2 Mose 8:1-32
8 Kɛkɛ ni Yehowa kɛɛ Mose akɛ: “Yaa Farao ŋɔɔ ni oyakɛɛ lɛ akɛ, ‘Nɔ ni Yehowa kɛɛ nɛ: “Hã mimaŋ lɛ aya koni amɛyasɔmɔ mi.+
2 Kɛ́ ohãaa amɛya lɛ, mikɛ kɔkɔdenei baahao oshikpɔŋ lɛ fɛɛ.+
3 Ni Nilo Faa lɛ baawo kɔkɔdenei babaoo, ni amɛbaaba amɛbabote oshĩa lɛ, amɛbaabote osɛɛtsu mli, amɛbaaba osaa nɔ, amɛbaabote otsuji kɛ omaŋbii lɛ ashĩai amli, amɛbaabote oflɔnɔi amli, ni amɛbaabote otsɛnsii ní okpɔtɔɔ ashikishaŋ yɛ mli lɛ amli.+
4 Kɔkɔdenei lɛ baaba bo, omaŋbii lɛ, kɛ otsuji lɛ fɛɛ anɔ.”’”
5 Sɛɛ mli lɛ, Yehowa kɛɛ Mose akɛ: “Kɛɛmɔ Aaron akɛ, ‘Kpã onine ní hiɛ tso lɛ mli lɛ mli yɛ fai lɛ anɔ, yɛ Nilo lɛ nujɔi ní agbála lɛ anɔ, yɛ nui ni tara shi lɛ anɔ, ní ohã kɔkɔdenei lɛ aba Ejipt shikpɔŋ lɛ nɔ.’”
6 No hewɔ lɛ, Aaron kpã enine mli yɛ Ejipt nui lɛ anɔ, ni kɔkɔdenei lɛ bɔi baa, ni amɛbaha Ejipt shikpɔŋ lɛ nɔ.
7 Shi Ejipt majikfeelɔi lɛ kɛ amɛmajikfeemɔ ŋai* lɛ fee nakai nɔŋŋ, ni amɛ hu amɛhã kɔkɔdenei ba Ejipt shikpɔŋ lɛ nɔ.+
8 Kɛkɛ ni Farao tsɛ Mose kɛ Aaron ni ekɛɛ: “Nyɛkpaa Yehowa fai koni ejie kɔkɔdenei lɛ kɛje mi kɛ mimaŋbii lɛ anɔ,+ ejaakɛ miitao mahã gbɔmɛi lɛ aya koni amɛyashã afɔle amɛhã Yehowa.”
9 Ni Mose kɛɛ Farao akɛ: “Ofainɛ, bo diɛŋtsɛ tsɔɔmɔ mi be ní mikpa fai lɛ mihã bo koni ajie kɔkɔdenei lɛ kɛje bo kɛ otsuji lɛ kɛ omaŋbii lɛ anɔ, kɛ oshĩai lɛ amli. Nilo Faa lɛ mli pɛ abaashi amɛ yɛ.”
10 Kɛkɛ ni ekɛɛ: “Wɔ́.” No hewɔ lɛ, Mose kɛɛ: “Abaafee bɔ ni okɛɛ lɛ koni oná ole akɛ mɔ ko mɔ ko bɛ ni tamɔ Yehowa, wɔ-Nyɔŋmɔ lɛ.+
11 Kɔkɔdenei lɛ baaje bo kɛ oshĩai lɛ kɛ otsuji lɛ kɛ omaŋbii lɛ anɔ aya. Nilo lɛ mli pɛ abaashi amɛ yɛ.”+
12 No hewɔ lɛ, Mose kɛ Aaron je Farao ŋɔɔ amɛtee, ni Mose yakpa Yehowa fai yɛ kɔkɔdenei lɛ ní ehã* amɛba Farao nɔ lɛ he.+
13 Kɛkɛ ni Yehowa fee bɔ ni Mose bi lɛ lɛ, ni kɔkɔdenei lɛ bɔi gboimɔ yɛ shĩai lɛ, kpoi lɛ, kɛ shikpɔji lɛ anɔ.
14 Amɛbua amɛnaa kuikui babaoo ní anyɛɛɛ akane, ni shikpɔŋ lɛ nɔ bɔi fujee.
15 Be ni Farao na akɛ hejɔlɛ eba lɛ, ekpiliŋ etsui+ ni ebooo amɛ toi, tamɔ bɔ ni Yehowa ekɛɛ lɛ.
16 Agbɛnɛ, Yehowa kɛɛ Mose akɛ: “Kɛɛmɔ Aaron akɛ, ‘Kpã otso lɛ mli ni okɛtswa shikpɔŋ mulu lɛ, ni ebaatsɔ tɔŋtɔŋi* yɛ Ejipt shikpɔŋ lɛ nɔ fɛɛ.’”
17 Ni amɛfee nakai. Aaron kpã enine mli kɛ tso lɛ, ni ekɛtswa shikpɔŋ mulu lɛ, ni tɔŋtɔŋi lɛ ba gbɔmɛi kɛ kooloi anɔ. Shikpɔŋ mulu lɛ fɛɛ tsɔ tɔŋtɔŋi yɛ Ejipt shikpɔŋ lɛ nɔ fɛɛ.+
18 Majikfeelɔi lɛ ka akɛ amɛbaafee nakai nɔŋŋ ní amɛtsɔ amɛmajikfeemɔ ŋai*+ lɛ anɔ amɛhã tɔŋtɔŋi aba, shi amɛnyɛɛɛ. Ni tɔŋtɔŋi lɛ ba gbɔmɛi kɛ kooloi anɔ.
19 No hewɔ lɛ, majikfeelɔi lɛ kɛɛ Farao akɛ: “Enɛ lɛ, Nyɔŋmɔ wao nɛ!”+ Shi Farao tee nɔ ekpiliŋ etsui, ni ebooo amɛ toi, tamɔ bɔ ni Yehowa ekɛɛ lɛ.
20 Ni Yehowa kɛɛ Mose akɛ: “Tee shi leebi maŋkpa ní oyadamɔ Farao hiɛ. Naa! Eeje kpo kɛmiiba faa lɛ naa! Ni kɛɛmɔ lɛ akɛ, ‘Nɔ ni Yehowa kɛɛ nɛ: “Hã mimaŋ lɛ aya koni amɛyasɔmɔ mi.
21 Shi kɛ́ ohãaa mimaŋ lɛ aya lɛ, no lɛ, mahã filikilɔi bibii ni kɔ̃ɔ mɔ aba bo, otsuji lɛ, kɛ omaŋbii lɛ anɔ, kɛ oshĩai lɛ amli; ni filikilɔi bibii ni kɔ̃ɔ mɔ lɛ baayimɔ shĩai ni yɔɔ Ejipt lɛ amli obɔbɔ, ni amɛbaaha shikpɔŋ ní amɛdamɔ* nɔ lɛ po nɔ.
22 Nakai gbi lɛ, majie Goshen shikpɔŋ ní mimaŋbii lɛ yɔɔ nɔ lɛ mato afã. Filikilɔi bibii ni kɔ̃ɔ mɔ lɛ eko kwraa ehiŋ jɛmɛ,+ ni enɛ okɛbaale akɛ mi, Yehowa, miyɛ biɛ yɛ shikpɔŋ lɛ nɔ.+
23 Ni mahã ana srɔto ni yɔɔ mimaŋbii lɛ kɛ omaŋbii lɛ ateŋ. Wɔ́ lɛ, okadi nɛɛ baaba.”’”
24 Ni Yehowa fee nakai, ni filikilɔi bibii ni kɔ̃ɔ mɔ babaoo ke yuu kɛba Farao shĩa lɛ, kɛ etsuji lɛ ashĩai lɛ, kɛ Ejipt shikpɔŋ lɛ nɔ fɛɛ.+ Filikilɔi bibii ni kɔ̃ɔ mɔ lɛ kpãtã shikpɔŋ lɛ hiɛ.+
25 Naagbee lɛ, Farao tsɛ Mose kɛ Aaron ni ekɛɛ: “Nyɛyaa, nyɛyashãa afɔle nyɛhãa nyɛ-Nyɔŋmɔ lɛ yɛ shikpɔŋ nɛɛ nɔ.”
26 Shi Mose kɛɛ: “Ejaaa gbɛ akɛ afeɔ nakai, ejaakɛ nɔ ni wɔkɛbaashã afɔle wɔhã Yehowa, wɔ-Nyɔŋmɔ lɛ, ji Ejiptbii lɛ anihiinii.+ Kɛji wɔkɛ nɔ ko ní Ejiptbii lɛ hiɔ shã afɔle yɛ amɛhiɛ lɛ, ani amɛtswiaŋ wɔ tɛi?
27 Wɔbaafã gbɛ gbii etɛ gbɛnyiɛmɔ kɛya ŋa lɛ nɔ, ni wɔbaayashã afɔle wɔhã Yehowa, wɔ-Nyɔŋmɔ lɛ yɛ jɛmɛ, tamɔ bɔ ni ekɛɛ wɔ lɛ.”+
28 Agbɛnɛ, Farao kɛɛ: “Mahã nyɛya koni nyɛyashã afɔle nyɛhã Yehowa, nyɛ-Nyɔŋmɔ lɛ yɛ ŋa lɛ nɔ. Shi shɔŋŋ kɛkɛ nyɛkayaa. Kpa fai ohã mi.”+
29 Kɛkɛ ni Mose kɛɛ: “Agbɛnɛ, miishi ohiɛ maya, ni mayakpa Yehowa fai, ni wɔ́ lɛ, filikilɔi bibii ni kɔ̃ɔ mɔ lɛ baaje Farao, etsuji lɛ, kɛ emaŋbii lɛ anɔ aya. Shi esa akɛ Farao akpa wɔhe fɛo ni eyeɔ* kɛtsɔ hã ní ehãaa maŋ lɛ aya koni amɛyashã afɔle amɛhã Yehowa lɛ nɔ lɛ.”+
30 Kɛkɛ ni Mose je Farao ŋɔɔ etee ni eyakpa Yehowa fai.+
31 No hewɔ lɛ, Yehowa fee bɔ ni Mose kɛɛ lɛ, ni filikilɔi bibii ni kɔ̃ɔ mɔ lɛ je Farao, etsuji lɛ, kɛ emaŋbii lɛ anɔ amɛtee. Ekome folo po eshwɛɛɛ.
32 Shi Farao kpiliŋ etsui ekoŋŋ, ni ehãaa maŋ lɛ aya.
Shishigbɛ Niŋmaa
^ Loo “hesai.”
^ Ni ji, Nyɔŋmɔ.
^ Enɛ jeee tɔŋtɔŋi diɛŋtsɛ, shi moŋ, amɛji filikilɔi bibii komɛi ní tamɔ tɔŋtɔŋi, ni ale waa yɛ Ejipt.
^ Loo “hesai.”
^ Ni ji, Ejiptbii lɛ.
^ Loo “shwɛmɔ ní ekɛ wɔ shwɛɔ.”
