Dabi kwraa!

 Anɔkwa Sane: Yɛ shihilɛ babaoo mli lɛ, henumɔ ni tamɔ nɛkɛ lɛ bahoɔ eyaa kɛkɛ.

 Nakai ji bɔ ni oblayoo ko ni atsɛɔ lɛ Lisette, ni eye afii 16, ni be ko ni eho lɛ ená oblayoo ko he miishɛɛ lɛ nu he ehã. Ekɛɛ akɛ: “Be ni miyaa skul lɛ, yɛ wɔnikasemɔ lɛ eko mli lɛ, atsɔɔ wɔ akɛ, kɛ́ mɔ ko ye afii 13 kɛyaa lɛ, henumɔ ko ni yɔɔ emli lɛ tsakeɔ oyayaayai. Anɔkwa, misusuɔ akɛ kɛ́ oblahii kɛ oblayei krokomɛi ná amɛle amɛgbɔmɔtso lɛ he nii babaoo lɛ, amɛbaana akɛ kɛ́ oná mɔ ko ni okɛhiɛ bɔɔsu kome lɛ he miishɛɛ lɛ, nakai henumɔ lɛ baanyɛ aho aya nɔŋŋ, ni no haŋ amɛnu he doo akɛ esa akɛ amɛkɛ nakai mɛi lɛ aná bɔlɛ.”

 Shi kɛ́ henumɔ ni oyɔɔ kɛhã mɔ ni okɛhiɛ bɔɔsu kome lɛ eyaaa hu? Kɛ́ Nyɔŋmɔ kɛɛ mɛi ni sumɔɔ koni amɛkɛ mɛi ni amɛkɛhiɛ bɔɔsu kome lɛ aná bɔlɛ lɛ akɛ amɛkwa nakai nifeemɔ lɛ, ani no tsɔɔ akɛ eyitsoŋ wa?

 Kɛ́ ohã naagbee sanebimɔ nɛɛ hetoo akɛ hɛɛ lɛ, belɛ esa akɛ ole akɛ jwɛŋmɔ ni hɔ susumɔ ni ejaaa ni mɛi hiɛ nɛɛ sɛɛ ji, kɛ́ adesai nu he akɛ amɛbaaná bɔlɛ nɔŋŋ lɛ, esa akɛ amɛná bɔlɛ. Biblia lɛ kɛ woo hãa adesai, ni efeɔ nakai kɛtsɔ nɔmimaa ni ehãa amɛnáa akɛ amɛbaanyɛ amɛye bɔlɛnamɔ henumɔ ni ejaaa ni amɛnáa lɛ nɔ lɛ.​—Kolosebii 3:5.

 Jwɛŋmɔ yɛ nɔ ni Biblia lɛ kɛɔ lɛ mli. Nɔ ni ekɛɔ mɛi ni náa bɔlɛnamɔ henumɔ amɛhãa mɛi ni amɛkɛhiɛ bɔɔsu kome lɛ nɔŋŋ ji akɛ, ‘amɛjo ajwamaŋbɔɔ naa foi’ taakɛ akpaa gbɛ yɛ nuu kɛ yoo teŋ bɔlɛnamɔ gbɛfaŋ lɛ nɔŋŋ. (1 Korintobii 6:18) Anɔkwa sane ji akɛ mɛi akpekpei abɔ ni náa nuu kɛ yoo teŋ bɔlɛnamɔ henumɔ ni amɛsumɔɔ akɛ amɛhi shi yɛ Biblia shishitoo mlai anaa lɛ bɔɔ mɔdɛŋ amɛyeɔ amɛhe nɔ yɛ ajwamaŋbɔɔ he kai ni amɛkɛkpeɔ lɛ fɛɛ sɛɛ. Mɛi ni nuɔ he akɛ esa akɛ amɛfee supi lɛ baanyɛ aye amɛhe nɔ kɛ́ amɛmiitao amɛsa Nyɔŋmɔ hiɛ lɛɛlɛŋ.​—5 Mose 30:19.