Gbɛ́ii Enyiɛ Nyɔŋmɔ Yɔɔ?

TSWAA

Hetoo ni Biblia lɛ kɛhãa

Gbɛ́i kome pɛ Nyɔŋmɔ yɔɔ. Akɛ niŋmaa okadii ni ji יהוה damɔɔ shi kɛhãa lɛ yɛ Hebri mli, ni yɛ Ga mli lɛ, atsɛɔ lɛ “Yehowa.” a Nyɔŋmɔ tsɔ egbalɔ Yesaia nɔ ewie akɛ: “Miji Yehowa. Migbɛ́i ji no.” (Yesaia 42:8) Gbɛ́i nɛɛ je kpo aaafee shii 7,000 yɛ blema Bibliai ni akɛ niji ŋmala lɛ amli—ni efa kwraa fe gbɛnaa gbɛ́ii krokomɛi fɛɛ ni akɛtsɛ Nyɔŋmɔ, loo mɔ aŋkro ko gbɛ́i. b

Ani Yehowa yɛ gbɛ́ii krokomɛi?

Eyɛ mli akɛ Biblia lɛ kɛ Nyɔŋmɔ gbɛ́i kome pɛ lɛ diɛŋtsɛ tsɛɔ lɛ moŋ, shi eyɛ gbɛnaa gbɛ́ii kɛ sablai krokomɛi hu ni akɛtsɛɔ lɛ. Gbɛnaa gbɛ́ii kɛ sablai ni nyiɛ sɛɛ nɛɛ ateŋ eko fɛɛ eko jieɔ Yehowa su pɔtɛɛ ko kpo.

Gbɛnaa Gbɛ́i	He Ni Ejeɔ Kpo Yɛ	Nɔ Ni Etsɔɔ
Alfa Lɛ Kɛ Omega Lɛ	Kpojiemɔ 1:8; 21:6; 22:13	“Klɛŋklɛŋ mɔ lɛ kɛ naagbee mɔ lɛ,” loo “shishijee lɛ kɛ naagbee lɛ,” enɛ tsɔɔ akɛ, Nyɔŋmɔ Ofe ko bako kɛtsɔ Yehowa hiɛ, ni eko hu baŋ yɛ esɛɛ. (Yesaia 43:10) Alfa ji okadi ni jeɔ Greek niŋmaa okadii lɛ ashishi, ni Omega ji nɔ ni gbeɔ naa.
Allah	(Ebɛ Biblia lɛ mli)	Aná wiemɔ ni ji “Allah” lɛ kɛjɛ Arabik mli, jeee Nyɔŋmɔ gbɛ́i diɛŋtsɛ ji no, eji gbɛnaa gbɛ́i ni shishi ji “Nyɔŋmɔ.” Mɛi ni tsɔɔ Biblia lɛ shishi kɛyaa Arabik kɛ wiemɔi krokomɛi amli lɛ, kɛ “Allah” damɔɔ shi kɛhãa “Nyɔŋmɔ.”
Awuŋayelɔ	2 Mose 34:14, Ga Biblia momo	Esumɔɔɔ ni ajáaa mɔ ko loo nɔ kroko, ja lɛ pɛ. Atsɔɔ sane nɛɛ shishi yɛ Bibliai krokomɛi amli akɛ “etaooo bienyɛmɛi” kɛ “ale lɛ akɛ mɔ ni biɔ ni aja ekome too pɛ.”—God’s Word Bible; Jeŋ Hee Shishitsɔɔmɔ.
Bɔlɔ	Yesaia 40:28	Lɛ ebɔ nibii fɛɛ.
Feelɔ Kpele	Lala 149:2	Lɛ efee nibii fɛɛ ni yɔɔ shihilɛ mli.—Kpojiemɔ 4:11.
Kpɔ̃lɔ	Yesaia 41:14	Ekpɔ̃ɔ gbɔmɛi kɛjɛɔ esha kɛ gbele dɛŋ kɛtsɔ Yesu Kristo kpɔmɔ afɔleshaa lɛ nɔ.—Yohane 3:16.
Mɔ Krɔŋkrɔŋ Fe Fɛɛ	Abɛi 9:10	Eyɛ krɔŋkrɔŋ ni ehe tse fe bɔɔ nii fɛɛ.
Mɔ Ni Eye Gbii Pii	Daniel 7:9, 13, 22	Ebɛ shishijee; eyɛ kɛjɛ naanɔi anaanɔ dani nɔ fɛɛ nɔ ba shihilɛ mli.—Lala 90:2.
Mɔ Ni Nɔ Kwɔ Fe Fɛɛ	Lala 47:2	Lɛ eyɔɔ gbɛhe ni nɔ kwɔ fe fɛɛ.
Miishɛɛ Nyɔŋmɔ	1 Timoteo 1:11	Ale lɛ akɛ eyɛ miishɛɛ be fɛɛ be.—Lala 104:31.
Miji Mɔ Ni Miji	2 Mose 3:14, Ga Biblia momo	Etsɔɔ ehe nɔ fɛɛ nɔ ni he hiaa kɛtsuɔ eyiŋtoo he nii. Biblia shishitsɔɔlɔi komɛi hu tsɔɔ wiemɔ nɛɛ shishi akɛ “Matsɔ nɔ fɛɛ nɔ ni misumɔɔ” loo “Matsɔ Nɔ Fɛɛ Nɔ Ni Misumɔɔ Ni Matsɔ.” (The Emphasised Bible, by J. B. Rotherham; Jeŋ Hee Shishitsɔɔmɔ) Enɛ yeɔ ebuaa ni anuɔ Nyɔŋmɔ gbɛ́i ni ji Yehowa ni atsĩ tã yɛ 2 Mose 3:15 lɛ mli lɛ shishi.
Naanɔi A-Maŋtsɛ	Kpojiemɔ 15:3	Enɔyeli lɛ bɛ shishijee ni ebɛ naagbee.
Nuŋtsɔ	Lala 135:5	Nɔtsɛ; yɛ Hebri mli lɛ ʼA·dhohnʹ kɛ ʼAdho·nimʹ.
Nuŋtsɔ Ofe	1 Mose 15:2	Eyɛ hegbɛ ni nɔ kwɔ fe fɛɛ; yɛ Hebri mli lɛ ʼAdho·naiʹ.
Nyɔŋmɔ	1 Mose 1:1	Mɔ ni ajáa lɛ; Mɔ ni he wa. Hebri wiemɔ ʼElo·himʹ lɛ ji wiemɔ ni ji Nyɔŋmɔ lɛ pii feemɔ, ni etsɔɔ bɔ ni Yehowa je agbo, esa woo, loo enunyam fa hã.
Nyɔŋmɔi A-Nyɔŋmɔ	5 Mose 10:17	Esoro Nyɔŋmɔ Ofe lɛ kwraa yɛ “nyɔŋmɔi ni he bɛ sɛɛnamɔ” ni mɛi komɛi jáa amɛ lɛ ahe.—Yesaia 2:8.
Ofe	1 Mose 17:1	Anyɛɛɛ ehewalɛ lɛ naa atsĩ. Hebri wiemɔ ʼEl Shad·daiʹ, ni eshishi ji “Nyɔŋmɔ Ofe” lɛ, je kpo shii kpawo yɛ Biblia lɛ mli.
Sɔlemɔ Toibolɔ	Lala 65:2	Lɛ diɛŋtsɛ eboɔ sɔlemɔi ni ajɛɔ hemɔkɛyeli mli asɔleɔ ahãa lɛ lɛ toi.
Shɔ̃lɔ	Yesaia 64:8	Eyɛ hegbɛi yɛ aŋkroaŋkroi kɛ majimaji anɔ, tamɔ bɔ ni gbɛshɔ̃lɔ yɔɔ hegbɛ yɛ su nɔ lɛ.—Romabii 9:20, 21.
Taiatsɛ, Zebaot	Yesaia 1:9, Ga Biblia momo; Romabii 9:29, Jeŋ Hee Shishitsɔɔmɔ	Eji ŋwɛibɔfoi asraafoi akpekpei abɔ ahiɛnyiɛlɔ. Abaanyɛ atsɛ gbɛnaa gbɛ́i ni ji “Yehowa Zebaot” lɛ akɛ “Yehowa, taiatsɛ.”—Romabii 9:29, Jeŋ Hee Shishitsɔɔmɔ; Ga Biblia momo.
Tɛsaa	Lala 18:2, 46	Abobaahe ni yɔɔ shweshweeshwe kɛ yiwalaheremɔ jɛɛhe.
Tookwɛlɔ	Lala 23:1	Ekwɛɔ mɛi ni jáa lɛ lɛ atsiabo.
Tsɔɔlɔ Kpele	Yesaia 30:20, 21	Etsɔɔ wɔ nii koni wɔná he sɛɛ, ni etsɔɔ wɔ gbɛ hu koni ahi ahã wɔ.—Yesaia 48:17, 18.
Tsɛ	Mateo 6:9	Lɛ ehãa wala.
Yiwalaherelɔ	Yesaia 45:21	Ejieɔ mɔ kɛjeɔ oshãra loo hiɛkpãtãmɔ mli.

Hei komɛi agbɛ́i ni yɔɔ Hebri Ŋmalɛ lɛ mli

Anaa Nyɔŋmɔ gbɛ́i yɛ hei komɛi agbɛ́i ni yɔɔ Biblia lɛ mli amli, shi hei nɛɛ agbɛ́ii lɛ jeee gbɛ́i kroko ni akɛtsɛɔ Nyɔŋmɔ.

Hei lɛ agbɛ́i	He ni ejeɔ kpo yɛ	Nɔ ni etsɔɔ
Yehowa-nisi	2 Mose 17:15	“Yehowa Ji Migbɛtsɔɔmɔ Tso,” loo “Yehowa ji miflaŋaa.” (Ga Biblia momo) Yehowa ji Nyɔŋmɔ ko ni ewebii baanyɛ amu afɔ̃ enɔ kɛhã hebuu kɛ yelikɛbuamɔ.—2 Mose 17:13-16.
Yehowa-shalom	Kojolɔi 6:23, 24	“Yehowa Lɛ, Toiŋjɔlɛ Ni.”
Yehowa-shamma	Ezekiel 48:35, shishigbɛ niŋmaa, American Standard Version	“Yehowa Yɛ Jɛmɛ.”
Yehowa-yire	1 Mose 22:13, 14	“Yehowa Kɛbaahã.”

Yiŋtoi ahewɔ ni esa akɛ ole Nyɔŋmɔ gbɛ́i lɛ ni okɛtsu nii

Akɛni Nyɔŋmɔ nuɔ he akɛ egbɛ́i Yehowa lɛ he hiaa waa hewɔ lɛ, ehã eje kpo shii akpei abɔ yɛ Biblia lɛ mli.—Maleaki 1:11.
Yesu, ni ji Nyɔŋmɔ Bi lɛ, ma bɔ ni Nyɔŋmɔ gbɛ́i lɛ he hiaa waa lɛ nɔ mi shii abɔ. Akɛ nɔkwɛmɔnɔ lɛ, esɔle ehã Yehowa akɛ: “Ogbɛ́i lɛ he atse.”—Mateo 6:9; Yohane 17:6.
Kɛ́ mɛi bale Nyɔŋmɔ gbɛ́i lɛ ni amɛkɛtsu nii lɛ, no tsɔɔ akɛ amɛje amɛkɛ Yehowa teŋ naanyobɔɔ lɛ shishi ji no. (Lala 9:10; Maleaki 3:16) Naanyobɔɔ nɛɛ hãa amɛnáa shi ni Nyɔŋmɔ ewo lɛ he sɛɛ; ewo shi akɛ: “Akɛni esumɔɔ mi hewɔ lɛ, majie lɛ. Mabu ehe ejaakɛ ele migbɛ́i.”—Lala 91:14.
Biblia lɛ kɛɔ akɛ: “Ayɛ nibii ni atsɛɔ amɛ nyɔŋmɔi moŋ, kɛji yɛ ŋwɛi jio, yɛ shikpɔŋ lɛ nɔ jio, tamɔ bɔ ni ‘nyɔŋmɔi’ babaoo kɛ ‘nuŋtsɔmɛi’ babaoo yɔɔ lɛ.” (1 Korintobii 8:5, 6) Kɛ̃lɛ, ehãa efeɔ faŋŋ akɛ anɔkwa Nyɔŋmɔ kome too lɛ gbɛ́i ji Yehowa.—Lala 83:18.

a Hebri woloŋlelɔi komɛi sumɔɔ ni amɛkɛ gbɛ́i “Yahweh” moŋ atsɛ Nyɔŋmɔ.

b Nyɔŋmɔ gbɛ́i lɛ ni afo lɛ kuku, ni ji “Yah” lɛ, jeɔ kpo aaafee shii 50 yɛ Biblia lɛ mli, ni bɔ ni ejeɔ kpo yɛ wiemɔ “Haleluya” ni s hishi ji “Nyɛjiea Yah yi” lɛ hu fata he.—Kpojiemɔ 19:1; Ga Biblia momo.

Saji Krokomɛi Ni Tamɔ Enɛ

Nyɔŋmɔ Sanebimɔi Ni Biblia Lɛ Ehã Hetoo

Ekolɛ Obaasumɔ Enɛ Hu

SANEBIMƆI NI BIBLIA LƐ EHÃ HETOO

Yehowa Odasefoi

Gbɛ́ii Enyiɛ Nyɔŋmɔ Yɔɔ?

Hetoo ni Biblia lɛ kɛhãa

Ani Yehowa yɛ gbɛ́ii krokomɛi?

Hei komɛi agbɛ́i ni yɔɔ Hebri Ŋmalɛ lɛ mli

Yiŋtoi ahewɔ ni esa akɛ ole Nyɔŋmɔ gbɛ́i lɛ ni okɛtsu nii

Saji Krokomɛi Ni Tamɔ Enɛ

Ekolɛ Obaasumɔ Enɛ Hu

Namɔ Ji Yehowa?

Ani Nyɔŋmɔ yɛ Gbɛ́i?

Ani Nyɔŋmɔ Gbɛ́i Ji Yesu?

Mɛni Loo Namɔ Ji “Alfa Lɛ Kɛ Omega Lɛ”?

Bi Ni Abasara Bo