1 Mose 26:1-35
26 Agbɛnɛ, hɔmɔ ko ba shikpɔŋ lɛ nɔ, ni esoro no yɛ klɛŋklɛŋ hɔmɔ ni ba yɛ Abraham gbii lɛ amli lɛ he,+ no hewɔ lɛ, Isak tee Filistibii lɛ amaŋtsɛ Abimelek ŋɔɔ yɛ Gerar.
2 Ni Yehowa jie ehe kpo etsɔɔ lɛ, ni ekɛɛ: “Kaakpeleke shi kɛtee Ejipt. Hii shikpɔŋ ni matsɔɔ bo lɛ nɔ.
3 Hii shi akɛ gbɔ yɛ shikpɔŋ nɛɛ nɔ,+ ni maya nɔ mikɛ bo ahi shi ni majɔɔ bo, ejaakɛ bo kɛ oseshi lɛ mikɛ shikpɔji nɛɛ fɛɛ baahã,+ ni maye kitã ni mikã otsɛ Abraham lɛ nɔ:+
4 ‘Mahã oseshi lɛ afa tamɔ ŋwɛi ŋulamii;+ ni mikɛ shikpɔji nɛɛ fɛɛ baahã oseshi lɛ;+ ni oseshi lɛ nɔ shikpɔŋ lɛ nɔ jeŋmaji fɛɛ baatsɔ aná jɔɔmɔ amɛhã amɛhe,’+
5 akɛni Abraham bo migbee toi, ni etee nɔ eye mitaomɔ nii kɛ mikitãi kɛ mifamɔi kɛ mimlai lɛ anɔ lɛ hewɔ.”+
6 No hewɔ lɛ, Isak tee nɔ ehi Gerar.+
7 Be fɛɛ be ni maŋ lɛ nɔ hii lɛ baabi lɛ eŋa lɛ he sane lɛ, ekɛɔ akɛ: “Minyɛmi yoo ni.”+ Eeshe gbeyei akɛ ebaakɛɛ akɛ, “Miŋa ni,” ejaakɛ ekɛɛ, “Maŋ lɛ nɔ hii lɛ baagbe mi yɛ Rebeka hewɔ,” ejaakɛ ehe yɛ fɛo.+
8 Be ko sɛɛ lɛ, Filistibii lɛ amaŋtsɛ Abimelek miikwɛ samfɛlɛ lɛ mli, ni ena ní Isak kɛ eŋa Rebeka miishwɛ suɔmɔ shwɛmɔ.*+
9 Amrɔ lɛ, Abimelek tsɛ Isak ni ekɛɛ: “Asomoaŋ oŋa ni! Mɛni hewɔ okɛɛ, ‘Minyɛmi yoo ni’ lɛ?” Kɛkɛ ni Isak kɛɛ lɛ akɛ: “Mikɛɛ nakai ejaakɛ miishe gbeyei akɛ abaagbe mi yɛ ehewɔ.”+
10 Shi Abimelek tsa nɔ ekɛɛ akɛ: “Mɛni ofee wɔ nɛɛ?+ Kulɛ maŋbii lɛ ateŋ mɔ ko baanyɛ ekɛ oŋa lɛ awɔ kwraa, ni kulɛ obaahã wɔye fɔ!”+
11 Kɛkɛ ni Abimelek kɛ famɔ hã maŋbii lɛ fɛɛ akɛ: “Mɔ fɛɛ mɔ ni baata nuu nɛɛ kɛ eŋa lɛ he lɛ, abaagbe lɛ!”
12 Ni Isak bɔi nidumɔ yɛ nakai shikpɔŋ lɛ nɔ, ni nakai afi lɛ nɔ lɛ, ekpa nɔ ni edu lɛ toi 100, ejaakɛ Yehowa jɔɔ lɛ.+
13 Nuu lɛ tsɔ niiatsɛ, ni etee nɔ eshwere aahu kɛyashi ebatsɔ niiatsɛ kpanaa.
14 Ená gwantɛŋkui kɛ tsinakui kɛ tsuji babaoo,+ ni Filistibii lɛ ahiɛ kɔ̃ enɔ.
15 No hewɔ lɛ, Filistibii lɛ loo sũ kɛtsĩmɔ nubui fɛɛ ní epapa tsuji lɛ tsa yɛ Abraham gbii lɛ amli lɛ.+
16 Kɛkɛ ni Abimelek kɛɛ Isak akɛ: “Jee wɔkutso lɛ mli, ejaakɛ ohe ewa kwraa fe wɔ.”
17 No hewɔ lɛ, Isak fã kɛshi jɛmɛ ni eyabɔ nsara yɛ Gerar+ jɔɔ* lɛ mli, ni ehi jɛmɛ.
18 Ni Isak saa etsa nubui ní atsa yɛ etsɛ Abraham gbii lɛ amli ní Filistibii lɛ tsĩmɔ yɛ Abraham gbele sɛɛ lɛ,+ ni ekɛ gbɛ́i ni epapa kɛwo nubui nɛɛ tsɛ amɛ.+
19 Be ni Isak tsuji lɛ tsaa shi yɛ jɔɔ* lɛ mli lɛ, amɛyana nubu ko ní baa nuŋma.
20 Ni tookwɛlɔi ni yɔɔ Gerar lɛ kɛ Isak tookwɛlɔi lɛ bɔi bemɔ amɛkɛɛ: “Nu lɛ wɔnɔ ni!” No hewɔ lɛ, ewo nubu lɛ gbɛ́i akɛ Esek,* ejaakɛ amɛkɛ lɛ bé.
21 Ni amɛbɔi nubu kroko tsaa, ni amɛkɛ lɛ bɔi bemɔ yɛ no hu he. No hewɔ lɛ, ewo lɛ gbɛ́i akɛ Sitna.*
22 Sɛɛ mli lɛ, efã kɛshi jɛmɛ ni eyatsa nubu kroko, shi amɛkɛ lɛ béee yɛ no he. No hewɔ lɛ, ewo lɛ gbɛ́i akɛ Rehobot,* ni ekɛɛ: “Ejaakɛ amrɔ nɛɛ Yehowa ehã wɔ he ko ni da, ni ehã wɔyi efa yɛ shikpɔŋ lɛ nɔ.”+
23 Kɛkɛ ni eshi jɛmɛ ni ekwɔ kɛtee Beer-sheba.+
24 Nakai nyɔɔŋ lɛ mli lɛ, Yehowa jie ehe kpo etsɔɔ lɛ ni ekɛɛ: “Miji otsɛ Abraham Nyɔŋmɔ lɛ.+ Kaashe gbeyei,+ ejaakɛ mikɛ bo yɛ, ni majɔɔ bo ni mahã oseshi ashwere yɛ mitsulɔ Abraham hewɔ.”+
25 No hewɔ lɛ, ema afɔleshaa latɛ yɛ jɛmɛ, ni etsɛ Yehowa gbɛ́i lɛ.+ Ni Isak fee emama tsũ lɛ yɛ jɛmɛ,+ ni etsuji lɛ tsa nubu yɛ jɛmɛ.
26 Sɛɛ mli lɛ, Abimelek kɛ eŋaawolɔ Ahuzat, kɛ etatsɛ Fikol jɛ Gerar ba eŋɔɔ.+
27 Ni Isak kɛɛ amɛ akɛ: “Mɛni hewɔ nyɛbaa miŋɔɔ, nyɛ mɛi ní nyɛnyɛ mi ní nyɛshwie mi kɛje nyɛkutso lɛ mli lɛ?”
28 Kɛkɛ ni amɛkɛɛ: “Wɔna faŋŋ akɛ, Yehowa kɛ bo yɛ.+ No hewɔ lɛ, wɔkɛɛ, ‘Ofainɛ, hã wɔkɛ bo fɛɛ akãmɔ wɔhe kitã, ní wɔkɛ bo akpaŋ kpaŋmɔ+
29 akɛ ofeŋ wɔ nɔ fɔŋ ko tamɔ bɔ ni wɔ hu wɔyeko bo awui ko lɛ, shi moŋ, ekpakpa sɔŋŋ wɔfee bo, ejaakɛ wɔwo bo gbɛ yɛ toiŋjɔlɛ mli. Amrɔ nɛɛ, Yehowa ejɔɔ bo.’”
30 Ni eŋmɛ amɛ okpɔlɔ, ni amɛye nii, ni amɛnu nɔ ko.
31 Enɔ jetsɛremɔ lɛ, amɛte shi leebi maŋkpa ni amɛkãmɔ amɛhe kitã.+ No sɛɛ lɛ, Isak wo amɛ gbɛ, ni amɛshi eŋɔɔ amɛtee yɛ toiŋjɔlɛ mli.
32 Nakai gbi lɛ nɔ lɛ, Isak tsuji lɛ babɔ lɛ nubu ní amɛtsa+ lɛ he amaniɛ, ni amɛkɛɛ lɛ akɛ: “Wɔyanina nu!”
33 No hewɔ lɛ, ewo nubu lɛ gbɛ́i akɛ Shiba. No hewɔ ni atsɛɔ maŋ lɛ Beer-sheba+ kɛbashi ŋmɛnɛ lɛ.
34 Be ni Esau ye afii 40 lɛ, eŋɔ Hitnyo Beeri biyoo Yudit, kɛ Hitnyo+ Elon biyoo Basemat hu akɛ eŋamɛi.
35 Amɛhã Isak kɛ Rebeka+ werɛ ho amɛhe waa diɛŋtsɛ.*
Shishigbɛ Niŋmaa
^ Loo “Isak miifua eŋa Rebeka.”
^ Loo “nujɔɔ.” Kwɛmɔ Wiemɔi Titrii Amligbalamɔ lɛ.
^ Loo “nujɔɔ.” Kwɛmɔ Wiemɔi Titrii Amligbalamɔ lɛ.
^ Eshishi ji, “Béi.”
^ Eshishi ji, “Sane Ní Akɛfɔ̃ Mɔ Nɔ.”
^ Eshishi ji, “Hei Ni Lɛɛlɛi.”
^ Hebri sht. ŋm., “Amɛfee Isak kɛ Rebeka mumɔ nidɔɔnii.”
