4 Mose 10:1-36
10 Ni Yehowa kɛɛ Mose akɛ:
2 “Feemɔ tɛtɛrɛmantɛrɛi+ enyɔ ohã ohe; okɛ hamlɛ atswia jwiɛtɛi kɛfee, ní okɛ nomɛi atsu nii kɛbua maŋbii lɛ anaa, ní okɛhã amɛfã nyiɛmɔ.
3 Kɛ́ akpã enyɔ lɛ fɛɛ lɛ, maŋbii lɛ fɛɛ ababua amɛhe naa yɛ oŋɔɔ yɛ kpee buu lɛ shinaa lɛ naa.+
4 Kɛ́ akpã ekome pɛ lɛ, no lɛ, wekunukpai lɛ, ni ji Israel akpei abɔ lɛ anɔ onukpai lɛ pɛ ababua amɛhe naa yɛ oŋɔɔ.+
5 “Kɛ́ nyɛkpã tɛtɛrɛmantɛrɛ lɛ bɔ ni egbɛɛmɔ lɛ bɛ ŋɛlɛ kome nɔ lɛ, mɛi ni ebɔ nsara yɛ bokãgbɛ+ lɛ afã nyiɛmɔ.
6 Kɛ́ nyɛkpã tɛtɛrɛmantɛrɛ lɛ nɔ ni ji shii enyɔ nɔ, bɔ ni egbɛɛmɔ lɛ bɛ ŋɛlɛ kome nɔ lɛ, mɛi ni ebɔ nsara yɛ wuoyigbɛ+ lɛ afã nyiɛmɔ. Be fɛɛ be kɛ́ amɛteŋ mɔ ko baafã lɛ, akpã tɛtɛrɛmantɛrɛ lɛ yɛ nɛkɛ gbɛ nɔ.
7 “Agbɛnɛ, kɛ́ aatsɛ asafo lɛ koni amɛbabua amɛhe naa lɛ, nyɛkpãa tɛtɛrɛmantɛrɛi lɛ,+ shi nyɛhãa egbɛɛmɔ lɛ ahia ŋɛlɛ kome nɔ.
8 Aaron bihii lɛ, ni ji osɔfoi lɛ, akpã tɛtɛrɛmantɛrɛi lɛ,+ ni bɔ ni akɛ amɛ baatsu nii ahã lɛ atsɔ mla ni kã shi daa hã nyɛ yɛ nyɛyinɔi fɛɛ amli.
9 “Kɛ́ nyɛkɛ yiwalɔ ko ní miigba nyɛnaa yaawu ta yɛ nyɛshikpɔŋ lɛ nɔ lɛ, nyɛkpãa tɛtɛrɛmantɛrɛi lɛ kɛtsɛa mɛi kɛhã ta,+ ni Yehowa, nyɛ-Nyɔŋmɔ lɛ, baakai nyɛ, ni abaahere nyɛ kɛjɛ nyɛhenyɛlɔi lɛ adɛŋ.
10 “Agbɛnɛ hu, yɛ nyɛmiishɛɛ bei lɛ amli+—ni ji nyɛgbii juji+ kɛ nyɛnyɔji lɛ ashishijee lɛ—nyɛkpãa tɛtɛrɛmantɛrɛi lɛ yɛ nyɛshãa afɔlei+ kɛ nyɛnaanyobɔɔ afɔlei+ lɛ anɔ; amɛbaatsɔ kaimɔ nɔ amɛhã nyɛ yɛ nyɛ-Nyɔŋmɔ lɛ hiɛ. Miji Yehowa, nyɛ-Nyɔŋmɔ lɛ.”+
11 Agbɛnɛ, yɛ afi ni ji enyɔ lɛ mli, nyɔɔŋ ni ji enyɔ lɛ nɔ+ gbi ni ji 20 lɛ nɔ lɛ, atatu lɛ wó ehe nɔ kɛje Odaseyeli sɔlemɔ buu+ lɛ nɔ.
12 No hewɔ lɛ, Israelbii lɛ fã kɛjɛ Sinai ŋa lɛ nɔ yɛ gbɛjianɔ ni ato kɛhã amɛfãa lɛ naa,+ ni atatu lɛ yawa yɛ Paran ŋa lɛ nɔ.+
13 Enɛ ji klɛŋklɛŋ be ni amɛfã yɛ famɔ ni Yehowa tsɔ Mose nɔ ekɛhã lɛ naa.+
14 No hewɔ lɛ, Yudabii lɛ ansara ni wekui etɛ yɔɔ mli lɛ fã klɛŋklɛŋ yɛ amɛkui* lɛ anaa, ni Nahashon,+ Aminadab binuu lɛ ji kuu lɛ nɔ onukpa.
15 Isakarbii lɛ aweku lɛ, Netanel,+ Zuar binuu lɛ ji amɛkuu lɛ nɔ onukpa.
16 Zebulonbii lɛ aweku lɛ, Eliab,+ Helon binuu lɛ ji amɛkuu lɛ nɔ onukpa.
17 Be ni ajie sɔlemɔ buu lɛ,+ Gershon bihii+ lɛ kɛ Merari bihii+ lɛ ní tereɔ sɔlemɔ buu lɛ fã nyiɛmɔ.
18 Kɛkɛ ni Rubenbii lɛ ansara ni wekui etɛ yɔɔ mli lɛ fã yɛ amɛkui* lɛ anaa, ni Elizur,+ Shedeur binuu lɛ ji kuu lɛ nɔ onukpa.
19 Simeonbii lɛ aweku lɛ, Shelumiel,+ Zurishadai binuu lɛ ji amɛkuu lɛ nɔ onukpa.
20 Gadbii lɛ aweku lɛ, Eliasaf,+ Deuel binuu lɛ ji amɛkuu lɛ nɔ onukpa.
21 Kɛkɛ ni Kohatbii ni tereɔ jamɔhe lɛ nibii+ lɛ fã nyiɛmɔ. Esa akɛ ashĩ sɔlemɔ buu lɛ ama shi dani amɛbashɛ shi.
22 Kɛkɛ ni Efraimbii lɛ ansara ni wekui etɛ yɔɔ mli lɛ fã yɛ amɛkui* lɛ anaa, ni Elishama,+ Amihud binuu lɛ ji kuu lɛ nɔ onukpa.
23 Manasebii lɛ aweku lɛ, Gamaliel,+ Pedazur binuu lɛ ji amɛkuu lɛ nɔ onukpa.
24 Benyaminbii lɛ aweku lɛ, Abidan,+ Gideoni binuu lɛ ji amɛkuu lɛ nɔ onukpa.
25 Kɛkɛ ni Danbii lɛ ansara ni wekui etɛ yɔɔ mli lɛ fã yɛ amɛkui* lɛ anaa, ni amɛ amɛnyiɛɔ nsarai lɛ fɛɛ asɛɛ, ni Ahiezer,+ Amishadai binuu lɛ ji kuu lɛ nɔ onukpa.
26 Asherbii lɛ aweku lɛ, Pagiel,+ Okran binuu lɛ ji amɛkuu lɛ nɔ onukpa.
27 Naftalibii lɛ aweku lɛ, Ahira,+ Enan binuu lɛ ji amɛkuu lɛ nɔ onukpa.
28 Nɛkɛ ji bɔ ni Israelbii lɛ kɛ amɛkui* lɛ fãa.+
29 Ni Mose kɛɛ Hobab, ni ji eshaanuu Reuel,*+ Midiannyo lɛ, binuu lɛ akɛ: “Wɔmiifã kɛmiiya he ni Yehowa wie he akɛ, ‘Mikɛbaahã nyɛ’+ lɛ. Okɛ wɔ aya,+ ni wɔkɛ bo baaye jogbaŋŋ, ejaakɛ Yehowa ewo Israelbii lɛ shi akɛ ebaahã amɛ nibii kpakpai.”+
30 Shi ekɛɛ lɛ akɛ: “Miyaaa. Maku misɛɛ kɛya mi diɛŋtsɛ mimaŋ kɛ miwekumɛi aŋɔɔ.”
31 Kɛkɛ ni ekɛɛ: “Ofainɛ kaashi wɔ, ejaakɛ bo ole he ni esa akɛ wɔbɔ nsara yɛ, yɛ ŋa lɛ nɔ, ni obaanyɛ otsɔɔ wɔ gbɛ.*
32 Ni kɛ́ okɛ wɔ tee lɛ,+ ekpakpa fɛɛ ni Yehowa baafee wɔ lɛ, bɔ fɛɛ bɔ ni fee lɛ, wɔ hu wɔbaafee bo ekpakpa.”
33 No hewɔ lɛ, amɛfã nyiɛmɔ kɛjɛ Yehowa gɔŋ+ lɛ he, ni amɛnyiɛ gbii etɛ gbɛnyiɛmɔ, ni Yehowa kpaŋmɔ adeka+ lɛ nyiɛ amɛhiɛ yɛ gbii etɛ gbɛnyiɛmɔ lɛ mli, koni etao hejɔɔmɔhe ko ehã amɛ.+
34 Ni kɛ́ amɛfã kɛshi he ni amɛbɔ nsara lɛ yɛ lɛ, Yehowa atatu+ lɛ hiɔ amɛnɔ kɛ́ je tsɛre.
35 Be fɛɛ be ni abaawó Adeka lɛ, Mose kɛɔ akɛ: “Ao Yehowa, tee shi,+ ní ohã ohenyɛlɔi lɛ agbɛ ashwã, ní ohã mɛi ni nyɛɔ bo lɛ ajo foi kɛje ohiɛ.”
36 Ni kɛ́ akɛbaama shi lɛ, ekɛɔ akɛ: “Yehowa, kuu osɛɛ kɛba Israel akpei abɔ* lɛ aŋɔɔ.”+
Shishigbɛ Niŋmaa
^ Hebri sht. ŋm., “amɛsraafoi akui.”
^ Hebri sht. ŋm., “amɛsraafoi akui.”
^ Hebri sht. ŋm., “amɛsraafoi akui.”
^ Hebri sht. ŋm., “amɛsraafoi akui.”
^ Hebri sht. ŋm., “amɛsraafoi akui.”
^ Ni ji, Yetro.
^ Loo “obaanyɛ otsɔ wɔhiŋmɛii.”
^ Loo “akpei nyɔŋmanyɔŋmai.”
