TOƁƁERE 35

Ko honno fewjirton no moƴƴiri ?

LECTURE

Mo kala e men no fewja. Wano suɓagol suudu, golle maa si en jommbay maa en jommbataa. Ko fewjeten kon no battina en ko tiiɗi. No walla en kadi ɓadagol Yahuwah Alla maa woɗɗagol mo. Si en fewjii no moƴƴiri, en heɓay ngurndan welɗan e en weltinay Yahuwah Alla.

1. Ko honno Deftere Alla nden wallirta en fewjugol no moƴƴiri ?

Ado yo on fewjude, toree Yahuwah Alla ballal e huutoron Deftere Alla nden fii anndugol ko o miijii fii mun (janngee Tindi 2:3-6, VPFJ). Wonnde, Yahuwah Alla no waɗa sariya welɗo faamude. Si ko non woniri, ko ɗoftagol on sariya ɓuri moƴƴude.

E si tawii Deftere Alla nden hollaali on ko laaɓi pos ko haanuɗon waɗude ? Fahin Yahuwah Alla hollay on « laawol ngol haanuɗ[on] rewude » (Isaaya 48:17). Honno ? Deftere Alla nden no mari tugaale waawayɗe on ɗowude. Tugaale Deftere Alla nden ko goongaaji hollayɗi miijooji Alla ɗin. Si en janngii Deftere Alla nden, en annday ko Alla miijii. E si en anndii ko o miijii, en waaway fewjude ko welata mo.

2. Ko honɗun haanuɗon miijitaade ado yo on fewjude ?

Deftere Alla nden wi’i : « jooma hakkil ndaray ka yahata ɗon » (Tindi 14:15, VPFJ). Ɗun no firi, ado yo en fewjude, hiɗen haani miijitaade moƴƴa fii ko faalaɗen waɗude. Si on ndaarii kala ko faalaɗon waɗude, lanndee hoore mon : « Ko tugaale Deftere Alla honɗe mi huutorta ? Si mi suɓike waɗugol ɗun mi heɓay ɓuttu-ɓernde ? Ko honno ko mi suɓii kon battinirta woɓɓe goo ? E ko mi suɓii kon weltinay Yahuwah Alla ? » (Yaɲɲannde sariyaaji ɗin 32:29).

Ko Yahuwah Alla tun haani haalande en ko moƴƴi maa ko boni. Si en anndii moƴƴa sariyaaji makko ɗin e tugaale makko ɗen e si en suɓike ɗoftagol mo, en heɓay ɓernde laaɓunde. Ko ɓernde waɗata neɗɗanke senndindirgol ko moƴƴi e ko boni (Roomu 2:14, 15). Ɓernde eltaande wallay en fewjugol no moƴƴiri.

LUGGINEE

Anndee fii no tugaale Deftere Alla nden e ɓernde men nden wallirta en fewjugol no moƴƴiri.

3. Accee Deftere Alla nden ɗowa on

Ko honno tugaale Deftere Alla nden ɗowirta en si hiɗen fewjude ? Fijinee VIDIO on e yewton fii lanndaale jokkituɗe ɗen.

VIDIO : Accee tugaale Deftere Alla nden ɗowa on (5:54)

Ko honɗun firi feere suɓanagol hoore mun ?
Fii honɗun Yahuwah Alla okki en feere suɓanagol hoore men ?
Ko honɗun Alla okki en fii huutorgol feere suɓanagol hoore men no moƴƴiri ?

Fii yi’ugol misal tugalal ka nder Deftere Alla, janngee Efeesi 5:15, 16 e yewton fii ‘no huutorton saa’i mon on no moƴƴiri’. Ko honno huutorton ngal tugalal...

fii janngugol Deftere Alla nden ɲannde woo ?
fii wonugol moodi maa ɓeyngu moƴƴo, baaba maa neene moƴƴo e ɓiɗɗo moƴƴo ?
fii tawegol ka pottite moftal ?

4. Eltee ɓernde mon nden fii fewjugol ko moƴƴi

No weli fii suɓagol ko moƴƴi si tawii Deftere Alla nden no holli ko laaɓi fii mun. Kono ko honɗun waɗeten si nde hollaali ko laaɓi ? Fijinee VIDIO on e yewton fii lanndal jokkitungal ngal.

VIDIO : « Maree ɓernde laaɓunde » (5:13)

Ko honno Emma eltirnoo ɓernde makko nden fii fewjugol no Yahuwah Alla yiɗiri non ?

Fii honɗun en haanaa lanndaade woɓɓe goo fewjangol en ? Janngee Yahuudiyankeeɓe 5:14 e yewton fii ɗee lanndaale :

Hay si no weli fii lanndagol woɓɓe goo fewjangol en, ko honɗun haanuɗen anndude enen tigi ?
Ko piiji honɗi huutorton fii eltugol ɓernde mon nden fii fewjugol no moƴƴiri ?

Wano kartal, ɓernde men nden wallay en fewjugol ka yaheten e nder ngurndan men ɗan.

5. Wattanee yila e ko woɓɓe goo mari ka ɓernde

Yimɓe no fewja ko serti. Ko honno hollirten hiɗen wattani yila e ko woɓɓe goo mari ka ɓerɗe maɓɓe ? Ndaaree mise ɗiɗi :

Misal 1 : Musiɗɗo debbo yiɗuɗo wattagol tuuba si himo gollude ka suudu maa si himo wondi e ɗimmooɓe makko ɓen. Kono, no o ɓornorta non no sonnja musiɓɓe makko ɓen ka moftal ka o ari neeɓaali.

Janngee Roomu 15:1 e 1 Korenti 10:23, 24 e yewton fii ɗee lanndaale :

E hoore janngugol ɗee aayeeje, hara ko honɗun musiɗɗo debbo on suɓotoo waɗugol ? Ko honɗun waɗoton si hiɗon wondi e goɗɗo mo ɓernde mun haɗi mo waɗugol goɗɗun ko ɓernde mon newnani on ?

Misal 2 : Hay si Deftere Alla nden haɗaali en yarugol konnjan, musiɗɗo gorko no suɓii kanko o yarataa konnjan. Musiɓɓe makko ɓen ka dewal no noddi mo ka fijetee e o yi’i hiɓe yarude konnjan.

Janngee Waajotooɗo on 7:16 e Roomu 14:1, 10 e yewton fii ɗee lanndaale :

E hoore janngugol ɗee aayeeje, hara ko honɗun musiɗɗo gorko on suɓotoo waɗugol ? Ko honɗun waɗoton si on yi’ii goɗɗo no waɗude huunde nde ɓernde mon nden haɗi on waɗude ?

Ko honɗun wallata on fewjugol ko moƴƴi ?

1. Toree Yahuwah Alla yo o ɗowu on (Yaaquuba 1:5).

2. Taskee ka nder Deftere Alla maa ndaaron e nder saakital tuggiingal e Deftere Alla nden fii heɓugol tugaale ɗe waawoton huutorde. Hiɗon waawi lanndaade ballal almasiiyaaɓe ɓurɓe on anndude.