Yesaia 3:1-26
3 Ejaakɛ naa! anɔkwa Nuŋtsɔ lɛ, Yehowa, taiatsɛ lɛ,Baajie yelikɛbuamɔ fɛɛ yelikɛbuamɔ, kɛ niyenii fɛɛ kɛje Yerusalem kɛ Yuda,Yelikɛbuamɔ ni ji blodo* kɛ nu jio,+
2 Nuu kãkãlɔ kɛ tawulɔ jio,Kojolɔ kɛ gbalɔ jio,+ klamɔfonyo kɛ onukpa jio,
3 Asraafoi 50+ anɔkwɛlɔ kɛ gbɔmɔ wulu kɛ ŋaawolɔ jio,Mɔ ni he esa yɛ majik mli kɛ mɔ ni he esa kɛ tsãamimɔ* jio.+
4 Mahã gbekɛbii hii aye amɛnɔ lumɛi,Ni mɛi ni nyɛɛɛ shi afi* baaye amɛnɔ.
5 Maŋbii lɛ baawawaa amɛhe yi,Mɔ fɛɛ mɔ baawa enyɛmi gbɔmɔ yi.+
Gbekɛ nuu baatutua onukpa,Ni mɔ ni abuuu lɛ lɛ baatse mɔ ni abuɔ lɛ lɛ hiɛ atua.+
6 Mɔ fɛɛ mɔ baamɔ enyɛmi nuu ni yɔɔ epapa shĩa lɛ ni ekɛɛ lɛ akɛ:
“Oyɛ mama nɔhaanɔ—baatsɔ wɔnɔyelɔ.
Baaye nɔ ni akumɔ ashwie shi nɛɛ nɔ.”
7 Shi nakai gbi lɛ, ekpɛlɛŋ ni ebaakɛɛ akɛ:
“Mitsɔŋ mɔ ni baato nyɛfaji lɛ anɔ;*Mishĩa lɛ, niyenii bɛ jɛmɛ ni atade hu bɛ jɛmɛ.
Nyɛkawóa mi nɔyelɔ yɛ maŋbii lɛ anɔ.”
8 Ejaakɛ Yerusalem nane etɔ̃tɔ,Ni Yuda egbee shi,Ejaakɛ amɛtsɔɔ amɛwiemɔ kɛ amɛnifeemɔ nɔ amɛteɔ shi amɛwoɔ Yehowa;Amɛtseɔ atua yɛ enunyam lɛ hiɛ.+
9 Amɛ diɛŋtsɛ amɛhiɛ yeɔ odase eshiɔ amɛ,Ni amɛwieɔ amɛhe eshai lɛ hu ahe yɛ faŋŋ tamɔ Sodom;+Amɛkɛteee.
Kpoo hã amɛ,* ejaakɛ amɛkɛ sane fɔŋ miiba amɛ diɛŋtsɛ amɛnɔ!
10 Nyɛkɛa jalɔi lɛ akɛ ebaahi ehã amɛ;Abaajwere amɛ yɛ nɔ ni amɛfeɔ lɛ hewɔ.*+
11 Kpoo hã efɔŋfeelɔ lɛ!
Sane fɔŋ baaba enɔ,Ejaakɛ nɔ ni ekɛ eniji feɔ lɛ, no nɔŋŋ abaafee lɛ!
12 Shi mimaŋ lɛ, mɛi ni nyɛɔ amɛnɔ kɛhã nitsumɔ lɛ ayi wa,Ni yei miiye amɛnɔ.
Mimaŋ, nyɛhiɛnyiɛlɔi lɛ miihã nyɛmiidu gbɛ,Ni amɛfutuɔ nyɛyiŋ yɛ gbɛi ni esa akɛ nyɛtsɔ nɔ lɛ ahe.+
13 Yehowa miite shi koni ewie eshi mɛi;Eete shi koni ekojo majimaji.
14 Yehowa baakojo emaŋ lɛ onukpai lɛ kɛ lumɛi lɛ.
“Nyɛkɛ la eshã wain ŋmɔ lɛ,Ni nibii ni nyɛshɔ̃ kɛjɛ ohiafoi lɛ adɛŋ lɛ yɛ nyɛshĩai lɛ amli.+
15 Mɛni hewɔ nyɛwaa mimaŋ lɛ yiNi nyɛkɛ ohiafoi ahiɛ shwishwiaa shi?”+ Nɛkɛ ji bɔ ni mi, Nuŋtsɔ Ofe, Yehowa, taiatsɛ lɛ kɛɛ.
16 Yehowa kɛɛ akɛ: “Akɛni Zion biyei lɛ wóɔ amɛhe nɔ,Ni amɛnyiɛɔ kɛ amɛkuɛi* ni amɛkpãkpãa mli,Ni amɛwoɔ amɛhiŋmɛii asɛɛ, ni amɛtumɔɔ kɛyaa kɛbaa,Ni amɛnaneshi gai lɛ miigbɛɛ hewɔ lɛ,
17 Yehowa hu baahã kpala ashwie Zion biyei lɛ ayiteŋ,Ni Yehowa baahã amɛhiɛnaa akpa.+
18 Nakai gbi lɛ nɔ lɛ, Yehowa baajie amɛhewulamɔ nii lɛ fɛɛ: amɛnaneshi gai lɛ,Kɛ amɛyitsofiinii lɛ, kɛ amɛjwinei ni afee lɛ tamɔ nyɔɔŋtsere ni kpaako ejeɔ lɛ,+
19 Kɛ amɛtoiiaŋnii* lɛ, kɛ amɛnineshi gai lɛ, kɛ amɛhiɛhaa nii lɛ,
20 Kɛ amɛyifii dukui lɛ, kɛ amɛnaneshi jwinei lɛ, kɛ amɛtsitsi mlifiinii lɛ,Kɛ amɛ-ojeŋma tɔi* lɛ, kɛ sɛbɛi ni amɛŋmɔɔ* lɛ,
21 Kɛ amɛwao gai lɛ, kɛ amɛgugɔŋ gai lɛ,
22 Kɛ amɛgbi jurɔ atadei lɛ, kɛ amɛtadei kakadaji lɛ, kɛ amɛmama nɔhaanɔi lɛ, kɛ amɛshika kotokui lɛ,
23 Kɛ ashwishwɛi+ ni amɛhiɛɔ lɛ, kɛ amɛklala atadei* lɛ,Kɛ amɛfaii lɛ, kɛ amɛhiɛhaa nii lɛ.
24 Nii ni ekpɔtɔ ni miije fu baaye balsam mu+ najiaŋ;Kpãa baaye bɛlti* najiaŋ;Yiteŋkpamɔ+ baaye yitsɔi ni afee lɛ fɛfɛo najiaŋ;Kpekpe+ baaye atade ni jara wa najiaŋ;Ni atswã baaye hefɛo najiaŋ.
25 Ohii lɛ baagboi yɛ klante naa,Ni ohii kãkãlɔi lɛ baagboi yɛ ta mli.+
26 Abaafó ni abaaye awerɛho yɛ Zion agbói lɛ amli,+Ni Zion baata shi yɛ shikpɔŋ ni etsɔ amaŋfɔ lɛ nɔ.”+
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Ni ji, mɔ ni kɛ majik hewalɛ tsuɔ nii kɛnáa mɛi anɔ hewalɛ.
^ Loo “mɛi ni bɛ tɛ̃ɛ.”
^ Loo “Mitsɔŋ mɔ ni baatsa nyɛhela lɛ.”
^ Loo “amɛsusuma.”
^ Loo “Amɛbaaye amɛnifeemɔi lɛ ayibii lɛ.”
^ Loo “amɛsɛ̃i.”
^ Loo “amɛkuɛnii.”
^ Hebri sht. ŋm., “amɛsusuma shĩai.”
^ Loo “hewulamɔ ŋoŋoi.”
^ Loo “kɛ amɛklala piotoi.”
^ Loo “hɛfiinɔ.”
