Wolo Ni Ji Enyɔ Ni Akɛmaje Korintobii Lɛ 7:1-16
7 No hewɔ lɛ, nyɛ mɛi ni asumɔɔ, akɛni wɔná shiwoi nɛɛ hewɔ lɛ,+ nyɛhãa wɔjiea nɔ fɛɛ nɔ ni woɔ mɔ he muji yɛ heloŋ kɛ jwɛŋmɔ* mli lɛ kɛjea wɔhe,+ ni wɔhã wɔkrɔŋkrɔŋfeemɔ lɛ aye emuu yɛ Nyɔŋmɔ gbeyeishemɔ mli.
2 Nyɛhãa wɔ gbɛ yɛ nyɛtsuii amli.+ Wɔtɔ̃ko mɔ ko nɔ, wɔfiteko mɔ ko, wɔyeko mɔ ko amim.+
3 Miwieee enɛ ni mikɛbu nyɛ fɔ. Ejaakɛ miwie momo akɛ nyɛyɛ wɔtsuii amli, koni yɛ gbele mli jio, wala mli jio, wɔkɛ nyɛ aya nɔ afee ekome.
4 Minyɛɔ mikɛ nyɛ wieɔ kɛ nɔmimaa babaoo. Mikɛ nyɛ shwãa waa. Miyi obɔ kɛ miishɛjemɔ; ni miyi kɛteke nɔ kɛ miishɛɛ yɛ wɔmanehulu lɛ fɛɛ mli.+
5 Anɔkwa, be ni wɔba Makedonia+ lɛ, wɔnáaa* hejɔlɛ ko kwraa, shi wɔtee nɔ wɔna amanehulu yɛ gbɛ fɛɛ gbɛ nɔ—kponɔgbɛ lɛ, nɔmɔi, ni yɛ mligbɛ lɛ, gbeyeishemɔi.
6 Shi Nyɔŋmɔ, mɔ ni shɛjeɔ mɛi ni tsui ekumɔ lɛ amii+ lɛ tsɔ wɔŋɔɔ ni Tito ba lɛ nɔ eshɛje wɔmii;
7 ni jeee kɛtsɔ wɔŋɔɔ ni eba lɛ nɔ kɛkɛ, shi moŋ kɛtsɔ miishɛjemɔ ni ená yɛ nyɛhewɔ lɛ hu nɔ, ejaakɛ ebabɔ wɔ amaniɛ akɛ, nyɛmiishwe waa ni nyɛna mi, nyɛmiiye awerɛho waa, ni nyɛmiisusu mihe waa;* ni no hewɔ lɛ, miná miishɛɛ babaoo fe tsutsu lɛ.
8 Ejaakɛ kɛ́ wolo ni miŋma nyɛ lɛ hã nyɛwerɛ ho nyɛhe po lɛ,+ mishwaaa mihe. Kɛ́ klɛŋklɛŋ lɛ mishwa mihe po lɛ (akɛni mina akɛ nakai wolo lɛ hã nyɛwerɛ ho nyɛhe, shi be fioo kɛkɛ hewɔ lɛ),
9 amrɔ nɛɛ mimii eshɛ mihe naakpa, jeee akɛni nyɛwerɛ ho nyɛhe lɛ kɛkɛ hewɔ, shi moŋ akɛni nyɛwerɛhoyeli lɛ hã nyɛtsake nyɛtsui lɛ hewɔ. Ejaakɛ nyɛwerɛ ho nyɛhe bɔ ni sa Nyɔŋmɔ hiɛ, ni no hewɔ lɛ, nɔ ko fɔŋ ko bako nyɛnɔ yɛ wɔhewɔ.
10 Ejaakɛ awerɛhoyeli ni sa Nyɔŋmɔ hiɛ lɛ tsɛɔ tsuitsakemɔ ni kɛ mɔ yaa yiwalaheremɔ mli kɛbaa, ni ashwaaa he yɛ no hewɔ;+ shi awerɛhoyeli ni sa je lɛ hiɛ lɛ tsɛɔ gbele kɛbaa.
11 Ejaakɛ nyɛkwɛa yibii babaoo ni nyɛwerɛhoyeli ni sa Nyɔŋmɔ hiɛ lɛ ehã nyɛwo, hɛɛ, ehã nyɛmiitse nyɛgbɛ́i he, hɛɛ, ehã nyɛmli ewo la, hɛɛ, ehã nyɛmiishe gbeyei, hɛɛ, ehã nyɛmiishwe waa, hɛɛ, ehã nyɛhiɛ edɔ, hɛɛ, ehã nyɛmiijie efɔŋ lɛ yɛ nyɛnɔ!+ Nyɛtsɔɔ yɛ nɔ fɛɛ nɔ mli akɛ nyɛhe tse* yɛ sane nɛɛ mli.
12 Miŋma nyɛ moŋ, shi jeee mɔ ni tɔ̃ lɛ hewɔ,+ ni jeee mɔ ni atɔ̃ enɔ lɛ hu hewɔ, shi moŋ koni wɔhe mɔdɛŋ ni nyɛbɔɔ lɛ aje kpo faŋŋ yɛ nyɛteŋ yɛ Nyɔŋmɔ hiɛ.
13 No hewɔ ni wɔmii eshɛ wɔhe lɛ.
Shi kɛfata wɔmiishɛjemɔ lɛ he lɛ, wɔná miishɛɛ babaoo fe tsutsu lɛ yɛ Tito miishɛɛ lɛ hewɔ, ejaakɛ nyɛ fɛɛ nyɛhã emumɔ he jɔ lɛ.
14 Ejaakɛ kɛ́ mikɛ nyɛ shwã mitsɔɔ lɛ lɛ, nyɛwoko mi hiɛgbele; shi tamɔ bɔ ni nibii fɛɛ ni wɔkɛɛ nyɛ lɛ ji anɔkwale lɛ, nakai nɔŋŋ shwã ni wɔkɛ nyɛ shwã wɔtsɔɔ Tito lɛ hu efee anɔkwale.
15 Agbɛnɛ hu, esumɔɔ nyɛ babaoo fe tsutsu lɛ, ejaakɛ ekaiɔ bɔ ni nyɛ fɛɛ nyɛboɔ toi lɛ,+ kɛ bɔ ni nyɛkɛ gbeyeishemɔ kɛ hekpokpomɔ here lɛ lɛ.
16 Miná miishɛɛ naakpa akɛ yɛ gbɛ fɛɛ gbɛ nɔ lɛ, manyɛ mamu mafɔ̃ nyɛnɔ.*
Shishigbɛ Niŋmaa
^ Loo “mumɔ.”
^ Greek sht. ŋm., “wɔheloo náaa.”
^ Greek sht. ŋm., “nyɛhiɛdɔɔ kɛhã mi.”
^ Loo “nyɛyɛ krɔŋŋ; efɔŋ ko bɛ nyɛhe.”
^ Shishitsɔɔmɔi komɛi kɛɔ akɛ, “mináa ekãa babaoo yɛ nyɛhewɔ.”
