E nder aduna on fow, yimɓe no mari miijooji sertuɗi fii konnjan. Wonnde, woɓɓe no yiɗi yaridugol e ɗimmooɓe maɓɓe ɓen. Woɓɓe goo no suɓoo ɓe yarataa fes. Woɓɓe goo kadi, yaray haa ɓe manndila. Ko honɗun Deftere Alla nden haali fii konnjan ?

1. Yarugol konnjan no boni ?

Deftere Alla nden haɗaali en yarugol konnjan. Kono, hakkunde piiji ɗi Alla okki en ɗin, ko tawaa e ɗun ko « njaram weltinayɗan ɓernde neɗɗanke » (Zabuura 104:14, 15, VPFJ). Hinde haali hay fii rewooɓe Alla sella-finndeeɓe goo yaraynooɓe konnjan (1 Timotee 5:​23).

2. Ko honɗun Deftere Alla nden waajii ɓee suɓiiɓe yarugol ?

Yahuwah Alla no toŋi yarugol buy maa haa manndila (Galaasi 5:​21). Alla daali : « Wota a tawde e mandilooɓe ɓen » (Tindi 23:20, VPFJ). Ko ɗun waɗi, si en suɓike yarugol — hay si ko enen tun —, en haanaa yarude haa ronken miijaade ko laaɓi, haa ronken anndude ko haalen, ko waɗen maa haa bonnen cellal men ngal. Si en waawataa hoore men fii ka yarugol, hiɗen haani accitude ɗun fes.

3. Ko honno teddinirten ko woɓɓe goo fewjata fii konnjan ?

Mo kala no haani fewjande hoore mun si o yaray konnjan. Si goɗɗo suɓike yarugol ko hawri, en haanaa mo ɲaawude. Si goɗɗo faalaaka yarude kadi, en haanaa mo forsude (Roomu 14:10). E si tawii ko yareten kon wonanay woɓɓe goo ella, hiɗen haani selude ɗun (janngee Roomu 14:21). Wota hay gooto « ɗaɓɓu nafa mun on, kono yo ɗaɓɓu fii heddiiɓe ɓen » (janngee 1 Korenti 10:23, 24).

 LUGGINEE

4. Fewjee si on yaray maa si on yarataa

Ko honno annabi Iisaa yiiraynoo konnjan ? Fii anndugol ɗun, ndaaree kaawee arano mo o waɗi on. Janngee Yuuhanna 2:​1-​11 e yewton fii ɗee laandaale ɗoo :

• Ko honɗun oo kaawee jannata en fii no annabi Iisaa yiiraynoo konnjan e ɓee yaraynooɓe ?

• Ɓay annabi Iisaa haɗaano fii yarugol konnjan, ko honno almasiiyaajo jogorta suɓiiɗo yarugol ?

Fii kala almasiiyaajo no mari feere yarugol konnjan, ɗun firaa himo haani waɗude ɗun soono woo. Janngee Tindi 22:3 (VPFJ) e ndaaron ɗee toɓɓe jokkituɗe si tawii on yaray maa si on yarataa.

• Si hiɗon doginde oto maa si hiɗon gollirde masin.

• Si tawii ko on debbo sowiiɗo.

• Si doftooru haɗii on yarugol konnjan.

• Si on waawataa hoore mon fii ko yaroton kon.

• Si sariya on no toŋani on yarugol konnjan.

• Si hiɗon wondi e suɓiiɗo mo yarataa konnjan sabu satteendi ndi o heɓunoo fii mun.

Hiɗon haani sennditude konnjan e peera maa ka fijetee ? Fii anndugol ko wallata on fewjugol, fijinee VIDIO on.

Janngee Roomu 13:13 e 1 Korenti 10:31, 32. Ɓawto janngugol kala aaya, yewtee fii ngal lanndal :

• Ko honno huutorgol ngal tugalal wallirta on fewjugol fii weltingol Yahuwah Alla ?

 5. Fewjee beru ko yaroton kon

Si on suɓike yarugol konnjan, annditee ɗun ɗoo : hay si Yahuwah Alla toŋaali yarugol konnjan, kono himo toŋi yarugol haa feƴƴita. Fii honɗun ? Janngee Husaa’a 4:11, 18 e yewton fii ngal lanndal :

• Ko honɗun heɓata goɗɗo si o yarii haa feƴƴiti ?

Ko honno sellirten yarugol haa feƴƴita ? Hiɗen haani yankinaade maa annden kattudi men ndin. Janngee Tindi 11:2 (VPFJ) e yewton fii ngal lanndal :

• Fii honɗun no moƴƴi waɗugol kattudi beru ko yareten kon ?

6. Ko honno waawirten hoore men fii yarugol konnjan ?

 RAWNOODE

Yahuwah Alla okkii en konnjan fii weltaare, kono himo toŋi yarugol buy maa haa manndila.

Ndartannde

• Ko honɗun Deftere Alla nden haali fii konnjan ?

• Ko boneeji honɗi heɓoton si on yarii haa feƴƴiti ?

• Ko honno teddinirten pewjooje woɓɓe goo fii yarugol konnjan ?