 5:28). Si tawii goɗɗo no miijitaade fii debbo goo maa gorko goo, haray o laaɓanaa ɗimmo makko.

Yahuwah daali ko yo on « danndu ɓernde » mon nden. (Tindi 4:23, TMN ; Yeremiiya 17:9, TMN.) Fii waɗugol ɗun, wonaa yo on ɗuuɗu gite (Matta 5:29, 30). Ko yo on jokku misal annabi Ayyuuba ngal, waɗuɗo ahadi hakkunde makko kanko e gite makko ɗen fii wota o ndaaru debbo njanano o himmanoo mo (Ayyuuba 31:1, TMN). Wakkilee hara on ndaaraali filmu porno few. Etee hara on yiɗaali goɗɗo goo sinaa ɓeyngu mon maa moodi mon.

KO HAANUƊON KON WAƊUDE :

• Hollee woɓɓe goo hiɗon humondiri e ɓeyngu mon maa moodi mon

• Annditee fii ɓeyngu mon maa moodi mon e selon kala ko sonnjata mo wano keleyaagal