1 Mose 32:1-32
32 Kɛkɛ ni Yakob tsa enyiɛmɔ lɛ nɔ, ni Nyɔŋmɔ bɔfoi kɛ lɛ bakpe.
2 Be ni Yakob na amɛ nɔŋŋ lɛ, ekɛɛ: “Nyɔŋmɔ ta lɛ nsara nɛ!” No hewɔ lɛ, ewo jɛmɛ Mahanaim.*
3 Ni Yakob tsu mɛi kɛtsɔ ehiɛ kɛtee enyɛmi nuu Esau ŋɔɔ yɛ Seir shikpɔŋ lɛ nɔ,+ yɛ Edom kpokpaa* lɛ nɔ,+
4 ni efã amɛ akɛ: “Nɔ ni nyɛyakɛa minuŋtsɔ Esau nɛ, ‘Nɔ ni otsulɔ Yakob kɛɛ nɛ: “Mikɛ Laban eyahi shi* be kplaŋŋ kɛbashi be nɛɛ.+
5 Ni miná tsinahii kɛ tejii kɛ gwantɛŋi, kɛ tsuji hii kɛ tsuji yei,+ ni mikɛ shɛɛ nɛɛ miitsu ní akɛbahã minuŋtsɔ, bɔ ni afee ní mihiɛ aba nyam yɛ ohiɛ.”’”
6 Sɛɛ mli lɛ, mɛi ní atsu lɛ ku amɛsɛɛ kɛba Yakob ŋɔɔ amɛbakɛɛ: “Wɔyana onyɛmi nuu Esau, ni amrɔ nɛɛ enyiɛ gbɛ eeba ekɛ bo abakpe, ni hii 400 fata ehe.”+
7 Ni gbeyei mɔ Yakob waa ni ehao.+ No hewɔ lɛ, ejara mɛi ni fata ehe lɛ, kɛ agbɛnɛ hu tookui lɛ kɛ tsinai lɛ kɛ afukpɔŋɔi lɛ amli ewo kui enyɔ amli.
8 Ekɛɛ: “Kɛ́ Esau batutua kuu kome lɛ, no lɛ kuu kroko lɛ baanyɛ ajo foi.”
9 No sɛɛ lɛ, Yakob sɔle ekɛɛ: “Ao, mitsɛ Abraham Nyɔŋmɔ kɛ mitsɛ Isak Nyɔŋmɔ, Yehowa, bo mɔ ni okɛɛ mi akɛ, ‘Kuu osɛɛ kɛya oshikpɔŋ lɛ nɔ kɛ owekumɛi lɛ aŋɔɔ, ni mikɛ bo baaye jogbaŋŋ lɛ,’+
10 suɔmɔ ni tsakeee kɛ anɔkwayeli fɛɛ ni ojie kpo otsɔɔ otsulɔ lɛ,+ emli ekome folo nɛkɛ esaaa mi, ejaakɛ midɛhiɛmɔtso lɛ pɛ mikɛfo Yordan nɛɛ, ni amrɔ nɛɛ mitsɔ kui enyɔ.+
11 Miikpa bo fai,+ heremɔ miyiwala kɛjɛ minyɛmi nuu Esau dɛŋ, ejaakɛ miishe lɛ gbeyei akɛ ebaaba ebatutua mi+ kɛ nyɛmɛi lɛ kɛ amɛbii lɛ fɛɛ.
12 Ejaakɛ bo okɛɛ: ‘Mikɛ bo baaye jogbaŋŋ, ni mahã oseshi lɛ atsɔ tamɔ ŋshɔnaa shia ní fa fe bɔ ni aaanyɛ akane lɛ.’”+
13 Ni eye jenamɔ lɛ yɛ jɛmɛ. Kɛkɛ ni eŋɔ nibii ni eyɔɔ lɛ eko akɛ ekɛbaayake enyɛmi nuu Esau:+
14 abotiayei 200 kɛ abotiahii 20 kɛ gwantɛŋyei 200 kɛ gwantɛŋhii 20
15 kɛ afukpɔŋɔi 30 ni miihã amɛbii fufɔ kɛ tsinayei 40 kɛ tsinahii 10 kɛ tejiyei 20 kɛ tejihii 10 ni esara.+
16 Ekɛ amɛ wo etsuji lɛ adɛŋ, koolooku kome nyiɛ koolooku kroko sɛɛ, ni ekɛɛ etsuji lɛ akɛ: “Nyɛtsɔa mihiɛ kɛfoa nujɔɔ lɛ, ni nyɛhãa gbɛ akãa koolooku kome kɛ koolooku ni nyiɛ sɛɛ lɛ teŋ.”
17 Agbɛnɛ hu, efã klɛŋklɛŋ mɔ lɛ akɛ: “Aleenɔ kɛji minyɛmi nuu Esau kɛ bo kpe ni ebi akɛ, ‘Namɔ ji onuŋtsɔ, ni nɛgbɛ oyaa, ni namɔ nii ji enɛɛmɛi ni nyiɛ ohiɛ nɛɛ?’
18 no lɛ kɛɛmɔ akɛ, ‘Otsulɔ Yakob tsulɔ ji mi. Eji nikeenii ní ekɛtsu ní akɛbahã minuŋtsɔ Esau,+ ni naa! lɛ diɛŋtsɛ hu eeba yɛ wɔsɛɛ.’”
19 Ni efã mɔ ni ji enyɔ lɛ kɛ mɔ ni ji etɛ lɛ kɛ mɛi fɛɛ ni nyiɛ koolookui lɛ asɛɛ lɛ hu akɛ: “Wiemɔi nɛɛ nɔŋŋ nyɛkɛ Esau awiea kɛ́ nyɛkɛ lɛ kpe.
20 Ni nyɛkɛa hu akɛ, ‘Naa, otsulɔ Yakob miiba yɛ wɔsɛɛ.’” Ejaakɛ ekɛɛ ehe akɛ: ‘Kɛ́ mikɛ nikeenii tsu kɛtsɔ mihiɛ kɛyakpãtã lɛ lɛ,+ no lɛ, sɛɛ mli kɛ́ miyana lɛ lɛ, ekolɛ ebaahere mi hiɛmɛɛ.’
21 No hewɔ lɛ, akɛ nikeenii lɛ tsɔ ehiɛ kɛfo nujɔɔ lɛ, shi lɛ diɛŋtsɛ lɛ, eye jenamɔ lɛ yɛ nsara lɛ mli.
22 Sɛɛ mli yɛ nakai gbi lɛ nyɔɔŋ lɛ mli lɛ, ete shi ni eŋɔ eŋamɛi enyɔ+ lɛ, kɛ etsuji yei enyɔ lɛ,+ kɛ ebihii bibii 11 lɛ, ni eyafo Yabok+ faa lɛ yɛ he ni mli kwɔɔɔ lɛ.
23 No hewɔ lɛ, eŋɔ amɛ ni ekɛ amɛ fo faa* lɛ, ni ekɛ enibii krokomɛi fɛɛ ní eshwɛ lɛ hu fo.
24 Naagbee lɛ, ebashwɛ Yakob kome pɛ. Kɛkɛ ni nuu* ko kɛ lɛ babɔi nɔmɔ kɛyashi je tsɛre.+
25 Be ni nuu lɛ na akɛ enyɛɛɛ Yakob nɔ kunim eye lɛ, eta egboŋ talɔ lɛ he; ni Yakob gboŋ talɔ lɛ lɔŋe* be ni ekɛ nuu lɛ nɔɔ lɛ.+
26 No sɛɛ lɛ, nuu lɛ kɛɛ: “Hã maya, ejaakɛ je miitsɛre.” Kɛkɛ ni Yakob kɛɛ: “Mihãŋ oya, ja ojɔɔ mi dã.”+
27 No hewɔ lɛ, ebi lɛ akɛ: “Te atsɛɔ bo tɛŋŋ?” ni ekɛɛ: “Yakob.”
28 Kɛkɛ ni ekɛɛ: “Atsɛŋ bo Yakob dɔŋŋ, shi abaatsɛ bo Israel,*+ ejaakɛ okɛ Nyɔŋmɔ kɛ gbɔmɛi eshi mple+ ni onyɛ odamɔ naa.”
29 Yakob hu bi lɛ akɛ: “Ofainɛ, tsɔɔmɔ mi ogbɛ́i.” Shi ekɛɛ: “Mɛni hewɔ obiɔ mi migbɛ́i?”+ Kɛkɛ ni ejɔɔ lɛ yɛ jɛmɛ.
30 No hewɔ lɛ, Yakob wo jɛmɛ gbɛ́i akɛ Peniel,*+ ejaakɛ ekɛɛ, “Mina Nyɔŋmɔ hiɛ kɛ hiɛ, kɛ̃lɛ abaa miwala* yi.”+
31 Ni be ni efo mli yɛ Penuel* nɔŋŋ lɛ, hulu lɛ je yɛ enɔ, shi no mli lɛ, egboŋ lɛ hewɔ lɛ eetsutsɔ.+
32 No hewɔ ni kɛbashi ŋmɛnɛ lɛ, Israelbii lɛ yeee shuɔ he fã ni yɔɔ gboŋ talɔ lɛ he lɛ, ejaakɛ nuu lɛ ta Yakob shuɔ he fã ni yɔɔ egboŋ talɔ lɛ he lɛ he.
Shishigbɛ Niŋmaa
^ Eshishi ji, “Nsarai Enyɔ.”
^ Hebri sht. ŋm., “shikpɔŋ.”
^ Loo “Miyahi Laban ŋɔɔ akɛ gbɔ.”
^ Loo “nujɔɔ.” Kwɛmɔ Wiemɔi Titrii Amligbalamɔ lɛ.
^ “Nuu” ní awie ehe yɛ biɛ lɛ ji ŋwɛibɔfo ní eŋɔ heloo gbɔmɔtso.
^ Loo “hwãŋ.”
^ Eshishi ji, “Mɔ Ni Kɛ Nyɔŋmɔ Shiɔ Mple (Mɔ Ni Miaa Ehiɛ Yɛ Nyɔŋmɔ Hiɛ)” loo “Nyɔŋmɔ Shiɔ Mple.”
^ Eshishi ji, “Nyɔŋmɔ Hiɛ.”
^ Loo “misusuma.”
^ Loo “Peniel.”
