1 Kronika 14:1-17
14 Hiram,+ Tiro maŋtsɛ lɛ, tsu mɛi kɛtee David ŋɔɔ, ni ehã akɛ tseneduru tsei, kɛ tɛ gbogbotswalɔi, kɛ kapintafoi hu tee ni amɛyama maŋtsɛ shĩa amɛhã David.+
2 Ni David na akɛ Yehowa ehã emaŋtsɛyeli lɛ edamɔ shi shiŋŋ yɛ Israel nɔ,+ ejaakɛ ewó emaŋtsɛyeli lɛ nɔ gojoo yɛ Nyɔŋmɔ maŋ Israel hewɔ.+
3 David ŋɔ ŋamɛi krokomɛi+ yɛ Yerusalem, ni David fɔ bihii kɛ biyei krokomɛi hu.+
4 Bii ni afɔ ahã lɛ yɛ Yerusalem lɛ agbɛ́ii nɛ:+ Shamua kɛ Shobab kɛ Natan+ kɛ Solomon+
5 kɛ Ibhar kɛ Elishua kɛ Elpelet
6 kɛ Noga kɛ Nefeg kɛ Yafia
7 kɛ Elishama kɛ Beeliada kɛ Elifelet.
8 Be ni Filistibii lɛ nu akɛ afɔ David mu ni awó lɛ Israel fɛɛ nɔ maŋtsɛ lɛ,+ Filistibii lɛ fɛɛ kwɔ kɛbatao David.+ Be ni David nu he lɛ, etee koni ekɛ amɛ ayawu.
9 Kɛkɛ ni Filistibii lɛ ba, ni amɛbatutua mɛi ni yɔɔ Refaim Jɔɔ lɛ mli lɛ.+
10 David bi Nyɔŋmɔ nii akɛ: “Mikwɔ kɛya ni mikɛ Filistibii lɛ ayawu lo? Ani okɛ amɛ baawo midɛŋ?” Ni Yehowa kɛɛ David akɛ: “Kwɔɔ kɛya, ni mikɛ Filistibii lɛ baawo odɛŋ kɛ̃.”+
11 No hewɔ lɛ, David kwɔ kɛtee Baal-perazim,+ ni eyagbe amɛ yɛ jɛmɛ. Kɛkɛ ni David kɛɛ akɛ: “Anɔkwa Nyɔŋmɔ lɛ etsɔ minine nɔ egbá kɛtsɔ mihenyɛlɔi lɛ ateŋ tamɔ nu ni eje ŋa gbáa lɛ.” No hewɔ ni amɛtsɛ jɛmɛ akɛ Baal-perazim* lɛ.
12 Filistibii lɛ shi amɛnyɔŋmɔi lɛ yɛ jɛmɛ, ni yɛ David famɔ naa lɛ, ashã amɛnyɔŋmɔi lɛ yɛ la mli.+
13 Sɛɛ mli lɛ, Filistibii lɛ ba ekoŋŋ, ni amɛbatutua mɛi ni yɔɔ jɔɔ lɛ mli lɛ.+
14 David bi Nyɔŋmɔ nii ekoŋŋ, shi anɔkwa Nyɔŋmɔ lɛ kɛɛ lɛ akɛ: “Kaakwɔ kɛyi amɛsɛɛ tɛ̃ɛ. Shi lɔgɔmɔ kɛyaje amɛsɛɛgbɛ, ni otutua amɛ yɛ baka tsei lɛ ahiɛ.+
15 Ni kɛ́ onu gbɛɛmɔ yɛ baka tsei lɛ ayiteŋ tamɔ najiashi gbɛɛmɔ lɛ, no lɛ, tutuamɔ amɛ, ejaakɛ anɔkwa Nyɔŋmɔ lɛ eje kpo kɛtsɔ ohiɛ koni eyagbe Filistibii lɛ asraafoi lɛ.”+
16 No hewɔ lɛ, David fee tamɔ bɔ ni anɔkwa Nyɔŋmɔ lɛ efã lɛ lɛ pɛpɛɛpɛ,+ ni egbe Filistibii lɛ kɛjɛ Gibeon kɛtee Gezer.+
17 Ni David he gbɛ́i yɛ shikpɔji lɛ fɛɛ anɔ, ni Yehowa hã ehe ŋmiŋmi mɔmɔ jeŋmaji lɛ fɛɛ.+
Shishigbɛ Niŋmaa
^ Eshishi ji, “Mɔ Ni Gbaa Kɛtsɔɔ Mli.”
