Akɛmaje Hebribii Lɛ 5:1-14
5 Osɔfonukpa fɛɛ osɔfonukpa ni ahala lɛ kɛjɛ gbɔmɛi ateŋ lɛ, awó lɛ osɔfonukpa yɛ amɛhewɔ yɛ nibii ni kɔɔ Nyɔŋmɔ he lɛ agbɛfaŋ,+ koni ekɛ nikeenii kɛ afɔlei ahã yɛ eshai ahewɔ.+
2 Enyɛɔ ekɛ mɛi ni leee nɔ ko ni amɛtɔ̃ɔ* lɛ yeɔ yɛ musuŋtsɔlɛ naa,* ejaakɛ lɛ hu eyɛ gbɔjɔmɔi,
3 ni no hewɔ lɛ, esa akɛ ekɛ afɔlei ahã yɛ lɛ diɛŋtsɛ ehe eshai lɛ ahewɔ, tamɔ bɔ ni efeɔ yɛ mɛi lɛ anɔ lɛ he lɛ nɔŋŋ.+
4 Gbɔmɔ ko eŋɔɔɔ woo nɛɛ ehãaa lɛ diɛŋtsɛ ehe, ja Nyɔŋmɔ etsɛ lɛ, tamɔ bɔ ni etsɛ Aaron lɛ, dani enine shɛɔ nɔ.+
5 Nakai nɔŋŋ Kristo lɛ hu, jeee lɛ diɛŋtsɛ ewó ehe osɔfonukpa ni ekɛwo lɛ diɛŋtsɛ ehiɛ nyam,+ shi moŋ mɔ ni kɛɛ lɛ akɛ: “Mibi ji bo; ŋmɛnɛ lɛ, mitsɔ otsɛ” lɛ ji mɔ ni wo ehiɛ nyam.+
6 Tamɔ bɔ ni ekɛɛ yɛ he kroko hu akɛ, “Osɔfo ji bo kɛmiiya naanɔ tamɔ Melkizedek nɔ lɛ.”+
7 Be ni Kristo yɔɔ shikpɔŋ lɛ nɔ lɛ,* ekɛ bolɔmɔi ni naa wa kɛ yaafonui sɔle kɛkpa fai kɛ hiɛdɔɔ+ ni ebi mɔ ni baanyɛ ahere eyiwala kɛje gbele mli lɛ nii shii abɔ, ni abo lɛ toi ejaakɛ esheɔ Nyɔŋmɔ gbeyei.
8 Eyɛ mli akɛ bi ji lɛ moŋ, shi ekase bɔ ni aboɔ Nyɔŋmɔ toi kɛjɛ amanehului ni ena lɛ amli.+
9 Ni be ni ahã eye emuu sɛɛ lɛ,+ ebatsɔ mɔ ni mɛi fɛɛ ni boɔ lɛ toi lɛ tsɔɔ enɔ amɛnáa naanɔ yiwalaheremɔ,+
10 ejaakɛ Nyɔŋmɔ wó lɛ osɔfonukpa tamɔ Melkizedek nɔ lɛ.+
11 Wɔyɛ nibii babaoo ni wɔbaakɛɛ yɛ ehe, ni amɛmlitsɔɔmɔ hu wa, ejaakɛ nyɛnuuu nii ashishi oya.*
12 Ejaakɛ nyɛ ni kulɛ benɛ nɛɛ* esa akɛ nyɛtsɔmɔ tsɔɔlɔi lɛ, ehe ehia akɛ mɔ ko aje shishi atsɔɔ nyɛ Nyɔŋmɔ wiemɔi krɔŋkrɔŋi lɛ amli shishijee nibii lɛ ekoŋŋ,+ ni nyɛsaa nyɛtsɔmɔ mɛi ni mliki he ehia amɛ, shi jeee niyenii ni tsii.
13 Ejaakɛ mɔ fɛɛ mɔ ni yaa nɔ ekɛ mliki pɛ feɔ eniyenii lɛ, eleee jalɛ wiemɔ lɛ, ejaakɛ gbekɛ bibioo ji lɛ.+
14 Shi mɛi ni edara lɛ anɔ ji niyenii ni tsii, amɛji mɛi ni kɛ amɛjwɛŋmɔ tsuɔ nii, ni amɛtsɔse amɛjwɛŋmɔ lɛ koni ele ekpakpa kɛ efɔŋ mlikpamɔ.
Shishigbɛ Niŋmaa
^ Loo “amɛduɔ gbɛ.”
^ Loo “yɛ mlijɔlɛ naa; ehiɛɔ amɛ blɛoo.”
^ Greek sht. ŋm., “Yɛ Kristo heloo gbii lɛ amli lɛ.”
^ Loo “nyɛyɛ shɔ̃ɔ yɛ nyɛninumɔ mli.”
^ Greek sht. ŋm., “yɛ be lɛ naa lɛ.”
