Yesaia 22:1-25
22 Sane ni awie yɛ Ninaa Jɔɔ* lɛ he lɛ nɛ:+
Mɛni feɔ bo hewɔ ni okɛ omɛi lɛ fɛɛ ekwɔ kɛtee tsũi ayiteŋ nɛɛ?
2 Basabasafeemɔ eyi omli obɔ,Maŋ ni feɔ hoo, maŋ ni mli efili lɛ.
Jeee klante akɛgbe omɛi ni egboi lɛ,Ni jeee ta mli hu agbe amɛ yɛ.+
3 Onɔyelɔi ni yitseiaŋ wala lɛ fɛɛ ejo foi.+
Amɔmɔ amɛ be ni ahiɛɛɛ gãi po.
Amɔmɔ mɛi fɛɛ ni ana lɛ,+Eyɛ mli akɛ amɛjo foi kɛtee shɔŋŋ.
4 No hewɔ ni mikɛɛ akɛ: “Nyɛjiea nyɛhiŋmɛii kɛjea minɔ,Ni mafó waa lɛ.+
Nyɛkagbaa nyɛhe naa nyɛshɛjea mimiiYɛ mimaŋ lɛ biyoo lɛ hiɛkpatamɔ lɛ* hewɔ.+
5 Ejaakɛ eji yiŋfutumɔ kɛ butumɔ kɛ tsuifãa gbi,+Yɛ Ninaa Jɔɔ lɛ mli,Ni ejɛ Nuŋtsɔ Ofe, Yehowa, taiatsɛ lɛ ŋɔɔ.
Abaakumɔ gbogbo lɛ+Ni abaafó kɛya gɔŋ lɛ nɔ.
6 Elam+ ewó egãimlibii kotoku lɛKɛ shwiilii kɛ amɛhe okpɔŋɔi ni mɛi tara mli lɛ,*Ni Kir+ ejie tsɛŋ lɛ kɛje nɔ ni akɛha he lɛ mli.*
7 Ojɔi kpakpai lɛ amliBaayimɔ kɛ ta shwiilii,Ni okpɔŋɔi* lɛ baabadamɔ agbó lɛ naa,
8 Ni abaajie gbogbo ni buɔ Yuda he* lɛ.
“Nakai gbi lɛ nɔ lɛ, okɛ ohiɛ baafɔ̃ tawuu nii ni yɔɔ Koo Shĩa lɛ mli lɛ nɔ,+
9 ni nyɛbaana fɔji babaoo yɛ David Maŋ lɛ gbogboi lɛ amli.+ Ni nyɛbaabua jɔɔŋgbɛ kpaakpo lɛ mli nui lɛ anaa nyɛto.*+
10 Nyɛbaakane Yerusalem tsũi lɛ, ni nyɛbaakumɔ tsũi lɛ koni nyɛkɛwaje gbogbo lɛ.
11 Ni nyɛbaafee he ko yɛ gbogboi enyɔ lɛ ateŋ ni nyɛkɛbua kpaakpo momo lɛ mli nu lɛ naa nyɛto, shi nyɛkɛ nyɛhiɛ efɔ̃ŋ e-Feelɔ Kpele lɛ nɔ, ni nyɛnaŋ mɔ ni fee enɛ kɛjɛ blema tɔ̃ɔ lɛ.
12 Nakai gbi lɛ nɔ lɛ, Nuŋtsɔ Ofe, Yehowa, taiatsɛ lɛ,Baabi ni nyɛfó ni nyɛwo yara,+Ni nyɛku nyɛyitsɔi ni nyɛbumɔ kpekpei.*
13 Shi nyɛbaanya ni nyɛmli baafili nyɛ moŋ,Nyɛbaagbe tsinai, ni nyɛbaagbe gwantɛŋi,Nyɛbaaye loo, ni nyɛbaanu wain.+
Nyɛbaakɛɛ akɛ, ‘Nyɛhãa wɔyea ni wɔnua, ejaakɛ wɔ́ lɛ wɔbaagboi.’”+
14 Kɛkɛ ni Yehowa, taiatsɛ lɛ, jie enɛ kpo yɛ mitoiiaŋ akɛ: “‘Akpãtãŋ nyɛtɔmɔ nɛɛ kɛyashi nyɛ fɛɛ nyɛbaagboi,’+ mi, Nuŋtsɔ Ofe, Yehowa, taiatsɛ lɛ, mikɛɛ.”
15 Nɔ ni Nuŋtsɔ Ofe, Yehowa, taiatsɛ lɛ, kɛɛ nɛ: “Yaa ni oyanina shĩa nɔkwɛlɔ nɛɛ, Shebna,+ mɔ ni kwɛɔ shĩa* lɛ nɔ lɛ, ni okɛɛ lɛ akɛ,
16 ‘Mɛni oyɔɔ yɛ biɛ, ni onamɔ yɔɔ biɛ hewɔ ni okpɛ́ gbonyobu ohã ohe yɛ biɛ lɛ?’ Eekpɛ́ egbonyobu yɛ he grɔŋŋ ko; eekpɛ́ tɛsaa ko mli koni ekɛfee ehejɔɔmɔhe.*
17 ‘Ao gbɔmɔ, Yehowa baawó bo kɛtswa shi waa, ni ebaamɔ omli kpɛŋŋ.
18 Ebaakota bo ni ebaafɔ̃ bo tamɔ bɔɔlu kɛya shikpɔŋ agbo ko nɔ. Jɛmɛ obaayagbo yɛ, ni jɛmɛ onunyam shwiilii lɛ baahi, hiɛshishwiemɔ kɛhã onuŋtsɔ shĩa lɛ.
19 Ni mashwie bo kɛje ogbɛhe lɛ, ni mahe onitsumɔ lɛ yɛ odɛŋ.
20 “‘Nakai gbi lɛ nɔ lɛ, matsɛ mitsulɔ Eliakim,+ Hilkia binuu lɛ,
21 ni mikɛ otade kakadaŋŋ lɛ baawo lɛ, ni mikɛ nɔ ni okɛfiɔ omli lɛ baafi emli kpɛŋŋ,+ ni mikɛ ohewalɛ* lɛ baahã lɛ. Ni lɛ ebaatsɔ tsɛ ehã mɛi ni yɔɔ Yerusalem lɛ kɛ Yuda shĩa lɛ.
22 Ni mikɛ David shĩa lɛ samfee+ lɛ baafɔ̃ ekɔɔŋ nɔ. Ebaagbele ni mɔ ko ŋaŋ; ni ebaaŋa ni mɔ ko gbeleŋ.
23 Maka lɛ tamɔ tso kɛ enaa piɔpiɔ mawo he ko ni wa, ni ebaatsɔ anunyam maŋtsɛ sɛi ehã etsɛ shĩa lɛ.
24 Ni amɛkɛ etsɛ shĩa lɛ anunyam* lɛ fɛɛ baatsotsoro enɔ, seshibii lɛ kɛ shwiei lɛ, kɛ tsɛnsii bibii lɛ fɛɛ, kɛ tsɛnsii agboi lɛ, kɛ kɔɔpoi agboi lɛ fɛɛ.
25 “‘Nakai gbi lɛ nɔ lɛ,’ Yehowa, taiatsɛ lɛ kɛɛ, ‘abaafã tso kɛ enaa piɔpiɔ ni aka awo he ko ni wa lɛ,+ ni abaafo ni ebaagbee shi, ni nɔ ni tsotsoro nɔ lɛ baagbee shi ni ehiɛ baakpãtã, ejaakɛ Yehowa diɛŋtsɛ ewie.’”
Shishigbɛ Niŋmaa
^ Eeenyɛ efee akɛ ekɔɔ Yerusalem he.
^ Lalawiemɔ ni akɛmiitsɔɔ mɔbɔnalɛ loo musuŋtsɔlɛ.
^ Loo “Kɛ shwiilii kɛ okpɔŋɔnɔtaralɔi.”
^ Loo “esaa tsɛŋ lɛ eto.”
^ Loo “okpɔŋɔnɔtaralɔi.”
^ Loo “pateeshɛŋ ni haa Yuda hiɛ.”
^ Loo “Ni nyɛbaabua nui anaa nyɛwo jɔɔŋgbɛ kpaakpo lɛ mli.”
^ Kpekpe ni atsɔɔ yɛ biɛ lɛ ji mama ko ni bei pii lɛ akɛ kooloo hetsɔi feɔ. Abuɔ be mli ni aaye awerɛho.
^ Loo “maŋtsɛ shĩa.”
^ Hebri sht. ŋm., “eshihilɛhe.”
^ Loo “onɔyeli.”
^ Hebri sht. ŋm., “tsiimɔ.”
