1 Mose 19:1-38
19 Ŋwɛibɔfoi enyɔ lɛ yashɛ Sodom gbɛkɛ mli, ni no mli lɛ, Lot ta Sodom agbó lɛ naa. Be ni Lot na amɛ lɛ, ete shi koni ekɛ amɛ ayakpe, ni ekula shi ni ekɛ ehiɛ bu shi.+
2 Ni ekɛɛ: “Minuŋtsɔmɛi, miikpa nyɛ fai, nyɛgbaa kɛbaa nyɛtsulɔ shĩa lɛ, ní nyɛbayea jenamɔ lɛ yɛ jɛmɛ, ní afɔ nyɛnaji ahe ahã nyɛ. Kɛkɛ lɛ, nyɛbaanyɛ nyɛte shi mra ní nyɛtsa nyɛgbɛfãa lɛ nɔ.” Kɛkɛ ni amɛkɛɛ: “Dabi, wɔbaaye jenamɔ lɛ yɛ henaabuamɔhe lɛ.”
3 Shi enyɛ amɛnɔ aahu ni amɛkɛ lɛ tee eshĩa lɛ. Kɛkɛ ni eŋmɛ amɛ okpɔlɔ, ni eshã blodo ni ashikishaŋ-sha* bɛ mli, ni amɛye.
4 Shi dani amɛbaakamɔ shi amɛwɔ lɛ, maŋ lɛ mli hii lɛ—ni ji Sodom hii lɛ fɛɛ, kɛjɛ gbekɛ nuu nɔ kɛyashi nuumo nɔ—fee ekome akɛ asafo yuu, ni amɛbagba amɛbɔle shĩa lɛ he kɛkpe.
5 Ni amɛtee nɔ amɛbolɔ amɛtsɛ Lot, ni amɛkɛɛ lɛ akɛ: “Nɛgbɛ hii ni ba oŋɔɔ gbɛkɛ nɛɛ yɔɔ? Okɛ amɛ aje kpo kɛbahã wɔ koni wɔkɛ amɛ aná bɔlɛ.”+
6 Kɛkɛ ni Lot je kpo eyanina amɛ yɛ shinaa lɛ naa, ni eŋa shinaa lɛ yɛ esɛɛ.
7 Ekɛɛ: “Minyɛmimɛi, miikpa nyɛ fai, nyɛkafea efɔŋ.
8 Nyɛfainɛ nyɛboa mi toi, miyɛ biyei enyɔ ní kɛ nuu ko náko bɔlɛ dã. Nyɛfainɛ, nyɛhãa mikɛ amɛ abahãa nyɛ ní nyɛfea amɛ nɔ fɛɛ nɔ ni sa nyɛhiɛ. Shi nyɛkafea hii nɛɛ nɔ ko nɔ ko, ejaakɛ amɛbaba abo yɛ mishĩa lɛ.”*+
9 Kɛkɛ ni amɛkɛɛ: “Jee wɔhiɛ!” Ni amɛkɛɛ kɛfata he akɛ: “Gbɔmɔ kome nɛɛ ebahi biɛ akɛ gbɔ, ni kɛ̃lɛ, lɛ moŋ eetao ekojo wɔ! Agbɛnɛ, wɔbaafee bo efɔŋ fe bɔ ni wɔbaafee amɛ lɛ.” Ni amɛke yuu kɛtee Lot nɔ,* ni amɛtsi kɛtee hiɛ koni amɛyajwa shinaa lɛ.
10 No hewɔ lɛ, hii lɛ kpã amɛnine mli ni amɛmɔ Lot kɛba amɛŋɔɔ yɛ shĩa lɛ mli, ni amɛŋa shinaa lɛ.
11 Shi amɛhã hii ni yɔɔ shĩa lɛ shinaa lɛ naa lɛ shwila, kɛjɛ mɔ bibioo fe fɛɛ nɔ kɛyashi mɔ wulu fe fɛɛ nɔ, no hewɔ lɛ, etɔ amɛ waa kɛ shinaa lɛ naa gbɛ taomɔ.
12 Ni hii lɛ kɛɛ Lot akɛ: “Ani oyɛ mɔ kroko hu yɛ biɛ? Shaahiimɛi kɛ obihii kɛ obiyei kɛ omɛi fɛɛ ni yɔɔ maŋ lɛ mli lɛ, jiemɔ amɛ kɛshi biɛ!
13 Ejaakɛ wɔmiiba wɔbakpãtã biɛ hiɛ, ejaakɛ nibii ní awieɔ ashiɔ amɛ lɛ fa* tsɔ yɛ Yehowa hiɛ,+ no hewɔ lɛ, Yehowa tsu wɔ ní wɔbakpãtã maŋ lɛ hiɛ.”
14 No hewɔ lɛ, Lot je kpo ekɛ eshaahiimɛi ní kɛ ebiyei lɛ baahi shi lɛ yawie, ni ekɛɛ amɛ shii abɔ akɛ: “Nyɛtea shi! Nyɛshia biɛ, ejaakɛ Yehowa baakpãtã maŋ lɛ hiɛ!” Shi efee eshaahiimɛi lɛ akɛ shwɛmɔ eshwɛɔ lɛ.+
15 Be ni je bɔi tsɛremɔ lɛ, ŋwɛibɔfoi lɛ kɛ hiɛdɔɔ kɛɛ Lot akɛ: “Tee shi! Ŋɔɔ oŋa kɛ obiyei enyɔ lɛ ni kɛ bo yɔɔ biɛ lɛ, koni akabɛɛ bo ashwie yɛ maŋ lɛ nɔ sha lɛ hewɔ!”+
16 Shi akɛni Yehowa musuŋ tsɔ lɛ yɛ ehe hewɔ lɛ,+ be ni eshashaoɔ shi lɛ, hii lɛ mɔ enineshi kɛ eŋa nineshi kɛ ebiyei enyɔ lɛ anijiashi, ni amɛkɛ lɛ je kpo kɛje maŋ lɛ mli.+
17 Be ni amɛkɛ amɛ shɛ maŋ lɛ klotia pɛ kɛkɛ ni amɛteŋ mɔ kome kɛɛ: “Joo foi kɛya koni oyi* aná wala! Kaakwɛ osɛɛ,+ ni kaawa odamɔ shi yɛ kpokpaa lɛ nɔ he ko he ko!+ Joo foi kɛya gɔji lɛ anɔ, koni akabɛɛ bo ashwie!”
18 Ni Lot kɛɛ amɛ akɛ: “Yehowa, ofainɛ, okɛ mi akaya jɛmɛ!
19 Agbɛnɛ, ofainɛ, otsulɔ hiɛ eba nyam yɛ ohiɛ, ni oojie mlihilɛ kpele* kpo ootsɔɔ mi kɛtsɔ miyi* ní obaa lɛ nɔ,+ shi minyɛŋ majo foi kɛya gɔji lɛ anɔ, ejaakɛ miishe gbeyei akɛ ekolɛ oshãra ko baayashãra mi, ni magbo.+
20 Agbɛnɛ, ofainɛ, maŋ nɛɛ bɛŋkɛ, ni manyɛ majo foi kɛya jɛmɛ; jɛmɛ edaaa. Ofainɛ, hã majo foi kɛya jɛmɛ. Jɛmɛ edaaa. Ni miyi baaná wala.”*
21 No hewɔ lɛ, ekɛɛ lɛ akɛ: “Yoo minu, mana mli mahã bo yɛ enɛ hu mli,+ ni mikpãtãŋ maŋ ni owie he lɛ hiɛ.+
22 Ohe afee oya! Joo foi kɛya jɛmɛ, ejaakɛ minyɛŋ nɔ ko nɔ ko mafee, ja oyashɛ jɛmɛ dã!”+ No hewɔ ni atsɛ maŋ lɛ gbɛ́i akɛ Zoar*+ lɛ.
23 Be ni Lot yashɛ Zoar lɛ, no mli lɛ hulu eje.
24 Kɛkɛ ni Yehowa hã sɔlfa kɛ la nɛ eshwie Sodom kɛ Gomora nɔ—ejɛ Yehowa ŋɔɔ yɛ ŋwɛi.+
25 No hewɔ lɛ, ekpãtã maji nɛɛ ahiɛ, hɛɛ, ekpãtã kpokpaa muu lɛ fɛɛ—mɛi fɛɛ ni yɔɔ maji lɛ amli kɛ tsei ni yɔɔ shikpɔŋ lɛ nɔ lɛ ahiɛ.+
26 Shi Lot ŋa lɛ, ní nyiɛ esɛɛgbɛ lɛ, bɔi esɛɛ kwɛmɔ, ni etsɔ ŋookpɔ+ kɛma shi.
27 Agbɛnɛ, Abraham te shi leebi maŋkpa, ni etee he ni tsutsu lɛ edamɔ Yehowa hiɛ yɛ lɛ.+
28 Be ni ekwɛ Sodom kɛ Gomora ni yɔɔ jɔɔ mli gbɛ lɛ kɛ kpokpaa muu lɛ fɛɛ nɔ lɛ, ena akɛ nɔ ko ni yɔɔ gbeyei miiya nɔ. Lasu kpɔŋŋ ko miifã kɛmiijɛ shikpɔŋ lɛ nɔ tamɔ flɔnɔɔ* mli lasu!+
29 No hewɔ lɛ, be ni Nyɔŋmɔ kpãtã maji ni yɔɔ kpokpaa lɛ nɔ lɛ ahiɛ lɛ, Nyɔŋmɔ kai Abraham, ni ejie Lot kɛje maji ni ekpãtã hiɛ lɛ amli, ni ji maji ní Lot hi mli lɛ.+
30 Sɛɛ mli lɛ, Lot shi Zoar ni ekɛ ebiyei enyɔ lɛ kwɔ kɛtee gɔji lɛ anɔ ni amɛyahi jɛmɛ,+ ejaakɛ eeshe gbeyei akɛ ebaahi Zoar.+ No hewɔ lɛ, ekɛ ebiyei enyɔ lɛ yahi tɛkplo ko mli.
31 Ni kromɔbi lɛ kɛɛ fiootsɛ lɛ akɛ: “Wɔpapa egbɔ, ni nuu ko bɛ shikpɔŋ lɛ nɔ ní kɛ wɔ baaná bɔlɛ tamɔ bɔ ni afeɔ yɛ shikpɔŋ muu lɛ fɛɛ nɔ lɛ.
32 Ba, hã wɔhã wɔpapa wain ni enu, ní wɔkɛ lɛ awɔ koni wɔwo shwiei wɔhã wɔpapa.”
33 No hewɔ lɛ, nakai gbɛkɛ lɛ, amɛtee nɔ amɛhã amɛpapa wain ni enu; kɛkɛ ni kromɔbi lɛ tee ni ekɛ epapa yawɔ,* shi eleee be ni ebi lɛ bakã shi kɛ be ni ete shi.
34 Ni enɔ jetsɛremɔ lɛ, kromɔbi lɛ kɛɛ fiootsɛ lɛ akɛ: “Naa! nyɛ gbɛkɛ lɛ, mikɛ mipapa yawɔ.* Hã wɔhã lɛ wain ni enu gbɛkɛ nɛɛ hu. No sɛɛ lɛ, bo hu yaa ní okɛ lɛ ayawɔ,* koni wɔwo shwiei wɔhã wɔpapa.”
35 No hewɔ lɛ, nakai gbɛkɛ lɛ hu lɛ, amɛtee nɔ amɛhã amɛpapa wain ni enu; kɛkɛ ni fiootsɛ lɛ tee ni ekɛ lɛ yawɔ,* shi eleee be ni ebi lɛ bakã shi kɛ be ni ete shi.
36 No hewɔ lɛ, Lot biyei enyɔ lɛ fɛɛ kɛ amɛpapa ná musu.
37 Kromɔbi lɛ fɔ binuu, ni ewo lɛ gbɛ́i akɛ Moab.+ Lɛ ji Moabbii ni yɔɔ ŋmɛnɛ lɛ atsɛ.+
38 Fiootsɛ lɛ hu fɔ binuu, ni ewo lɛ gbɛ́i akɛ Ben-ami. Lɛ ji Amonbii+ ni yɔɔ ŋmɛnɛ lɛ atsɛ.
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Loo “amɛbatao hebuu yɛ mishĩa lɛ.” Hebri sht. ŋm., “amɛba mishĩa lɛ hɔɔŋ lɛ shishi.”
^ Loo “amɛfifia Lot waa.”
^ Loo “naa wa.”
^ Loo “osusuma yi.”
^ Loo “suɔmɔ ni tsakeee.”
^ Loo “misusuma yi.”
^ Loo “misusuma baaya nɔ ahi shi.”
^ Eshishi ji, “Bibioo.”
^ Ni ji, flɔnɔɔ ní akɛshãa brik kɛ kã kɛ gbɛ́ kɛ sũ nibii krokomɛi.
^ Loo “yaná bɔlɛ.”
^ Loo “yaná bɔlɛ.”
^ Loo “ayaná bɔlɛ.”
^ Loo “yaná bɔlɛ.”
