1 Kronika 13:1-14
13 David kɛ asraafoi akpei anɔkwɛlɔi lɛ kɛ asraafoi ohai anɔkwɛlɔi lɛ, kɛ hiɛnyiɛlɔi lɛ fɛɛ tee ajina.+
2 Kɛkɛ ni David kɛɛ Israel asafo lɛ fɛɛ akɛ: “Kɛ́ esa nyɛhiɛ ni eja yɛ Yehowa, wɔ-Nyɔŋmɔ lɛ hu hiɛ lɛ, belɛ nyɛhãa wɔtsua kɛyaa wɔnyɛmimɛi hii ni eshwɛ ni yɔɔ Israel kpokpai lɛ fɛɛ anɔ kɛ osɔfoi lɛ kɛ Levibii lɛ ni yɔɔ amɛmaji+ lɛ amli kɛ hei ni kooloi yeɔ nii yɛ ni bɔle amɛmaji lɛ ahe lɛ aŋɔɔ koni amɛba ni amɛbafata wɔhe.
3 Koni wɔyawó wɔ-Nyɔŋmɔ lɛ Adeka+ lɛ kɛku sɛɛ kɛba.” Ejaakɛ yɛ Saul gbii lɛ amli lɛ, jeee mɔ ko mɔ ko he sane ji Adeka lɛ.+
4 Asafo lɛ fɛɛ kpɛlɛ nɔ akɛ afee nakai, ejaakɛ eja yɛ maŋbii lɛ fɛɛ ahiɛ.
5 No hewɔ lɛ, David bua Israel fɛɛ naa, kɛjɛ Ejipt faa* lɛ he aahu kɛtee Lebo-hamat*+ tɔ̃ɔ, koni ayawó anɔkwa Nyɔŋmɔ lɛ Adeka lɛ kɛjɛ Kiriat-yearim kɛba.+
6 David kɛ Israel fɛɛ kwɔ kɛtee Baala,+ ni ji Kiriat-yearim, Yudabii lɛ amaŋ lɛ, koni amɛyawó Yehowa, anɔkwa Nyɔŋmɔ lɛ, ni taa maŋtsɛ sɛi nɔ yɛ kerubim lɛ anɔ*+ lɛ Adeka lɛ ni mɛi yaboɔ amɛtsɛɔ egbɛ́i yɛ hiɛ lɛ, kɛjɛ jɛmɛ kɛba.
7 Shi amɛkɛ anɔkwa Nyɔŋmɔ lɛ Adeka lɛ ma shwiili hee ko nɔ,+ ni amɛwó kɛje Abinadab shĩa lɛ, ni Uza kɛ Ahio nyiɛ shwiili lɛ hiɛ.+
8 David kɛ Israel fɛɛ miinya yɛ anɔkwa Nyɔŋmɔ lɛ hiɛ kɛ amɛhewalɛ fɛɛ, ni amɛmiila, ni amɛmiitswa saŋkui kɛ kpãa saŋkui krokomɛi kɛ akashai+ kɛ tsɛŋtsɛŋi,+ ni amɛmiikpã tɛtɛrɛmantɛrɛi.+
9 Shi be ni amɛshɛ Kidon ŋmaagbeemɔhe lɛ, Uza kpã enine mli ni emɔ Adeka lɛ mli, ejaakɛ shwɛ fioo ni tsinai lɛ atsi Adeka lɛ agbee shi.
10 Kɛkɛ ni Yehowa mli wo la ewo Uza, ni etswa lɛ nɔ ejaakɛ ekpã enine mli ni emɔ Adeka lɛ mli,+ ni egbo yɛ jɛmɛ yɛ Nyɔŋmɔ hiɛ.+
11 Shi David mli wo la* ejaakɛ Yehowa mlifu egbá ewo Uza; ni atsɛ jɛmɛ akɛ Perez-uza,* ni nakai atsɛɔ jɛmɛ lolo kɛbashi ŋmɛnɛ.
12 No hewɔ lɛ, David she anɔkwa Nyɔŋmɔ lɛ gbeyei yɛ nakai gbi lɛ nɔ, ni ekɛɛ akɛ: “Te aaafee tɛŋŋ ni anɔkwa Nyɔŋmɔ lɛ Adeka lɛ aaaba miŋɔɔ lɛ?”+
13 David kɛ Adeka lɛ baaa he ni eyɔɔ yɛ David Maŋ lɛ mli, shi ehã awó kɛtee Obed-edom, Gatnyo* lɛ shĩa lɛ.
14 Anɔkwa Nyɔŋmɔ lɛ Adeka lɛ hi Obed-edom shĩabii lɛ aŋɔɔ yɛ eshĩa lɛ nyɔji etɛ, ni Yehowa tee nɔ ejɔɔ Obed-edom shĩabii lɛ kɛ nɔ fɛɛ nɔ ni eyɔɔ.+
Shishigbɛ Niŋmaa
^ Loo “kɛjɛ Shihor ni yɔɔ Ejipt.”
^ Loo “he ni atsɔɔ kɛboteɔ Hamat lɛ.”
^ Shishitsɔɔmɔi komɛi kɛɔ akɛ, “ateŋ.”
^ Loo “egba David naa.”
^ Eshishi ji, “Gba Ewo Uza.”
^ Loo “Gitinyo.”
