Shihilɛ ni naa wa waa baanyɛ aba mɔ fɛɛ mɔ nɔ. Biblia lɛ kɛɛ: “Jeee be fɛɛ be mɔ ni he yɔɔ oya yeɔ kunim yɛ foidamɔ mli, ni jeee be fɛɛ be mɔ ni he wa yeɔ kunim yɛ ta mli.” Ejaakɛ “nibii ni baa yɛ be ni akpaaa gbɛ mli lɛ baa amɛ fɛɛ amɛnɔ. (Jajelɔ 9:11) Oblahii kɛ oblayei ni oshãrai eba amɛnɔ hu fata he. Mɛni amɛfee kɛkpee oshãra lɛ naa? Hã wɔsusu mɛi nɛɛ ateŋ anyɔ ahe wɔkwɛ.

•  REBEKAH

•  CORDELL

 Mifɔlɔi tse gbãla be ni miye afii 14.

 Mikɛɛ mihe akɛ, efeee mi akɛ amɛbaatse gbãla lɛ, ekolɛ mipapa miitao be fioo ekɛjɔɔ ehe. Esumɔɔ mimami waa​—⁠mɛni hewɔ ebaatse mimami gbãla? Mɛni hewɔ ebaashi mi?

 Ebawa kɛhã mi akɛ mikɛ mɔ ko baagba nɔ ni no mli lɛ eyaa nɔ lɛ he sane. No mli lɛ, misumɔɔɔ majwɛŋ he kwraa. Mimli wo la waa, eyɛ mli lɛ aka nakai beiaŋ miyayɔseee moŋ. Mibahao wa diɛŋtsɛ bɔ ni ehiii mi wɔɔ kwraa.

 Be ni miye afii 19 lɛ, kansa gbe mimami. No mli lɛ, lɛ ji minaanyo kpaakpa.

 Mifɔlɔi lɛ agbalatsemɔ lɛ hã minaa kpɛ mihe waa, shi mimami gbele lɛ kumɔ mi kwraa. Eedɔ mi kɛbashi bianɛ. Agbɛnɛ, minyɛɛɛ mawɔ kwraa, ni mihao waa.

 Shi nakai beiaŋ nɔŋŋ lɛ, mina nibii babaoo ni yeɔ ebuaa mi. Akɛ nɔkwɛmɔnɔ lɛ, Abɛi 18:1 lɛ bɔɔ wɔ kɔkɔ akɛ wɔkatse wɔhe yɛ mɛi ahe, no hewɔ lɛ, mibɔɔ mɔdɛŋ ni mikɛ nakai ŋaawoo lɛ tsuɔ nii.

 Agbɛnɛ hu lɛ, akɛ Yehowa Odasefonyo lɛ, mibɔɔ mɔdɛŋ mikaneɔ wɔwoji ni ajɛ Biblia lɛ mli aŋmala lɛ. Woji nɛɛ ateŋ ekome ni ye ebua mi waa be ni mifɔlɔi tse gbala lɛ ji, Questions Young People Ask​—⁠Answers That Work. Titri lɛ, mikaiɔ akɛ mikane wolo nɛɛ Kpo 2 lɛ mli sane ko ni hiɛ sane yitso akɛ “Can I Be Happy in a Single-Parent Family?” (“Ani Manyɛ Maná Miishɛɛ Yɛ Fɔlɔ Kome Weku Mli?”)

 Ŋmalɛ ko ni misumɔɔ waa ni kɛ́ mihao lɛ, eyeɔ ebuaa mi ji Mateo 6:25-34. Yɛ kuku 27 lɛ mli lɛ, Yesu bi akɛ: “Nyɛteŋ namɔ baanyɛ atsɔ etsui ni eyeɔ lɛ nɔ etsa ewalasɛɛkɛlɛ nɔ ninetalɔ kome?”

 Mikase yɛ shihilɛ ni nina mimami lɛ mli akɛ, nibii gbohii baanyɛ aba wɔteŋ mɔ fɛɛ mɔ nɔ, shi bɔ ni wɔtsuɔ nakai kai lɛ ahe nii lɛ ji nɔ ni he hiaa waa. Ekɛ shihilɛi ni jaraa kpe​—atse lɛ gbãla, ni no sɛɛ lɛ, ená kansa, ni ji hela ni gbeɔ mɔ​—shi fɛɛ mli lɛ, etee nɔ ená jwɛŋmɔ ni ja yɛ shihilɛ lɛ he, ni etee nɔ ehiɛ hemɔkɛyeli ni eyɔɔ yɛ Nyɔŋmɔ mli lɛ mli kpɛŋŋ kɛyashi egbo. Mihiɛ kpaŋ nɔ ni etsɔɔ mi yɛ Yehowa he lɛ nɔ kɔkɔɔkɔ.

 Kɛhã hesusumɔ: Mɛɛ gbɛ nɔ kɛ́ okaneɔ Biblia lɛ kɛ woji ni adamɔ Biblia lɛ nɔ aŋmala lɛ, ebaanyɛ eye abua bo ni onyɛ okpee oshãrai anaa?​—⁠Lala 94:19.

 Be ni miye afii 17 lɛ, midamɔ mipapa masɛi ni emu enaagbee mumɔ, no ji, egbo. Egbele lɛ ji nɔ ko ni egba minaa fe fɛɛ yɛ miwala shihilɛ mli. Ekumɔ mi kwraa.

 Minu he akɛ egboko diɛŋtsɛ, ni akɛ, jeee mipapa ji mɔ ni akɛ mama lɛ eha enɔ lɛ. Mikɛɛ mihe akɛ, ‘Wɔ lɛ, ebaate shi.’ Mifee shwɛm, ni minaaa nɔ ni mifeɔ mihe kwraa.

 Mikɛ miweku lɛ, Yehowa Odasefoi ji wɔ, ni be ni mipapa gbo lɛ, wɔsafoŋbii lɛ ye amɛbua wɔ waa. Amɛhã wɔ niyenii, amɛteŋ mɛi komɛi kɛ wɔ bahi shi, ni amɛkpɛtɛ wɔ gbagbalii​—jeee be kukuoo ko kɛkɛ, shi amɛkɛ wɔ hi shi bei saŋŋ. Amɛyelikɛbuamɔ lɛ hã miná nɔmimaa akɛ Yehowa Odasefoi ji anɔkwa Kristofoi diɛŋtsɛ.​—Yohane 13:35.

 Ŋmalɛ ko ni ewo mi hewalɛ waa ji 2 Korintobii 4:17, 18. Jɛmɛ kɛɛ: “Eyɛ mli akɛ amanehulu lɛ ji be fioo ko nɔ, ni etsiii moŋ, shi nakai amanehulu lɛ hãa wɔnáa anunyam ni nɔ bɛ kwraa ni hiɔ shi kɛyaa naanɔ; ni nakai be mli nɔŋŋ lɛ, wɔkɛ wɔhiŋmɛii emaaa nibii ni anaa lɛ anɔ, shi moŋ nibii ni anaaa lɛ anɔ. Ejaakɛ nibii ni anaa lɛ hiɔ shi be fioo ko, shi nibii ni anaaa lɛ hiɔ shi kɛyaa naanɔ.”

 Naagbee kuku lɛ ná minɔ hewalɛ waa. Mipapa nɔnaa lɛ, be kukuoo nɔ ni, shi nibii ni Nyɔŋmɔ ewo he shi kɛhã wɔsɛɛ lɛ baahi shi kɛya naanɔ. Mipapa gbele lɛ hã miná hegbɛ ni mijwɛŋ nɔ ni mikɛ mishihilɛ feɔ lɛ he jogbaŋŋ. Mitsake otii ni mikɛmamɔ mihiɛ lɛ.

 Kɛhã hesusumɔ: Kɛ́ amanehulu ko ba onɔ lɛ, mɛɛ gbɛ nɔ ebaanyɛ eye ebua bo ni okwɛ otii ni okɛmamɔ ohiɛ yɛ shihilɛ mli lɛ ekoŋŋ?​—1 Yohane 2:17.