Kpojiemɔ Ko Ni Akɛhã Yohane 21:1-27
21 Ni mina ŋwɛi hee kɛ shikpɔŋ hee;+ ejaakɛ tsutsu ŋwɛi lɛ kɛ tsutsu shikpɔŋ lɛ eho etee,+ ni ŋshɔ+ lɛ bɛ dɔŋŋ.
2 Agbɛnɛ hu, mina maŋ krɔŋkrɔŋ lɛ, Yerusalem Hee lɛ, jɛ Nyɔŋmɔ ŋɔɔ yɛ ŋwɛi miikpeleke shi,+ ni asaa lɛ tamɔ ayemforo ni awula lɛ ahã ewu.+
3 Kɛkɛ ni minu gbee ko ni wa jɛ maŋtsɛ sɛi lɛ mli kɛɛ: “Naa! Nyɔŋmɔ mama tsũ lɛ yɛ gbɔmɛi ateŋ, ni ekɛ amɛ baahi shi, ni amɛbaatsɔmɔ emaŋ. Ni Nyɔŋmɔ diɛŋtsɛ kɛ amɛ baahi shi.+
4 Ni ebaatsumɔ amɛhiŋmɛiiaŋ yaafonui fɛɛ,+ ni gbele bɛ dɔŋŋ,+ ni awerɛhoyeli loo yaafo loo piŋmɔ ko hu bɛ dɔŋŋ.+ Tsutsu nibii lɛ eho etee.”
5 Ni mɔ ni ta maŋtsɛ sɛi lɛ nɔ+ lɛ kɛɛ: “Naa! Miifee nibii fɛɛ ehee.”+ Esaa ekɛɛ: “Ŋmaa, ejaakɛ wiemɔi nɛɛ, anɔkwa wiemɔi ni,* ni amɛyɛ mli.”
6 Ni ekɛɛ mi akɛ: “Agbe naa! Miji Alfa lɛ kɛ Omega lɛ,* shishijee lɛ kɛ naagbee lɛ.+ Mɔ fɛɛ mɔ ni kumai yeɔ lɛ lɛ, mahã lɛ wala nuhiŋmɛi lɛ mli nu lɛ eko ni miheee lɛ nɔ ko.+
7 Mɔ fɛɛ mɔ ni yeɔ kunim lɛ, enine baashɛ nibii nɛɛ anɔ,* ni matsɔ e-Nyɔŋmɔ, ni lɛ hu ebaatsɔ mibi.
8 Shi gbeyeilɔi lɛ kɛ mɛi ni bɛ hemɔkɛyeli+ kɛ mɛi ni he tseee ni feɔ taŋ nii kɛ gbɔmɔgbelɔi+ kɛ ajwamaŋbɔlɔi*+ lɛ kɛ mɛi ni kɛ mumɔi shãraa kɛ amagajalɔi kɛ amalelɔi fɛɛ lɛ,+ amɛbaaná amɛgbɛfaŋnɔ yɛ kpaakpo lɛ ni tsoɔ kɛ la kɛ sɔlfa lɛ mli.+ Enɛ damɔ shi kɛhã gbele ni ji enyɔ lɛ.”+
9 Ŋwɛibɔfoi kpawo ni hiɛ tsɛnsii kpawo ni eyimɔ obɔbɔ kɛ naagbee haomɔi kpawo lɛ ateŋ mɔ kome+ ba ni ebakɛɛ mi akɛ: “Ba, ni matsɔɔ bo ayemforo lɛ, Gwantɛŋbi lɛ ŋa lɛ.”+
10 No hewɔ lɛ, ekɛ mi tee gɔŋ kpeteŋkpele ni kwɔ ko nɔ yɛ mumɔ lɛ hewalɛ lɛ mli, ni etsɔɔ mi maŋ krɔŋkrɔŋ ni ji Yerusalem lɛ ni jɛ Nyɔŋmɔ ŋɔɔ yɛ ŋwɛi eekpeleke shi,+
11 ni eyɛ Nyɔŋmɔ anunyam lɛ.+ Ekpɛlɛɔ tamɔ tɛ ni jara wa fe fɛɛ, etamɔ yaspi tɛ ni mli tse tamɔ kristalo.+
12 Eyɛ gbogbo kpeteŋkpele ni kwɔ kɛ agbói 12, ni ŋwɛibɔfoi 12 damɔ agbói lɛ anaa, ni akpɛ́ Israelbii lɛ awekui 12 lɛ agbɛ́ii lɛ awo agbói lɛ ahe.
13 Agbói etɛ yɛ bokãgbɛ, ni agbói etɛ yɛ kooyigbɛ, ni agbói etɛ yɛ wuoyigbɛ, ni agbói etɛ yɛ anaigbɛ.+
14 Maŋ lɛ gbogbo lɛ yɛ faneshi tɛi 12 hu, ni Gwantɛŋbi lɛ bɔfoi 12 lɛ agbɛ́ii 12+ lɛ yɛ amɛnɔ.
15 Agbɛnɛ, mɔ ni kɛ mi wieɔ lɛ hiɛ shika tsuru gãlã* akɛ susumɔnɔ, bɔ ni afee ni ekɛsusu maŋ lɛ kɛ egbói lɛ kɛ egbogbo lɛ.+
16 Ni maŋ lɛ kã shi koji ejwɛ, ni ekɛlɛ tamɔ elɛɛmɔ nɔŋŋ. Ni ekɛ gãlã lɛ susu maŋ lɛ, ni efee stadioi 12,000;* ni ekɛlɛ kɛ elɛɛmɔ kɛ ekwɔlɛ yeɔ egbɔ.
17 Esusu maŋ lɛ gbogbo lɛ hu, ni efee ninetalɔi 144,* yɛ gbɔmɔ susumɔnɔ naa, ni yɛ nakai be lɛ mli nɔŋŋ lɛ, eji ŋwɛibɔfo susumɔnɔ.
18 Agbɛnɛ, nɔ ni akɛtswa gbogbo lɛ ji yaspi,+ ni maŋ lɛ, shika tsuru krɔŋŋ ni tamɔ glase ni mli tse ni.
19 Awula maŋ lɛ gbogbo lɛ faneshii lɛ kɛ tɛi ni jara wa srɔtoi fɛɛ: klɛŋklɛŋ faneshi lɛ yaspi, nɔ ni ji enyɔ lɛ safiro, nɔ ni ji etɛ lɛ kalkedon, nɔ ni ji ejwɛ lɛ emerald,
20 nɔ ni ji enumɔ lɛ sardoniki, nɔ ni ji ekpaa lɛ sardio, nɔ ni ji kpawo lɛ krisolito, nɔ ni ji kpaanyɔ lɛ berilo, nɔ ni ji nɛɛhu lɛ topasion, nɔ ni ji nyɔŋma lɛ krisopraso, nɔ ni ji nyɔŋma kɛ ekome lɛ hiakinto, nɔ ni ji nyɔŋma kɛ enyɔ lɛ amɛtisto.*
21 Agbɛnɛ hu, agbói 12 lɛ, adiagbai* 12 ni; agbói lɛ eko fɛɛ eko lɛ adiagba kome akɛfee. Ni maŋ lɛ gbɛjegbɛ wulu lɛ, shika tsuru krɔŋŋ ni, ni etamɔ glase ni anaa mli.
22 Minaaa sɔlemɔ shĩa yɛ maŋ lɛ mli, ejaakɛ Yehowa* Nyɔŋmɔ, Ofe+ lɛ, kɛ agbɛnɛ hu, Gwantɛŋbi lɛ ji esɔlemɔ shĩa.
23 Ni hulu loo nyɔɔŋtsere kpɛmɔ he ehiaaa maŋ lɛ, ejaakɛ Nyɔŋmɔ anunyam lɛ kpɛɔ yɛ mli,+ ni Gwantɛŋbi lɛ ji ekane.+
24 Ni jeŋmaji lɛ baanyiɛ yɛ ela lɛ mli,+ ni shikpɔŋ lɛ nɔ maŋtsɛmɛi lɛ baaŋɔ amɛnunyam lɛ kɛba mli.
25 Egbói lɛ, aŋamɔŋ kwraa yɛ jetsɛremɔ mli, ejaakɛ je enaŋ yɛ jɛmɛ.+
26 Ni amɛkɛ jeŋmaji lɛ anunyam lɛ kɛ woo lɛ baaba mli.+
27 Shi nɔ fɛɛ nɔ ni abule kɛ mɔ fɛɛ mɔ ni feɔ nihiinii ni elakaa mɛi lɛ boteŋ mli kɔkɔɔkɔ;+ ja mɛi ni aŋmala amɛgbɛ́ii yɛ Gwantɛŋbi lɛ wala wolokpo* lɛ mli lɛ pɛ baabote mli.+
Shishigbɛ Niŋmaa
^ Loo “dɔlɛ nii.“
^ Loo “abaanyɛ amu afɔ̃ wiemɔi nɛɛ anɔ.”
^ Loo “A lɛ kɛ Z lɛ.” Alfa ji nɔ ni jeɔ Greek niŋmaa okadii lɛ ashishi, ni Omega ji nɔ ni gbeɔ naa.
^ Greek sht. ŋm., “ebaaná nibii nɛɛ akɛ gboshinii.”
^ Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
^ Kwɛmɔ Wiemɔi Titrii Amligbalamɔ lɛ.
^ Aaafee kilomitai 2,220 (mailii 1,379). Stadio kome feɔ mitai 185 (nanetalɔi 606.95). Kwɛmɔ Saji Krokomɛi B14 lɛ.
^ Aaafee mitai 64 (nanetalɔi 210). Kwɛmɔ Saji Krokomɛi B14 lɛ.
^ Enɛɛmɛi fɛɛ ji tɛi ni jara wala, ni esoro eko fɛɛ eko kɔla, ni tɛi lɛ ekomɛi po hiɛ kɔlai srɔtoi.
^ Blɔfo mli lɛ, pearl.
^ Kwɛmɔ Saji Krokomɛi A5 lɛ.
