Ezekiel 22:1-31
22 Ni Yehowa kɛɛ mi ekoŋŋ akɛ:
2 “Bo gbɔmɔ bi,* ani ofee klalo akɛ obaakojo lashishwiemɔ maŋ lɛ,*+ ni ohã ena enyaŋemɔ nibii lɛ fɛɛ?+
3 Kɛɛmɔ akɛ, ‘Nɔ ni Nuŋtsɔ Ofe Yehowa kɛɛ nɛ: “Bo maŋ ni shwieɔ lá shi+ yɛ bo diɛŋtsɛ omli, ni obe eshɛ etã,+ ni ofeɔ amagai ni yɔɔ nyaŋemɔ* kɛbuleɔ ohe,+
4 lá shi ni oshwieɔ lɛ ehã otere sɔ̃,+ ni omaga ni yɔɔ nyaŋemɔ lɛ ehã ohe ewo muji.+ Owo ogbii lɛ anaagbee lɛ foi, ni ofii lɛ anaagbee lɛ eshɛ. No hewɔ ni mahã otsɔ hiɛgbejianii ohã jeŋmaji lɛ kɛ nii ni ayeɔ he fɛo ohã shikpɔji lɛ fɛɛ lɛ.+
5 Bo mɔ ni awo ogbɛ́i lɛ he muji ni basabasafeemɔ eyi omli obɔ, shikpɔji ni bɛŋkɛ kɛ nɔ ni yɔɔ shɔŋŋ lɛ baaye ohe fɛo.+
6 Naa! Israel lumɛi ni yɔɔ omli lɛ ateŋ mɔ fɛɛ mɔ kɛ hegbɛ ni eyɔɔ lɛ shwieɔ lá shi.+
7 Amɛbuuu amɛpapa kɛ amɛmami amɛhãaa nɔ ko yɛ omli.+ Amɛshishiuɔ* gbɔ, ni amɛwaa gbekɛ ni bɛ tsɛ* kɛ yoo okulafo yi.”’”+
8 “‘Obuuu mihei krɔŋkrɔŋi lɛ, ni owoɔ mihejɔɔmɔ gbii lɛ ahe muji.+
9 Mɛi ni wieɔ mɛi ahe efɔŋ ni amɛto amɛyiŋ akɛ amɛbaashwie lá shi lɛ yɛ omli.+ Omli amɛyeɔ afɔlei yɛ gɔji lɛ anɔ yɛ, ni amɛkɛ amɛhe woɔ jeŋba sha mli yɛ omli.+
10 Amɛbuuu amɛtsɛ saa* yɛ omli,+ ni amɛkɛ yoo ni miifee yei anii ni he tseee náa bɔlɛ.+
11 Nuu kɛ enyɛmi gbɔmɔ ŋa feɔ nyaŋemɔ nii yɛ omli,+ nuu kroko hu kɛ lɛ diɛŋtsɛ ebinuu ŋa náa bɔlɛ yɛ jeŋba sha mli,+ ni nuu kroko hu kɛ enyɛmi yoo, lɛ diɛŋtsɛ epapa biyoo náa bɔlɛ.+
12 Amɛheɔ nyɔɔŋnii yɛ omli koni amɛshwie lá shi.+ Okɛ nii faa+ koni ohe he kpa loo oná he sɛɛ, ni oshɔ̃ɔ shika yɛ onyɛmi gbɔmɔ dɛŋ.+ Hɛɛ, ohiɛ ekpa minɔ kwraa,’ Nuŋtsɔ Ofe Yehowa kɛɛ.
13 “‘Naa! Mitswa midɛ̃ kɛwɔ oyi yɛ sɛɛnamɔ gbonyo ni obua naa kɛ lashishwiemɔ ni yɔɔ omli lɛ hewɔ.
14 Ani obaaya nɔ ofee ekãa* ni oya nɔ ohã onineshi awa yɛ gbii ni mate shi mawo bo lɛ anɔ?+ Mi, Yehowa, mi diɛŋtsɛ miwie, ni mafee hu.
15 Magbɛ bo mashwã jeŋmaji lɛ amli ni mashwie bo kɛya shikpɔji lɛ anɔ,+ ni mahã ohe muji lɛ atã.+
16 Ni abuŋ bo yɛ jeŋmaji lɛ ahiɛ, ni obaaná ole akɛ miji Yehowa.’”+
17 Ni Yehowa kɛɛ mi ekoŋŋ akɛ:
18 “Gbɔmɔ bi,* Israel shĩa lɛ etsɔ tamɔ dadefei ni he bɛ sɛɛnamɔ. Amɛ fɛɛ lɛ, akɔɔble kɛ sanyaa, kɛ dade, kɛ sumui ni yɔɔ dade seremɔ flɔnɔɔ mli ji amɛ. Amɛtsɔmɔ jwiɛtɛifei.+
19 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Akɛni nyɛ fɛɛ nyɛtsɔmɔ tamɔ dadefei ni he bɛ sɛɛnamɔ hewɔ lɛ,+ miibua nyɛnaa miiwo Yerusalem.
20 Bɔ ni abuaa jwiɛtɛi, kɛ akɔɔble, kɛ dade, kɛ sumui, kɛ sanyaa naa awoɔ dade seremɔ flɔnɔɔ mli koni ahuu la ashwie amɛnɔ ni amɛsere lɛ, nakai nɔŋŋ mabua nyɛnaa yɛ mimlifu kɛ mimlila lɛ mli, ni mahuu la mashwie nyɛnɔ ni masere nyɛ.+
21 Mabua nyɛnaa ni mahuu mimlifu lɛ la lɛ mashwie nyɛnɔ,+ ni nyɛbaasere yɛ emli.+
22 Bɔ ni asereɔ jwiɛtɛi yɛ dade seremɔ flɔnɔɔ mli lɛ, nakai nɔŋŋ abaasere nyɛ yɛ emli; ni nyɛbaaná nyɛle akɛ, mi, Yehowa, mi diɛŋtsɛ mifɔse mimlila lɛ mishwie nyɛnɔ.’”
23 Ni Yehowa kɛɛ mi ekoŋŋ akɛ:
24 “Gbɔmɔ bi,* kɛɛmɔ lɛ akɛ, ‘Oji shikpɔŋ ni ajieŋ enɔ muji loo ahãŋ nugbɔ anɛ yɛ nɔ yɛ mlifu gbi lɛ nɔ.
25 Egbalɔi lɛ etsɔ ŋaa yɛ emli,+ tamɔ jata ni hũɔ ni tserɛɔ kooloo mli.+ Amɛmiiye gbɔmɛi.* Amɛmiiloo jwetrii kɛ nibii ni jara wala. Amɛhã yei babaoo etsɔmɔ okulafoi yɛ emli.
26 Esɔfoi lɛ eku mimla lɛ mli,+ ni amɛmiiya nɔ amɛmiibule mihei krɔŋkrɔŋi lɛ.+ Amɛhãaa ana srɔto ni yɔɔ krɔŋkrɔŋ nii kɛ nii ni jeee krɔŋkrɔŋ lɛ teŋ,+ ni amɛhãaa ale nɔ ni he tseee kɛ nɔ ni he tse,+ ni amɛyeee mihejɔɔmɔ gbii lɛ, ni amɛwo mihe muji yɛ amɛteŋ.
27 Elumɛi ni yɔɔ emli lɛ tamɔ ŋa mli gbei ni tserɛɔ kooloo mli; amɛshwieɔ lá shi ni amɛgbeɔ mɛi* yɛ sɛɛnamɔ gbonyo hewɔ.+
28 Shi egbalɔi lɛ kɛ kaaloo esha amɛnifeemɔi lɛ ahe. Amɛnaa amale ninai ni amɛklaa amale klamɔ,+ ni amɛkɛɔ akɛ: “Nɔ ni Nuŋtsɔ Ofe Yehowa kɛɛ nɛ,” be ni Yehowa diɛŋtsɛ ekɛko nɔ ko.
29 Shikpɔŋ lɛ nɔ bii lɛ shishiuɔ* mɛi ni amɛjuɔ,+ amɛwaa mɔ ni efi lɛ kɛ ohiafo yi, amɛshishiuɔ* gbɔ ni amɛtsɔɔ esane hiɛ amɛbuɔ shi.’
30 “‘Kulɛ miitao nuu ko yɛ amɛteŋ ni baasaa tɛ gbogbo lɛ loo ebaadamɔ fɔlɔ lɛ naa yɛ mihiɛ ehã shikpɔŋ lɛ koni akakpãtã hiɛ,+ shi mináaa mɔ ko.
31 No hewɔ lɛ, mafɔse mimlila lɛ mashwie amɛnɔ ni mikɛ mimlifu lɛ la lɛ baakpãtã amɛhiɛ. Mikɛ nɔ ni baajɛ amɛgbɛi lɛ amli kɛba lɛ baaba amɛ diɛŋtsɛ amɛnɔ,’ Nuŋtsɔ Ofe Yehowa kɛɛ.”
Shishigbɛ Niŋmaa
^ Loo “ani ofee klalo akɛ obaabu lashishwiemɔ maŋ lɛ bem loo fɔ lo?” Hebri sht. ŋm., “ani obaakojo? ani obaakojo lashishwiemɔ maŋ lɛ?”
^ Hebri sht. ŋm., “binuu.”
^ Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
^ Loo “Amɛlakaa.”
^ Loo “awusã.”
^ Hebri sht. ŋm., “amɛhãa anaa amɛtsɛ he folo.”
^ Hebri sht. ŋm., “Ani otsui baafi shi?”
^ Hebri sht. ŋm., “binuu.”
^ Hebri sht. ŋm., “binuu.”
^ Loo “susumai.”
^ Loo “susumai.”
^ Loo “lakaa.”
^ Loo “amɛlakaa.”
