Bɔfoi Lɛ Anitsumɔi 7:1-60
7 Shi osɔfonukpa lɛ kɛɛ: “Ani nibii nɛɛ yɛ mli nakai?”
2 Stefano here nɔ akɛ: “Ataamɛi, nyɛmimɛi kɛ tsɛmɛi, nyɛboa toi. Anunyam Nyɔŋmɔ lɛ jie ehe kpo etsɔɔ wɔtsɛ Abraham be ni eyɔɔ Mesopotamia lɛ dani efã kɛyahi Haran,+
3 ni ekɛɛ lɛ akɛ: ‘Jee oshikpɔŋ lɛ nɔ kɛ owekumɛi lɛ ateŋ ni oya shikpɔŋ ni matsɔɔ bo lɛ nɔ.’+
4 Kɛkɛ ni eje Kaldeabii ashikpɔŋ lɛ nɔ ni eyahi Haran. Ni be ni epapa gbo sɛɛ lɛ,+ Nyɔŋmɔ hã efã kɛje jɛmɛ kɛbahi shikpɔŋ nɛɛ ni nyɛyɔɔ nɔ amrɔ nɛɛ nɔ.+
5 Shi ehãaa lɛ gboshinii ko yɛ nɔ, dabi, ehãaa lɛ nɔ ni da bɔ ni ekɛ enane baama nɔ po; shi ewo lɛ shi akɛ ekɛbaahã lɛ koni etsɔ enɔ, ni yɛ esɛɛ lɛ, ekɛbaahã eseshibii* lɛ,+ eyɛ mli akɛ no mli lɛ ebɛ bi ko.
6 Agbɛnɛ hu, Nyɔŋmɔ kɛɛ lɛ akɛ eseshibii* lɛ baayato gbɔ yɛ shikpɔŋ ko ni jeee amɛnɔ nɔ, ni mɛi lɛ baaye amɛ nyɔŋ ni amɛbaawa amɛ yi* afii 400.+
7 Nyɔŋmɔ kɛɛ akɛ, ‘Ni makojo nakai jeŋmaŋ ni baaye amɛ nyɔŋ lɛ,+ ni nibii nɛɛ asɛɛ lɛ, amɛbaaje jɛmɛ koni amɛkɛ sɔɔmɔ krɔŋŋ abahã mi yɛ biɛ nɛɛ.’+
8 “Ekɛ ketiafoo he kpaŋmɔ ko hu hã lɛ,+ ni Abraham fɔ Isak+ ni efo lɛ ketia yɛ gbi ni ji kpaanyɔ lɛ nɔ,+ ni Isak fɔ Yakob,* ni Yakob fɔ weku yitsei* 12 lɛ.*
9 Ni weku yitsei lɛ ye Yosef he awuŋa+ ni amɛhɔ̃ɔ lɛ kɛtee Ejipt.+ Shi Nyɔŋmɔ kɛ lɛ yɛ,+
10 ni ejie lɛ kɛjɛ emanehului lɛ fɛɛ amli ni ehã ená dromɔ kɛ hiɛshikamɔ yɛ Ejipt maŋtsɛ Farao hiɛ. Ni Farao hala lɛ akɛ eye Ejipt kɛ eshĩa lɛ fɛɛ nɔ.+
11 Shi hɔmɔ ko ba Ejipt kɛ Kanaan fɛɛ, hɛɛ, amanehulu kpeteŋkpele ko, ni wɔtsɛmɛi lɛ náaa nɔ ko amɛye.+
12 Shi Yakob nu akɛ niyenii yɛ Ejipt, ni etsu wɔtsɛmɛi lɛ jɛmɛ nɔ ni ji klɛŋklɛŋ nɔ.+
13 Nɔ ni ji shii enyɔ nɔ lɛ, Yosef jie ehe shi etsɔɔ enyɛmimɛi hii lɛ, ni Farao baná ele Yosef weku lɛ.+
14 No hewɔ lɛ, Yosef kɛ shɛɛ maje, ni ayaŋɔ epapa Yakob kɛ ewekumɛi lɛ fɛɛ kɛjɛ jɛmɛ kɛba,+ amɛyibɔ ji mɛi* 75.+
15 No hewɔ lɛ, Yakob kpeleke shi kɛtee Ejipt+ ni egbo yɛ jɛmɛ,+ ni nakai nɔŋŋ wɔtsɛmɛi lɛ hu gboi.+
16 Akɛ amɛ tee Shekem, ni akɛ amɛ yafɔ̃ gbonyobu ni Abraham hé kɛ jwiɛtɛi shika kɛjɛ Hamor bihii lɛ adɛŋ yɛ Shekem lɛ mli.+
17 “Be ni shiwoo ni Nyɔŋmɔ jaje etsɔɔ Abraham lɛ mlibaa be lɛ miihe ashɛ lɛ, maŋ lɛ bada ni amɛyi bafa babaoo yɛ Ejipt,
18 kɛyashi be ni maŋtsɛ kroko baye Ejipt nɔ, ni eleee Yosef.+
19 Mɔ nɛ kɛ wɔmaŋbii lɛ ye yɛ ŋaa mli, ni efee tsɛmɛi lɛ efɔŋ, akɛ enyɛ amɛnɔ koni amɛkpoo amɛbifabii lɛ koni amɛkahi wala mli.+
20 Nakai be lɛ mli nɔŋŋ afɔ Mose, ni ehe yɛ fɛo naakpa yɛ Nyɔŋmɔ hiɛ. Ni akwɛ lɛ nyɔji etɛ yɛ epapa shĩa.+
21 Shi be ni ashi lɛ afɔ̃ shi lɛ,*+ Farao biyoo lɛ wó lɛ ni ekwɛ lɛ tamɔ lɛ diɛŋtsɛ ebi.+
22 No hewɔ lɛ, atsɔɔ Mose Ejiptbii lɛ anilee* lɛ fɛɛ. Anɔkwa, ená hewalɛ yɛ ewiemɔi kɛ enifeemɔi amli.+
23 “Agbɛnɛ be ni eye afii 40 lɛ, eba etsui mli* akɛ ebaayasara* enyɛmimɛi Israelbii lɛ.+
24 Be ni ehiŋmɛi gba nɔ akɛ aafee amɛteŋ mɔ kome efɔŋ lɛ, efã mɔ lɛ he ni egbe Ejiptnyo lɛ kɛtɔ mɔ ni afeɔ lɛ efɔŋ lɛ he owele.
25 Esusu akɛ enyɛmimɛi lɛ baakɔ sɛɛ akɛ Nyɔŋmɔ miitsɔ enine nɔ eehere amɛyiwala, shi amɛkɔɔɔ sɛɛ.
26 Enɔ jetsɛremɔ lɛ, ebanina amɛ ni amɛmiinɔ, ni ebɔ mɔdɛŋ akɛ ebaakpãtã amɛ koni toiŋjɔlɛ ahi amɛteŋ, ni ekɛɛ akɛ: ‘Ataamɛi, nyɛmimɛi ji nyɛ. Mɛni hewɔ nyɛfeɔ nyɛhe efɔŋ nɛɛ?’
27 Shi mɔ ni feɔ enaanyo lɛ efɔŋ lɛ tsirɛ lɛ ni ekɛɛ, ‘Namɔ wó bo wɔnɔyelɔ kɛ wɔkojolɔ?
28 Ani ootao ogbe mi tamɔ bɔ ni nyɛ lɛ ogbe Ejiptnyo lɛ?’
29 Be ni Mose nu enɛ lɛ, ejo foi ni eyato gbɔ yɛ Midian shikpɔŋ lɛ nɔ, ni efɔ bihii enyɔ yɛ jɛmɛ.+
30 “Afii 40 sɛɛ lɛ, ŋwɛibɔfo ko jie ehe kpo etsɔɔ lɛ yɛ Sinai Gɔŋ lɛ he ŋa lɛ nɔ yɛ ŋmei tso ko ni miitso lɛ mli.+
31 Be ni Mose na enɛ lɛ, enaa kpɛ ehe yɛ nɔ ni ena lɛ hewɔ. Shi be ni ebɛŋkɛɔ koni ekwɛ nɔ ni ji lɛ, enu Yehowa* gbee miikɛɛ:
32 ‘Miji otsɛmɛi lɛ a-Nyɔŋmɔ lɛ, Abraham kɛ Isak kɛ Yakob Nyɔŋmɔ lɛ.’+ Ni Mose he bɔi kpokpomɔ ni ekaaa akɛ ebaaya nɔ ekwɛ.
33 Yehowa* kɛɛ lɛ akɛ: ‘Jiemɔ otokotai lɛ yɛ onane, ejaakɛ he ni odamɔ lɛ, shikpɔŋ krɔŋkrɔŋ ni.
34 Anɔkwa, mina bɔ ni awaa mimaŋ ni yɔɔ Ejipt lɛ yi lɛ, ni minu amɛkɛ̃ɛmɔ lɛ,+ ni mikpeleke shi miba koni mibajie amɛ. Agbɛnɛ ba, matsu bo Ejipt.’
35 Nɛkɛ Mose nɛɛ ni amɛkwa lɛ amɛkɛɛ: ‘Namɔ wó bo nɔyelɔ kɛ kojolɔ?’+ lɛ, lɛ nɔŋŋ Nyɔŋmɔ tsɔ ŋwɛibɔfo ni jie ehe kpo etsɔɔ lɛ yɛ ŋmei tso lɛ mli lɛ nɔ etsu lɛ+ akɛ nɔyelɔ kɛ kpɔ̃lɔ fɛɛ lɛ.
36 Nuu nɛɛ nyiɛ amɛhiɛ kɛshi Ejipt,+ ni efee naakpɛɛ nii kɛ okadii yɛ Ejipt+ kɛ Ŋshɔ Tsuru lɛ mli+ kɛ ŋa lɛ nɔ afii 40.+
37 “Nɛkɛ Mose nɛɛ ji mɔ ni kɛɛ Israelbii lɛ akɛ: ‘Nyɔŋmɔ baawó gbalɔ ko ni tamɔ mi kɛbaajɛ nyɛnyɛmimɛi lɛ ateŋ ahã nyɛ’ lɛ.+
38 Mose ji mɔ ni kɛ asafo lɛ bahi ŋa lɛ nɔ, ni ekɛ ŋwɛibɔfo+ ni kɛ lɛ wie+ yɛ Sinai Gɔŋ lɛ nɔ lɛ kɛ wɔtsɛmɛi lɛ hi jɛmɛ lɛ, ni enine shɛ wiemɔi krɔŋkrɔŋi ni hiɛ kamɔ lɛ anɔ koni ekɛhã wɔ.+
39 Wɔtsɛmɛi lɛ booo lɛ toi, ni amɛtsi lɛ amɛto afã,+ ni yɛ amɛtsuii amli lɛ amɛku amɛsɛɛ kɛtee Ejipt,+
40 ni amɛkɛɛ Aaron akɛ: ‘Feemɔ nyɔŋmɔi ohã wɔ koni amɛnyiɛ wɔhiɛ. Ejaakɛ nɛkɛ Mose nɛɛ ni nyiɛ wɔhiɛ kɛshi Ejipt shikpɔŋ lɛ nɔ lɛ, wɔleee nɔ ni eba enɔ.’+
41 No hewɔ lɛ, amɛfee tsinabi amaga yɛ nakai gbii lɛ amli, ni amɛshã afɔle amɛhã amaga lɛ, ni amɛbɔi amɛhewɔ miishɛɛnamɔ yɛ amɛninenaa nitsumɔi lɛ ahewɔ.+
42 No hewɔ lɛ, Nyɔŋmɔ tsɔ ehe kɛje amɛmasɛi ni eŋmɛɛ amɛhe koni amɛkɛ sɔɔmɔ krɔŋŋ ahã ŋwɛi asraafoi lɛ,+ tamɔ bɔ ni aŋma yɛ Gbalɔi lɛ awolo lɛ mli lɛ akɛ: ‘Israel shĩa, jeee mi nyɛkɛ afɔlei kɛ nikeenii bahã afii 40 yɛ ŋa lɛ nɔ lɛ, aloo mi ni?
43 Shi moŋ Molok+ buu lɛ kɛ nyɔŋmɔ Refan ŋulami lɛ nyɛwó nyɛtere; amɛji amagai ni nyɛfee koni nyɛjá amɛ lɛ. No hewɔ lɛ, mashwie nyɛ kɛya Babilon sɛɛ tɔ̃ɔ.’+
44 “Wɔtsɛmɛi lɛ ná odase buu lɛ yɛ amɛteŋ yɛ ŋa lɛ nɔ, tamɔ bɔ ni mɔ ni kɛ Mose wie lɛ fã lɛ akɛ eyafee buu lɛ, tamɔ nɔ ni ena lɛ henɔ pɛpɛɛpɛ lɛ.+
45 Ni wɔtsɛmɛi lɛ anine shɛ buu lɛ nɔ ni amɛkɛba be ni amɛkɛ Yoshua ba jeŋmaji ashikpɔŋ lɛ nɔ lɛ,+ mɛi ni Nyɔŋmɔ shwie amɛ yɛ wɔtsɛmɛi lɛ ahiɛ lɛ.+ Biɛ buu lɛ hi kɛyashi David gbii lɛ amli.
46 Lɛ ená Nyɔŋmɔ hiɛ dromɔ, ni ebi koni ahã lɛ hegbɛ ni efee shihilɛhe ehã Yakob Nyɔŋmɔ lɛ.+
47 Shi Solomon moŋ ma shĩa ehã lɛ.+
48 Shi Mɔ Ni Nɔ Kwɔ Fe Fɛɛ lɛ ehiii shĩai ni akɛ niji fee amli,+ tamɔ bɔ ni gbalɔ lɛ wie lɛ, akɛ:
49 ‘Ŋwɛi lɛ, mimaŋtsɛ sɛi ni,+ ni shikpɔŋ lɛ, minajiashi sɛi ni.+ Mɛɛ tsũ nyɛbaama nyɛhã mi? Yehowa* kɛɛ. Aloo nɛgbɛ mihejɔɔmɔhe lɛ yɔɔ?
50 Minine mikɛfee nibii nɛɛ fɛɛ, aloo jeee nakai?’+
51 “Hii kuɛŋtilɔi ni afolɔko amɛtsuii kɛ amɛtoii ketia, daa nɛɛ, nyɛtsĩɔ mumɔ krɔŋkrɔŋ lɛ naa; bɔ ni nyɛtsɛmɛi lɛ fee lɛ, nakai nɔŋŋ nyɛ hu nyɛfeɔ.+
52 Gbalɔi lɛ ateŋ namɔ ni nyɛtsɛmɛi lɛ waaa lɛ yi?+ Hɛɛ, amɛgbe mɛi ni tsɔ hiɛ amɛjaje jalɔ lɛ baa lɛ,+ mɔ ni amrɔ nɛɛ nyɛtsɔmɔ mɛi ni jie lɛ amɛhã kɛ mɛi ni gbe lɛ lɛ,+
53 nyɛ ni nyɛnine shɛ Mla lɛ nɔ tamɔ bɔ ni atsɔ ŋwɛibɔfoi lɛ anɔ akɛhã lɛ,+ shi nyɛyeee nɔ lɛ.”
54 Anɔkwa, be ni amɛnu nibii nɛɛ, amɛmli fu waa yɛ amɛtsuiiaŋ* ni amɛkpe amɛnyanyɔjiashi amɛwo lɛ.
55 Shi lɛ lɛ, akɛni mumɔ krɔŋkrɔŋ eyi lɛ obɔ hewɔ lɛ, ekwɛ ŋwɛi gãa ni ehiŋmɛi gba Nyɔŋmɔ anunyam lɛ kɛ Yesu hu nɔ ni edamɔ Nyɔŋmɔ ninejurɔ nɔ,+
56 ni ekɛɛ: “Naa! miina ni agbele ŋwɛi naa ni gbɔmɔ Bi+ lɛ damɔ Nyɔŋmɔ ninejurɔ nɔ.”+
57 Kɛkɛ ni amɛbolɔ kɛ gbee ni wa ni amɛkɛ amɛniji tsĩmɔ amɛtoii ni amɛ fɛɛ amɛké kɛtee enɔ.
58 Be ni amɛtsirɛ eyisɛɛ kɛje maŋ lɛ mli lɛ, amɛbɔi lɛ tɛi tswiamɔ.+ Odasefoi+ lɛ kɛ amɛtadei anɔhaanɔi lɛ shwie oblanyo ko ni atsɛɔ lɛ Saul+ lɛ naji anaa.
59 Be ni amɛtswiaa Stefano tɛi lɛ, ekpa fai akɛ: “Nuŋtsɔ Yesu, ŋɔɔ mimumɔ.”
60 Kɛkɛ ni ekula shi, ni ekɛ gbee ni wa bo ekɛɛ: “Yehowa,* okɛ nɛkɛ esha nɛɛ akafɔ̃ amɛnɔ.”+ Ni be ni ewie enɛ sɛɛ lɛ, egbo.*
Shishigbɛ Niŋmaa
^ Loo “eseshi.” Greek sht. ŋm., “edumɔwu.”
^ Loo “eseshi.” Greek sht. ŋm., “edumɔwu.”
^ Loo “amɛbaafee amɛ niseniianii.”
^ Shishitsɔɔmɔi komɛi kɛɔ akɛ, “Yakob fee nakai nɔŋŋ yɛ weku yitsei 12 lɛ agbɛfaŋ.”
^ Loo “blematsɛmɛi.”
^ Shishitsɔɔmɔi komɛi kɛɔ akɛ, “Isak fee nakai nɔŋŋ yɛ Yakob gbɛfaŋ.”
^ Loo “susumai.”
^ Loo “be ni amɛkɛ lɛ je kpo lɛ.”
^ Loo “ahiɛshikamɔ.”
^ Loo “ekpɛ yiŋ.”
^ Loo “ebaayakwɛ.”
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “efolɔ amɛtsuiiaŋ.”
^ Kwɛmɔ Saji Krokomɛi A5 lɛ.
^ Loo “ewɔ.”
