2 Mose 26:1-37
26 “Okɛ klala ni alo lɛ jogbaŋŋ kɛ kpãa bluu kɛ kooloo hetsɔi afaseo* kɛ kpãa ni tsuɔ waa afee mama tsũ mamai nyɔŋma ní okɛfee sɔlemɔ buu+ lɛ. Hã alo+ kerubim+ awo mamai lɛ amli.
2 Mamai lɛ eko fɛɛ eko kɛlɛ afee ninetalɔi* 28, ni elɛɛmɔ afee ninetalɔi 4. Mamai lɛ fɛɛ daramɔ afee ekome.+
3 Tsaramɔ mamai lɛ enumɔ kɛfee mama muu kome, eko atsa eko naa, ní otsara mamai enumɔ kroko lɛ hu kɛfee mama muu kome, eko atsa eko naa.
4 Okɛ kpãa bluu aŋmɔlɔ aflãi yɛ mamai ni atsara lɛ ateŋ ekome naagbeehe, ní ofee nakai nɔŋŋ yɛ ekroko lɛ hu naagbee mama lɛ naa, he ni akɛbaatsa yɛ lɛ.
5 Ŋmɔlɔmɔ aflãi 50 yɛ mama muu kome naa, ni oŋmɔlɔ aflãi 50 yɛ mama muu kroko lɛ hu naa, koni ekome akwɛ ekome hiɛ yɛ he ni akɛ mamai lɛ baatsa yɛ lɛ.
6 Okɛ shika tsuru afee kpoji* 50, ni okɛ kpoji lɛ amɔmɔ mamai muji enyɔ lɛ kɛtsa, koni etsɔ mama muu kome kɛhã sɔlemɔ buu lɛ.+
7 “Agbɛnɛ hu, okɛ abotia hetsɔi+ afee mamai koni akɛha sɔlemɔ buu lɛ nɔ. Feemɔ mamai 11.+
8 Mamai lɛ eko fɛɛ eko kɛlɛ afee ninetalɔi 30, ni elɛɛmɔ afee ninetalɔi 4. Mamai 11 lɛ fɛɛ daramɔ afee ekome.
9 Tsaramɔ mamai lɛ enumɔ ofee lɛ mama muu kome, ni otsara ekpaa ni eshwɛ lɛ hu ofee lɛ mama muu kome, ní odɔ nɔ ni ji ekpaa nɔ lɛ ofɔ̃ nɔ yɛ sɔlemɔ buu lɛ hiɛ.
10 Ni ŋmɔlɔmɔ aflãi 50 yɛ mamai ni atsara lɛ ateŋ ekome naagbeehe, ni ji mama muu lɛ naagbee mama lɛ naa, ni oŋmɔlɔ aflãi 50 yɛ mama kroko lɛ naagbeehe lɛ, he ni akɛ mamai enyɔ lɛ baatsa yɛ lɛ.
11 Okɛ akɔɔble afee kpoji 50, ni okɛ kpoji lɛ alalaa aflãi lɛ ni okɛmɔmɔ mamai lɛ otsa, koni etsɔ mama muu kome.
12 Mamai ni baashwɛ yɛ sɛɛ lɛ baatsotsoro shi, ní edɛŋ nɔ. Mama ni baashwɛ yɛ sɛɛ lɛ fã baatsotsoro shi, ní edɛŋ nɔ yɛ sɔlemɔ buu lɛ sɛɛgbɛ.
13 Mamai lɛ mli nɔ ni baashwɛ yɛ sɛɛ yɛ ekɛlɛ naa lɛ baatsotsoro shi yɛ sɔlemɔ buu lɛ he, ninetalɔ komekome atsotsoro shi, ní edɛŋ nɔ yɛ sɔlemɔ buu lɛ biɛ kɛ biɛ, koni eha he.
14 “Agbɛnɛ hu, okɛ gwantɛŋhii ahewoji ni awo lɛ tsofa tsuru afee nɔhaanɔ kɛhã sɔlemɔ buu lɛ, ni okɛ nu mli gbei ahewoji hu afee nɔhaanɔ ní akɛha no hu nɔ.+
15 “Okɛ akasia tso afee mplaŋi+ ni baadamɔ shi jaŋŋ kɛhã sɔlemɔ buu lɛ.+
16 Mplaŋi lɛ eko fɛɛ eko kwɔlɛ afee ninetalɔi nyɔŋma, ni elɛɛmɔ afee ninetalɔ kome kɛ fã.
17 Jiemɔ naji* enyɔ ni eko ye eko ŋɛlɛ nɔ owo mplaŋ fɛɛ mplaŋ shishi. Nakai ji bɔ ni ofee sɔlemɔ buu lɛ mplaŋi lɛ fɛɛ.
18 Feemɔ mplaŋi 20 kɛhã sɔlemɔ buu lɛ afã ni ye wuoyigbɛ lɛ, ní amɛhiɛ akwɛ wuoyigbɛ.
19 “Feemɔ jwiɛtɛi nɔdaamɔnii 40 ni fɔji yɔɔ mli+ owo mplaŋi 20 lɛ ashishi: nɔdaamɔnii enyɔ ni fɔji yɔɔ mli ahi mplaŋ kome shishi kɛhã enaji enyɔ lɛ, ni nɔdaamɔnii enyɔ ni fɔji yɔɔ mli ahi mplaŋi ni baanyiɛ sɛɛ lɛ eko fɛɛ eko shishi kɛhã enaji enyɔ lɛ.+
20 Feemɔ mplaŋi 20 yɛ sɔlemɔ buu lɛ afã kroko lɛ, he ni ye kooyigbɛ lɛ,
21 kɛ amɛjwiɛtɛi nɔdaamɔnii 40 ni fɔji yɔɔ mli, nɔdaamɔnii enyɔ ni fɔji yɔɔ mli ahi mplaŋ kome shishi, ni nɔdaamɔnii enyɔ ni fɔji yɔɔ mli ahi mplaŋi ni baanyiɛ sɛɛ lɛ eko fɛɛ eko shishi.
22 Feemɔ mplaŋi ekpaa kɛhã sɔlemɔ buu lɛ sɛɛgbɛ, he ni ye anaigbɛ lɛ.+
23 Feemɔ mplaŋi enyɔ koni amɛtsɔmɔ sɔlemɔ buu lɛ koŋtsei, yɛ sɛɛgbɛ koji enyɔ lɛ.
24 Okɛ mplaŋi enyɔ abɔ he kɛjɛ shishi kɛya ŋwɛi, aahu kɛyashi klɛŋklɛŋ ga lɛ he. Nakai ji bɔ ni ofee enyɔ lɛ fɛɛ, koni amɛtsɔmɔ koŋtsei enyɔ lɛ.
25 No hewɔ lɛ, fɛɛ baafee mplaŋi kpaanyɔ kɛ amɛjwiɛtɛi nɔdaamɔnii 16 ni fɔji yɔɔ mli, nɔdaamɔnii enyɔ ni fɔji yɔɔ mli ahi mplaŋ kome shishi, ni nɔdaamɔnii enyɔ ni fɔji yɔɔ mli ahi mplaŋi ni baanyiɛ sɛɛ lɛ eko fɛɛ eko shishi.
26 “Okɛ akasia tso afee mlibelemɔnii, feemɔ enumɔ kɛhã mplaŋi ni yɔɔ sɔlemɔ buu lɛ afã kome lɛ,+
27 ni ofee mlibelemɔnii enumɔ kɛhã mplaŋi ni yɔɔ sɔlemɔ buu lɛ afã kroko lɛ, ni ofee mlibelemɔnii enumɔ hu kɛhã mplaŋi ni yɔɔ sɔlemɔ buu lɛ anaigbɛ, yɛ esɛɛgbɛ lɛ.
28 Teŋ mlibelemɔnii ní baabele mplaŋi lɛ teŋgbɛ lɛ abele mli kɛjɛ shishijee kɛyashi naagbee.
29 “Okɛ shika tsuru aha mplaŋi lɛ ahe,+ ni okɛ shika tsuru afee amɛhe gai ní akɛ mlibelemɔnii lɛ baahɔlɔ mli lɛ, ni okɛ shika tsuru aha mlibelemɔnii lɛ ahe.
30 Shĩi sɔlemɔ buu lɛ oma shi tamɔ ehe nɔkwɛmɔnɔ ni akɛtsɔɔ bo yɛ gɔŋ lɛ nɔ lɛ pɛpɛɛpɛ.+
31 “Okɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ afee pateeshɛŋ.+ Alo kerubim awo mli.
32 Okɛtsotsoro akulashiŋi ejwɛ ni akɛ akasia tso fee ni akɛ shika tsuru eha he lɛ ahe. Okɛ shika tsuru afee amɛhe kpoji lɛ. Okɛ akulashiŋi lɛ amamɔ nɔdaamɔnii ejwɛ ni fɔji yɔɔ mli ni akɛ jwiɛtɛi fee lɛ anɔ.
33 Okɛ pateeshɛŋ lɛ atsotsoro kpoji lɛ ashishi, ni okɛ Odaseyeli adeka+ lɛ abama mligbɛ yɛ pateeshɛŋ lɛ sɛɛ. Pateeshɛŋ lɛ baaja He Krɔŋkrɔŋ+ lɛ kɛ He Krɔŋkrɔŋ Fe Fɛɛ+ lɛ mli ehã nyɛ.
34 Okɛ naanɔ lɛ abu Odaseyeli adeka lɛ naa yɛ He Krɔŋkrɔŋ Fe Fɛɛ lɛ.
35 “Okɛ okpɔlɔ lɛ ama pateeshɛŋ lɛ hiɛgbɛ, ní kanetso+ lɛ ama sɔlemɔ buu lɛ wuoyigbɛ ní ekwɛ okpɔlɔ lɛ hiɛ; ni okɛ okpɔlɔ lɛ ama kooyigbɛ.
36 Okɛ kpãa bluu kɛ kooloo hetsɔi afaseo* kɛ kpãa ni tsuɔ waa kɛ klala ni alo lɛ jogbaŋŋ alo pateeshɛŋ owo sɔlemɔ buu lɛ shinaa lɛ naa.+
37 Okɛ akasia tso afee akulashiŋi enumɔ kɛhã pateeshɛŋ lɛ, ni okɛ shika tsuru aha he. Okɛ shika tsuru afee amɛhe gai lɛ, ni okɛ akɔɔble afee nɔdaamɔnii enumɔ ni fɔji yɔɔ mli ohã amɛ.
Shishigbɛ Niŋmaa
^ Blɔfo mli lɛ, “pɛpol.”
^ Ninetalɔ kome feɔ sɛntimitai 44.5 (iŋtsii 17.5). Kwɛmɔ Saji Krokomɛi B14 lɛ.
^ Kpoji ni akɛtsu nii yɛ biɛ lɛ ji dadei bibii komɛi ni adɔrɔ amɛnaabu tamɔ kpoŋ.
^ Loo “tsei ni mamɔ shi jaŋŋ.”
^ Blɔfo mli lɛ, “pɛpol.”
^ Blɔfo mli lɛ, “pɛpol.”
