1. Ko honɗun heɓeten si en ɓadike Allah ?

YAHUWAH no yiɗi jiyaaɓe makko ɓen. Si on rewii Yahuwah, o barkinay on hannde e ko aroyta. Deftere Allah nden wi’i : « Ɓadee Alla, ɗun o ɓadoto on » (Yaaquuba 4:8).

2. Honno ɓadortoɗen Allah, e ko honno yiireten ɗun e nder toraare men nden ?

² Fii ɓadagol Allah, hiɗon haani janngugol Daaluyee makko on e huutoroɗon ɗun. Si on torike mo huunde ko yiitidi e faale makko on, Yahuwah heɗoto on e o jaaboto tooraare mon nden. Yuuhanna sahaabaajo Almasiiyaajo winnduno : « Awa e hino hoolaare nde ɓattorten Alla nden : si en torike mo goɗɗun ko yaadi e faale makko on, o heɗoto en. Ɓay non hiɗen andi himo heɗii kala ko toriɗen mo, haray hiɗen andi en heɓii ko toriɗen mo kon » (1 Yuuhanna 5:14, 15).

3-7. Honno heɓirten mokobayaagal iwrungal ka Allah, e ko honno ɗun wallirta en ?

³ E hoore ɗun, si on ɓadike Allah, o okkay on mokobayaagal fii no anndiron honno feƴƴinirton ngurndan mon ɗan. Deftere Allah nden wi’i : « Si goɗɗo e mon ŋakkira faamu, yo o toro ɗun Alla, on okkay mo ɗun » (Yaaquuba 1:5).

⁴ Ko honno mokobayaagal iwrungal ka Allah ngal wallirta on ? Ko adii kon, wallay on no anndiron piiji ɗi welataa Yahuwah. Ko watti ɗon, on annday fii honɗun ɗii piiji no boni e fii wota on waɗu ɗii piiji bonɗi. Ngal ganndal dannday on e piiji buy ko woni e sonnjude yimɓe ɓen hannde. E piide misal, ɗoftagol Allah fii ko o waajii en kon fii needi laaɓundi, no danndi yimɓe Allah ɓen reedugol fattu, heɓugol ɲabbeeli e nder jeenugol, fii dewle ɗe aldaa e welo welo maa ko bonnata ɗe.

⁵ Ko honɗun kadi mokobayaagal iwrungal ka Allah ngal waɗanta on ? Ɗun wallay on no heɓiron nafa ngurndan mon ɗan. Wallay on no ƴettiron pehe moƴƴe e haajuuji, wano huutorgol kaalisiiji mon ɗin. On waaway jokkude ko nafata on hara on jokkaali piiji ɗi aldaa e nafa.

⁶ Mokobayaagal iwrungal ka Allah ngal wallay on no huuwondiron e yimɓe ɓen. Ɓeynguure mon nden heɓay weltaare. On heɓay njaatigiiɓe moƴƴuɓe, kelɗuɓe, teddinɓe on. Hay ɓee ɓe rewataa Allah teddinay on.

⁷ E hoore ɗun, mokobayaagal iwrungal ka Allah ngal wallay on no yiiron ngurndan tagaaɗo no haaniri non. Wallay on no anndiron honno gerdirton fii anndeeji mon ɗin. Wallay on kadi no heɓiron ɲiiɓal e pellital fii ko aroyta. Ɗun ɗoo fow ɓeydanay on cellal (Tindi 14:30, TMN ; Isaaya 48:17, TMN).

8. Si hiɗon rewude Allah, ko honɗun woni on hulataa ?

⁸ Si hiɗon rewude Allah goongaajo on, on heɓataa kulol wano ɓee ɓe alaa mo e rewude ɓen. Ɓayri hiɗon anndi mayɓe ɓen ka berɗe wuuraa, on hulataa mayɓe. Sabu hoolaare nde maruɗon nden e ko Allah yeɗi en kon fii immintingol mayɓe ɓen, on hulataa maayugol. E ɓayri hiɗon  anndi Allah ko Jom Bawgal, on hulataa ndureyaagal e ɲanneyaagal (Yuuhanna 8:32).

9-11. Homɓe wuuroyta ka Aljanna, e ko homɓe woni wuuroytaa ton ?

⁹ Si on ɓadike Allah, on hulataa ko aroyta. Wano no janngirɗen non, Deftere Allah nden no yewti en fii ellaaji buy ko wonuɗen e yi’ude hannde e hoore ndii leydi. Yahuwah no daalani en ɗii piiji fow ko fii saa’ihun ; Laamu Allah ngun wattoyay oo aduna aljanna ko neeɓataa (Luuka 21:10, 11, 31 ; 23:43).

¹⁰ Ko wonuɓe e ɓadaade Yahuwah ɓen tun e wonuɓe mo e rewude ɓen wuuroyta ka Aljanna. Deftere Allah nden wi’i : « Saa’i on no heddii seeɗa, bonɓe ɓen muloyay ; on ndaaroyay ka ɓe wonunoo on yi’oytaa ɓe. Kono yankiniiɓe ɓen jeyay leydi ndin, e ɓe heɓoyay welo welo e nder ɓuttu » (Zabuura 37:10, 11, TMN).

¹¹ Ɓee saliiɓe ɗoftaade sariyaaji Allah feewuɗi ɗin muloyay (2 Tesalonii 1:8, 9). Haray fii maɓɓe lannii. Ɓe tawtay Seytaane e jinnaaji mun ɗin e muleede haa poomaa (Feɲɲinannde 20:10, 14). Kono wonuɓe janngude fii no ɓe anndira Yahuwah, ɓe rewa mo, heɓoyay welo welo ka Aljanna e hoore ndii leydi.

12. Honɗun Deftere Allah nden wi’i fii ko aroyta ?

¹² Yahuwah no marani ɓee yiɗuɓe mo piiji moƴƴuɗi buy ! Ndaaree ko Daaluyee makko on wi’i kon fii ngurndan ɗan ka Aljanna e hoore ndii leydi :

• Ɲaametee ko ɗuuɗi : « Aroyay wonude gabbe buy ka hoore leydi ; ka hoore pelle foonday » (Zabuura 72:16, TMN).

• Cuuɗi moƴƴuɗi : « Ɓe darnay cuuɗi e ɓe hoɗa e nder majji » (Isaaya 65:21, TMN).

• Golle moƴƴuɗe : « Ɓe mi suɓii ɓen heɓoyay nafa golle maɓɓe ɗen ko timmi. Ɓe yanngoytaako fii meere » (Isaaya 65:22, 23, TMN).

• Ɲabbeeli alaa : « Hay gooto innoyta : “ Hilan nawni ” » (Isaaya 33:24, TMN).

• Jukkere alaa : « E on saa’i ɗon gite bunɗo on udditoyto, e noppi pahoojo on nanoyay. E on saa’i ɗon boygeejo on hoccoroyto wa jawre, e ɗenngal mboboojo on haacoyay e hoore weltaare » (Isaaya 35:5, 6, TMN).

• Muuseendi, yoomere, e mayde alaa : « Alla fitta kala gongol ka gite maɓɓe, hara hande kadi mayde waɗitataa, yoometaake, fesetaake, muuseendi waɗitataa. Ko fii haray sifa ɗin piiji arani fow feƴƴiino » (Feɲɲinannde 21:4).

• Gere alaa : « Allah lannay gereeji ɗin e hoore leydi ndin fow » (Zabuura 46:9, TMN).

• Ngurndan poomayankejan : « Feewuɓe ɓen jeyay leydi ndin, e ɓe wuuray e hoore mayri haa poomaa » (Zabuura 37:29, TMN).

13. Ko hommbo tun waawi waɗude ndii leydi aljanna, fii honɗun ?

¹³ Tagaaɗo waawataa waɗude sifa ɗii piiji, kono Yahuwah no mari bawgal waɗugol kala ko o daali. Hay huunde haɗataa mo waɗugol ko o faalaa waɗude kon. Deftere Allah nden wi’i : « Sabu alaa ko Allaahu on ronki » (Luuka 1:37).

14. Honno yaaroton e laawol nawrayngol ngol e ngurndan poomayankejan ?

¹⁴ E jurol Seedeeɓe makko ɓen, Yahuwah no okkude yimɓe ɓen fow feere fii no ɓe naatira « ka dambugal faaɗungal » e no ɓe yaara e laawol nawrayngol e ngurndan poomayankejan. Yo wonu hara hiɗon hakkunde ɓee yimɓe jaɓuɓe ngal noddital e hoore weltaare. Yo wonu hara hiɗon jokki diina goonga kan fii yo on heɓu barki Yahuwah kin haa poomaa ! (Matta 7:13, 14.)