Nɔ ni wɔbaasusu he yɛ sane nɛɛ mli

•  Mɛni ji nuu kɛ yoo teŋ nyiɛmɔ?

•  Ani ofee klalo akɛ okɛ mɔ ko baabɔi nyiɛmɔ?

 Mɛi komɛi naa nuu kɛ yoo teŋ nyiɛmɔ akɛ nɔ ko ni akɛjieɔ hiɛtserɛ kɛkɛ. Shi yɛ sane nɛɛ mli lɛ, “nuu kɛ yoo teŋ nyiɛmɔ” kɔɔ be ni nuu ko kɛ yoo ko kɛmiile amɛhe jogbaŋŋ koni amɛkwɛ kɛji amɛbaanyɛ amɛfee gbalashihilɛ mli hefatalɔi ni sa kɛhã amɛhe lɛ he. No hewɔ lɛ, kɛ́ nuu ko kɛ yoo ko miinyiɛ lɛ, belɛ, oti pɔtɛɛ ko ma amɛhiɛ. Jeee nyiɛmɔ nɛɛ yiŋtoo ji ni ehã nuu ko ana akɛ yoo ko sumɔɔ esane kɛkɛ, loo yoo ko ana akɛ nuu ko sumɔɔ esane kɛkɛ.

 Kɛ́ nuu ko kɛ yoo ko miinyiɛ lɛ, be ni be shwieɔ mli lɛ, esa akɛ nyiɛmɔ nɛɛ aye abua amɛ koni amɛkpɛ amɛyiŋ kɛji amɛbaabote gbalashihilɛ mli loo amɛbaafo nyiɛmɔ lɛ sɛɛ. No hewɔ lɛ, kɛ́ okɛ mɔ ko bɔi nyiɛmɔ lɛ, esa akɛ osaa ohe oto nibii enyɔ nɛɛ ateŋ ekome.

 Sane lɛ nɔŋŋ ji akɛ: Kɛ́ oheɔ oyeɔ akɛ ofee klalo akɛ okɛ mɔ ko baabɔi nyiɛmɔ lɛ, no lɛ esa akɛ ohe oye hu akɛ ofee klalo kɛhã gbalashihilɛ.

 Kɛ́ okɛ mɔ ko bɔi nyiɛmɔ lɛ, ebaanyɛ eyagbe naa yɛ gbalashihilɛ mli, no hewɔ lɛ esa akɛ obi ohe akɛ, mɛɛ sui miyɔɔ ni baanyɛ ahã wɔnaanyobɔɔ lɛ aye omanye? Akɛ nɔkwɛmɔnɔ lɛ, susumɔ saji ni nyiɛ sɛɛ nɛɛ ahe okwɛ:

•   Bɔ ni okɛ oweku lɛ mli bii lɛ yeɔ ohãa. Bei pii lɛ, bɔ ni okɛ ofɔlɔi kɛ onyɛmimɛi lɛ yeɔ ohãa, titri lɛ, be ni ohao lɛ hãa anaa bɔ ni okɛ mɔ ni baafee ohefatalɔ lɛ baaye ohã.

   Biblia mli shishitoo mla: “Nyɛjiea mlijoomɔ, kɛ mlila, kɛ mlifu, kɛ bolɔmɔ, kɛ jɛmɔi fɛɛ, kɛ nɔ fɛɛ nɔ ni yeɔ mɔ awui lɛ yɛ nyɛhe nyɛshɛrɛa nyɛshwiea.”​—Efesobii 4:31.

   Bi ohe akɛ: ‘Kɛ́ abi mifɔlɔi kɛ minyɛmimɛi lɛ, ani amɛbaakɛɛ akɛ mikɛ amɛyeɔ yɛ bulɛ mli? Kɛ́ mikɛ amɛteŋ mɔ ko kpãaa gbee yɛ nɔ ko he lɛ, ani mitoɔ mitsui shi mikɛ lɛ susuɔ nii ahe, aloo mitsui baa ni mikɛ lɛ taa saji anaa?’

•   Hekɛafɔleshaa. Kɛ́ oná obote gbalashihilɛ mli lɛ, bei pii lɛ, ehe baahia ni okɛ nibii ashã afɔle koni ofee nibii ni ohefatalɔ lɛ sumɔɔ lɛ ohã lɛ.

   Biblia mli shishitoo mla: “Mɔ ko mɔ ko akaya nɔ etao nɔ ni lɛ diɛŋtsɛ ebaaná he sɛɛ, shi moŋ nɔ ni mɔ kroko baaná he sɛɛ.”​—1 Korintobii 10:24.

   Bi ohe akɛ: ‘Ani be fɛɛ be lɛ, misumɔɔ ni doo lɛ, afee nibii bɔ ni mi mitaoɔ? Ani mɛi naa mi akɛ mɔ ni nuɔ nii ashishi? Mɛɛ nibii mifeɔ kɛtsɔɔ akɛ mikɛ mɛi krokomɛi ahiamɔ nii yeɔ mi diɛŋtsɛ minɔ hiɛ?’

•   Heshibaa. Kɛ́ mɔ ko ji wu loo ŋa kpakpa lɛ, kɛ́ etɔ̃ lɛ, ekpɛlɛɔ etɔ̃mɔi anɔ ni ejɛɔ etsui mli ekpaa he fai.

   Biblia mli shishitoo mla: “Wɔ fɛɛ wɔtɔ̃ɔ babaoo.”​—Yakobo 3:2.

   Bi ohe akɛ: ‘Kɛ́ mitɔ̃ lɛ, ani mikpɛlɛɔ mitɔ̃mɔi lɛ anɔ oya nɔŋŋ, aloo mitao nibii komɛi kɛjieɔ minaa? Kɛ́ awo mi ŋaa yɛ nɔ ko he lɛ, ani mimli fuɔ?’

•   Shika. Nɔ kome ni bei pii lɛ, ekɛ béi baa gbalashihilɛ mli hefatalɔi ateŋ ji shika. No hewɔ lɛ, kɛ́ ole bɔ ni ahiɛɔ shika jogbaŋŋ lɛ, ehãŋ okɛ ohefatalɔ lɛ ataa saji anaa yɛ shika he.

   Biblia mli shishitoo mla: “Nyɛteŋ namɔ ni kɛ́ eetao ema mɔɔ lɛ, klɛŋklɛŋ lɛ, etaŋ shi ni ebu naa ekwɛ kɛji eyɛ nii ni fa bɔ ni sa ni ekɛbaagbe naa lo?”​—Luka 14:28.

   Bi ohe akɛ: ‘Ani mikwɛɔ jogbaŋŋ koni mikafite shika kɛkɛ, aloo daa nɛɛ mimɔ nyɔmɔ? Te mikɛ shika tsuɔ nii mihãa tɛŋŋ ni hãa anaa akɛ manyɛ mahiɛ shika jogbaŋŋ?’

•   Nyɔŋmɔjamɔ nifeemɔi. Kɛ́ Yehowa Odasefonyo ji bo lɛ, no lɛ wɔheɔ wɔyeɔ akɛ, oto gbɛjianɔ kɛhã Biblia lɛ kasemɔ daa, ni oyaa Kristofoi akpeei hu daa.

   Biblia mli shishitoo mla: “Mɛi ni le akɛ Nyɔŋmɔ he miihia amɛ lɛ yɛ miishɛɛ.”​—Mateo 5:3.

   Bi ohe akɛ: ‘Ani mibɔɔ mɔdɛŋ akɛ mikɛ mihe baawo Nyɔŋmɔjamɔ nifeemɔi amli daa kɛwaje mihemɔkɛyeli lɛ? Ani mikɛ Nyɔŋmɔjamɔ nifeemɔi yeɔ klɛŋklɛŋ gbɛhe yɛ mishihilɛ mli, aloo mihãa nibii krokomɛi gbalaa mijwɛŋmɔ kɛjeɔ nɔ?’

 Sane lɛ nɔŋŋ ji akɛ: Esa akɛ mɔ ni okɛbaabote gbalashihilɛ mli lɛ ana akɛ ená hefatalɔ kpakpa. No hewɔ lɛ, kɛ́ oofee nɔ fɛɛ nɔ ni obaanyɛ koni otsɔ hefatalɔ kpakpa ni tamɔ nakai, no lɛ, ewaaa akɛ bo hu obaaná mɔ ko tamɔ nakai nɔŋŋ ni baasumɔ bo.