ALLA daaluno wonndema o toɗɗoto Almasiihu on fii yo o wonu Ardiiɗo yimɓe ɓen fow. Ko Alla anndi sifa ardiiɗo mo faalaɗen on tigi tigi e o suɓii ɓuruɗo moƴƴude on. Ko ardiiɗo sifa hommbo Almasiihu on wonani en ? Ko sooriijo dolnuɗo ? Ko politisienjo ɲeeɲuɗo ? Ko aaden faamuɗo ? Wano no Deftere Alla nden holliri non, Almasiihu on, noddaaɗo annabi Iisaa, hari ko o annabaajo hertiiɗo (Matta 23:10).

Alla waɗi annabi Iisaa jibinaa timmuɗo, ɓurnaaɗo. Kadi, annabi Iisaa dartino kala etaare ko Seytaane waɗi fii yeenugol mo. E kala ko annabi Iisaa haalaynoo e waɗaynoo, o holluno honno bawgal Alla ngal, peewal Alla ngal, faamu Alla ngun e giggol Alla ngol huutortee. Ndaaren ko misal makko ngal jannata en.

O huutorno bawgal ngal Alla okki mo ngal fii wallugol yimɓe. Annabi Iisaa hari no kippi fii yimɓe. O huutorno bawgal makko ngal fii wallugol ɓe. O wi’i : « Oo jamaa no yurmammi [...] ɓe alaa ko ɓe ɲaama » (Markuusa 8:2). Ontuma annabi Iisaa waɗi kaawee, o ɲammini jamaa moolanaaɗo arunooɗo jentagol ko o jannaynoo kon.

Annabi Iisaa hari no yiiloo, janna e « ɲawndora kala noone ɲabbeeli e nawnaaje yimɓe ɓen » (Matta 4:23). Hino anndaa, yimɓe buy jokkayno mo e « mo kala e maɓɓe no faalanoo mo meemude, ɓay himo wondunoo e bawgal ɲawndaynoongal ɓe fow » (Luuka 6:19). Tigi tigi on, annabi Iisaa « ardaali fii kurkanegol, kono ko fii kurkanagol, okkitira ngurndan mun ɗan fii cottudi ɗuuɗuɓe » (Matta 20:28). a Ko ardiiɓe njelo waawi waɗude sifa ɗun ?

O jokkuno peewal Alla ngal. Annabi Iisaa ɗoftino Alla e o teddinno sariya makko on. Wano Deftere Alla nden holliri non, o wi’i : « Fii waɗugol faale maa on, yaa Alla an, ɗun ko weltaare an, sariya maa on no ka nder ɓernde an » (Zabuura 40:8). Annabi Iisaa joggorno fow, galo, miskiino, gorko e debbo, fayɓe e mawɓe e hoore teddungal e o ɓurnaali hay gooto wano no Alla joggorii fow non. Ɲannde goo, taalibaaɓe annabi Iisaa ɓen toŋanno mawɓe faalonooɓe addude paykoy mun koy ka annabi Iisaa. Kono annabi Iisaa wi’i ɓe : « Accee paykoy koy ara e an, wota on haɗu koy, ko fii laamu Alla ngun ko sifa makkoy wonani » (Markuusa 10:14).

O holluno faamu Alla ngun. Annabi Iisaa no faamunoo yimɓe moƴƴa. « Ko fii himo andunoo ko woni ka nder ɓernde neɗɗanke » (Yuuhanna 2:25). Ko ayɓe annabi Iisaa ɓen immini woɓɓe arugol nannga mo, hay kamɓe ɓe haaluno : « Hay gooto yewtiraali wano oo neɗɗo yewtirta nii ! » Ko honto annabi Iisaa heɓi faamu makko ngun ? O sifii : « Gandal an ngal hinaa e an iwi, kono ko e Nuluɗo lan on » (Yuuhanna 7:16, 46).

O holluno giggol iwrungol ngol ka Alla. Annabi Iisaa yurminayno kadi yimɓe ɓen. Gorko « mo ɗamajan heewi e ɓandu mun » jeejuno mo, o wi’i : « Koohoojo,  si hiɗon faalaa, hiɗon waawii lan sellinde, mi laaɓa ! » Annabi Iisaa yurmaa mo, « fonti jungo mun ngon, meemi mo, wi’i : “ Miɗo yiɗi, laato selluɗo laaɓa. Ɗon kisan, ɗamajan ɗan iwi e makko, o selli, o laaɓi ” » (Luuka 5:12, 13 ; Markuusa 1:41, 42). Tigi tigi on, annabi Iisaa no faalanoo wallude on gorko tampuɗo.

Annabi Iisaa no kippi fii mon onon kadi ? Kanko tigi himo jaabii : « Aree e an, on fow, yo rondiiɓe ko teddi haa ronki, mi fowtina on. Jaɓon yankinanagol ko mi fawi on kon, jaɓon janndeeji an ɗin. Ko fii min ko mi newiiɗo, yankiniiɗo kadi e ɓernde, ɗun on heɓay fowtunde fii wonkiiji mon ɗin » (Matta 11:28, 29).

Ko annabi Iisaa woni Ardiiɗo ɓuruɗo moƴƴude mo waaweten heɓude on. Ko sabu ɗun, o wi’i : « Jaɓon janndeeji an ɗin. » En waaway jaɓude ɗun ? Waɗugol ɗun okkay en weltaare.