Yesaia 24:1-23
24 Naa! Yehowa miijie mɔ fɛɛ mɔ kɛmiije shikpɔŋ lɛ nɔ koni etsɔ amaŋfɔ.+
Etsɔ shikpɔŋ lɛ hiɛ ebu shi*+ ni egbɛ mɛi ni yɔɔ nɔ lɛ eshwã.+
2 Nɔ kome lɛ nɔŋŋ baaba mɔ fɛɛ mɔ nɔ:
Bɔ ni abaafee maŋbii lɛ, nakai nɔŋŋ abaafee osɔfo lɛ,Bɔ ni abaafee tsulɔ lɛ, nakai nɔŋŋ abaafee enuŋtsɔ,Bɔ ni abaafee tsulɔ lɛ, nakai nɔŋŋ abaafee enuŋtsɔ yoo,Bɔ ni abaafee mɔ ni héɔ nii lɛ, nakai nɔŋŋ abaafee mɔ ni hɔ̃ɔ nii lɛ,Bɔ ni abaafee mɔ ni kɛ nii faa lɛ, nakai nɔŋŋ abaafee mɔ ni faa nii lɛ,Bɔ ni abaafee mɔ ni ahiɛ lɛ nyɔmɔ lɛ, nakai nɔŋŋ abaafee mɔ ni hiɛ nyɔmɔ lɛ.+
3 Abaajie nɔ fɛɛ nɔ yɛ shikpɔŋ lɛ nɔ;Abaaloo nɔ fɛɛ nɔ kɛje nɔ,+Ejaakɛ Yehowa ji mɔ ni ewie nɛkɛ wiemɔ nɛɛ.
4 Shikpɔŋ lɛ miiye awerɛho;*+ eefite.
Shikpɔŋ ni baa nii lɛ nɔ miigbi; ehiɛ miikpãtã.
Shikpɔŋ lɛ nɔ gbɔmɛi wuji lɛ miitã.
5 Mɛi ni yɔɔ shikpɔŋ lɛ nɔ lɛ efite shikpɔŋ lɛ,+Ejaakɛ amɛyeee mlai lɛ anɔ,+Amɛtsake taomɔ nii lɛ,+Ni amɛku kpaŋmɔ ni baahe be kplaŋŋ* lɛ mli.+
6 No hewɔ ni loomɔ kpãtãa shikpɔŋ lɛ hiɛ,+Ni abu mɛi ni yɔɔ nɔ lɛ fɔ lɛ.
No hewɔ ni mɛi ni yɔɔ shikpɔŋ lɛ nɔ lɛ etã,Ni eshwɛ mɛi fioo pɛ lɛ.+
7 Wain hee lɛ miiye awerɛho,* wain tso lɛ egbi,+Ni mɛi ni mli filiɔ amɛ lɛ fɛɛ miiye ŋkɔmɔ.+
8 Akashaa gbɛɛmɔ ni hãa anyaa lɛ sɛɛ efo;Mɛi ni feɔ hoo lɛ abolɔmɔ lɛ eba naagbee;Saŋku gbɛɛmɔ ni hãa anáa miishɛɛ lɛ sɛɛ efo.+
9 Amɛnuɔ wain ni lala fataaa he,Ni dãa joɔ yɛ mɛi ni nuɔ lɛ adaaŋ.
10 Akumɔ maŋ ni mɛi ejo foi kɛshi mli lɛ ashwie shi;+Aŋa shĩa fɛɛ shĩa naa koni mɔ ko akanyɛ ebote mli.
11 Amɛbolɔɔ kɛtaoɔ wain yɛ gbɛjegbɛi lɛ anɔ.
Nyamɔ lalai fɛɛ sɛɛ efo;Shikpɔŋ lɛ nɔ nyamɔ lɛ etee.+
12 Maŋ lɛ etsɔ koikoi;Akumɔ agbó lɛ dukuduku.+
13 Ejaakɛ bɔ ni ebaaba yɛ shikpɔŋ lɛ nɔ yɛ majimaji lɛ ateŋ nɛ:
Ebaafee tamɔ oliv tso ni akpala enɔ yibii atã,+Tamɔ kpɛkpɛo ni ayeɔ be ni akpa wain yibii atã lɛ.+
14 Amɛbaahole amɛgbei anɔ,Amɛbaalá nyamɔ lala.
Amɛbaajɛ ŋshɔ lɛ he* amɛjaje Yehowa agbojee lɛ.+
15 No hewɔ ni amɛbaawo Yehowa hiɛ nyam yɛ la kpokpaa lɛ nɔ lɛ;*+Amɛbaawo Yehowa, Israel Nyɔŋmɔ lɛ gbɛ́i lɛ hiɛ nyam yɛ ŋshɔkpɔi lɛ anɔ.+
16 Wɔmiinu lalai kɛmiijɛ shikpɔŋ lɛ naagbeehei lɛ akɛ:
“Jalɔ lɛ hiɛ aba nyam!”*+
Shi mi lɛ, miikɛɛ akɛ: “Miitã loo, miitã loo!
Kpoo hã mi! Mɛi ni yeee anɔkwa lɛ miiye sane ni ejaaa;Mɛi ni yeee anɔkwa lɛ tsɔɔ gbɛ fɔŋ nɔ amɛyeɔ sane ni ejaaa.”+
17 Bo mɔ ni oyɔɔ shikpɔŋ lɛ nɔ, gbeyei, kɛ bui, kɛ tsɔnei miimɛ bo.+
18 Mɔ fɛɛ mɔ ni joɔ foi yɛ gbɛɛmɔ ni woɔ mɔ he gbeyei naa lɛ, ebaagbee bu lɛ mli,Ni mɔ fɛɛ mɔ ni baaje kpo kɛjɛ bu lɛ mli kɛba lɛ, tsɔne lɛ baadu lɛ.+
Ejaakɛ abaagbele nui babaoo ni yɔɔ ŋwɛi lɛ anaa,Ni shikpɔŋ lɛ faneshii lɛ baahoso.
19 Shikpɔŋ lɛ mli egbala;Ahoso shikpɔŋ lɛ;Shikpɔŋ lɛ miikpokpo waa.+
20 Shikpɔŋ lɛ miididãa tamɔ mɔ ko ni etɔ dãa,Ni eehoso kɛmiiya kɛmiiba tamɔ agba ni kɔɔyɔɔ miihoso lɛ.
Etɔmɔ lɛ tsii yɛ enɔ waa,+Ni ebaagbee shi ni eteŋ shi dɔŋŋ.
21 Nakai gbi lɛ nɔ lɛ, Yehowa kɛ ejwɛŋmɔ baaya asraafoi ni yɔɔ ŋwɛi lɛ anɔKɛ shikpɔŋ lɛ nɔ maŋtsɛmɛi lɛ anɔ yɛ shikpɔŋ lɛ nɔ.
22 Ni amɛbaabua amɛhe naaTamɔ gboklɛfoi ni abua amɛnaa awo bu mli,Ni abaawo amɛ tsuŋ yɛ gboklɛfoi abu mli;Ni gbii babaoo sɛɛ lɛ, abaagbala jwɛŋmɔ kɛya amɛnɔ.
23 Nyɔɔŋtsere ni eye emuu lɛ hiɛ baagbo,Ni hulu ni miitso lɛ hiɛ baashwie shi,+Ejaakɛ Yehowa, taiatsɛ lɛ, etsɔ Maŋtsɛ+ yɛ Zion Gɔŋ+ lɛ nɔ kɛ Yerusalem,Ehiɛ eba nyam yɛ emaŋ onukpai lɛ ahiɛ.*+
Shishigbɛ Niŋmaa
^ Loo “Ekũa shikpɔŋ lɛ hiɛ.”
^ Shishitsɔɔmɔi komɛi kɛɔ akɛ, “miigbi.”
^ Loo “blema kpaŋmɔ.”
^ Shishitsɔɔmɔi komɛi kɛɔ akɛ, “miigbi.”
^ Loo “Amɛbaajɛ anaigbɛ.”
^ Loo “yɛ bokã lɛ.”
^ Loo “Jalɔ lɛ he afee fɛo!”
^ Hebri sht. ŋm., “yɛ enukpai lɛ ahiɛ.”
