3 Mose 13:1-59
13 Yehowa tee nɔ ekɛ Mose kɛ Aaron wie ekɛɛ:
2 “Kɛ́ nɔ ko fuu yɛ mɔ ko hewolo nɔ loo nɔ ko fee ehewolo nɔ ni ehiɛ mɔ akaka loo gbɛ̃ shwie ehewolo nɔ he ko, ni no baanyɛ atsɔ kpiti*+ yɛ ehewolo nɔ lɛ, no lɛ, akɛ lɛ aba osɔfo Aaron loo ebihii ni ji osɔfoi lɛ ateŋ mɔ kome ŋɔɔ.+
3 Osɔfo lɛ akwɛ hela ni yɔɔ ehewolo nɔ lɛ. Kɛ́ tsɔi ni yɔɔ he ni hela lɛ yɔɔ lɛ etsɔ eyɛŋ, ni aana akɛ hela lɛ ebote heloo lɛ mli vii lɛ, hela lɛ kpiti ni. Osɔfo lɛ akwɛ hela lɛ ni ejaje akɛ mɔ lɛ he tseee.
4 Shi kɛ́ gbɛ̃ ní yɔɔ ehewolo nɔ lɛ eyɛŋ ni, ni eboteko heloo lɛ mli vii, ni tsɔi ni yɔɔ jɛmɛ lɛ hu tsɔko eyɛŋ lɛ, no lɛ, osɔfo lɛ atsĩ mɔ ni hela lɛ yɔɔ ehe lɛ kome too naa ewo he ko gbii kpawo.+
5 Gbi ni ji kpawo lɛ nɔ lɛ, osɔfo lɛ akwɛ lɛ, ni kɛji ena akɛ hela lɛ yɛ bɔ ni eyɔɔ lɛ nɔŋŋ, ni elɛɛko shi yɛ ehewolo nɔ lɛ, osɔfo lɛ asaa atsĩ enaa ewo he ko gbii kpawo kroko hu.
6 “Osɔfo lɛ akwɛ lɛ ekoŋŋ yɛ gbi ni ji kpawo lɛ nɔ, ni kɛji hela lɛ miiya, ni elɛɛko shi yɛ ehewolo nɔ lɛ, osɔfo lɛ ajaje akɛ ehe tse;+ nɔ ko ni hiɛ emɔ akaka kɛkɛ ni. Mɔ lɛ afɔ etadei lɛ ahe, kɛkɛ lɛ ehe baatse.
7 Shi kɛ́ be ni eyana osɔfo lɛ ní osɔfo lɛ jaje akɛ ehe tse lɛ sɛɛ lɛ, hela* lɛ lɛɛ shi yɛ ehewolo nɔ lɛ, no lɛ, esaa eyana osɔfo lɛ ekoŋŋ.*
8 Osɔfo lɛ akwɛ lɛ, ni kɛ́ nɔ ni efee lɛ ni hiɛ emɔ akaka lɛ miilɛɛ shi yɛ ehewolo nɔ lɛ, osɔfo lɛ ajaje akɛ ehe tseee. Kpiti ni.+
9 “Kɛ́ hela ni ji kpiti lɛ shwie mɔ ko he lɛ, akɛ lɛ aba osɔfo lɛ ŋɔɔ,
10 ni osɔfo lɛ akwɛ lɛ.+ Kɛji nɔ ko yɛŋ efuu yɛ ehewolo nɔ, ni ehã jɛmɛ tsɔi lɛ etsɔ eyɛŋ, ni he ni efuu lɛ efee fala lɛ,+
11 no lɛ, kpiti ni hiɔ mɔ he be kplaŋŋ eshwie ehewolo nɔ lɛ, ni osɔfo lɛ ajaje akɛ ehe tseee. Ekatsĩ enaa ewo he ko,+ ejaakɛ ehe tseee.
12 Agbɛnɛ, kɛ́ kpiti lɛ shwie mɔ lɛ hewolo nɔ fɛɛ, ni eshwie ehe kɛjɛ eyiteŋ kɛyashi enaji ahe, ni ji mɔ lɛ he fɛɛ he ni osɔfo lɛ baanyɛ ana,
13 ni osɔfo lɛ kwɛ lɛ, ni ena akɛ kpiti lɛ eshwie ehewolo nɔ fɛɛ lɛ, no lɛ, ejaje akɛ mɔ ni kpiti lɛ eshwie ehe lɛ he tse.* Fɛɛ etsɔ eyɛŋ, ni ehe tse.
14 Shi kɛ́ ana akɛ kpiti lɛ mli efee fala lɛ, mɔ lɛ he tseee.
15 Kɛ́ osɔfo lɛ na fala lɛ, ejaje akɛ mɔ lɛ he tseee.+ Fala lɛ he tseee. Kpiti ni.+
16 Shi kɛ́ fala lɛ saa etsɔ eyɛŋ ekoŋŋ lɛ, no lɛ, eba osɔfo lɛ ŋɔɔ.
17 Osɔfo lɛ akwɛ lɛ,+ ni kɛji nɔ ni eshwie ehe lɛ etsɔ eyɛŋ lɛ, no lɛ, osɔfo lɛ ajaje akɛ mɔ ni nii lɛ eshwie ehe lɛ he tse. Ehe tse.
18 “Kɛ́ asane tsɛ̃ mɔ ko hewolo nɔ, ni asane lɛ gbo,
19 shi nɔ ko yɛŋ fuu yɛ he ni asane lɛ tsɛ̃, loo gbɛ̃ yɛŋ ko ní efee tamɔ eetsu ba jɛmɛ lɛ, no lɛ, ekɛ ehe abatsɔɔ osɔfo lɛ.
20 Osɔfo lɛ akwɛ lɛ,+ ni kɛ́ hela lɛ ebote heloo lɛ mli vii, ni tsɔi ni yɔɔ jɛmɛ lɛ etsɔ eyɛŋ lɛ, osɔfo lɛ ajaje akɛ mɔ lɛ he tseee. Kpiti ji nɔ ni eje kpo yɛ asane lɛ mli lɛ.
21 Shi kɛ́ osɔfo lɛ kwɛ lɛ, ni ena akɛ tsɔi yɛŋ ko bɛ jɛmɛ, ni hela lɛ hu boteko heloo lɛ mli vii, ni hela lɛ miiya lɛ, osɔfo lɛ atsĩ enaa yɛ he ko gbii kpawo.+
22 Ni kɛ́ aana faŋŋ akɛ hela lɛ elɛɛ shi yɛ mɔ lɛ hewolo nɔ lɛ, osɔfo lɛ ajaje akɛ ehe tseee. Kpiti ni.
23 Shi kɛ́ gbɛ̃ lɛ yɛ he ni eyɔɔ lɛ nɔŋŋ ni elɛɛko shi lɛ, no lɛ, fuumɔ kɛkɛ asane lɛ efuu, ni osɔfo lɛ ajaje akɛ mɔ lɛ he tse.+
24 “Aloo kɛ́ la shã mɔ ko ni efee fala, ni he ni fala lɛ yɔɔ lɛ, gbɛ̃ yɛŋ ko ni efee tamɔ eetsu loo gbɛ̃ yɛŋ ko ba jɛmɛ lɛ,
25 osɔfo lɛ akwɛ. Kɛ́ tsɔi ni yɔɔ he ni gbɛ̃ lɛ yɔɔ lɛ etsɔ eyɛŋ, ni hela lɛ ebote heloo lɛ mli vii lɛ, kpiti ji nɔ ni eje kpo yɛ fala lɛ mli lɛ, ni osɔfo lɛ ajaje akɛ ehe tseee. Hela lɛ, kpiti ni.
26 Shi kɛ́ osɔfo lɛ kwɛ, ni ena akɛ tsɔi yɛŋ ko bɛ he ni gbɛ̃ lɛ yɔɔ lɛ, ni hela lɛ boteko heloo lɛ mli vii, ni nɔ ni efee lɛ lɛ miiya lɛ, osɔfo lɛ atsĩ enaa yɛ he ko gbii kpawo.+
27 Osɔfo lɛ akwɛ lɛ yɛ gbi ni ji kpawo lɛ nɔ, ni kɛ́ aana faŋŋ akɛ hela lɛ elɛɛ shi yɛ ehewolo nɔ lɛ, no lɛ, osɔfo lɛ ajaje akɛ ehe tseee. Hela lɛ, kpiti ni.
28 Shi kɛji gbɛ̃ lɛ hi he kome, ni elɛɛɛ shi yɛ ehewolo nɔ, ni eeya lɛ, no lɛ, fuumɔ kɛkɛ fala lɛ efuu, ni osɔfo lɛ ajaje akɛ mɔ lɛ he tse, ejaakɛ fuumɔ kɛkɛ fala lɛ efuu.
29 “Kɛ́ nɔ ko fee nuu ko loo yoo ko yiteŋ loo etsɛŋ lɛ,
30 osɔfo lɛ akwɛ nɔ ni efee mɔ lɛ.+ Kɛ́ ena akɛ hela lɛ ebote heloo lɛ mli vii, ni tsɔi ni yɔɔ jɛmɛ lɛ wuɔfɔ ni, ni eyɛ hwiahwia lɛ, osɔfo lɛ ajaje akɛ mɔ lɛ he tseee; nɔ ko ji nɔ ni efee eyiteŋ loo etsɛŋ tsɔi lɛ. Kpiti ni shwieɔ mɔ yiteŋ loo mɔ tsɛŋ ni.
31 Shi kɛ́ osɔfo lɛ na akɛ nɔ ni efee mɔ lɛ boteko eheloo lɛ mli vii, ni tsɔi diŋ bɛ jɛmɛ lɛ, no lɛ, osɔfo lɛ atsĩ mɔ ni nii lɛ efee lɛ lɛ kome too naa ewo he ko gbii kpawo.+
32 Osɔfo lɛ akwɛ nɔ ni efee mɔ lɛ yɛ gbi ni ji kpawo lɛ nɔ, ni kɛ́ he ni nii lɛ efee lɛ elɛɛko shi, ni tsɔi wuɔfɔ ko bako jɛmɛ, ni hela lɛ boteko heloo lɛ mli vii lɛ,
33 no lɛ, mɔ lɛ ashɛ eyi loo etsɛŋ, shi ekashɛ he ni nii lɛ efee lɛ. No sɛɛ lɛ, osɔfo lɛ atsĩ mɔ lɛ kome too naa ewo he ko gbii kpawo.
34 “Osɔfo lɛ asaa akwɛ he ni nii lɛ efee lɛ ekoŋŋ yɛ gbi ni ji kpawo lɛ nɔ, ni kɛ́ nɔ ni efee eyiteŋ kɛ etsɛŋ tsɔi lɛ elɛɛko shi yɛ hewolo lɛ nɔ, ni hela lɛ boteko heloo lɛ mli vii lɛ, no lɛ, osɔfo lɛ ajaje akɛ mɔ lɛ he tse, ni mɔ lɛ afɔ etadei lɛ ahe, kɛkɛ lɛ ehe baatse.
35 Shi kɛ́ be ni ajaje akɛ ehe tse lɛ sɛɛ lɛ, ana faŋŋ akɛ hela lɛ elɛɛ shi yɛ hewolo lɛ nɔ lɛ,
36 osɔfo lɛ akwɛ lɛ, ni kɛ́ hela lɛ elɛɛ shi yɛ hewolo lɛ nɔ lɛ, no lɛ, ehe ehiaaa ni osɔfo lɛ akwɛ akɛ ebaana tsɔi wuɔfɔ lo; mɔ lɛ he tseee.
37 Shi kɛ́ be ni ekwɛ lɛ lɛ, ena akɛ hela lɛ elɛɛko shi ni tsɔi diŋ hu etsa yɛ jɛmɛ lɛ, no lɛ, hela lɛ etee. Mɔ lɛ he tse, ni osɔfo lɛ ajaje akɛ ehe tse.+
38 “Kɛji gbɛ̃ ko shwie nuu ko loo yoo ko hewolo nɔ he ko, ni gbɛ̃ lɛ eyɛŋ ni lɛ,
39 osɔfo lɛ akwɛ gbɛ̃ lɛ.+ Kɛ́ gbɛ̃ ni eshwie ehewolo nɔ lɛ hiɛ efee tamɔ eyɛŋ lɛ, no lɛ, jeee gbɛ̃ fɔŋ eshwie ehewolo nɔ lɛ. Mɔ lɛ he tse.
40 “Kɛji nuu ko yiteŋ kpa, ni etsɔ yiteŋkpataatsɛ lɛ, ehe tse.
41 Kɛji mɔ lɛ hiɛnaa tsɔi lɛ kpa, ni etsɔ hiɛnaakpataatsɛ lɛ, ehe tse.
42 Shi kɛ́ fala yɛŋ ko ní efee tamɔ eetsu fee eyiteŋ loo ehiɛnaa he ni ekpa lɛ, no lɛ, kpiti ji nɔ ni eshwie eyiteŋ loo ehiɛnaa lɛ.
43 Osɔfo lɛ akwɛ lɛ, ni kɛ́ ena fala yɛŋ ko ni efee tamɔ eetsu ni efuu yɛ eyiteŋ loo ehiɛnaa he ni ekpa lɛ, ni etamɔ kpiti yɛ ehewolo nɔ lɛ,
44 kpitiyelɔ ni. Ehe tseee, ni osɔfo lɛ ajaje akɛ ehe tseee yɛ hela lɛ ni yɔɔ eyiteŋ lɛ hewɔ.
45 Kpitiyelɔ ni hela lɛ yɔɔ ehe lɛ agbála etadei lɛ, ní ehiɛ eyiteŋ tsaŋtsaŋ, ní eha etswei* nɔ, ní ebolɔ akɛ, ‘Mihe tseee, mihe tseee!’
46 Bei abɔ ni hela lɛ yɔɔ ehe lɛ, ehe tseee. Akɛni ehe tseee hewɔ lɛ, ekome too ehi he ko. Ehi nsara lɛ sɛɛ.+
47 “Kɛji hela ni ji kpiti lɛ shwie atade ko mli lɛ, kooloo hetsɔi atade jio, klala atade jio,
48 kɛ́ eshwie kpãa ni akɛlo kooloo hetsɔi atade lɛ loo klala atade lɛ mli jio, eshwie kooloo hewolo nɔ jio, loo nɔ fɛɛ nɔ ni akɛ kooloo hewolo fee lɛ nɔ jio,
49 ni kɛ́ nɔ ko ni su tamɔ baa ŋmɔŋ ni miiba lɛ tamɔ wuɔfɔ loo etsuru ji nɔ ni eka atade lɛ, kooloo hewolo lɛ, kpãa ni akɛlo atade lɛ, loo nɔ fɛɛ nɔ ni akɛ kooloo hewolo fee lɛ mli lɛ, no lɛ, kpiti ji nɔ ni eshwie mli lɛ, ni esa akɛ akɛbatsɔɔ osɔfo lɛ.
50 Osɔfo lɛ akwɛ hela lɛ, ní ekɛ nɔ ni hela lɛ yɔɔ mli lɛ pɛ ato he ko gbii kpawo.+
51 Kɛji ekwɛ hela lɛ yɛ gbi ni ji kpawo lɛ nɔ, ni ena akɛ elɛɛ shi yɛ atade lɛ, kpãi ni akɛlo atade lɛ, loo kooloo hewolo lɛ mli lɛ (ekɔɔɔ he eko nɔ ni akɛ kooloo hewolo lɛ feɔ lɛ), no lɛ, hela lɛ kpiti fɔŋ ni, nii lɛ he tseee.+
52 Eshã atade lɛ loo kpãi ni akɛlo kooloo hetsɔi atade lɛ loo klala atade lɛ loo nɔ fɛɛ nɔ ni akɛ kooloo hewolo fee ni hela lɛ yɔɔ mli lɛ, ejaakɛ kpiti fɔŋ ni. Ashã yɛ la mli.
53 “Shi kɛji osɔfo lɛ kwɛ, ni hela lɛ elɛɛko shi yɛ atade lɛ loo kpãi ni akɛlo atade lɛ loo nɔ fɛɛ nɔ ni akɛ kooloo hewolo fee lɛ mli lɛ,
54 no lɛ, osɔfo lɛ afã akɛ, afɔ nii ni hela lɛ yɔɔ mli lɛ he, ní ekɛ nii lɛ pɛ ato he ko gbii kpawo kroko hu.
55 Be ni afɔ nɔ ni hela lɛ yɔɔ mli lɛ he jogbaŋŋ sɛɛ lɛ, osɔfo lɛ akwɛ. Kɛ́ nɔ ni eshwie nii lɛ mli lɛ tsakeko, ni hela lɛ hu elɛɛko shi po lɛ, nii lɛ he tseee. Shãa yɛ la mli, ejaakɛ hela lɛ ekpe emligbɛ loo ehiɛgbɛ.
56 “Shi kɛ́ osɔfo lɛ kwɛ, ni ena akɛ nɔ ni eshwie nii lɛ mli lɛ miiya be ni afɔ he jogbaŋŋ sɛɛ lɛ, no lɛ, etse jɛmɛ kɛje atade lɛ loo kooloo hewolo lɛ loo kpãi ni akɛlo atade lɛ mli.
57 Shi kɛ́ eyaje kpo yɛ atade lɛ loo kpãi ni akɛlo atade lɛ loo nɔ fɛɛ nɔ ni akɛ kooloo hewolo fee lɛ mli he kroko lɛ, no lɛ, eelɛɛ shi, ni esa akɛ oshã nɔ fɛɛ nɔ ni hela lɛ yɔɔ mli lɛ yɛ la mli.+
58 Shi kɛ́ hela lɛ je atade lɛ loo kpãi ni akɛlo atade lɛ loo nɔ fɛɛ nɔ ni akɛ kooloo hewolo fee ni ofɔ he lɛ mli lɛ, no lɛ, afɔ he nɔ ni ji shii enyɔ nɔ, kɛkɛ lɛ, ehe baatse.
59 “Enɛ ji mla ni kɔɔ hela ni ji kpiti ni shwieɔ kooloo hetsɔi atade loo klala atade, loo kpãi ni akɛloɔ atadei, loo nɔ fɛɛ nɔ ni akɛ kooloo hewolo feɔ lɛ he lɛ, ni no akɛtsɔɔ akɛ nɔ ko he tse loo ehe tseee.”
Shishigbɛ Niŋmaa
^ Hebri wiemɔ ni atsɔɔ shishi akɛ “kpiti” lɛ hiɛ shishinumɔ ni yaa shɔŋŋ fe nɔ ni wɔle ŋmɛnɛ lɛ, ni ebaanyɛ ekɔ hewolo nɔ helai srɔtoi ni tsɛŋeɔ mɔ lɛ ahe. Ebaanyɛ ekɔ helai komɛi ni shwieɔ atadei amli kɛ shĩai ahe lɛ hu ahe.
^ Loo “nɔ ni fee lɛ ni hiɛ mɔ akaka.”
^ Loo “nɔ ni ji shii enyɔ nɔ.”
^ Loo “mɔ ni kpiti lɛ eshwie ehe lɛ nyɛŋ ekɛtsɛŋe mɔ ko.”
^ Loo “efintamo,” ni ji naabu nɔ tsɔi.
