“Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ; ni Nyɔŋmɔ toiŋjɔlɛ ni fe niiashishinumɔi fɛɛ lɛ baatsɔ Kristo Yesu nɔ abu nyɛtsuii kɛ nyɛjwɛŋmɔi ahe.”​—Filipibii 4:6, 7, Jeŋ Hee Shishitsɔɔmɔ.

 “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.”​—Filipibii 4:6, 7, Ga Biblia Momo.

 Nyɔŋmɔ jalɔi baanyɛ akpee yeyeeyefeemɔ naa kɛtsɔ sɔlemɔ nɔ. Ewo shi akɛ, ebaahã amɛ mligbɛ toiŋjɔlɛ, ni ebaaye ebua amɛ ni amɛkpee yeyeeyefeemɔi anaa, ni ebaabu amɛtsui kɛ amɛjwɛŋmɔi ahe. Kuku 6 lɛ tsɔɔ sɔlemɔi srɔtoi ni baaye abua amɛ ni amɛnine ashɛ nakai toiŋjɔlɛ lɛ nɔ.

 Fai ni akɛ hiɛdɔɔ kpaa kɛ́ aasɔle lɛ tsɔɔ akɛ, aajɛ tsui muu fɛɛ mli aakpa Nyɔŋmɔ fai kɛhã yelikɛbuamɔ. Tamɔ bɔ ni Yesu fee lɛ, kɛ́ mɔ ko yaje naagba loo haomɔ mli lɛ, ebaanyɛ ekɛ hiɛdɔɔ akpa Nyɔŋmɔ fai. (Hebribii 5:7) Bei pii lɛ, sɔlemɔ ni tamɔ nɛkɛ lɛ yaa nɔ shii abɔ.

 Nibimɔi nɛɛ tsɔɔ akɛ, aabi Nyɔŋmɔ nɔ ko pɔtɛɛ. Ejálɔi baanyɛ abi lɛ nii yɛ “nɔ fɛɛ nɔ mli” loo yɛ “shihilɛ fɛɛ shihilɛ mli.” Shi, esa akɛ sɔlemɔi nɛɛ kɛ Nyɔŋmɔ suɔmɔnaa nii ni atsɔɔ yɛ Biblia lɛ mli lɛ akpã gbee.​—1 Yohane 5:14.

 Shidaa sɔlemɔ tsɔɔ hiɛsɔɔ kpo ni ajieɔ kɛhã nɔ ni Nyɔŋmɔ efee kɛ nɔ ni ebaafee. Kɛ́ wɔkɛ wɔjwɛŋmɔ ma nɔ ni Nyɔŋmɔ efee ehã wɔ hewɔ ni wɔmiisumɔ ni wɔda lɛ shi lɛ nɔ lɛ, ebaahã wɔya nɔ wɔná miishɛɛ.​—1 Tesalonikabii 5:16-18.

 Nyɔŋmɔ hãa ejálɔi lɛ toiŋjɔlɛ kɛtsɔɔ akɛ eehã sɔlemɔi ni tamɔ nɛkɛ lɛ ahetoo. ‘Toiŋjɔlɛ ni Nyɔŋmɔ hãa’ lɛ hãa mɛi ni naanyobɔɔ kpakpa yɔɔ ekɛ amɛteŋ lɛ atoiaŋ jɔɔ amɛ. (Romabii 15:13; Filipibii 4:9) Toiŋjɔlɛ nɛɛ “fe niiashishinumɔi fɛɛ” ejaakɛ, ejɛ Nyɔŋmɔ ŋɔɔ ni ebaanyɛ eye ebua wɔ fe bɔ ni wɔjwɛŋmɔ baanyɛ ashɛ he po.

 Nakai kuku lɛ kɛɛ, Nyɔŋmɔ toiŋjɔlɛ lɛ baanyɛ abu wɔtsui ahe. Greek wiemɔ ni atsɔɔ shishi akɛ “bu” lɛ kɛ asraafoi awiemɔ ko ni kɔɔ nɔ ni asraafoi akuu ko feɔ kɛbuɔ maŋ ko he lɛ yɛ tsakpaa. Nakai nɔŋŋ Nyɔŋmɔ toiŋjɔlɛ lɛ buɔ mɔ henumɔi kɛ esusumɔi ahe. Eyeɔ ebuaa mɔ lɛ ni eyeee etsui yɛ naagbai ni suɔ mɔ tsui lɛ po ahe.

 Toiŋjɔlɛ ni Nyɔŋmɔ hãa lɛ buɔ wɔhe “kɛtsɔ Kristo Yesu nɔ,” ejaakɛ Yesu nɔ etsɔɔ ni naanyobɔɔ hiɔ wɔ kɛ Nyɔŋmɔ teŋ. Yesu kɛ ewala hã akɛ kpɔmɔnɔ yɛ wɔhe eshai lɛ ahewɔ. Kɛ́ wɔhe enɔ wɔye lɛ, Nyɔŋmɔ baajɔɔ wɔ. (Hebribii 11:6) Yesu nɔ atsɔɔ abɛŋkɛɔ Nyɔŋmɔ. Yesu wie akɛ: “Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”​—Yohane 14:6; 16:23.

 Biblia wolo ni ji Filipibii lɛ ji wolo ni bɔfo Paulo ŋma kɛyahã Kristofoi ni hi shi yɛ Filipi maŋtiase lɛ mli lɛ. a Yɛ yitso 4 lɛ mli lɛ, Paulo wo mɛi ni yɔɔ asafo lɛ mli lɛ hewalɛ ni amɛmii ashɛ amɛhe, ni eda amɛ shi hu yɛ ejurɔ ni amɛfeɔ ni hãa amɛmii shɛɔ amɛhe lɛ hewɔ. (Filipibii 4:4, 10, 18) Etsɔɔ bɔ ni sɔlemɔ hãa wɔnáa Nyɔŋmɔ toiŋjɔlɛ lɛ, kɛ nɔ ni esa akɛ wɔsusu he kɛ nɔ ni esa akɛ wɔfee koni wɔnine ashɛ “Nyɔŋmɔ toiŋjɔlɛ lɛ” nɔ.​—Filipibii 4:8, 9.