Kɛ́ okaseɔ Nyɔŋmɔ he nii ni ofeɔ nibii ni esumɔɔ lɛ, obaanyɛ ole lɛ. Kɛkɛ lɛ, Nyɔŋmɔ ‘baatsi ebɛŋkɛ bo.’ (Yakobo 4:8) Biblia lɛ kɛ nɔmimaa kɛɔ wɔ akɛ “ekɛ wɔteŋ mɔ fɛɛ mɔ teŋ jekɛɛɛ.”​—Bɔfoi 17:27.

•  Nibii ni esa akɛ wɔfee koni wɔle Nyɔŋmɔ

•  Susumɔi ni ejaaa ni ahiɛ yɛ Nyɔŋmɔ ni abaale lɛ lɛ he

 Kanemɔ Biblia lɛ

•  Nɔ ni Biblia lɛ kɛɔ: “Ŋmalɛ muu lɛ fɛɛ jɛ Nyɔŋmɔ mumɔ lɛŋ.”​—2 Timoteo 3:16.

•  Nɔ ni etsɔɔ: Nyɔŋmɔ ji mɔ ni Ŋma Biblia lɛ. Ekɛ esusumɔi wo mɛi ni ekɛtsu nii kɛŋmala lɛ ajwɛŋmɔ mli. Nyɔŋmɔ etsɔɔ wɔ bɔ ni esumɔɔ ni wɔhi shi wɔhã lɛ yɛ wolo ni nɔ bɛ ni ji Biblia lɛ mli. Ehã wɔna esui kpakpai pii, ekomɛi ji suɔmɔ, jalɛsaneyeli, kɛ mɔbɔnalɛ.​—2 Mose 34:6; 5 Mose 32:4.

•  Nɔ ni obaanyɛ ofee: Kanemɔ Biblia lɛ daa gbi. (Yoshua 1:8) Jwɛŋmɔ nɔ ni okaneɔ lɛ nɔ; bi ohe akɛ: ‘Mɛni enɛ tsɔɔ mi yɛ Mɔ tuuntu ni Nyɔŋmɔ ji lɛ he?’​—Lala 77:12.

   Akɛ nɔkwɛmɔnɔ lɛ, kanemɔ Yeremia 29:11 lɛ, ni obi ohe akɛ: ‘Mɛɛ shihilɛ Nyɔŋmɔ sumɔɔ ni maná​—toiŋjɔlɛ aloo nɔnaa? Ani eji Nyɔŋmɔ ni tɔɔ owele, loo eesumɔ ni maná shihilɛ kpakpa wɔsɛɛ?’

 Kwɛmɔ nibii ni abɔ lɛ jogbaŋŋ

•  Nɔ ni Biblia lɛ kɛɔ: “[Nyɔŋmɔ sui] ni anaaa lɛ, ni ji enaanɔ hewalɛ kɛ Nyɔŋmɔ ni eji lɛ, kɛjɛ jeŋbɔɔ mli beebe lɛ anaa faŋŋ, ejaakɛ atsɔɔ nibii ni efee lɛ anɔ ayɔseɔ enɛɛmɛi.”​—Romabii 1:20.

•  Nɔ ni etsɔɔ: Tamɔ bɔ ni ŋaalɔ ko ninenaa nitsumɔ hãa anaa akɛ ehe esa waa, loo mashiŋ ko ni hiɛ fãi srɔtoi ni tsuɔ nitsumɔi srɔtoi hãa anaa akɛ mɔ ni fee lɛ he esa lɛ, nakai nɔŋŋ nibii ni Nyɔŋmɔ efee lɛ hãa anaa mɔ ni eji diɛŋtsɛ. Akɛ nɔkwɛmɔnɔ lɛ, nibii abɔ ni adesa jwɛŋmɔ lɛ nyɛɔ ekɛtoɔ kɛ bɔ ni jwɛŋmɔ lɛ tsuɔ nii ehãa lɛ, hãa anaa akɛ Nyɔŋmɔ hiɛ kã shi, ni bɔ ni ekudɔɔ hulu lɛ kɛ ŋulamii krokomɛi lɛ hãa wɔnaa akɛ eyɛ hewalɛ kpele.​—Lala 104:24; Yesaia 40:26.

•  Nɔ ni obaanyɛ ofee: Hemɔ be ni okɛkase adebɔɔ nibii ahe nii. Be ni ofeɔ nakai lɛ, bi ohe akɛ, ‘Mɛni samai srɔtoi fɛfɛji ni wɔnaa yɛ adebɔɔ mli lɛ tsɔɔ wɔ yɛ Nyɔŋmɔ he?’ a Anɔkwa, nibii pii yɛ ni adebɔɔ nii nyɛŋ ahã wɔle yɛ wɔ-Bɔlɔ lɛ he. No hewɔ ni ehã wɔ Biblia lɛ.

 Okɛ Nyɔŋmɔ gbɛ́i atsɛ lɛ

•  Nɔ ni Biblia lɛ kɛɔ: “Mabu ehe ejaakɛ ele migbɛ́i. Ebaabo etsɛ mi, ni mahere lɛ nɔ.”​—Lala 91:14, 15.

•  Nɔ ni etsɔɔ: Nyɔŋmɔ, ni gbɛ́i ji Yehowa lɛ, gbalaa ejwɛŋmɔ kɛyaa mɛi ni le egbɛ́i lɛ ni amɛkɛtsuɔ nii yɛ gbɛ ni ja nɔ lɛ anɔ. b (Lala 83:18; Maleaki 3:16) Nyɔŋmɔ jie ehe shi etsɔɔ wɔ kɛtsɔ egbɛ́i diɛŋtsɛ ni ehã wɔle lɛ nɔ. Ekɛɛ akɛ, “Miji Yehowa. Migbɛ́i ji no.”​—Yesaia 42:8.

•  Nɔ ni obaanyɛ ofee: Kɛ́ oowie nɔ ko ni kɔɔ Yehowa he lɛ, okɛ egbɛ́i atsɛ lɛ.

 Okɛ Yehowa awie yɛ sɔlemɔ mli

•  Nɔ ni Biblia lɛ kɛɔ: “Yehowa yɛ mɛi fɛɛ ni boɔ amɛtsɛɔ lɛ lɛ amasɛi.”​—Lala 145:18.

•  Nɔ ni etsɔɔ: Yehowa bɛŋkɛɔ mɛi fɛɛ ni jɛɔ hemɔkɛyeli mli amɛsɔleɔ amɛhãa lɛ lɛ. Sɔlemɔ fata jamɔ ni wɔkɛhãa Nyɔŋmɔ lɛ he, ni etsɔɔ akɛ wɔmiijie bulɛ ni mli kwɔ kpo wɔmiitsɔɔ lɛ.

•  Nɔ ni obaanyɛ ofee: Fɔɔ sɔlemɔ. (1 Tesalonikabii 5:17) Kɛɛmɔ lɛ nɔ fɛɛ nɔ ni gbaa onaa kɛ bɔ ni onuɔ he ohãa.​—Lala 62:8. c

 Feemɔ nibii ni baahã oná hemɔkɛyeli yɛ Nyɔŋmɔ mli

•  Nɔ ni Biblia lɛ kɛɔ: “Kɛ́ hemɔkɛyeli bɛ lɛ, anyɛŋ asa Nyɔŋmɔ hiɛ jogbaŋŋ.”​—Hebribii 11:6.

•  Nɔ ni etsɔɔ: Dani wɔbaanyɛ wɔtsi wɔbɛŋkɛ Nyɔŋmɔ lɛ, esa akɛ wɔná hemɔkɛyeli yɛ emli. Kɛ́ Biblia lɛ kɛɛ wɔná hemɔkɛyeli yɛ emli lɛ, eyaa shɔŋŋ fe ni wɔbaahe wɔye kɛkɛ akɛ Nyɔŋmɔ yɛ. Etsɔɔ hu akɛ wɔkɛ wɔhe afɔ̃ enɔ kwraa, ni nɔ ni fata enɛ he ji, ni wɔbaahe wɔye kwraa akɛ eshiwoi lɛ baaba mli, ni eshishitoo mlai lɛ nilee yɛ mli. Kɛ́ wɔmiitao ni naanyobɔɔ ni yɔɔ wɔkɛ mɔ ko teŋ lɛ mli awa lɛ, esa akɛ wɔhe lɛ wɔye.

•  Nɔ ni obaanyɛ ofee: Anɔkwa hemɔkɛyeli damɔ nibii ni ale nɔ. (Romabii 10:17) No hewɔ lɛ, kasemɔ Biblia lɛ ni oná nɔmimaa akɛ obaanyɛ okɛ ohe afɔ̃ Nyɔŋmɔ kɛ eŋaawoi lɛ anɔ. Yehowa Odasefoi yɛ he miishɛɛ akɛ amɛkɛ bo baakase Biblia lɛ. d

 Feemɔ nibii ni saa Nyɔŋmɔ hiɛ

•  Nɔ ni Biblia lɛ kɛɛ: “Ejaakɛ enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ.”​—1 Yohane 5:3.

•  Nɔ ni etsɔɔ: Yehowa bɛŋkɛɔ mɛi ni bɔɔ mɔdɛŋ amɛyeɔ ekitãi anɔ kɛtsɔɔ akɛ amɛsumɔɔ lɛ lɛ.

•  Nɔ ni obaanyɛ ofee: Kɛ́ ookase Biblia lɛ, yɔsemɔ nibii ni Nyɔŋmɔ sumɔɔ kɛ nibii ni esumɔɔɔ. Bi ohe akɛ, ‘Mɛɛ tsakemɔi manyɛ mafee koni masa mi-Bɔlɔ lɛ hiɛ?’​—1 Tesalonikabii 4:1.

 Kɛ́ okɛ Nyɔŋmɔ ŋaawoi tsu nii lɛ ebaaye ebua bo

•  Nɔ ni Biblia lɛ kɛɔ: “Kɛtsɔ niiashikpamɔ nɔ lɛ, obaana akɛ [Nyɔŋmɔ] hi.”​—Lala 34:8, The Bible in Basic English.

•  Nɔ ni etsɔɔ: Nyɔŋmɔ miitsɛ bo koni obakpa lɛ shi ni ona bɔ ni ehi hã. Kɛ́ ejie esuɔmɔ kpo etsɔɔ bo, ni eye ebua bo lɛ, obaasumɔ ni otsi obɛŋkɛ lɛ.

•  Nɔ ni obaanyɛ ofee: Kɛ́ okane Biblia lɛ, bɔɔ mɔdɛŋ ni okɛ Nyɔŋmɔ ŋaawoi atsu nii koni oná jɔɔmɔi ni jɛɔ mli kɛbaa lɛ eko. (Yesaia 48:17, 18) Agbɛnɛ hu kwɛmɔ aŋkroaŋkroi komɛi ni yɛ Nyɔŋmɔ yelikɛbuamɔ naa lɛ, amɛnyɛ amɛye amɛnaagbai lɛ anɔ, amɛ kɛ amɛweku mli bii lɛ ashihilɛ ebafee nɔ ni sa Nyɔŋmɔ hiɛ, ni amɛná miishɛ diɛŋtsɛ. e

 Susumɔ ni ejaaa: Wɔnyɛŋ wɔle Nyɔŋmɔ ejaakɛ wɔleee mɔ tuuntu ni eji.

 Anɔkwa sane: Nyɔŋmɔ he nibii komɛi yɛ ni ewa akɛ abaanu shishi, eko ji, eji Mumɔ ni anaaa lɛ. Fɛɛ sɛɛ lɛ, wɔbaanyɛ wɔle Nyɔŋmɔ. Anɔkwa, Biblia lɛ kɛɛ ja wɔle lɛ dani wɔbaanyɛ wɔná naanɔ wala. (Yohane 17:3) Biblia lɛ kɛ wiemɔi ni wɔbaanyɛ wɔnu shishi tsuɔ nii kɛtsɔɔ wɔ wɔ-Bɔlɔ lɛ he saji, mɔ ni eji, eyiŋtoi kɛhã adesai kɛ shikpɔŋ lɛ, kɛ eshishitoo mlai. (Yesaia 45:18, 19; 1 Timoteo 2:4) Taakɛ wɔtsĩ tã kɛtsɔ hiɛ lɛ, Biblia lɛ hãa wɔleɔ Nyɔŋmɔ gbɛ́i lɛ hu. (Lala 83:18) No hewɔ lɛ, jeee akɛ wɔbaanyɛ wɔle Nyɔŋmɔ kɛkɛ, shi wɔbaanyɛ wɔtsi wɔbɛŋkɛ lɛ hu.​—Yakobo 4:8.