Bɔfoi Lɛ Anitsumɔi 13:1-52
13 Agbɛnɛ, gbalɔi kɛ tsɔɔlɔi komɛi yɛ asafo ni yɔɔ Antiokia lɛ mli:+ Barnaba, kɛ Simeon ni atsɛɔ lɛ Niger lɛ, kɛ Lukio ni jɛ Kirene lɛ, kɛ Manahen ni kɛ kpokpaa nɔyelɔ Herode tee skul lɛ, kɛ Saul.
2 Be ni amɛsɔmɔɔ Yehowa* ni amɛhiɔ ŋmaa lɛ, mumɔ krɔŋkrɔŋ lɛ kɛɛ: “Nyɛjiea Barnaba kɛ Saul+ nyɛhãa mi kɛhã nitsumɔ hewɔ ni mitsɛ amɛ lɛ.”+
3 Ni be ni amɛhi ŋmaa ni amɛsɔle amɛgbe naa lɛ, amɛkɛ amɛniji ŋmɛlɛ amɛnɔ, ni amɛwo amɛ gbɛ.
4 No hewɔ lɛ, hii nɛɛ ni mumɔ krɔŋkrɔŋ lɛ etsu amɛ lɛ kpeleke shi kɛtee Seleukia, ni amɛbote lɛlɛ mli yɛ jɛmɛ kɛtee Kipro.
5 Be ni amɛshɛ Salami lɛ, amɛbɔi Nyɔŋmɔ wiemɔ lɛ jajemɔ yɛ Yudafoi lɛ akpeehei lɛ. No mli lɛ, Yohane hu fata amɛhe akɛ sɔɔlɔ.*+
6 Be ni amɛkpa ŋshɔkpɔ lɛ nɔ fɛɛ kɛyashɛ Pafo tɔ̃ɔ lɛ, amɛkɛ nuu Yudanyo ko ni atsɛɔ lɛ Bar-Yesu ni eji ŋkunyaayelɔ kɛ amale gbalɔ hu lɛ kpe.
7 No mli lɛ, eyɛ prokɔnsɔl* Sergio Paulo ni ji nuu nilelɔ lɛ ŋɔɔ. Nuu nɛɛ tsɛ Barnaba kɛ Saul kɛba eŋɔɔ, no mli lɛ eetao waa akɛ enu Nyɔŋmɔ wiemɔ lɛ.
8 Shi Elima* ŋkunyaayelɔ lɛ (egbɛ́i Elima lɛ shishi ji ŋkunyaayelɔ) bɔi shitee kɛ amɛ woo, no mli lɛ eetao ehã prokɔnsɔl lɛ atsi ehe kɛje hemɔkɛyeli lɛ he.
9 Kɛkɛ ni mumɔ krɔŋkrɔŋ yi Saul ni atsɛɔ lɛ Paulo hu lɛ obɔ, ni ekwɛ lɛ gãa
10 ni ekɛɛ: “Bo nuu ni shishiumɔi srɔtoi kɛ efɔŋfeemɔi srɔtoi fɛɛ eyi bo obɔ, bo Abonsam bi,+ bo ni oji jalɛ nii fɛɛ henyɛlɔ, ani okpaaa Yehowa* gbɛi ni ja lɛ kɔdɔmɔ?
11 Naa! Yehowa* nine kã onɔ, ni obaashwila, onaŋ hulu la kɛyashi be ko.” Amrɔ lɛ, afua kpɔŋŋ kɛ duŋ kpii baha enɔ, ni ebɔle shi eetao mɔ ko amɔ enine mli kɛtsɔɔ lɛ gbɛ.
12 Kɛkɛ ni prokɔnsɔl lɛ, be ni ena nɔ ni eba lɛ, ehe eye, ejaakɛ Yehowa* tsɔɔmɔ lɛ hã ehe jɔ̃ ehe.
13 Agbɛnɛ, Paulo kɛ hii ni fata ehe lɛ kɛ lɛlɛ fã kɛjɛ Pafo ni amɛyashɛ Perga yɛ Pamfilia. Shi Yohane+ shi amɛ ni eku esɛɛ etee Yerusalem.+
14 Shi amɛ lɛ, amɛtsa nɔ kɛjɛ Perga ni amɛba Antiokia yɛ Pisidia. Ni amɛbote kpeehe+ lɛ yɛ Hejɔɔmɔ Gbi lɛ nɔ, ni amɛyatara shi.
15 Be ni akane Mla+ lɛ kɛ Gbalɔi lɛ yɛ mɛi lɛ ahiɛ lɛ, onukpai ni kwɛɔ kpeehe lɛ nɔ lɛ tsu ni abakɛɛ amɛ akɛ: “Ataamɛi, nyɛmimɛi, kɛ́ nyɛyɛ hewalɛwoo wiemɔ ko kɛhã mɛi lɛ, nyɛwiea.”
16 No hewɔ lɛ, Paulo te shi edamɔ shi ni ekɛ enine fee okadi, ni ekɛɛ:
“Ataamɛi, Israelbii kɛ nyɛ mɛi ni nyɛsheɔ Nyɔŋmɔ gbeyei, nyɛboa toi.
17 Nɛkɛ Israelbii nɛɛ a-Nyɔŋmɔ lɛ hala wɔtsɛmɛi lɛ, ni ewó amɛnɔ be ni amɛyato gbɔ yɛ Ejipt shikpɔŋ lɛ nɔ lɛ, ni ekɛ nine ni awó nɔ jie amɛ kɛje jɛmɛ.+
18 Ni eto etsui shi ehã amɛ aaafee afii 40 yɛ ŋa lɛ nɔ.+
19 Be ni ekpãtã jeŋmaji kpawo ahiɛ yɛ Kanaan shikpɔŋ lɛ nɔ sɛɛ lɛ, eja amɛshikpɔŋ lɛ ehã amɛ akɛ gboshinii.+
20 Enɛ fɛɛ ba yɛ aaafee afii 450 mli.
“Enɛ sɛɛ lɛ, ehã amɛ kojolɔi kɛbashi gbalɔ Samuel nɔ.+
21 Shi no sɛɛ lɛ, amɛbi koni ahã amɛ maŋtsɛ,+ ni Nyɔŋmɔ kɛ Kish bi Saul, nuu ko ni jɛ Benyamin weku lɛ mli lɛ hã amɛ+ afii 40.
22 Be ni ehã ekpa maŋtsɛ lɛ yeli lɛ, ewó David nɔ ehã amɛ akɛ maŋtsɛ,+ mɔ ni eye ehe odase ekɛɛ: ‘Mina David, Yishai binuu lɛ,+ ni ji mitsuinaa nuu lɛ;+ ebaafee misuɔmɔnaa nii fɛɛ’ lɛ.
23 Bɔ ni Nyɔŋmɔ wo shi lɛ, ekɛ yiwalaherelɔ, Yesu, ni jɛ nuu nɛɛ seshi* lɛ mli lɛ ba Israel.+
24 Dani mɔ nɛ baaba lɛ, Yohane tsɔ hiɛ eshiɛ baptisimɔ ni feɔ tsuitsakemɔ ni hãa akɛ eshai keɔ lɛ he okadi lɛ yɛ faŋŋ etsɔɔ Israelbii lɛ fɛɛ.+
25 Shi be ni Yohane miihe agbe esɔɔmɔ lɛ naa lɛ, efɔɔ kɛɛmɔ akɛ: ‘Namɔ nyɛsusuɔ akɛ miji? Jeee miji lɛ. Shi naa! Mɔ ko miiba yɛ misɛɛ, misaaa mɔ ni fɛneɔ etokotai yɛ enaji.’+
26 “Ataamɛi, nyɛmimɛi, nyɛ Abraham seshibii kɛ mɛi krokomɛi ni yɔɔ nyɛteŋ ni sheɔ Nyɔŋmɔ gbeyei, wɔ atsu akɛ yiwalaheremɔ nɛɛ he wiemɔ lɛ bahã.+
27 Ejaakɛ mɛi ni yɔɔ Yerusalem lɛ kɛ amɛnɔyelɔi lɛ yɔseee mɔ nɛɛ, shi be ni amɛsɔmɔɔ akɛ kojolɔi lɛ, amɛhã nibii ni Gbalɔi lɛ wie ni akaneɔ atsɔɔ maŋbii lɛ yɛ Hejɔɔmɔ Gbi fɛɛ Hejɔɔmɔ Gbi nɔ lɛ ba mli.+
28 Eyɛ mli akɛ amɛnaaa nɔ ko ni hãa efeɔ mɔ ni sa gbele yɛ ehe moŋ,+ shi kɛ̃lɛ amɛbi Pilato koni ehã agbe lɛ.+
29 Ni be ni amɛhã nibii fɛɛ ni aŋma yɛ ehe lɛ eba mli lɛ, amɛjie lɛ kɛje tso jaŋŋ* lɛ nɔ ni amɛkɛ lɛ yaŋmɛ gbonyobu* mli.+
30 Shi Nyɔŋmɔ tee lɛ shi kɛjɛ gbohii ateŋ,+
31 ni ejie ehe kpo gbii pii etsɔɔ mɛi ni fata ehe kɛjɛ Galilea kɛkwɔ kɛtee Yerusalem lɛ. Amrɔ nɛɛ mɛnɛɛmɛi ji mɛi ni yeɔ ehe odase amɛtsɔɔ maŋbii lɛ.+
32 “No hewɔ lɛ, wɔmiijaje shi ni awo wɔtsɛmɛi lɛ he sane kpakpa lɛ wɔmiitsɔɔ nyɛ.
33 Nyɔŋmɔ ehã eshiwoo lɛ eba mli kɛmɔ shi ehã wɔ mɛi ni wɔji amɛbii lɛ, kɛtsɔ shi ni etee Yesu lɛ nɔ;+ tamɔ bɔ ni aŋma yɛ lala ni ji enyɔ lɛ mli akɛ: ‘Mibi ji bo; ŋmɛnɛ lɛ, mitsɔ otsɛ’ lɛ.+
34 Ni anɔkwa sane ni ji akɛ Nyɔŋmɔ tee lɛ shi kɛjɛ gbohii ateŋ ni ekuŋ esɛɛ kɛyaŋ fitemɔ mli dɔŋŋ lɛ, Nyɔŋmɔ wie he yɛ nɛkɛ gbɛ nɔ akɛ: ‘Majɛ suɔmɔ ni tsakeee mli maŋɔ jɔɔmɔi ni miwo David he shi, ni ma shi shiŋŋ* lɛ mahã nyɛ.’+
35 No hewɔ lɛ, ewie yɛ lala kroko hu mli akɛ: ‘Ohãŋ onɔkwafo lɛ ana fitemɔ.’+
36 Yɛ David gbɛfaŋ lɛ, esɔmɔ Nyɔŋmɔ* yɛ lɛ diɛŋtsɛ eyinɔ, egbo,* ni afu lɛ afata etsɛmɛi lɛ ahe, ni ena fitemɔ.+
37 Shi mɔ ni Nyɔŋmɔ tee lɛ shi lɛ enaaa fitemɔ.+
38 “No hewɔ lɛ, nyɛmimɛi, nyɛnáa nyɛlea akɛ, aatsɔ mɔ nɛ nɔ aajaje aatsɔɔ nyɛ akɛ abaanyɛ akɛ nyɛhe eshai ake nyɛ,+
39 ni akɛ, nibii fɛɛ ni anyɛɛɛ atsɔ Mose Mla lɛ nɔ abu nyɛ bem yɛ he lɛ,+ kɛtsɔ mɔ nɛ nɔ lɛ, abuɔ mɔ fɛɛ mɔ ni heɔ yeɔ lɛ bem.+
40 No hewɔ lɛ, nyɛkwɛa jogbaŋŋ koni nɔ ni awie yɛ Gbalɔi lɛ amli lɛ akaba nyɛnɔ akɛ:
41 ‘Nyɛ hefɛoyelɔi, nyɛkwɛa ni nyɛnaa akpɛa nyɛhe, ni nyɛhiɛ akpãtãa, ejaakɛ miitsu nitsumɔ ko yɛ nyɛgbii lɛ amli, nitsumɔ ko ni kɛ́ mɔ ko gba nyɛ fitsofitso po lɛ, nyɛheŋ nyɛyeŋ kɔkɔɔkɔ.’”+
42 Agbɛnɛ, be ni amɛmiije kpo lɛ, mɛi lɛ kpa amɛ fai akɛ amɛkɛ amɛ abawie saji nɛɛ ahe yɛ Hejɔɔmɔ Gbi ni nyiɛ sɛɛ lɛ nɔ.
43 No hewɔ lɛ, be ni akpa kpeehe lɛ kpee lɛ, Yudafoi lɛ ateŋ mɛi babaoo kɛ mɛi ni etsɔmɔ Yudafoi ni jáa Nyɔŋmɔ lɛ nyiɛ Paulo kɛ Barnaba sɛɛ, ni amɛwie amɛtsɔɔ mɛi nɛɛ ni amɛwo amɛ hewalɛ koni amɛya nɔ amɛhi Nyɔŋmɔ dromɔ lɛ mli.+
44 Hejɔɔmɔ Gbi ni nyiɛ sɛɛ lɛ nɔ lɛ, mɛi ni miihe ashɛ maŋ muu lɛ fɛɛ babua amɛhe naa koni amɛbo Yehowa* wiemɔ lɛ toi.
45 Be ni Yudafoi lɛ na mɛi babaoo lɛ, awuŋayeli yi amɛmli obɔ ni amɛbɔi wiemɔi ni kɛ nibii ni Paulo wieɔ lɛ kpãaa gbee wiemɔ kɛtsɔɔ akɛ amɛbuuu Nyɔŋmɔ.+
46 Kɛkɛ ni Paulo kɛ Barnaba kɛ ekãa kɛɛ amɛ akɛ: “Ehe miihia ni awie Nyɔŋmɔ wiemɔ lɛ atsɔɔ nyɛ klɛŋklɛŋ.+ Shi akɛni nyɛmiikpoo wiemɔ lɛ, ni nyɛbuuu nyɛhe akɛ mɛi ni sa naanɔ wala hewɔ lɛ, naa! wɔmiidɔ wɔyi kɛmiiya jeŋmaji lɛ aŋɔɔ.+
47 Ejaakɛ Yehowa* fã wɔ kɛ wiemɔi nɛɛ akɛ: ‘Miwó bo akɛ jeŋmaji lɛ ala, koni otsɔ yiwalaheremɔ kɛyashi shikpɔŋ lɛ naagbeehei lɛ.’”+
48 Be ni jeŋmajiaŋbii lɛ nu enɛ lɛ, amɛbɔi nyamɔ ni amɛwo Yehowa* wiemɔ lɛ hiɛ nyam, ni mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ he amɛye.
49 Agbɛnɛ hu, agbɛ Yehowa* wiemɔ lɛ ashwã nakai kpokpaa lɛ nɔ fɛɛ.
50 Shi Yudafoi lɛ wo yei ni abuɔ amɛ ni sheɔ Nyɔŋmɔ gbeyei lɛ kɛ maŋ lɛŋ hii hiɛnaanɔbii lɛ ayiŋ, ni amɛhã ate shi awo+ Paulo kɛ Barnaba ni ashwie amɛ kɛtee amɛhusui lɛ asɛɛ.
51 No hewɔ lɛ, amɛkpokpo amɛnaji ahe mulu amɛshwie* amɛnɔ, ni amɛyiŋ kɛtee Ikonium.+
52 Ni kaselɔi lɛ tee nɔ amɛyimɔ obɔbɔ kɛ miishɛɛ+ kɛ mumɔ krɔŋkrɔŋ.
Shishigbɛ Niŋmaa
^ Loo “Be ni amɛsɔmɔɔ Yehowa yɛ mɛi krokomɛi ahilɛkɛhamɔ hewɔ.” Kwɛmɔ Saji Krokomɛi A5 lɛ.
^ Loo “yelikɛbualɔ.”
^ Ni ji, Roma amralo kɛhã kpokpaa ko. Kwɛmɔ Wiemɔi Titrii Amligbalamɔ lɛ.
^ Lɛ nɔŋŋ ji Bar-Yesu ni atsĩ etã yɛ kuku 6 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Greek sht. ŋm., “dumɔwu.”
^ Loo “gbonyo kaimɔ bu.”
^ Loo “tso.”
^ Loo “abaanyɛ akɛ he afɔ̃ nɔ.”
^ Loo “efee Nyɔŋmɔ suɔmɔnaa nii.”
^ Loo “eyawɔ.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kɛ́ mɔ ko kpokpo enaji ahe mulu eshwie lɛ, no tsɔɔ akɛ mɔ ko he sɔ̃ kãaa enɔ dɔŋŋ.
