2 Maŋtsɛmɛi 21:1-26
21 Be ni Manase+ batsɔ maŋtsɛ lɛ, no mli lɛ, eye afii 12, ni eye nɔ afii 55 yɛ Yerusalem.+ Enyɛ gbɛ́i ji Hefziba.
2 Efee efɔŋ yɛ Yehowa hiɛ, efee nibii gbohii ni jeŋmaji ni Yehowa jie* amɛ kɛje Israelbii lɛ ahiɛ+ lɛ fee lɛ nɔŋŋ.+
3 Emamɔ hei grɔŋŋi ni etsɛ Hezekia fite lɛ ekoŋŋ,+ ni emamɔ afɔleshaa latɛi ehã Baal, ni efee wɔŋ tso,*+ tamɔ bɔ ni Israel maŋtsɛ Ahab fee lɛ.+ Ekoto nibii ni yɔɔ ŋwɛi* lɛ fɛɛ, ni esɔmɔ amɛ.+
4 Emamɔ afɔleshaa latɛi hu yɛ Yehowa shĩa lɛ,+ shĩa ni Yehowa ewie yɛ he akɛ: “Yerusalem ji he ni migbɛ́i lɛ baahi”+ lɛ.
5 Ni emamɔ afɔleshaa latɛi ehã nibii ni yɔɔ ŋwɛi* lɛ fɛɛ+ yɛ Yehowa shĩa lɛ kpoi enyɔ lɛ anɔ.+
6 Ni ehã lɛ diɛŋtsɛ ebinuu tsɔ la mli; efee majik, ebi nii,*+ ni ehã mɛi sɔmɔ akɛ mumɔi atsɛlɔi kɛ klamɔfoi.+ Efee efɔŋ kpele yɛ Yehowa hiɛ kɛwo emli la.
7 Ekɛ wɔŋ tso*+ lɛ amaga ni egbɔ lɛ yama Yehowa shĩa lɛ, shĩa ni ekɛɛ David kɛ ebinuu Solomon yɛ he akɛ: “Shĩa nɛɛ kɛ Yerusalem, ni ji he ni mihala yɛ Israel wekui lɛ fɛɛ ateŋ lɛ ji he ni migbɛ́i lɛ baahi kɛya naanɔ.+
8 Ni kɛ́ Israelbii lɛ ye nibii fɛɛ ni mifã amɛ, ni ji Mla muu lɛ fɛɛ ni mitsulɔ Mose fã amɛ akɛ amɛye nɔ lɛ nɔ+ lɛ, mihãŋ Israelbii lɛ atsomlo* yɛ shikpɔŋ ni mikɛhã amɛtsɛmɛi lɛ nɔ dɔŋŋ.”+
9 Shi amɛbooo toi, Manase tee nɔ elaka amɛ, ni ehã amɛfee efɔŋ kpele fe jeŋmaji ni Yehowa kpãtã amɛhiɛ kɛje Israelbii lɛ ahiɛ lɛ.+
10 Yehowa tee nɔ etsɔ etsuji gbalɔi lɛ anɔ+ ekɛɛ:
11 “Yuda maŋtsɛ Manase efee nyaŋemɔ nii nɛɛ fɛɛ; efee efɔŋ kwraa fe Amorbii+ lɛ ni tsɔ ehiɛ lɛ,+ ni ehã Yuda efee efɔŋ yɛ emagai ni yɔɔ nyaŋemɔ* ni amɛjá lɛ hewɔ.
12 No hewɔ lɛ, nɔ ni Yehowa, Israel Nyɔŋmɔ lɛ kɛɛ nɛ: ‘Mikɛ sane fɔŋ ko ni anako enɔ dã miiba Yerusalem+ kɛ Yuda nɔ, ni mɔ fɛɛ mɔ ni baanu lɛ naa baakpɛ ehe.*+
13 Ni mikɛ susumɔ kpãa+ ni akɛsusu Samaria lɛ baasusu Yerusalem,+ ni mikɛ tsũ jajemɔ kpãa* ni akɛtsu nii yɛ Ahab shĩa lɛ he lɛ baatsu nii yɛ enɔ,+ ni matsumɔ Yerusalem keŋkeŋ, tamɔ bɔ ni atsumɔɔ tsɛnsi mli, bɔ ni atsumɔɔ mli ni atsɔɔ abuɔ shi lɛ.+
14 Makwa migboshinii ni eshwɛ lɛ,+ ni mikɛ amɛ baawo amɛhenyɛlɔi lɛ adɛŋ, ni amɛhenyɛlɔi lɛ fɛɛ baaŋɔ amɛ nom ni amɛbaaha amɛnibii fɛɛ,+
15 ejaakɛ amɛfee efɔŋ yɛ mihiɛ, ni kɛjɛ gbi nɔ ni amɛtsɛmɛi lɛ jɛ Ejipt kɛba nɛɛ, mimlila sɔŋŋ amɛwoɔ.’”+
16 Agbɛnɛ hu, Manase shwie mɛi ni efeko nɔ ko lɛ alá shi waa kɛyashi Yerusalem yi kɛ lá, kɛjɛ afã kome kɛyashi afã kroko,+ soro esha ni ehã Yuda fee ni amɛkɛfee efɔŋ yɛ Yehowa hiɛ lɛ.
17 Manase shihilɛ mli saji krokomɛi fɛɛ, kɛ nibii fɛɛ ni efee kɛ esha ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.
18 Kɛkɛ ni Manase gbo* ni afu lɛ yɛ abɔɔ ni yɔɔ eshĩa lɛ, ni ji Uza abɔɔ lɛ mli,+ ni ebinuu Amon baye maŋtsɛ yɛ esɛɛ.
19 Be ni Amon+ batsɔ maŋtsɛ lɛ, no mli lɛ, eye afii 22, ni eye nɔ afii enyɔ yɛ Yerusalem.+ Emami gbɛ́i ji Meshulemet, Haruz ni jɛ Yotba lɛ biyoo lɛ.
20 Etee nɔ efee efɔŋ yɛ Yehowa hiɛ tamɔ bɔ ni etsɛ Manase fee lɛ nɔŋŋ.+
21 Etee nɔ enyiɛ gbɛi fɛɛ ni etsɛ nyiɛ nɔ lɛ nɔ, ni etee nɔ esɔmɔ ni ekoto amagai ni yɔɔ nyaŋemɔ ni etsɛ sɔmɔ lɛ.+
22 Eje Yehowa, etsɛmɛi a-Nyɔŋmɔ lɛ sɛɛ, ni enyiɛɛɛ yɛ Yehowa gbɛ lɛ nɔ.+
23 Sɛɛ mli lɛ, Amon tsuji lɛ kpaŋ eyi nɔ, ni amɛgbe maŋtsɛ lɛ yɛ lɛ diɛŋtsɛ eshĩa.
24 Shi shikpɔŋ lɛ nɔ bii lɛ gbe mɛi fɛɛ ni kpaŋ Maŋtsɛ Amon yi nɔ lɛ, ni amɛwó ebinuu Yosia maŋtsɛ yɛ esɛɛ.+
25 Amon shihilɛ mli saji krokomɛi fɛɛ, kɛ nibii ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.
26 No hewɔ lɛ, amɛfu lɛ yɛ efuuhe lɛ yɛ Uza abɔɔ lɛ mli,+ ni ebinuu Yosia+ baye maŋtsɛ yɛ esɛɛ.
Shishigbɛ Niŋmaa
^ Loo “shwie.”
^ Kwɛmɔ Wiemɔi Titrii Amligbalamɔ lɛ.
^ Loo “Ekoto ŋwɛi asraafoi.”
^ Loo “ŋwɛi asraafoi.”
^ Loo “etaoɔ nibii ahe okadi.”
^ Kwɛmɔ Wiemɔi Titrii Amligbalamɔ lɛ.
^ Loo “Israelbii lɛ anaji atsomlo.”
^ Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
^ Hebri sht. ŋm., “mɔ fɛɛ mɔ ni baanu lɛ toiiaŋ baafɛ̃lɛ lɛ.”
^ Loo “kulomulo.”
^ Loo “kɛ etsɛmɛi lɛ yawɔ.”
