Ani ole oblanyo loo oblayoo ko ni hela ko ni naa wa kɛ lɛ miiwuwua shi? Ani ooye hela ko ni hãaa onyɛ ofee nibii ni otipɛŋfoi nyɛɔ amɛfeɔ?

 Kɛ́ nakai lɛ, onijiaŋ baanyɛ aje wui bei komɛi. Kɛ̃lɛ, saji enyɔ komɛi yɛ Biblia lɛ mli ni baanyɛ ashɛje omii.

•   Yehowa Nyɔŋmɔ, ni ji mɔ ni bɔ bo lɛ, le oshihilɛ lɛ. Nɔ ni fe fɛɛ lɛ, ‘esusuɔ ohe.’​—1 Petro 5:7.

•   Yehowa Nyɔŋmɔ eto eyiŋ akɛ ebaatsa helai fɛɛ! Obaanyɛ okane enɛ he saji yɛ Biblia lɛ mli yɛ Yesaia 33:24 kɛ Kpojiemɔ 21:1-4.

 Oblahii kɛ oblayei babaoo ni helai miigba amɛnaa lɛ eyɔse akɛ, hemɔkɛyeli ni amɛnáa yɛ Nyɔŋmɔ kɛ eshiwoi lɛ amli lɛ ji nɔ ni wajeɔ amɛ. Hã wɔsusu nɔkwɛmɔnii ejwɛ ahe wɔkwɛ.

•  YEIMY

•  MATTEO

•  BRUNA

•  ANDRÉ

 Be ni miyeɔ afii 11 lɛ, ehe bahia ni mata helatsɛmɛi ashwiilii mli kɛya he fɛɛ he. Minyɛɛɛ nitsumɔi bibii po matsu, tamɔ nibii ni mli etsiii anɔholemɔ nɛkɛ.

 Be ni miye afii enumɔ lɛ, datrɛfoi yɔse akɛ miná kuumɔ hela ko (muscular dystrophy); eji hela ko ni hãaa manyɛ nibii babaoo mafee. Bei komɛi lɛ, minijiaŋ jeɔ wui ejaakɛ minyɛɛɛ mafee nibii ni mitipɛŋfoi lɛ nyɛɔ amɛfeɔ lɛ. Shi mifɔlɔi kɛ misafoŋbii lɛ yeɔ amɛbuaa mi yɛ heloŋ, henumɔŋ kɛ mumɔŋ. Mikɛ mibe fɛɛ shiɛɔ Biblia mli sane lɛ, ni bei pii lɛ, kɛ́ mikɛ mɛi ni nyaa Biblia lɛ he lɛ yaakase Biblia lɛ, minanemɛi Kristofoi lɛ fataa mihe kɛyaa.

 Yesu kɛɛ akɛ gbi fɛɛ gbi kɛ emli naagbai. (Mateo 6:34) No hewɔ lɛ, mijwɛŋɔ ŋmɛnɛ pɛ he ni migbaaa mihe naa yɛ wɔ he, ni mikɛ otii ni minine baanyɛ ashɛ nɔ lɛ mamɔɔ mihiɛ. Miikwɛ be ni manyɛ maná “wala diɛŋtsɛ lɛ” yɛ jeŋ hee ni Nyɔŋmɔ kɛbaaba lɛ mli lɛ gbɛ, ni maye mihe kɛjɛ nɛkɛ kuumɔ hela nɛɛ he.​—1 Timoteo 6:19.

 Kɛhã he susumɔ: Yeimy na akɛ kɛ́ ekɛ ‘otii ni enine baanyɛ ashɛ nɔ lɛ mamɔ ehiɛ lɛ’ eyeɔ ebuaa lɛ. Mɛɛ gbɛ nɔ obaanyɛ ofee nakai?​—1 Korintobii 9:26.

 Be ni miye afii ekpaa lɛ, mibanu he akɛ misɛɛ waa mihe, ni shishijee lɛ datrɛfoi kɛɛ dalɛ hewɔ ni ewaa mihe lɛ. Afi sɛɛ lɛ, amɛna akɛ nɔ ko efũu yɛ misɛɛ wu lɛ he.

 Afee mi opireshɛŋ, shi fũumɔ lɛ 100 mlijaa 40 pɛ datrɛfonyo lɛ nyɛ ejie. No sɛɛ nyɔji enyɔ pɛ mli lɛ, esaa efũu tamɔ tsutsu lɛ nɔŋŋ! Kɛjɛ nakai beaŋ kɛbaa nɛɛ, mifee tɛst babaoo, mika tsofãi srɔtoi babaoo, ni mikɛ nijiaŋwujei babaoo hu ekpe.

 Bei komɛi lɛ, fũumɔ lɛ waa mihe tamɔ nɔ ni akɛ kakla miitsurɔ mihe fɛɛ he, shi titri lɛ misɛɛ kɛ mitsitsi. Loloolo lɛ, mibɔɔ mɔdɛŋ koni mishihilɛ lɛ akaye minɔ. Mihãa mihiɛ hiɔ nɔ akɛ, mɛi krokomɛi hu emia amɛhiɛ yɛ shihilɛi ni jaraa amli, ni kɛ̃lɛ amɛtee nɔ amɛná jwɛŋmɔ ni ja. Nɔ titri ni yeɔ ebuaa mi ni mináa jwɛŋmɔ ni ja lɛ ji, hiɛkɛnɔfɔɔ ni miyɔɔ akɛ be ko baashɛ ni Yehowa Nyɔŋmɔ baafo nɔnai fɛɛ asɛɛ taakɛ ewo shi lɛ.​—Kpojiemɔ 21:4.

 Kɛhã he susumɔ: Mɛɛ gbɛ nɔ Nyɔŋmɔ shiwoo akɛ ebaajie nɔnai yɛ shihilɛ mli lɛ anɔjwɛŋmɔ baanyɛ aye abua bo ni ofi shi taakɛ ebalɛ yɛ Matteo gbɛfaŋ lɛ?​—Yesaia 65:17.

 Akɛni kɛ́ akwɛ mi lɛ, anaaa akɛ hela miiye mi hewɔ lɛ, mɛi komɛi susuɔ akɛ anihaolɔ ji mi. Anɔkwa, nɔ fɛɛ nɔ kwraa feemɔ baanyɛ awa ahã mi, tamɔ shĩa nifeemɔi, nikasemɔ, kɛ shitee yɛ saa nɔ po.

 Be ni miye afii 16 lɛ, datrɛfoi na akɛ miiye kuumɔ hela ko (multiple sclerosis); eji hela ko ni waa mɔ he waa ni mli woɔ wu be kɛ beaŋ. Jeee akɛ hela nɛɛ hãaa manyɛ matsu nii kɛkɛ, ehãaa manyɛ mikɛ mihe awo Kristofoi anifeemɔi amli bɔ ni misumɔɔ. Mikane 1 Petro 5:7 lɛ shii abɔ, jɛmɛ kɛɔ akɛ: “Nyɛshɛrɛɔ nyɛyeyeeyefeemɔi lɛ fɛɛ nyɛshwieɔ [Nyɔŋmɔ] nɔ, ejaakɛ esusuɔ nyɛhe.” Le ni mile akɛ Yehowa susuɔ wɔteŋ mɔ fɛɛ he lɛ wajeɔ mi waa. Susumɔ nɛɛ wajeɔ mi lolo kɛbashi ŋmɛnɛ.

 Kɛhã he susumɔ: Taakɛ eji yɛ Bruna gbɛfaŋ lɛ, Mɛɛ gbɛ nɔ bo hu kɛ́ oshɛ ojatsu lɛ ofɔ̃ Yehowa nɔ lɛ, obaaná he sɛɛ?​—Lala 55:22, Ga Biblia hee.

 Mɛi komɛi kɛ mi yeɔ tamɔ gbekɛ ni eye afii 10. Kɛ̃lɛ mishwaaa amɛ; ejaakɛ yɛ anɔkwale mli lɛ, mitamɔ mɔ ko ni eye afii 10.

 Be ni miye afii enyɔ lɛ, datrɛfoi na akɛ kansa henɔ ko ni yeɔ mɔ kɛjɛɔ sɛɛ wu lɛ mli aahu kɛyaa jwɛŋmɔ lɛ mli lɛ eko miiye mi. Datrɛfoi lɛ bɔ mɔdɛŋ ni amɛfee he eko, shi tsamɔ lɛ hãaa manyɛ mada jogbaŋŋ. Ŋmɛnɛ lɛ, mikwɔlɛ fɛɛ ji mitai 1.37. Kɛ́ mikɛɛ akɛ miye afii 18 lɛ mɛi pii susuɔ akɛ miimale!

 Mɛi ni kɛ mi yɔɔ Kristofoi asafo lɛ mli lɛ kɛ woo kɛ bulɛ hãa mi. Amɛkɛ mi yeee oookɛɛ gbekɛ, tamɔ bɔ ni gbekɛbii ni mikɛtee skul lɛ kɛ mi ye lɛ. Mibɔ mɔdɛŋ ni maya nɔ mahiɛ jwɛŋmɔ ni ja yɛ mishihilɛ lɛ he. Eji anɔkwale akɛ, nɔ ko ni fe fɛɛ ni baanyɛ aba adesa ko nɔ lɛ eba minɔ​—Mibale Yehowa! Shihilɛ fɛɛ shihilɛ ni ebaabi ni mamia mihiɛ yɛ mli lɛ mli lɛ, mile akɛ Yehowa baakwɛ mi. Jeŋ hee ni nɔ bɛ ni Yehowa Nyɔŋmɔ ewo he shi akɛ ekɛbaaba lɛ yeɔ ebuaa mi ni miyaa nɔ mihiɛɔ jwɛŋmɔ ni ja.​—Yesaia 33:24.

 Kɛhã he susumɔ: Mɛni hewɔ Yehowa ni mɔ ko baale lɛ ji, “nɔ ko ni fe fɛɛ ni baanyɛ aba adesa ko nɔ” taakɛ André wie lɛ?​—Yohane 17:3.