Abɛi 23:1-35
23 Kɛ́ ota shi koni okɛ maŋtsɛ aye nii lɛ,Jwɛŋmɔ he ni oyɔɔ lɛ he jogbaŋŋ;
2 Okɛ kakla ama osɛ̃*Kɛ́ oji mɔ ko ni yeɔ ŋmaa waa.*
3 Kaahã eniyenii ni ŋɔɔ lɛ miiba otsine,Ejaakɛ lakamɔ niyenii ni.
4 Kaahã etɔ bo yɛ ninámɔ he.+
Kaafee nakai, okɛ ojwɛŋmɔ ato he.*
5 Be ni obaana lɛ, ebɛ dɔŋŋ,+Ejaakɛ ekwɛ̃ɔ fiji tamɔ okropɔŋ ni efilikiɔ kɛyaa ŋwɛi.+
6 Kaaye mɔ ni hãaa mɔ nɔ* niyenii;Kaahã eniyenii ni ŋɔɔ lɛ miiba otsine,
7 Ejaakɛ etamɔ mɔ ko ni buɔ akɔntaa.*
Ekɛɔ bo akɛ, “Ye ni onu,” shi jeee kɛ etsui.*
8 Obaashwe atrɔmai ni omi lɛNi eyi ni ojie lɛ fɛɛ baafee efolo.
9 Kaawie owo kwashia toiiaŋ,+Ejaakɛ ebaagbe owiemɔi ni nilee yɔɔ mli lɛ he guɔ.+
10 Kaatsi blema shikpɔŋ husu kadimɔnɔ kɛtee sɛɛ,+Ni kaabote mɔ ni bɛ tsɛ* shikpɔŋ mli.
11 Ejaakɛ mɔ ni fãa amɛhe lɛ* he wa;Ekɛ bo baaye ehã amɛ.+
12 Okɛ otsui ahã tsɔsemɔNi oka otoi ohã nilee wiemɔi.
13 Kaatsĩ gbekɛ* tsɔsemɔ naa.+
Kɛ́ oyi lɛ kɛ kpãa lɛ, egboŋ.
14 Okɛ kpãa ayi lɛ,Koni ojie lɛ* kɛje Gbonyobu* lɛ mli.
15 Mibi,* kɛ́ ohã otsui hiɛ kã shi lɛ,Mi hu mitsui baanya.+
16 Kɛ́ onaabu wie nɔ ni ja lɛ,Mimli baafili mi.*
17 Kaahã otsui hiɛ miikɔ̃ eshafeelɔi anɔ,+She Yehowa gbeyei be fɛɛ be.+
18 Ejaakɛ no baahã ahi ahã bo wɔsɛɛ+Ni ohiɛnɔkamɔ lɛ efeŋ efolo.
19 Mibi,* bo toi ni ohiɛ akã shi,Ni ohã otsui ahi gbɛ ni ja lɛ nɔ.
20 Okɛ ohe akafutu mɛi ni nuɔ wain babaoo,+Kɛ mɛi ni feɔ loo he fu lɛ,+
21 Ejaakɛ dãatɔlɔ kɛ fufeelɔ lɛ, amɛbaaye ohia,+Ni wɔdɔ̃iwɔɔ baahã mɔ abu mamashwɛi.
22 Bo opapa ni fɔ bo lɛ toi,Ni kaagbe omami he guɔ yɛ gbɔ ni egbɔ lɛ hewɔ.+
23 Hemɔ* anɔkwale, ni kaahɔ̃ɔ kɔkɔɔkɔ,+Hemɔ hiɛshikamɔ, kɛ tsɔsemɔ, kɛ niiashishinumɔ hu.+
24 Jalɔ tsɛ baanya babaoo;Mɔ fɛɛ mɔ ni fɔɔ bi hiɛshikalɔ lɛ baaná miishɛɛ yɛ ehewɔ.
25 Opapa kɛ omami baaná miishɛɛ,Ni yoo ni fɔ bo lɛ baanya babaoo.
26 Mibi,* okɛ otsui ahã mi,Ni oná* migbɛi lɛ ahe miishɛɛ.+
27 Ejaakɛ ashawo yoo lɛ, bu kwɔŋkwɔŋ ni,Ni yoo ni bɛ jeŋba* lɛ, nubu ni mli elɛɛɛ ni.+
28 Eteɔ ehe tamɔ ojotswalɔ;+Ehãa hii ni yeee anɔkwa lɛ ayi faa.
29 Namɔ naa nɔ? Namɔ he ejɔɔɔ lɛ?
Namɔ náa béi? Namɔ náa sane?
Namɔ pilaa yakatswaa? Namɔ hiŋmɛii tsuɔ waa?*
30 Mɛi ni taa wain he amɛtsɛɔ;+Mɛi ni taoɔ* wain ni afutu lɛ.
31 Kaakwɛ bɔ ni wain lɛ tsuɔ lɛ,Bɔ ni ekpɛlɛɔ yɛ kɔɔpoo lɛ mli kɛ bɔ ni eyaa yɔɔ lɛ,
32 Ejaakɛ sɛɛ mli lɛ, ekɔ̃ɔ mɔ tamɔ onufu,Ni ekɛ pɔizin woɔ mɔ mli tamɔ onufu.
33 Ohiŋmɛii baana nibii ni yɔɔ naakpɛɛ,Ni otsui baawie wiemɔi gbohii.+
34 Ni obaatsɔ tamɔ mɔ ko ni kã ŋshɔ teŋ,Tamɔ mɔ ko ni kã meele mli tso ni akɛshiɔ abalaa yiteŋ.
35 Obaakɛɛ akɛ: “Amɛtswia mi nii, shi minuuu he.
Amɛyi mi, shi mileee.
Mɛɛ be mihiɛ baatsɛ̃?+
Eeba mitsine ekoŋŋ.”*
Shishigbɛ Niŋmaa
^ Loo “Ye ohe nɔ.”
^ Loo “Kɛ́ osusuma shweɔ nii babaoo.”
^ Shishitsɔɔmɔi komɛi kɛɔ akɛ, “okɛ ohiɛ akafɔ̃ bo diɛŋtsɛ oniiashishinumɔ nɔ.”
^ Loo “mɔ ni yɔɔ hiŋmɛi gbonyo.”
^ Loo “mɔ ko ni buɔ akɔntaa yɛ esusuma mli.”
^ Hebri sht. ŋm., “etsui bɛ ohe.”
^ Loo “awusã.”
^ Hebri sht. ŋm., “amɛkpɔ̃lɔ lɛ.”
^ Loo “gbekɛ nuu; oblanyo; oblayoo.”
^ Loo “esusuma.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “Mibinuu.”
^ Hebri sht. ŋm., “Misabai amli baafili amɛ.”
^ Hebri sht. ŋm., “Mibinuu.”
^ Loo “Taomɔ.”
^ Hebri sht. ŋm., “Mibinuu.”
^ Loo “ohiŋmɛii aná.”
^ Loo “hiŋmɛii anɔ haa?”
^ Loo “Mɛi ni yaa yasaa amɛnaa.”
^ Loo “Matao sɛɛ gbɛ ekoŋŋ.”
