1 Mose 20:1-18
-
Ahere Sara kɛje Abimelek dɛŋ (1-18)
20 Agbɛnɛ, Abraham fã* kɛjɛ jɛmɛ+ kɛtee Negeb shikpɔŋ lɛ nɔ, ni eyahi Kadesh+ kɛ Shur+ teŋ. Be ni Abraham yɔɔ Gerar*+ lɛ,
2 esaa ewie yɛ eŋa Sara he akɛ: “Minyɛmi yoo ni.”+ No hewɔ lɛ, Abimelek, Gerar maŋtsɛ lɛ, tsu ayaŋɔ Sara abahã lɛ.+
3 No sɛɛ lɛ, Nyɔŋmɔ ba Abimelek ŋɔɔ nyɔɔŋ yɛ lamɔ mli ni ekɛɛ lɛ akɛ: “Naa, obaagbo yɛ yoo lɛ ni oyaŋɔ lɛ lɛ hewɔ,+ ejaakɛ ebote gbalashihilɛ mli, ni nuu kroko nɔ ji lɛ.”+
4 Shi no mli lɛ, Abimelek etako yoo lɛ he.* No hewɔ lɛ, ekɛɛ: “Yehowa, ani obaagbe jeŋmaŋ ko ní yɛ anɔkwale mli lɛ efeko efɔŋ ko?*
5 Ani jeee Abraham kɛɛ mi akɛ, ‘Minyɛmi yoo ni,’ ni Sara hu kɛɛ akɛ, ‘Minyɛmi nuu ni’? Mifee enɛ kɛ tsui krɔŋŋ kɛ niji ni sane ko bɛ he.”
6 Kɛkɛ ni anɔkwa Nyɔŋmɔ lɛ kɛɛ lɛ yɛ lamɔ lɛ mli akɛ: “Mile akɛ tsui krɔŋŋ okɛfee enɛ, ni no hewɔ ni mitsĩ onaa koni okafee esha oshi mi lɛ. No hewɔ ni miŋmɛɛɛ bo gbɛ ní ota ehe lɛ.
7 Agbɛnɛ, okɛ nuu lɛ ŋa lɛ aku sɛɛ ayahã lɛ, ejaakɛ gbalɔ+ ji lɛ, ni ekɛ hiɛdɔɔ baakpa fai ehã bo,+ ní oya nɔ ohi wala mli. Shi kɛ́ okɛ yoo lɛ ekuuu sɛɛ kɛyaaa lɛ, ná ole akɛ bɔ fɛɛ bɔ ni fee lɛ, obaagbo, bo kɛ mɛi fɛɛ ni ji onɔ lɛ.”
8 Abimelek te shi leebi maŋkpa ni etsɛ etsuji lɛ fɛɛ ni egba amɛ nibii nɛɛ fɛɛ, ni gbeyei mɔmɔ amɛ naakpa.
9 Kɛkɛ ni Abimelek tsɛ Abraham ni ebi lɛ akɛ: “Mɛni ofee wɔ nɛɛ? Mɛɛ esha mifee bo, hewɔ ni okɛ esha kpele ni tamɔ nɛkɛ baa mi kɛ mimaŋtsɛyeli lɛ nɔ nɛɛ? Nɔ ni ofee mi lɛ ejaaa.”
10 Ni Abimelek tee nɔ ekɛɛ Abraham akɛ: “Mɛɛ yiŋtoo hewɔ ofee enɛ lɛ?”+
11 Abraham kɛɛ: “Ejaakɛ mikɛɛ mihe akɛ, ‘Asheee Nyɔŋmɔ gbeyei yɛ biɛ, ni amɛbaagbe mi yɛ miŋa lɛ hewɔ.’+
12 Ni minyɛmi yoo hu ni lɛɛlɛŋ, mipapa bi ni shi jeee mimami bi ni, ni ebatsɔ miŋa.+
13 No hewɔ lɛ, be ni Nyɔŋmɔ hã mishi mitsɛ shĩa+ lɛ ní mikpaa shi lɛ, mikɛɛ lɛ akɛ: ‘Nɛkɛ sa akɛ ojie suɔmɔ ni tsakeee kpo otsɔɔ mi: He fɛɛ he ni wɔbaaya lɛ, kɛɛmɔ akɛ, “Minyɛmi nuu ni.”’”+
14 Ni Abimelek ŋɔ gwantɛŋi kɛ tsinai kɛ tsuji hii kɛ tsuji yei ni ekɛhã Abraham, ni ekɛ eŋa Sara ku sɛɛ ehã lɛ.
15 Abimelek kɛɛ hu akɛ: “Naa, mishikpɔŋ lɛ kã ohiɛ nɛɛ. Hii he fɛɛ he ni osumɔɔ.”
16 Ni ekɛɛ Sara akɛ: “Naa, mihã onyɛmi nuu+ lɛ jwiɛtɛi kapɛji 1,000. Eji okadi hã mɛi fɛɛ ni kɛ bo yɔɔ lɛ, kɛ okadi yɛ mɔ fɛɛ mɔ hiɛ akɛ sane ko bɛ ohe,* ni ajie heguɔgbee kɛje onɔ.”
17 Ni Abraham kɛ hiɛdɔɔ bɔi anɔkwa Nyɔŋmɔ lɛ fai kpamɔ, ni Nyɔŋmɔ tsa Abimelek kɛ eŋa lɛ kɛ etsuji yei lɛ, ni amɛbɔi fɔmɔ;
18 ejaakɛ Yehowa ehã yei fɛɛ ni yɔɔ Abimelek shĩa lɛ etsɔmɔ kenei* yɛ Sara, Abraham ŋa lɛ hewɔ.+
Shishigbɛ Niŋmaa
^ Loo “fã ensara lɛ.”
^ Loo “eyɔɔ Gerar akɛ gbɔ.”
^ Loo “jeŋmaŋ ko ni ja.”
^ Ni tsɔɔ akɛ, ekɛ yoo lɛ náko bɔlɛ.
^ Hebri sht. ŋm., “Naa, eji hiɛhaanɔ kɛhã bo.” Wiemɔ ni ji “hiɛhaanɔ” lɛ ji Hebri fɔŋwiemɔ ni tsɔɔ akɛ, abu yoo ko akɛ eyeɔ bem yɛ mla naa, ni shwamɔ ko bɛ ehe yɛ mɛi ahiɛ.
^ Loo “eŋamɔ yei fɛɛ ni yɔɔ Abimelek shĩa lɛ afɔmɔ kotokui anaa kwraa.”
