Yeremia 22:1-30
22 Nɔ ni Yehowa kɛɛ nɛ: “Kpelekemɔ shi kɛya Yuda maŋtsɛ lɛ shĩa lɛ, ni oyawie sane nɛɛ yɛ jɛmɛ.
2 Kɛɛmɔ akɛ, ‘Bo Yuda maŋtsɛ ni ota David maŋtsɛ sɛi lɛ nɔ, bo kɛ otsuji kɛ omaŋbii, mɛi ni tsɔɔ agbói nɛɛ amli lɛ, nyɛboa Yehowa wiemɔ lɛ toi.
3 Nɔ ni Yehowa kɛɛ nɛ: “Nyɛyea jalɛ sane ni nyɛfea nɔ ni ja. Nyɛjiea mɔ ni atswaa lɛ ojo lɛ kɛjea ojotswalɔ lɛ dɛŋ. Nyɛkawaa gbɔ ko yi, ni nyɛkafea gbekɛ ko ni bɛ tsɛ* loo yoo okulafo ko efɔŋ.+ Ni nyɛkashwiea mɛi ni efeko nɔ ko lɛ alá shi yɛ biɛ.+
4 Ejaakɛ kɛ́ nyɛye miwiemɔ lɛ nɔ jogbaŋŋ lɛ, no lɛ, maŋtsɛmɛi ni taa David maŋtsɛ sɛi lɛ nɔ+ lɛ baatara shwiilii kɛ okpɔŋɔi anɔ kɛtsɔ shĩa nɛɛ agbói lɛ amli kɛbote shĩa lɛ mli, amɛ kɛ amɛtsuji lɛ, kɛ amɛmaŋbii lɛ.”’+
5 “‘Shi kɛ́ nyɛbooo wiemɔi nɛɛ atoi lɛ, mikɛ mi diɛŋtsɛ mihe miikã kitã akɛ shĩa nɛɛ baatsɔ amaŋfɔ,’ Yehowa kɛɛ.+
6 “Ejaakɛ nɔ ni Yehowa wie yɛ Yuda maŋtsɛ lɛ shĩa lɛ he nɛ,‘Otamɔ Gilead kɛhã mi,Tamɔ Lebanon yiteŋ.
Shi mahã otsɔ ŋa;Ahiŋ omaji lɛ ekome folo po mli.+
7 Ni matsɛ hiɛkpatalɔi* mawo bo,Mɔ fɛɛ mɔ kɛ etawuu nii.+
Amɛbaafolɔ otseneduru tsei fɛfɛji lɛ amɛshwie shiNi amɛbaashɛrɛ amɛ amɛwo la mli.+
8 “‘Ni jeŋmaji babaoo baatsɔ maŋ nɛɛ he kɛho ni amɛbaakɛɛkɛɛ amɛhe akɛ: “Mɛni hewɔ ni Yehowa fee maŋ kpele nɛɛ nɛkɛ?”+
9 Ni amɛbaahere nɔ akɛ: “Ejaakɛ amɛku Yehowa, amɛ-Nyɔŋmɔ lɛ, kpaŋmɔ lɛ mli, ni amɛyakoto nyɔŋmɔi krokomɛi ni amɛsɔmɔ amɛ.”’+
10 Nyɛkafóa mɔ ni egbo lɛ,Ni nyɛkayea lɛ ŋkɔmɔ hu.
Nyɛfóa waa nyɛhãa mɔ ni yaa lɛ moŋ,Ejaakɛ ekuŋ esɛɛ ebaŋ dɔŋŋ, ni enaŋ shikpɔŋ ni afɔ lɛ yɛ nɔ lɛ dɔŋŋ.
11 “Ejaakɛ nɔ ni Yehowa wie yɛ Shalum,*+ Yosia binuu lɛ, ni ji Yuda maŋtsɛ lɛ ni yeɔ nɔ yɛ etsɛ Yosia+ najiaŋ, ni eje biɛ nɛɛ lɛ he nɛ: ‘Ekuŋ esɛɛ kɛbaŋ jɛmɛ dɔŋŋ.
12 Ejaakɛ ebaagbo yɛ he ni aŋɔ lɛ nom kɛtee lɛ, ni enaŋ shikpɔŋ nɛɛ dɔŋŋ.’+
13 Kpoo hã mɔ ni kɛ jalɛ nifeemɔ emaaa eshĩaNi ekɛ jalɛsaneyeli efeee eŋwɛi asai lɛ,Mɔ ni hãa enyɛmi gbɔmɔ sɔmɔɔ lɛ efolo,Ni ewooo lɛ nyɔmɔ ko lɛ;+
14 Mɔ ni kɛɔ akɛ, ‘Mama shĩa wulu mahã miheKɛ emli ŋwɛi asai wujiwuji.
Mafee samfɛji mawo heNi makala tseneduru tsei kɛha mli, ni mikɛ pɛnte tsuru* baapɛnte mli.’
15 Ani tseneduru tsei ni okɛtsuɔ nii fe mɛi krokomɛi hewɔ ni obaaya nɔ oye maŋtsɛ lɛ?
Otsɛ hu ye ni enu,Shi eye jalɛ sane ni efee jalɛ nii,+Ni ehi hã lɛ.
16 Eye mɔ ni naa nɔ kɛ ohiafo sane ehã lɛ,No hewɔ lɛ, nibii tee nɔ jogbaŋŋ ehã lɛ.
‘Ani jeee enɛ ji nɔ ni tsɔɔ akɛ mɔ ko le mi?’ Yehowa kɛɛ.
17 ‘Shi bo lɛ, ohiŋmɛii kɛ otsui kãaa nɔ ko nɔ ko he fe osɛɛnamɔ gbonyo lɛ,Kɛ mɛi ni efeko nɔ ko alá shi ni oshwieɔ lɛKɛ shishiumɔ ni oshishiuɔ* mɛi kɛ ojo ni otswaa mɛi* lɛ pɛ he.’
18 “No hewɔ lɛ, nɔ ni Yehowa wieɔ yɛ Yehoiakim,+ Yosia binuu lɛ, ni ji Yuda maŋtsɛ lɛ he nɛ,‘Amɛfóŋ lɛ akɛ:
“Ao minyɛmi nuu, kpoo oo! Ao minyɛmi yoo, kpoo oo!”
Ni amɛfóŋ lɛ hu akɛ:
“Ao nuŋtsɔ, kpoo oo! Ao anunyamtsɛ, kpoo oo!”
19 Abaafu lɛ tamɔ afuɔ teji,+Abaagbala lɛ kɛya ni ayashɛ lɛ afɔ̃Yerusalem agbói lɛ asɛɛ.’+
20 Kwɔɔ kɛya Lebanon ni oyabolɔ,Wó ogbee nɔ yɛ Bashan,Ni ojɛ Abarim+ obo,Ejaakɛ akumɔ mɛi ni sumɔɔ bo waa lɛ fɛɛ.+
21 Mikɛ bo wie be ni osusuɔ akɛ oshãra ko baŋ onɔ lɛ.
Shi okɛɛ, ‘Mibooo toi.’+
Osubaŋ kwraa nɛ kɛjɛ ogbekɛbiiashi,Ejaakɛ obooo migbee toi.+
22 Kɔɔyɔɔ baakpala otookwɛlɔi lɛ fɛɛ,+Ni abaaŋɔ mɛi ni sumɔɔ bo waa lɛ nom kɛya.
Kɛkɛ lɛ, ohiɛ baagbo ni ohiɛ baashwie shi yɛ omanehului lɛ fɛɛ ahewɔ.
23 Bo mɔ ni ohiɔ Lebanon,+Ni ofee tsũ yɛ tseneduru tsei lɛ ateŋ,+Obaakɛ̃mɔ waa kɛji kɔ̃ɔmɔ ta ohe,Ohe baajara bo* tamɔ yoo ni miifɔ!”+
24 “‘Gbii abɔ ni mihiɛ kã nɛɛ,’ Yehowa kɛɛ, ‘kɛ́ bo Konia,*+ Yehoiakim+ binuu lɛ, ni ji Yuda maŋtsɛ lɛ ji niianaasɔomɔ ga yɛ mininejurɔ nɔ po lɛ, magbala bo kɛbaaje jɛmɛ!
25 Mikɛ bo baawo mɛi ni taoɔ ashɔ̃ owala yɛ odɛŋ* lɛ adɛŋ, mikɛ bo baawo mɛi ni osheɔ amɛ gbeyei lɛ adɛŋ, mikɛ bo baawo Babilon maŋtsɛ Nebukadnezar* dɛŋ, mikɛ bo baawo Kaldeabii lɛ adɛŋ.+
26 Ni mashɛ bo kɛ onyɛ ni fɔ bo lɛ mafɔ̃ shikpɔŋ kroko ni jeee jɛmɛ afɔ bo yɛ lɛ nɔ, ni jɛmɛ obaagbo yɛ.
27 Ni amɛkuŋ amɛsɛɛ dɔŋŋ kɛyaŋ shikpɔŋ ni amɛhiɛ tseɔ* lɛ nɔ.+
28 Ani nɛkɛ nuu Konia nɛɛ ji nɔ ko ni abuuu, gbɛ́ ko ni ejwa kɛkɛ,Gbɛ́ ni mɔ ko mɔ ko sumɔɔɔ?
Mɛni hewɔ ashɛ lɛ kɛ eseshibii lɛ afɔ̃Ni afɔ̃ amɛ afɔ̃ shikpɔŋ ko ni amɛleee lɛ nɔ lɛ?’+
29 Ao, shikpɔŋ, shikpɔŋ, shikpɔŋ, bo Yehowa wiemɔ lɛ toi.
30 Nɔ ni Yehowa kɛɛ nɛ:
‘Nyɛŋmaa yɛ nuu nɛɛ gbɛ́i naa akɛ ebɛ bi,Nuu ni ehiŋ ehãŋ lɛ yɛ ewala beiaŋ,*Ejaakɛ eseshibii lɛ ateŋ mɔ ko mɔ ko yeŋ esɛɛKoni eta David maŋtsɛ sɛi lɛ nɔ ni eye Yuda nɔ ekoŋŋ.’”+
Shishigbɛ Niŋmaa
^ Loo “awusã ko.”
^ Hebri sht. ŋm., “mafee hiɛkpatalɔi krɔŋkrɔŋ.”
^ Atsɛɔ lɛ Yehoahaz hu.
^ Loo “mikɛ vɛmilion.”
^ Loo “lakamɔ ni olakaa.”
^ Loo “mɛi anii ni oshɔ̃ɔ.”
^ Hebri sht. ŋm., “Obaakɔ̃mɔ.”
^ Atsɛɔ lɛ hu akɛ Yehoiakin kɛ Yekonia.
^ Loo “mɛi ni taoɔ osusuma.”
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Loo “shikpɔŋ ni hãa amɛholeɔ amɛsusuma nɔ.”
^ Hebri sht. ŋm., “yɛ egbii lɛ amli.”
