1 Mose 28:1-22
28 No hewɔ lɛ, Isak tsɛ Yakob ni ejɔɔ lɛ ni efã lɛ akɛ: “Kaaŋɔ Kanaan yei lɛ eko akɛ oŋa.+
2 Yaa omami papa Betuel shĩa lɛ yɛ Padan-aram, ní oyaŋɔ yoo yɛ jɛmɛ yɛ omami nyɛmi nuu Laban biyei+ lɛ ateŋ ohã ohe akɛ oŋa.
3 Nyɔŋmɔ Ofe lɛ baajɔɔ bo, ni ebaahã ofɔ ní oshwere babaoo, ni bɔ fɛɛ bɔ ni fee lɛ, obaatsɔ majimaji asafo.+
4 Ni ekɛ Abraham jɔɔmɔ+ lɛ baahã bo kɛ oseshi lɛ, koni oŋɔ shikpɔŋ ní Nyɔŋmɔ kɛhã Abraham,+ ní oyɔɔ nɔ akɛ gbɔ lɛ.”
5 No hewɔ lɛ, Isak wo Yakob gbɛ, ni eyi mli akɛ eeya Padan-aram, koni eya Aramnyo Betuel binuu Laban,+ ni ji Rebeka nyɛmi nuu+ lɛ ŋɔɔ; Rebeka ji Yakob kɛ Esau mami.
6 Esau na akɛ Isak ejɔɔ Yakob ni ewo lɛ gbɛ kɛtee Padan-aram koni eyatao ŋa yɛ jɛmɛ, ni akɛ, be ni ejɔɔ lɛ lɛ efã lɛ akɛ, “Kaaŋɔ Kanaan yei lɛ ateŋ mɔ ko akɛ oŋa,”+
7 ni ena hu akɛ Yakob ebo epapa kɛ emami toi, ni eyi mli kɛmiiya Padan-aram.+
8 Kɛkɛ ni Esau yɔse akɛ etsɛ Isak bɛ Kanaan yei lɛ ahe miishɛɛ,+
9 no hewɔ lɛ, Esau tee Ishmael ŋɔɔ,* ni eyaŋɔ Abraham binuu Ishmael biyoo Mahalat, Nebaiot nyɛmi yoo lɛ akɛ eŋa kɛfata ŋamɛi krokomɛi ni eyɔɔ momo lɛ ahe.+
10 Yakob yi mli kɛjɛ Beer-sheba, ni ewó ehiɛ ewo Haran+ gbɛ.
11 Sɛɛ mli lɛ, ebashɛ he ko, ni eto shi yɛ jɛmɛ koni eye jenamɔ lɛ yɛ jɛmɛ, ejaakɛ hulu lɛ enyɔ shi. No hewɔ lɛ, eŋɔ tɛi ni yɔɔ jɛmɛ lɛ ekome ni ekɛfɔ̃ shi koni etsɔle, ni ekã shi yɛ jɛmɛ.+
12 Kɛkɛ ni ela lamɔ ko, ni naa! akɛ aŋtswele* ema shikpɔŋ lɛ nɔ, ni eyiteŋ yashiɔ ŋwɛi; ni Nyɔŋmɔ bɔfoi miikwɔ ni amɛmiikpeleke yɛ nɔ.+
13 Ni naa! Yehowa yɛ aŋtswele lɛ yiteŋ, ni ekɛɛ:
“Miji Yehowa, otsɛ Abraham Nyɔŋmɔ lɛ kɛ Isak Nyɔŋmɔ lɛ.+ Bo kɛ oseshi+ lɛ mikɛ shikpɔŋ ní okã nɔ lɛ baahã.
14 Ni oseshi lɛ baafa tamɔ shikpɔŋ mulu,+ ni obaagbɛ oshwã shikpɔŋ lɛ nɔ fɛɛ kɛya bokã kɛ anai kɛ kooyi kɛ wuoyi, ni bo kɛ oseshi lɛ nɔ abaatsɔ ajɔɔ shikpɔŋ lɛ nɔ wekui fɛɛ.*+
15 Mikɛ bo yɛ, ni mabu ohe yɛ he fɛɛ he ni obaaya, ni mikɛ bo baaku sɛɛ kɛba shikpɔŋ nɛɛ+ nɔ. Mishiŋ bo, ni bɔ fɛɛ bɔ ni fee lɛ, mafee nɔ ni miwo bo he shi lɛ.”+
16 Kɛkɛ ni Yakob hiɛ tsɛ̃ kɛjɛ ewɔ lɛ mli, ni ekɛɛ: “Anɔkwa, Yehowa yɛ biɛ, ni mi lɛ mileee.”
17 Kɛkɛ ni gbeyei mɔ lɛ ni ekɛɛ kɛfata he akɛ: “Kwɛ bɔ ni biɛ yɔɔ gbeyei hã! Enɛ lɛ, Nyɔŋmɔ shĩa nɛ,+ ni ŋwɛi naa agbó lɛ nɛ.”+
18 No hewɔ lɛ, Yakob te shi leebi maŋkpa ni eŋɔ tɛ ní etsɔle lɛ, ni ekɛma shi tamɔ akulashiŋ ni efɔse mu eshwie yiteŋ.+
19 No hewɔ lɛ, ewo jɛmɛ gbɛ́i akɛ Betel,* shi tsutsu lɛ maŋ lɛ gbɛ́i ji Luz.+
20 Kɛkɛ ni Yakob wo shi ekɛɛ: “Kɛji Nyɔŋmɔ kɛ mi baahi shi, ni ebaabu mihe yɛ migbɛfãa lɛ mli, ni ebaahã mi niyenii* maye kɛ atadei mawo,
21 ni minyɛ miku misɛɛ kɛba mitsɛ shĩa lɛ yɛ toiŋjɔlɛ mli lɛ, no lɛ, Yehowa etsɔɔ lɛɛlɛŋ akɛ, lɛ ji mi-Nyɔŋmɔ.
22 Ni tɛ nɛɛ ní mikɛma shi tamɔ akulashiŋ lɛ baatsɔ Nyɔŋmɔ shĩa,+ ni bɔ fɛɛ bɔ ni fee lɛ maŋɔ nibii fɛɛ ni obaahã mi lɛ mlijai nyɔŋma mli ekome mahã bo.”
Shishigbɛ Niŋmaa
^ Loo “Ishmaelbii lɛ aŋɔɔ.” Nɛkɛ be nɛɛ mli lɛ, Ishmael diɛŋtsɛ egbo ni Esau eye aaafee afii 77. Kwɛmɔ 25:17, 26.
^ Loo “atswere; atrakpoi.”
^ Loo “bo kɛ oseshi lɛ nɔ shikpɔŋ lɛ nɔ wekui fɛɛ baatsɔ aná jɔɔmɔ amɛhã amɛhe.”
^ Eshishi ji, “Nyɔŋmɔ Shĩa.”
^ Hebri sht. ŋm., “blodo.”
