Abɛi 27:1-27
27 Kaashwã ofɔ̃ wɔ́ nɔ,Ejaakɛ oleee nɔ ni baaba yɛ gbi ko nɔ.*+
2 Hã mɔ kroko* ajie oyi, shi jeee bo diɛŋtsɛ onaabu;Mɛi krokomɛi,* shi jeee bo diɛŋtsɛ onaabu.+
3 Tɛ tsii, ni shia hu ji jatsu ni tsii,Shi mlila ni buulu woɔ mɔ lɛ, etsii fe nibii enyɔ nɛɛ fɛɛ.+
4 Mlila yitsoŋ wa, ni mlifu lɛ, nu afua ni,Shi namɔ baanyɛ awuŋayeli naa edamɔ?+
5 Kɛ́ ajaje mɔ yɛ faŋŋ mli lɛ, ehi fe suɔmɔ ni akɛtee.+
6 Naanyo pilamɔi lɛ, anɔkwayeli ni,+Shi henyɛlɔ naashɔmɔi lɛ, efa babaoo.*
7 Mɔ ni etɔ* lɛ, ekpoɔ wo ni miitsere,*Shi mɔ* ni hɔmɔ miiye lɛ lɛ, nɔ ni joɔ po ŋɔɔ enaa.
8 Bɔ ni loofɔlɔ ni shiɔ etsũ ni eduɔ gbɛ* ji lɛ,Nakai nuu ni shiɔ eshĩa ni eyabɔɔ ko lɛ ji.
9 Mu kɛ tsofa-kɛ-ŋma hãa tsui nyaa;Nakai nɔŋŋ kɛ́ ajɛ tsui mli awo ŋaa lɛ ehãa* naanyobɔɔ ŋɔɔ.+
10 Kaakwa onaanyo kɛ opapa naanyo,Ni kaaya bo diɛŋtsɛ onyɛmi shĩa yɛ omanehulu gbi nɔ;Naanyo ni bɛŋkɛ bo lɛ, ehi fe nyɛmi ni yɔɔ shɔŋŋ.+
11 Mibi, hã ohiɛ akã shi, ni ohã mitsui anya,+Koni maná nɔ ko makɛɛ mɔ ni wieɔ eshiɔ mi* lɛ.+
12 Hiɛtɛ̃lɔ naa oshãra lɛ, ni eteɔ ehe,+Shi mɔ ni jwɛŋmɔ esako* lɛ, ebɛŋkɛɔ he, ni enaa amane.*
13 Hemɔ mɔ atade yɛ edɛŋ kɛ́ eyadamɔ mli ehã mɔkpɔŋ;Hemɔ nɔ ni ekɛba ni ekɛbaato awaba lɛ yɛ edɛŋ kɛ́ edamɔ mli ehã yoo mɔkpɔŋ.*+
14 Kɛ́ mɔ ko jɔɔ enyɛmi gbɔmɔ kɛ bolɔmɔ leebi maŋkpa lɛ,Abaabu no akɛ loomɔ moŋ.
15 Yoo* ni sumɔɔ béi* lɛ, etamɔ tsũ ni yiteŋ kpaaa duu be ni nugbɔ miinɛ.+
16 Mɔ fɛɛ mɔ ni baanyɛ ajɔɔ yoo nɛɛ he lɛ, ebaanyɛ ejɔɔ kɔɔyɔɔ heNi ebaanyɛ ekɛ eninejurɔ amɔ fɔ* mli.
17 Bɔ ni dade jɔɔ dade naa lɛ,Nakai nɔŋŋ gbɔmɔ hu jɔɔ enaanyo naa.*+
18 Mɔ ni kwɛɔ agbami tso nɔ lɛ, ebaaye eyibii lɛ eko,+Ni mɔ ni kwɛɔ enuŋtsɔ lɛ, abaawo ehiɛ nyam.+
19 Bɔ ni anaa gbɔmɔ hiɛ yɛ nu mli lɛ,Nakai nɔŋŋ mɔ ko tsui hãa anaa nɔ ni yɔɔ mɔ kroko tsui mli.
20 Gbonyobu kɛ hiɛkpatamɔ bu lɛ,* amɛtɔrɔko dã,+Ni gbɔmɔ hiŋmɛii hu etɔko dã.
21 Niiahetsuumɔ kukwɛi yɛ kɛhã jwiɛtɛi, ni dade seremɔ flɔnɔɔ hu yɛ kɛhã shika tsuru,+Nakai nɔŋŋ gbɔmɔ hu, eyi ni mɛi jieɔ lɛ, no kaa lɛ ekwɛɔ.*
22 Kɛ́ okɛ ŋmetso mli bi shi buulu yɛ ŋmetso mliTamɔ ashiɔ ŋmaa* po lɛ,Ebuulufeemɔ lɛ ejeŋ ehe.
23 Esa akɛ ole bɔ ni otooku lɛ yɔɔ jogbaŋŋ.Kwɛmɔ ogwantɛŋi lɛ jogbaŋŋ.*+
24 Ejaakɛ ninámɔ ehiii shi kɛyaaa naanɔ,+Ni maŋtsɛ fai* hu ehiii shi kɛyaaa yinɔi fɛɛ.
25 Jwɛi fɔ laajeɔ, jwɛi hee kwɛ̃ɔ,Ni abuaa gɔji lɛ anɔ kwɛ̃ɛ nii lɛ anaa.
26 Gwantɛŋhii ni darako lɛ hãa onáa hehaanɔ,Ni abotiahii okɛwoɔ shikpɔŋ nyɔmɔ.
27 Ni amɛbaahã oná abotia fufɔ bɔ ni fa ni baashɛ bo,Ebaashɛ oshĩabii lɛ, ni okɛbaalɛ otsuji yei lɛ hu.
Shishigbɛ Niŋmaa
^ Hebri sht. ŋm., “oleee nɔ ni gbi ko baafɔ.”
^ Hebri sht. ŋm., “gbɔ; mɔkpɔŋ.”
^ Hebri sht. ŋm., “Maŋsɛɛnyo.”
^ Shishitsɔɔmɔi komɛi kɛɔ akɛ, “ejɛɛɛ etsui mli; ekwaa efeɔ.”
^ Loo “Susuma ni etɔ.”
^ Loo “susuma.”
^ Loo “wo ni afutuko mli.” Hebri sht. ŋm., “enaanaa wo ni miitsere nɔ.”
^ Loo “loofɔlɔ ni joɔ foi eshiɔ etsũ.”
^ Loo “Nakai nɔŋŋ susuma ŋaawoo hãa.”
^ Loo “mɔ ni bɔɔ mi ahora; mɔ ni tswaa mi mpoa.”
^ Loo “enáa he toigbalamɔ.”
^ Loo “mɔ ni bɛ niiashikpamɔ.”
^ Loo “mɔ ni jɛ jeŋmaŋ kroko nɔ.”
^ Loo “Ŋa.”
^ Loo “ni wieɔ nii ahe; ni suɔ mɔ tsui.”
^ Loo “mu.”
^ Hebri sht. ŋm., “jɔɔ enaanyo hiɛ.”
^ Loo “Sheol kɛ Abadon.”
^ Loo “eyi ni mɛi jieɔ lɛ, no akɛnaa nɔ gbɔmɔ ni eji.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “Hã otsui ahi ogwantɛŋi lɛ anɔ; Hã ohiɛ ahi ogwantɛŋi lɛ anɔ.”
^ Loo “akekere.”
