4 Mose 34:1-29
34 Ni Yehowa tee nɔ ekɛ Mose wie ekɛɛ:
2 “Okɛ gbɛtsɔɔmɔi nɛɛ ahã Israelbii lɛ akɛ: ‘Kɛ́ nyɛtee Kanaan shikpɔŋ lɛ nɔ lɛ,+ shikpɔŋ ní baatsɔ nyɛgboshinii, ni ji Kanaan shikpɔŋ lɛ yɛ ehusui lɛ anaa lɛ nɛ.+
3 “‘Nyɛwuoyigbɛ husu lɛ baajɛ Zin ŋa lɛ nɔ, yɛ Edom ŋɛlɛ nɔ, ni nyɛwuoyigbɛ husu yɛ bokãgbɛ lɛ baajɛ Ŋoo Ŋshɔ* lɛ naagbeehe lɛ.+
4 Nyɛhusu lɛ baadɔ kɛyatsɔ he ni atsɔɔ kɛkwɔɔ Akrabim+ lɛ wuoyigbɛ, ni ebaatsa nɔ kɛya Zin, ni ebaayagbe naa yɛ Kadesh-barnea+ wuoyigbɛ. Ni ebaatsa nɔ kɛyamɔ Hazar-adar+ aahu kɛya Azmon.
5 Husu lɛ baadɔ yɛ Azmon kɛya Ejipt Nujɔɔ* lɛ mli, ni ebaayagbe naa yɛ Ŋshɔ* lɛ naa.+
6 “‘Nyɛnaigbɛ husu lɛ baafee Ŋshɔ Wulu* lɛ kɛ ŋshɔ lɛ naa. Enɛ baafee nyɛnaigbɛ husu.+
7 “‘Agbɛnɛ, enɛ baafee nyɛkooyigbɛ husu: Nyɛgbáa nyɛhusu lɛ kɛjɛa Ŋshɔ Wulu lɛ he kɛyaa Hor Gɔŋ lɛ he.
8 Kɛjɛ Hor Gɔŋ lɛ he lɛ, nyɛgbáa husu lɛ kɛyaa Lebo-hamat,*+ ni husu lɛ baayagbe naa yɛ Zedad.+
9 Ni husu lɛ baajɛ jɛmɛ kɛyamɔ Zifron, ni ebaayagbe naa yɛ Hazar-enan.+ Enɛ baafee nyɛkooyigbɛ husu.
10 “‘No sɛɛ lɛ, nyɛgbáa nyɛbokãgbɛ husu lɛ kɛjɛa Hazar-enan kɛyaa Shefam.
11 Husu lɛ baatsa nɔ kɛjɛ Shefam kɛya Ribla yɛ Ain bokãgbɛ, ni husu lɛ baakpeleke shi, ni ebaafo mli yɛ gɔŋkpɔi ni yɔɔ Kineret Ŋshɔ* lɛ bokãgbɛ lɛ anɔ.+
12 Husu lɛ baatsa nɔ kɛyamɔ Yordan lɛ, ni ebaayagbe naa yɛ Ŋoo Ŋshɔ lɛ naa.+ Enɛ baafee nyɛshikpɔŋ+ lɛ kɛ ehe husui ni bɔle lɛ kɛkpe lɛ.’”
13 No hewɔ lɛ, Mose kɛɛ Israelbii lɛ akɛ: “Enɛ ji shikpɔŋ ni nyɛbaafɔ̃ oshiki kɛja nyɛhã nyɛhe lɛ,+ tamɔ bɔ ni Yehowa fã akɛ akɛhã wekui nɛɛhu kɛ fã lɛ.
14 Ejaakɛ Rubenbii lɛ aweku lɛ yɛ amɛtsɛmɛi ashĩa lɛ naa, kɛ Gadbii lɛ aweku lɛ yɛ amɛtsɛmɛi ashĩa lɛ naa, kɛ Manase weku lɛ fã lɛ eŋɔ amɛgboshinii lɛ momo.+
15 Wekui enyɔ kɛ fã lɛ eŋɔ amɛgboshinii momo yɛ Yordan kpokpaa lɛ bokãgbɛ, yɛ Yeriko ŋɛlɛ nɔ, yɛ hulushiteehe lɛ gbɛ.”+
16 Yehowa tee nɔ ekɛ Mose wie ekɛɛ:
17 “Hii ni baaja shikpɔŋ lɛ amɛhã nyɛ koni etsɔ nyɛnɔ lɛ agbɛ́ii nɛ: Osɔfo Eleazar+ kɛ Yoshua,+ Nun binuu lɛ.
18 Ni nyɛŋɔa wekunukpa kome kɛjɛa weku fɛɛ weku mli koni amɛja shikpɔŋ lɛ amɛhã nyɛ akɛ nyɛgboshinii.+
19 Hii lɛ agbɛ́ii nɛ: Yuda weku+ lɛ mli lɛ, Kaleb,+ Yefune binuu lɛ;
20 Simeonbii lɛ aweku+ lɛ mli lɛ, Shemuel, Amihud binuu lɛ;
21 Benyamin weku+ lɛ mli lɛ, Elidad, Kislon binuu lɛ;
22 Danbii lɛ aweku+ lɛ mli lɛ, wekunukpa Buki, Yogli binuu lɛ;
23 Yosef bihii+ lɛ ateŋ lɛ, Manasebii aweku+ lɛ mli lɛ, wekunukpa Haniel, Efod binuu lɛ;
24 Efraimbii lɛ aweku+ lɛ mli lɛ, wekunukpa Kemuel, Shiftan binuu lɛ;
25 Zebulonbii lɛ aweku+ lɛ mli lɛ, wekunukpa Elizafan, Parnak binuu lɛ;
26 Isakarbii lɛ aweku+ lɛ mli lɛ, wekunukpa Paltiel, Azan binuu lɛ;
27 Asherbii aweku+ lɛ mli lɛ, wekunukpa Ahihud, Shelomi binuu lɛ;
28 Naftalibii lɛ aweku+ lɛ mli lɛ, wekunukpa Pedahel, Amihud binuu lɛ.”
29 Mɛnɛɛmɛi ji mɛi ni Yehowa fã akɛ amɛja shikpɔŋ lɛ amɛhã Israelbii lɛ yɛ Kanaan shikpɔŋ lɛ nɔ lɛ.+
Shishigbɛ Niŋmaa
^ Ni ji, Ŋshɔ Ni Egbo lɛ.
^ Kwɛmɔ Wiemɔi Titrii Amligbalamɔ lɛ.
^ Ni ji, Ŋshɔ Wulu lɛ, Mediterenia Ŋshɔ lɛ.
^ Ni ji, Mediterenia Ŋshɔ lɛ.
^ Loo “he ni atsɔɔ kɛboteɔ Hamat lɛ.”
^ Ni ji, Genesaret kpaakpo lɛ, loo Galilea Ŋshɔ lɛ.
