2 Samuel 10:1-19
-
Aye Amon kɛ Siria nɔ kunim (1-19)
10 Sɛɛ mli lɛ, Amonbii+ lɛ amaŋtsɛ lɛ gbo, ni ebinuu Hanun baye maŋtsɛ yɛ esɛɛ.+
2 Kɛkɛ ni David kɛɛ akɛ: “Majie suɔmɔ ni tsakeee kpo matsɔɔ Hanun, Nahash binuu lɛ, tamɔ bɔ ni epapa jie suɔmɔ ni tsakeee kpo etsɔɔ mi lɛ.” No hewɔ lɛ, David tsu etsuji lɛ kɛtee koni amɛyashɛje emii yɛ epapa gbele lɛ hewɔ. Shi be ni David tsuji lɛ yashɛ Amonbii lɛ ashikpɔŋ lɛ nɔ lɛ,
3 Amonbii lɛ alumɛi lɛ bi amɛnuŋtsɔ Hanun akɛ: “Ani osusuɔ akɛ opapa hiɛ nyam ni David taoɔ awo lɛ hewɔ ni etsu miishɛjelɔi kɛba nɛɛ? Aso jeee koni amɛbakwɛ maŋ lɛ shikamɔ ni amɛkpá maŋ lɛ shi ni amɛbaŋɔ hewɔ David tsu etsuji nɛɛ kɛba oŋɔɔ nɛɛ?”
4 No hewɔ lɛ, Hanun mɔmɔ David tsuji lɛ ni eshɛshɛɛ amɛtsɛŋ+ afãfã ni efolɔfolɔɔ amɛtadei lɛ anɔ yɛ teŋ tuuntu yɛ amɛdunaa* ni ewo amɛ gbɛ.
5 Be ni abakɛɛ David lɛ, etsu hii amrɔ nɔŋŋ koni amɛkɛ amɛ ayakpe, ejaakɛ ashwie hii lɛ ahiɛ shi waa; ni maŋtsɛ lɛ kɛɛ amɛ akɛ: “Nyɛhia Yeriko+ kɛyashia nyɛtsɛŋ lɛ baatsa ekoŋŋ dani nyɛku nyɛsɛɛ kɛba.”
6 Be ko sɛɛ lɛ, Amonbii lɛ na akɛ amɛhe eje fu ewo David, no hewɔ lɛ, Amonbii lɛ tsu ni ayabɔ Siriabii ni yɔɔ Bet-rehob,+ kɛ Siriabii ni yɔɔ Zoba+ lɛ apaa, asraafoi 20,000 ni nyiɛɔ amɛnane nɔ; kɛ hii 1,000 kɛjɛ Maaka+ maŋtsɛ lɛ ŋɔɔ; kɛ hii 12,000 hu kɛjɛ Ishtob* ŋɔɔ.+
7 Be ni David nu he lɛ, etsu Yoab kɛ asraafoi lɛ fɛɛ, kɛ etawulɔi kãkãlɔi ni fe fɛɛ lɛ kɛtee.+
8 Ni Amonbii lɛ je kpo ni amɛyabua amɛhe naa kɛhã ta yɛ maŋ lɛ agbó lɛ naa, ni Siriabii ni yɔɔ Zoba kɛ Rehob lɛ, kɛ agbɛnɛ hu Ishtob* kɛ Maaka lɛ sɔŋŋ yabua amɛhe naa yɛ ŋa lɛ nɔ.
9 Be ni Yoab na akɛ mɛi ni ekɛyaawu lɛ miiba yɛ ehiɛ kɛ esɛɛ fɛɛ lɛ, ehala Israel asraafoi lɛ ateŋ mɛi ni he esa fe fɛɛ lɛ ekomɛi, ni ebua amɛnaa koni amɛkɛ Siriabii lɛ awu.+
10 Ekɛ hii ni shwɛ lɛ wo enyɛmi nuu Abishai+ shishi,* koni ebua amɛnaa ni amɛkɛ Amonbii+ lɛ awu.
11 Kɛkɛ ni ekɛɛ: “Kɛ́ ona akɛ Siriabii lɛ anine miitsɔ minɔ lɛ, ba ni obaye obua mi; shi kɛ́ mi hu mina akɛ Amonbii lɛ anine miitsɔ onɔ lɛ, mi hu maba mabaye mabua bo.
12 Esa akɛ wɔhe awa ni wɔfee ekãa+ yɛ wɔmaŋbii lɛ kɛ wɔ-Nyɔŋmɔ lɛ maji lɛ ahewɔ, ni Yehowa hu baafee nɔ ni sa ehiɛ.”+
13 Kɛkɛ ni Yoab kɛ ehii lɛ tee amɛhiɛ kɛyanina Siriabii lɛ ni amɛkɛ amɛ wu, ni amɛjo foi yɛ Yoab hiɛ.+
14 Be ni Amonbii lɛ na akɛ Siriabii lɛ ejo foi lɛ, amɛ hu amɛjo foi yɛ Abishai hiɛ ni amɛyabote maŋ lɛ mli. No sɛɛ lɛ, Yoab ku esɛɛ kɛjɛ Amonbii lɛ asɛɛ ni eba Yerusalem.
15 Be ni Siriabii lɛ na akɛ Israel eye amɛnɔ kunim lɛ, amɛbua amɛhe naa ekoŋŋ.+
16 No hewɔ lɛ, Hadadezer+ tsu koni ayatsɛ Siriabii ni yɔɔ Faa*+ lɛ kpokpaa lɛ nɔ lɛ kɛba, ni amɛba Helam, ni Shobak ni ji Hadadezer tatsɛ lɛ nyiɛ amɛhiɛ.
17 Be ni ayabɔ David amaniɛ lɛ, amrɔ nɔŋŋ ni ebua Israel fɛɛ naa ni efo Yordan lɛ ni eba Helam. Kɛkɛ ni Siriabii lɛ bua amɛhe naa koni amɛkɛ David awu, ni amɛkɛ lɛ wu.+
18 Shi Siriabii lɛ jo foi yɛ Israel hiɛ; ni David gbe hii 700 ni taraa shwiilii amli kɛ okpɔŋɔnɔtaralɔi 40,000, ni etswa Shobak, amɛtatsɛ lɛ nɔ, ni egbo yɛ jɛmɛ.+
19 Be ni maŋtsɛmɛi lɛ fɛɛ, ni ji Hadadezer tsuji lɛ, na akɛ Israel eye amɛnɔ kunim lɛ, amrɔ nɔŋŋ ni amɛkɛ Israel kpaŋ toiŋjɔlɛ kpaŋmɔ ni amɛbatsɔmɔ amɛtsuji;+ ni Siriabii lɛ ekaaa akɛ amɛbaaye amɛbua Amonbii lɛ dɔŋŋ, ejaakɛ amɛmiishe gbeyei.
Shishigbɛ Niŋmaa
^ Loo “amɛdukui anɔ.”
^ Loo “kɛjɛ Tob hii lɛ.”
^ Loo “Tob hii lɛ.”
^ Hebri sht. ŋm., “dɛŋ.”
^ Ni ji, Yufrate Faa lɛ.
