4 Mose 24:1-25
24 Be ni Bileam na akɛ esa Yehowa hiɛ akɛ ejɔɔ Israel lɛ, eyaaa eyataooo okadii ni tsɔɔ nɔ fɔŋ ni baaba dɔŋŋ,+ shi moŋ, ekɛ ehiɛ tsɔɔ ŋa lɛ nɔ gbɛ.
2 Be ni Bileam hole ehiŋmɛii anɔ ni ena Israel ni ebɔ nsara yɛ ewekui lɛ anaa lɛ,+ Nyɔŋmɔ mumɔ lɛ ba enɔ.+
3 Kɛkɛ ni egba abɛbua nɛɛ akɛ:+
“Bileam, Beor binuu lɛ wiemɔ,Nuu ni agbele ehiŋmɛii lɛ wiemɔ nɛ,
4 Mɔ ni nuɔ Nyɔŋmɔ wiemɔ lɛ,Mɔ ni na Ofe lɛ he ninaa lɛ,Mɔ ni ema eyi shi ni agbele ehiŋmɛii lɛ wiemɔ nɛ:+
5 Yakob, kwɛ bɔ ni omama tsũi lɛ yɔɔ fɛo hã,Israel, oshihilɛhei lɛ yɛ fɛo!+
6 Amɛlɛɛ shi kɛtee shɔŋŋ tamɔ jɔi,+Tamɔ abɔi ni yɔɔ faa he,Tamɔ aloe tsei ni Yehowa du,Tamɔ tseneduru tsei ni yɔɔ nui ahe.
7 Nu yaa nɔ etsereɔ kɛjɛɔ enuyɛɛ nii* enyɔ lɛ amli,Ni adu edumɔwu* lɛ yɛ nui babaoo ahe.+
Emaŋtsɛ+ lɛ baaje agbo fe Agag,+Ni aaawó emaŋtsɛyeli lɛ nɔ.+
8 Nyɔŋmɔ jie lɛ kɛje Ejipt;Etamɔ ŋa mli tsinanuu akolontoi kɛhã amɛ.
Ebaami jeŋmaji lɛ, eyiwalɔi lɛ,+Ni ebaakpe amɛwui lɛ, ni ekɛ gãimlibii baatserɛ amɛmli dukuduku.
9 Ebu shi, ekã shi tamɔ jata,Ni tamɔ jata ji lɛ, namɔ baanyɛ awo ehiɛ la?
Ajɔɔ mɛi ni jɔɔ bo lɛ,Ni alomɔ mɛi ni lomɔɔ bo lɛ.”+
10 Ni Balak mli fu Bileam waa. Balak kɛ mlifu tswa edɛ̃ ni ekɛɛ Bileam akɛ: “Miyatsɛ bo kɛba koni obalomɔ mihenyɛlɔi lɛ,+ shi agbɛnɛ, jɔɔmɔ sɔŋŋ moŋ ojɔɔ amɛ shii etɛ nɛɛ.
11 Agbɛnɛ, yaa shĩa amrɔ nɔŋŋ. Kulɛ, miitao mawo ohiɛ nyam waa,+ shi naa! Yehowa etsĩ ohiɛnyamwoo lɛ naa.”
12 Bileam hã Balak hetoo akɛ: “Ani mikɛɛɛ mɛi ni otsu amɛ lɛ akɛ,
13 ‘Kɛ́ Balak kɛ lɛ diɛŋtsɛ eshĩa hã mi, ni jwiɛtɛi kɛ shika tsuru eyi mli obɔ po lɛ, mi diɛŋtsɛ minyɛŋ mafee nɔ ko yɛ misuɔmɔ naa* kɛteke Yehowa famɔ lɛ, nɔ kpakpa jio, nɔ fɔŋ jio. Ni nɔ ni Yehowa baakɛɛ mi lɛ, no pɛ mawie’?+
14 Ni agbɛnɛ, miiya mimaŋbii lɛ aŋɔɔ. Ba ni mahã ole nɔ ni nɛkɛ maŋ nɛɛ baafee omaŋ lɛ wɔsɛɛ ko.”*
15 No hewɔ lɛ, egba abɛbua nɛɛ akɛ:+
“Bileam, Beor binuu lɛ wiemɔ,Nuu ni agbele ehiŋmɛii lɛ wiemɔ nɛ,+
16 Mɔ ni nuɔ Nyɔŋmɔ wiemɔ lɛ,Mɔ ni yɔɔ Mɔ Ni Nɔ Kwɔ Fe Fɛɛ lɛ he nilee,Mɔ ni na Ofe lɛ he ninaaBe mli ni ema eyi shi ni agbele ehiŋmɛii lɛ wiemɔ nɛ:
17 Mana lɛ, shi jeee bianɛ;Mana lɛ, shi jeee amrɔ nɛɛ.
Ŋulami+ ko baajɛ Yakob mli aba,Ni maŋtsɛtso+ baate shi kɛaajɛ Israel mli.+
Ni bɔ fɛɛ bɔ ni fee lɛ, ebaajwara Moab hiɛnaa*+Ni ebaajwara mɛi fɛɛ ni feɔ hoo lɛ ayitsoŋoŋo.
18 Ni ebaaŋɔ Edom akɛ enɔ,+Hɛɛ, Seir+ baatsɔ ehenyɛlɔi lɛ anɔ,+Be mli ni Israel jieɔ ekãa ni eyɔɔ lɛ kpo lɛ.
19 Ni mɔ ko baajɛ Yakob mli eye mɛi anɔ kunim,+Ni ebaakpãtã mɔ fɛɛ mɔ ni baashwɛ yɛ maŋ lɛ mli lɛ hiɛ.”
20 Be ni ena Amalek lɛ, etsa ebɛbua lɛ nɔ akɛ:
“Amalek ji jeŋmaji lɛ ateŋ klɛŋklɛŋ maŋ,+Shi naagbee lɛ, ehiɛ baakpãtã.”+
21 Be ni ena Kenbii+ lɛ, etsa ebɛbua lɛ nɔ akɛ:
“Oshihilɛhe lɛ yɛ shweshweeshwe, ni oshĩa lɛ ma tɛsaa nɔ.
22 Shi mɔ ko baashã Kain* wɛlɛŋŋ.
Bei enyiɛ eshwɛ ni Asiria baaŋɔ bo nom?”
23 Ni etsa ebɛbua lɛ nɔ akɛ:
“Kpoo! Namɔ yi baaná wala be ni Nyɔŋmɔ feɔ enɛ lɛ?
24 Meelei baajɛ Kitim+ ŋshɔ lɛ naa aba,Ni amɛbaawa Asiria+ yi,Ni amɛbaawa Eber yi.
Shi lɛ hu ehiɛ baakpãtã kwraa.”
25 Ni Bileam+ te shi ni eyi mli, ni eku esɛɛ etee he ni eyɔɔ lɛ. Balak hu kɔ egbɛ.
Shishigbɛ Niŋmaa
^ Loo “eseshi.”
^ Ni ji, kooloo hewolo nuyɛɛ nii.
^ Hebri sht. ŋm., “minyɛŋ majɛ mitsuiŋ mafee nɔ ko.”
^ Loo “baafee omaŋ lɛ yɛ gbii lɛ anaagbee lɛ mli.”
^ Loo “Moab yitso lɛ biɛ kɛ biɛ ni bɛŋkɛ ehiɛnaa lɛ.”
^ Ni ji, Kenbii lɛ aweku lɛ.
