Klɛŋklɛŋ Wolo Ni Akɛmaje Korintobii Lɛ 16:1-24
16 Agbɛnɛ nɔ ni kɔɔ onia ni atsuɔ ahãa mɛi krɔŋkrɔŋi lɛ he lɛ+, nyɛbaanyɛ nyɛkɛ gbɛtsɔɔmɔi ni mikɛhã Galatia asafoi lɛ atsu nii.
2 Otsi fɛɛ otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ ajɛ nɔ ni lɛ diɛŋtsɛ eyɔɔ lɛ mli ekɛ nɔ ko ato, koni mikaba dani atsu onia lɛ.
3 Shi kɛ́ mishɛ jɛmɛ lɛ, matsu hii ni nyɛbaaŋmala woji kɛkpɛlɛ amɛnɔ lɛ,+ koni amɛkɛ nyɛnikeenii ni nyɛjɛ mlihilɛ mli nyɛkɛhã lɛ aya Yerusalem.
4 Shi kɛ́ nilee yɛ mli akɛ mi hu maya jɛmɛ lɛ, no lɛ amɛbaafata mihe kɛya.
5 Shi kɛ́ miyatsɔ Makedonia lɛ, maba nyɛŋɔɔ, ejaakɛ mayatsɔ Makedonia;+
6 ni ekolɛ mikɛ nyɛ baahi shi, loo maye fɛ̃i be lɛ po yɛ nyɛŋɔɔ, koni no sɛɛ lɛ, he ni maya lɛ, nyɛyajie mi gbɛ.
7 Ejaakɛ misumɔɔɔ akɛ minaa nyɛ amrɔ nɛɛ be ni minyiɛ gbɛfãa nɔ kɛkɛ, ejaakɛ mihiɛ kã nɔ akɛ kɛ́ Yehowa* aaaŋmɛ gbɛ lɛ, mabaye be ko yɛ nyɛŋɔɔ.+
8 Shi mahi Efeso+ kɛyashi Pentekoste Gbi Jurɔ lɛ nɔ,
9 ejaakɛ agbele shinaa wulu ko ahã mi kɛhã nitsumɔ,+ shi shiteekɛwolɔi babaoo yɛ.
10 Agbɛnɛ, kɛji Timoteo+ bashɛ shi lɛ, nyɛkwɛa ni nɔ ko nɔ ko akawo ehe gbeyei be ni eyɔɔ nyɛteŋ lɛ, ejaakɛ eetsu Yehowa* nitsumɔ,+ tamɔ mi nɔŋŋ.
11 No hewɔ lɛ, mɔ ko akanyaŋe lɛ. Nyɛjiea lɛ gbɛ yɛ toiŋjɔlɛ mli, koni eba miŋɔɔ, ejaakɛ mi kɛ nyɛmimɛi lɛ miimɛ lɛ.
12 Agbɛnɛ, yɛ wɔnyɛmi Apolo+ gbɛfaŋ lɛ, miwo lɛ hewalɛ waa akɛ ekɛ nyɛmimɛi lɛ aba nyɛŋɔɔ. Etoko eyiŋ akɛ ebaaba amrɔ nɛɛ, shi kɛ́ ená hegbɛ lɛ, ebaaba.
13 Nyɛyaa nɔ nyɛshia kpe,+ nyɛdamɔa shi shiŋŋ yɛ hemɔkɛyeli lɛ mli,+ nyɛyaa nɔ nyɛfea nyɛnii tamɔ hii,*+ nyɛhe awaa.+
14 Nyɛfea nyɛnii fɛɛ yɛ suɔmɔ mli.+
15 Agbɛnɛ, nyɛmimɛi, miiwo nyɛ hewalɛ akɛ: Nyɛle Stefana shĩabii lɛ akɛ amɛji klɛŋklɛŋ yibii ni aná yɛ Akaia, ni amɛkɔ mɛi krɔŋkrɔŋi lɛ asɔɔmɔ amɛfɔ̃ amɛnɔ.
16 Nyɛ hu nyɛyaa nɔ nyɛbaa nyɛhe shi nyɛhãa mɛi ni tamɔ nakai, kɛ mɛi fɛɛ ni kɛ wɔ tsuɔ nii, ni amɛtsuɔ nii waa lɛ.+
17 Shi miná miishɛɛ akɛ Stefana+ kɛ Fortunato kɛ Akaiko yɛ biɛ, ejaakɛ ni nyɛbɛ miŋɔɔ nɛɛ, amɛbaye nyɛnajiaŋ.
18 Ejaakɛ amɛbahã mimumɔ kɛ nyɛ hu nyɛnɔ lɛ he ejɔ lɛ. No hewɔ lɛ, nyɛhiɛ asɔa mɛi ni tamɔ nakai.
19 Asia asafoi lɛ miiŋa nyɛ. Akwila kɛ Priska kɛ asafo ni yɔɔ amɛshĩa+ lɛ mli lɛ miiŋa nyɛ jogbaŋŋ yɛ Nuŋtsɔ lɛ mli.
20 Nyɛmimɛi lɛ fɛɛ miiŋa nyɛ. Nyɛkɛ naashɔmɔ krɔŋkrɔŋ aŋaŋaa nyɛhe.
21 Mi Paulo, mi diɛŋtsɛ mininenaa ŋamɔ nɛ.
22 Kɛ́ mɔ ko sumɔɔɔ Nuŋtsɔ lɛ sane lɛ, hã etsɔ mɔ ni alomɔ lɛ. Ao, wɔ-Nuŋtsɔ, ba!
23 Nuŋtsɔ Yesu dromɔ lɛ kɛ nyɛ ahi shi.
24 Misuɔmɔ lɛ kɛ nyɛ fɛɛ ahi shi yɛ Kristo Yesu mli.
