Jeee ŋmɛnɛ kwraa kooloi ahe nilelɔi yɔse akɛ kakaradai nyɛɔ amɛkpɛtɛɔ tɛi kɛ meelei ashishi. Aheɔ ayeɔ akɛ kakarada glue nyɛɔ emɔɔ nii fe glue fɛɛ glue ni adesai efee. Nyɛsɛɛ nɛɛ nɔŋŋ ni jeŋ shikpalɔi ná amɛle bɔ ni feɔ ni kakaradai nyɛɔ amɛkpɛtɛɔ nibii ni nu yɔɔ hiɛ lɛ ahe.

 Susumɔ he okwɛ: Niiamlitaomɔ ehã ana akɛ, dani kakarada bi ni miisele lɛ baakpɛtɛ nɔ ko he lɛ, etaoɔ nibii lɛ ateŋ nɔ ni sa jogbaŋŋ ni ekpɛtɛɔ he. Kɛ́ ena nɔ ni esumɔɔ ni ekpɛtɛ he lɛ, eŋaa nibii enyɔ komɛi eshwieɔ he. Klɛŋklɛŋ nɔ ni eŋaa lɛ tamɔ fɔ, ni no hãa nu lɛ jeɔ he loo egbiɔ. Fɔ nɛɛ hãa he ni etaoɔ ekpɛtɛ lɛ feɔ he ni sa jogbaŋŋ koni enyɛ eŋa nɔ ni ji enyɔ lɛ ni blɔfo tsɛɔ lɛ phosphoproteins lɛ eshwie he.

 Nibii enyɔ nɛɛ nyɛɔ emɔɔ nii aahu akɛ, muawai ni yɔɔ ŋshɔ lɛ mli lɛ po nyɛɛɛ afite lɛ. Enɛ yeɔ ebuaa kakaradai lɛ waa, ni amɛnyɛɔ amɛkpɛtɛɔ he amɛwala beiaŋ fɛɛ.

 Bɔ ni kakarada tsɔɔ efeɔ glue lɛ yɛ hwanyaŋŋ kwraa fe bɔ ni jeŋ shikpalɔi susu be ko ni eho. Jeŋ shikpalɔi akuu ni yɔse enɛ lɛ ateŋ mɔ kome wie akɛ: “Enɛ ji gbɛ ni sa jogbaŋŋ ni abaanyɛ atsɔ nɔ atsu naagbai ni akɛkpeɔ be ni ataoɔ akɛ nɔ ko akpɛtɛ nibii ni nu yɔɔ nɔ lɛ anɔ lɛ ahe nii.” Enɛ baanyɛ aye abua niiamlitaolɔi ni amɛfee glue ni abaanyɛ akɛtsu nii yɛ nu shishi, kɛ agbɛnɛ hu ni anyɛ akɛ adebɔɔ nibii afee glue ni akɛbaatsu nii yɛ ilɛktrɔnik nibii kɛ opreshɛŋfeemɔ mli.

 Te osusuɔ tɛŋŋ? Ani kakarada glue lɛ ba kɛtsɔ sutsakemɔ nɔ? Aloo mɔ ko ni fee?