ALLA haajino jiyaaɓe makko ɓen wonndema gomɗinal maɓɓe ngal ndaarete. Daaluyee makko on wi’i : « Wonon hakkilanɓe e reeniiɓe, ko fii liddotooɗo on on, ɗun ko Ibuliisa, no waɗude yaha ara, riggora wa ngayuuri, hara no ɗaɓɓa ko seekita » (1 Petruusu 5:8). Ko honno Seytaane etortoo bonnugol gomɗinal mon ngal ?

Seytaane huutoray woɓɓe goo, hay ɓee ɓe yiɗuɗon fii haɗugol on janngugol Deftere Alla nden. Ko fii ɗun annabi Iisaa wi’i : « Yimɓe suudu ontigi ndun [wonata] ayɓe makko » (Matta 10:36). Musiɓɓe mon ɓen e njaatigiiɓe mon ɓen haray anndaa piijii moƴƴuɗi ko wonuɗon e janngude kon ka nder Deftere Alla. Maa haray hiɓe huli fii ko woɓɓe goo miijotoo. Kono Deftere Alla nden wi’i : « Diwnugol yeeso yimɓe ko ɗun wonata bappeeru, kono hooliiɗo Yahuwah on danndoyte » (Tindi 29:25). Si on accitii janngugol Deftere Alla nden fii weltingol ɓerɗe yimɓe, ɗun weltinay Alla ? Waawataa wonde ! E senngo goo, si en hollii gomɗinal haqiiqawal, Alla wallay en. « Enenle hinaa en yiltorooɓe ɓaawo fii hayrugol, kono ko en gomɗinɓe fii dandegol » (Yahuudiyankeeɓe 10:39).

Annditee ko Dumas feƴƴinnoo kon, mo yewtunoɗen fii mun on. Ka fuɗɗoode, ɓeyngu makko jalayno mo sabu gomɗinal makko ngal. Kono ɓawto ɗun, ɓeyngu makko tawtuno mo fii janngugol Deftere Alla nden. Ko wano non kadi, si on jokkii waɗugol ko haani kon, on battinay njaatigiiɓe mon ɓen e musiɓɓe mon waɗugol ɗun kamɓe kadi. Ko ɓuri kon, musiɗɗo mon on « gomɗiniray sabu kuuɗe [mon ɗen] e ɓaawo kongol, e yi’ugol [...] jikku mon laaɓuɗo wonduɗo e teddungal on » (1 Petruusu 3:1, 2).

Seytaane waɗay yimɓe ɓen miijoo kadi hiɓe ɗuuɗiraa golle ko haɗata ɓe janngugol Deftere Alla nden. Haray himo yiɗi yo satteendeeji ngurndan ɗin, wano maapunde fii hoore mon e fii mbuuɗi waɗa gomɗinal mon ngal ronka tiiɗude, « ko fii haray [daalol] ngol moɗiraama anndeeji aduna » fii no gomɗinal mon ngal wonira anngal kuuɗe (Markuusa 4:19). Wota on tewto sifa ɗun ! Deftere Alla nden wi’i : « Ngurndan  poomayankejan ɗan ko yo ɓe ande an Alla Bajjo Goongaajo on, e Iisaa Almasiihu, mo nuluɗaa on » (Yuuhanna 17:3). Ko goonga, si on jokkii janngugol fii Alla e fii annabi Iisaa, Almasiihu on, ko ɗun okkata on ngurndan poomayankejan ka Aljanna !

Annditee fii annabi Muusaa, tawanooɗo e ɓeynguure lanɗo Misira on. Himo waawunoo ɗaɓɓude jawdi, darja e laamu. Kono ko « tampindineede e jamaa Alla on [ɓurannoo] mo, edii weltorgol junuubu e nder saa’ihun ». Fii honɗun ? « Ɓay himo catornoo wa sutiiɗo on mo yi’otaako » (Yahuudiyankeeɓe 11:24, 25, 27). Ko goonga, annabi Muusaa no gomɗinoo Alla ko tiiɗi. O Waɗuno faale Alla on yeeso faale makko on. Ko sabu ɗun Alla barkini mo moƴƴa. Si on waɗii sifa ɗun, Alla barkinay on onon kadi.

Seytaane etoto ɲosagol on e sifaaji sertuɗi. Kono wota on accu o hewta on. Deftere Alla nden wi’i : « Ɗartoɗon Ibuliisa, ɗun o dogay, o woɗɗoo on » (Yaaquuba 4:7). Ko honno dartortoɗon mo ?

Jokkee janngugol Deftere Alla nden. Janngee Daaluyee Alla on ɲannde woo ɲannde. Taskoɗon ko nde janni kon. Huutoron ko nde waajii kon. Si on jokkii waɗugol ɗun, on ƴettay « aalaaji Alla ɗin fow, » fii no waawiron dartaade Seytaane (Efeesi 6:13).

Jokkondiree e yimɓe maruɓe gomɗinal haqiiqawal. Ɗaɓɓitee janngayɓe, taskotooɓe e huutorayɓe Deftere Alla nden. Ko sifa ɓen miijondiranta e waawata « wakkilindirde ka giggol e ka kuuɗe moƴƴe, [...] [ɓe wakilindirana] ». Ɓe waaway on wallude no gomɗinal mon ngal tiiɗira (Yahuudiyankeeɓe 10:24, 25).

Ɓadee Yahuwah. Toree Alla ballal e hooloɗon mo. Wota on yejjitu, Alla no faalaa on wallude. « Fawee anndeeji mon ɗin fow e hoore [Alla], ko fii o kippay fii mon » (1 Petruusu 5:6, 7). « Alla ko SellaFindeejo, o newnataa ndarndeɗon toonin doole mon ɗen, kono e nder ndarndannde nden o adday feere no sortoron e mun, waawiron nde dartorde » (1 Korenti 10:13).

Seytaane no liggitude Alla, himo wi’a hay gooto luttataa rewude Alla e nder tampere. Kono hiɗon mari feere hollugol Seytaane ko o fenoowo ! Alla daali : «  Wonu mokobaa, yo ɓiɗɗo an, weltinaa lan ɓernde nden fii no mi jaabora wonɗo lan e liggitude on » (Tindi 27:11). Hollee hiɗon mari gomɗinal haqiiqawal !